مفردات سادت وأخرى بادت

دايما الناس تخترع كلمات جديدة.. في زمان بعينه ومكان بعينه.. بعض المفردات كانت سائدة في فترة معينة مرتبطة بوضعية اقتصادية سياسية اجتماعية محددة.. مثلا يقولوا ليكي زول ما عندو ولا (مليم).. كانت المليم أصغر فئة في القروش.. لكن كان عندها قيمة صغيرة جدا.. يعني ممكن تجيب علبة كبريت.. أنا غايتو لحقت زمن المليم ما منو أي فايدة لكن كان مكتوب في القروش.. لحفظ ماء وجهه.. ولحدي الآن بستعمل كلمة مليم للتعبير عن الفلس.. يعني بالواضح كدي أنا زول مفلس من زمن المليم لي حسي.. بالرغم من إنو حياتي شهدت بعض الانفراجات الاقتصادية في أوقات متفاوتة.. ولكن دائما الغلبة للفلس.. برضو من المفردات التي بادت مفردة (كيشة).. وكيشة باللغة الحديثة زول داقس.. أو زول ماسورة.. فلان في الكورة كيشة ساكت.. يعني ماسورة ساكت.. وفي البيلي برضو كيشة.. وفي الكشتينة.. وكيشة الكوشتينة لا يجد من يكون له زميلا.. والكيشة في الدافوري يعزلوهو آخر زول وتلقى الفريق البيقع ليهو الكيشة ينقنقوا.. وأيضا لقد شغلت منصب كيشة في الدافوري لفترة ثم طورت ملكاتي ومقدراتي وتركت المنصب لغيري.. أما مفردة فردة والتي جاءت إلينا من الدبايب.. فلم تكن موجودة وكانت تستعمل في أشياء محددة فردة نعال.. فردة لستك.. ولو كوركت لي زول وقلت ليهو يا فردة أكيد ح تحصل مشكلة.. أما كلمة ساندوتش برضو جديدة نوعا ما.. حيث كانت تستعمل كلمة حشوة.. يعني تجي لبتاع الطعمية وتقول ليهو أديني رغيفة واحشيها لي طعمية بقرشين.. بالرغم من إنو كان عيب الزول يشيل ليهو رغيفة ويقعد ياكل براهو وفي السهلة كمان؟.. كانت مسموحة للأطفال بس! إلى أن يبلغوا الحلم.. وأي زول كبير يشوفوهو بياكل في سندوتش الله قال بي قولو.. فطالما ما دا هو المفهوم مافي داعي لاستعمال كلمة ساندوتش من أساسو.. وأيضا بدأت تختفي كلمة شفت.. إلا شذرات هنا وهناك.. وحلت محلها كلمة تفتيحة.. وأعتقد أن الشفت كلمة أوسع وأشمل.. وهو الزول المفتح الصعلوك الصايع والما هميهو حاجة وغالبا ما يعتمد على عضلاتو في حل إشكالاتو ومشاكلو.. فيتشفتن حيثما شاء.. أما تفتيحة فأقرب إليها كلمة فهلوي.. منها إلى الشفت.. حيث إن التفتيحة يعتمد على عقله أكثر من جسمه.. ودائما ما يوجه ذكاءه لخدمة ذاته فقط.. أما كلمة اتلحس.. فهي أيضا جديدة وتجمع مجموعة تعابير في مفردة واحدة.. اتلحس بمعنى وقع في مشكلة بعد أن دقس.. دقسة السواد والرماد.. اتلحس بمعنى مات.. وكانت تستعمل كلمة ودع أو اتوكل.. أو سافر.. عندما سأل أحد الدبايب زميلا له ما هي العلاقة بين العسل والزول البيقع من عمارة عشرة طوابق؟.. فأجابه الدبيب الآخر بأنو الاتنين بتلحسو!!!!