محمد عبد الماجد

المريخ شائل تسجيلاته (بدائل)


[CENTER][B][SIZE=5] المريخ شائل تسجيلاته (بدائل) [/SIZE][/B][/CENTER] [SIZE=5]

< المتابع لتسجيلات المريخ في هذه المرة ..سوف يلاحظ ان اي لاعب رصده المريخ وقصد التعاقد معه ..فشل في قيده واتجه الي (بديل) له...(سوف نفصل ذلك بالورقة والقلم). < اصبروا لينا انتوا ما تضيقوا. < الموضوع دا ..ما بنقولوا نحن (الهلالاب)..المريخاب ذاتهم عارفين الحكاية دي ..وبتكلموا عنو لمن يكونوا براهم. < المغصة كاتلاهم. < خلونا نقول اولا ان تسجيلات المريخ هذا العام ..خالية من اي (نجم). < او بالاصح ما في لاعب سجله المريخ هذا العام واحدث (ضجة اعلامية) ...وعملوا ليه مؤتمرات وجوطة واصبح حديث الصحافة والشارع السوداني. < اديكم دليل ..في لاعب سجله المريخ هذا العام ..مزمل ابوالقاسم وضع صورتو في عموده. < ناس (مالك) ديل رائحين فيها ساكت ...زول شغال بيهم مافي. < لعلكم تتفقون معي في الضجة التى احدثها انتقال وارغو الي المريخ ..وكذلك تسجيل عصام الحضري في المريخ. < ديل عملوا ليهم عشرة مؤتمرات صحفية ..لمن نحن افتكرناهم (حركة مسلحة) بتفاوض في الحكومة. < وقبل اولئك كان علي النونو وكان عبدالكريم النفطي ..ثم جاء اخيرا قائد الهلال السابق هيثم مصطفى في التسجيلات الماضية ..وكان اثر (الضجة) واضح في الطرقات. < هذه المرة تسجيلات المريخ خالية من (الضجة)..ربما يكون هذا عامل من عوامل نجاحها لا ادري ...لكن في كل الاحوال فانها جاءت هادية ولم تخالف التوقعات ، وجاءت دون الاحلام. < يا ربي عشان جمال الوالي ...قاعد في الامارات ..وعبدالصمد هنا شغال التسجيلات بـ (الشيكات). < زي تسجيلات ابوجريشة زمان بـ (الاتوسات). < قالوا ليك جمال الوالي لمن يقفل تلفونو ..مجلس المريخ هنا في الخرطوم رأسو بضرب. < ما يعرفوا (يتصرفوا) كيف؟. < بتموا حوافز التسجيلات (طوب احمر). < اذكركم اني قلت ربما يكون هذا (الهدوء) الخالي من الضجة في تسجيلات المريخ من عوامل نجاحها ..وان كنت ارى ان المريخ يبحث فقط في تسجيلاته عن (الضجة) دون التقيد بالاثر الفني والمردود الذي يمكن ان يكون من اللاعب المسجل. < هم يقصدون في الاصل هذه الضجة ...من بعد اللاعب واثره في ستين...ينجح او لا ينجح ما مهم عندهم. < لذلك نقول ان تسجيلات المريخ هذا العام فقدت اهم مقوماتها وجاءت باردة مثل (البيض المسلوق) الذي يكون من غير طعم. < ما في اي (مفاجأة)..وتسجيلات المريخ كلها كانت (محلية) حتى المحترفين جابوهم من شندي وشارع العرضة. < يعني المريخاب السنة دي حق التذاكر ما عندهم ..عشان كدا ركبوا التحدي وجابوا باسيرو ومالك. < مالك وباسيرو ديل من الليلة اسمهم تسجيلات (موقف شندي). < من موقف شندي لكشوفات المريخ. < وعشان يطعموا الحكاية ...قاموا جابوا (تراوري) الذي صرف الهلال النظر عنه. < يمكن المحترف الوحيد الذي جاء بمطار الخرطوم هو المحترف الاثيوبي الذي وصفته صحافة المريخ بـ (المعجزة). < معجزة في شنو؟. < والله معجزتكم دا ..إلا يكون معجزة في (الشعر)...او معجزة في (الرسم). < معجزة في الكورة دي ..ما شفناه ليه. < ما تغشوا الناس ساكت ...وتتموا تسجيلاتكم (كلام جرايد). < نخش على (الملاحق). < قلت ليكم (يعيدوا ليكم الكلام مية مرة)...قلت ليكم تسجيلات المريخ السنة دي زي (امتحانات البدائل). < اي لاعب رصده المريخ ...قام سجل واحد غيرو. < يعني سجل بديله. < موش في مثل بقول ليك عينك في الفيل ..وتطعن في ضلو..أها ناس المريخ ديل خلوا الفيل وسجلوا (الضل). < وقعوا لي (الضللة) ساكت. < تسجيلاتهم دي ما فيها (فيل)...الرخصة كاتلاها. < عشان اثبت ليكم الكلام دا ...المريخ السنة دي اتجه نحو اللاعب مطلق السراح ...وبحثوا عن الانتقال الحر لاللاعب. < حتى اللاعب الاثيوبي قالوا ليه خلّص نفسك براك من الاتحاد الليبي وتعال بنسجلك. < وهذا شيء يؤكد (الفلسة). < فلستكم ظاهرة في تسجيلاتكم. < اما حكاية (البدائل) دي ..فهذا هو اثباتها. < نمشي معاكم خطوة ..خطوة ..تطيروا في عيونكم زي الدولاب الضلفو فاتحة. < اول الدولاب الضلفو فاتحة ..بطيّر عيونه. < المريخ في جانب المحترفين قصد اولا المحترف الاثيوبي اوكيري ..وقالوا لينا (كروجر اوصى بتسجيل اوكيري) ..وزحمونا بالكلام دا في الجرايد. < كل سطر والتاني يقولوا ليك كروجر اوصى بتسجيل (اوكيري). < عارفين اوكيري سجلوا بدلوا منو؟. < سجلوا بدلوا الاثيوبي . < اها يا جماعة ..خلوني انا ..هسع في علاقة بين اوكيري و . < لجنة تسجيلات المريخ دا لم تنفذ في توصية كروجر إلا (جنسية اللاعب). لأن اثيوبي الجنسية متل اوكيري. < كدا يا جماعة ...اظننا اتفقنا على البديل الاول. < نخش على البديل الثاني. < المريخاب ديل موش من اول يوم في التسجيلات قالوا المريخ عاوز عبدالرحمن الدعيع. < الكلام دا ثبتوه في كل الصحف..الرياضية والسياسية ..واي زول في البلد اقتنع بالكلام دا. < المريخ ذهب في هذا الامر ابعد من ذلك ..وقالوا ان موضوع الدعيع خلاص انتهى وذلك بعد ان وقع المريخ (اقرارا) مع عبدالرحمن الدعيع. < الشيء العاوز اعرفو ...(الاقرار) دا كان فيه بند ان يعيد الدعيع قيده في اهلي شندي. < نحن اول يوم ..قلنا خلاص ..موضوع الدعيع دا انتهى ...واللاعب سوف يوقع رسميا في المريخ. < اتاريه (الاقرار) طلع زي (البصمة). < الدعيع رجع من كينيا بي اقرارو ووقع في الاهلي شندي. < دا شنو البحصل دا؟. < اليوم التاني صحف المريخ قالت ليك المريخ يصرف نظر عن عبدالرحمن الدعيع. < الزول ساكونا جوة وبرة البلد ...ووقعوا معه (اقرار) ودفعوا فيه اكثر من مليار ونصف المليار ..وبعد ما اتسجل في الاهلي شندي قالوا ليك المريخ صرف نظر. < اها تتخيلوا (بديل) المريخ هنا طلع منو؟. < طلع ايهاب زغبير. < دا يبقى شنو؟. < دا يبقى البديل التاني...علما ان الدعيع ذاتو كان بديل لي عصام الحضري. < عليه فان ايهاب زغبير يبقى بديل البديل. < بعدين تعال هنا يا ايهاب زغبير ..انت جيت توقع في كشوفات المريخ كلاعب معار بالزي البلدي ليه؟. < انا افتكرت الموضوع في الاول فيه (ضبيحة). < دا شغل (عقد زواج)...ما (عقد اعارة). < نخش على البديل الثالث. < مزمل ابوالقاسم قال في قناة الشروق ان مدرب المريخ كروجر اوصى بتسجيل (مدثر كاريكا) في المريخ. < خلاص يا كروجر ..لا بالله ...انت قايل كاريكا دا بلعب في (رديف المريخ) عشان توصي بي تسجيله. < الغريبة مزمل ابوالقاسم كان فرحان بالتوصية دي ..فاكر التوصية (نصف الاجابة)..زي فهم السؤال. < بعدين انتوا كروجر دا ..ياتو توصية نفذتوها ليه ..عشان تنفذوا ليه توصية تسجيل كاريكا. < كاريكا دا (طحنية) في دكان ابوكم. < المهم كروجر (المسكين) اوصى بتسجيل (كاريكا)..قاموا سجلوا ليه (تراوري). < كدا دا يبقى البديل الكم؟. < دا البديل الثالث ..يا جماعة انتوا ما في مادة نجحتوا فيها ..تسجيلاتكم كلها شائلنها (بدائل). < ندخل على البديل الرابع ..ودا بديل تحصلنا عليه الان على التو ..(قبل قفلة السيستم). < المريخاب ديل يا جماعة ..موش قالوا عاوزين يسجلوا هداف الدوري الممتاز (مشترك) محمد كوكو مهاجم الاهلي عطبرة. < ورتب المريخ امورهم على هذا النحو ..والدنيا كلها عرفت ان المريخ سوف يسجل محمد كوكو. < دخلوا ليك كوكو غرفة تسجيلات المريخ ..وقالوا دا احسن مهاجم. < قام حسن عبدالسلام قال ليهم السما قريب. < حسن عبدالسلام قال ليهم (مفضل) دا ليه مشى الموردة ؟....الموردة بتلعب في الكونفدرالية. < الموردة بتلعب (تمهيدي). < تعيّروا مفضل للموردة البتلعب في الدرجة الاولى ...وعاوزين محمد كوكو من الاهلي البيلعب في الكونفدرالية. < حسن عبدالسلام اعتبر الموضوع دا فيه (حقارة). < المريخاب جروا على (البديل). < متعودة دائما. < تتخيلوا البديل منو؟. < البديل محمد عبدالمنعم عنكبة. < عنكبة دا منو؟. < عنكبة البيلعب في الخرطوم الوطني. < هي الخرطوم الوطني فيها (عنكبة)...اول مرة اسمع بالمعلومة دي. < اخر التسجيلات ..ومع قفلة السيستم ..دائما بتجيب ليها (عنكبات) البشكل دا. < دا تسجيل (غاظة) ساكت. < الظاهر موضوع صلاح الجزولي دا ..(عنكب) مع المريخ ..قاموا اتحركوا في اخر الساعات وسجلوا (عنكبة). < اسمع عنكبة دا بيلعب شنو؟. < لا اقول ليك طرف شمال ..لا اقول ليك وسط مدافع. < اتذكرت بلعب (مهاجم). < مهاجم (بديل). < اها الجماعة ديل تسجيلاتهم دي عليكم الله ما مفروض يعملوا ليها (اعادة). < غايتو وقت جمال الوالي يكون مسافر ..البجيب ليكم (كهربة) ما تلقوه. < سفر جمال الوالي ظهر في تسجيلاتكم. < جمال الوالي سافر الامارات سجلتوا (عنكبة)...لو سافر استراليا تعمل شنو؟. < ديل كوكو قلبهم يحصلوا على مخالصته من الاهلي عطبرة. < كل القدرو عليه في (الدعيع) جابوا ليك منو (اقرار). < اها ان شاءالله (الاقرار) يلعب ليكم. < ملحوظة : تسجيلاتكم دي يا ناس المريخ اخير منها (البطيخ). هوامش < طبعا (البطيخ) ما عندو اي علاقة بالموضوع دا. < بعد مفاوضات طويلة ...استطاع مجلس ادارة نادي الهلال الفوز بالمهاجم الخطير صلاح الجزولي. < صلاح الجزولي هو نجم التسجيلات الاول. < واظن ان تميز صلاح الجزولي ناتج من انه يسجل الاهداف بطريقة مختلفة..وان اسلوبه لا يشبه اسلوب المهاجمين ..وهذا تفرد يحفظ له. < صلاح الجزولي بسجل على الطائر ومن اي حتة ..وبالشمال وباليمين. < وعن شمالو وعن يمينو. < اعتقد ان الهلال اضاف الي كشفه لاعب مختلف. < مع هذه المهارات والتفرد يتميز صلاح الجزولي بالقوة ...والنكهة الخاصة في التعبير عن الهدف بعد تسجيله. < تحية لمجلس الهلال اذا انجز هذا الملف بحكنة ..وذكاء وقدرة كبيرة. < ناس المريخ طبعا الموضوع ما وقع ليهم ...قاموا جابوا (عنكبة). < الغريب ان المريخ شطب محمد موسى اللاعب الذي اشاد به كروجر وكان السبب الاول والرئيس في فوز المريخ بالممتاز. < اها يا محمد موسى اتعاملوا معاك زي العجب. < شطبوك في اخر ساعة. < المريخ لم يقصد من تسجيل عنكبة إلا افشال وابطال تسجيل صلاح الجزولي في الهلال. < المريخ اراد ان يجعل الخرطوم الوطني تتراجع من قرار اطلاق سراح الجزولي للهلال ..بعد ان قاموا باغراء الخرطوم الوطني لاطلاق سراح عنكبة للمريخ. < العملية كلها مقصود بها ان تتراجع الخرطوم الوطني من اتفاقها مع الهلال...لأن الخرطوم لا يقعل ان يطلق سراح مهاجمين في اخر ساعة من التسجيلات للقمة. < لولا موقف اللاعب صلاح الجزولي ...لنجحت خطة المريخ. < خطة المريخ دفع ثمنها محمد موسي. < جميل من مجلس الهلال اعارة مروان للخرطوم حتى يقوى عوده ..ويعود الي الهلال مكتمل النواحي. < الحمدلله انهم لم يشطبوا الموهوب مروان الحرية. < تسيجلات مريخ الفاشر افضل من تسجيلات المريخ العاصمي. < مفروض جماهير المريخ تتحول لتشجيع مريخ الفاشر. < مريخ الفاشر بيلعب فيه فيصل العجب (الاصل) ومريخ ام درمان بيلعب فيه رمضان عجب. < الفرق واضح. < بعد كدا ..نقعد ونصقر وننتظر المدير الفني الجديد. < نجاح مجلس الهلال في التسجيلات تجاوز الـ 100 %. < باقى المدير الفني. < مدير فني كبير ...زايد معسكر اعدادي جيد ...(ريال مدريد) ما يقيف قدامكم يا ناس الهلال. < ..... عاجل : السيستم قفل. [/SIZE] وإن طال السفر - محمد عبد الماجد صحيفة قوون



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *