قعر السنة دي.. وراس السنة الجديدة
بينما أنا أتشعلق في قعر السنة دي.. وأشابي داير أنط في عربيات قطر رأس السنة الجديدة.. قعدت مع نفسي وراجعت انجازاتي في السنة الفاتت وعملت كشف حساب لقيت اني:- ما جاتني مرارايا علا مرة واحدة فقط.. وهذا إن دل على شي إنما يدل على أن مستوى الرعاية الصحية على المستوى الشخصي لحضرتنا كان ممتاز.. مقارنة بالسنه القبالها.. كما وإن وجدت أن البعوضة قرصتني حداشر مرة.. واعتمدت على عدد الحبات البتقوم في الجسم بعد القرصة في حساب عدد القرصات.. كما وأنه جاتني نزلة تلاتة مرات.. وما زالت عندي واحدة مستمرة لي حسي وما عارف حسي أحسبها مع ياتو سنة؟.. لكن ممكن أقول جاتني نص نزلة في السنة الفاتت ونص في السنة الجديدة وكلو عشان أكون دقيق في حسابي وما يجيني بتاع ضرائب ويغالطني!!! مشيت المقابر ودفنت ناس تلاتة مرات وقد كان في السنة الفاتت مرة واحدة بس.. كما وانني شلت الفاتحة تلاتة واربعين مرة.. بزيادة تلاتة وعشرين فاتحة عن السنة القبالها.. والتي كنت عشرين فاتحة بس.. زدت جرعة حبوب الدغت اللاتي.. من خمسة مليغرام إلى عشرة مليغرام.. وهذا ليس معناهو أن الدغت العندي غتيت وراسو قوي.. ولكنني ارجح ان الحبوب كعبات ومافيهن فايدة ومغشوشات.. بنتي الصغيرة قالت لي “أبوي أديني قروش” متين تلاتة واربعين مرة.. وهو رقم شوية جدا مقارنة بحق السنة الفاتت والكان يفوق الألف ونيف مرة.. ربما لأن البنية كبرت وبقت في مستوى المسعولية.. أو تكون قنعّت من خيرن في.. وانا ارحج الفرضية الاخيرة.. كما وانني خلال العام المنصرم لم اسمع ولا مرة واحدة غنية المشكلة لفرفور.. لا في تلفزيون ولا في رادي ولا من شافع ساكت يغني فيها ولا من مطربين الحلاّل ولا في وسيلة مواصلات.. مما جعلني استبشر خيرا بان المشكلة اتحلت.. و.. هَم ونزل من ضهر البلد المليانة مشاكل دي.. وما ناقصة! وربنا يكفيها شر المشاكل!.. .. وأسأل المولى عزّ وجل أن لا تقوم مشكلة تاني لا لي الحلنقى ولا لفرفور.. وربنا يهدئ النفوس.. ومما اثار قلقي وشيلني هم برضو على الهم العلي.. إني ما سمعت غنية ندى القلعة “السمحة أم ولدي” ولا مرة واحدة.. والهم مصدرو اني خايف يكون الزول دا غيّر رايو في أم ولدو وطلقها.. وأي زول عندو خبر غير دا عليكم الله يتصل على في جريدة اليوم التالي.. ويطمني! ربنا يطمنكم دنيا وآخرة!!!
عام سعيد.. وعمر مديد.. وصحة حديد
الباب البجيب الريح- صحيفة اليوم التالي[/SIZE][/JUSTIFY]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
[SIZE=4]بارك الله فيك ياعادل ذكرتنا نعمل جرد السنة .
كتبت أكثر من ألف تعليق في النيلين ….ويمكن فرد واحد في موقع آخر لأني مابريدهم وللاضطرار فقط .
ولذلك كافأتني الإدارة مشكورة وشعبطت لي تعليقن من تعاليقي والقراء علقوا على تعليقي مشكورين ما طولوا ألسنتهم علي زي ما أنا بطول لساني ..
وده المخوفني ذااااتو من اتشعبط فوق في المنصات وأصبح هدفا لكل قارئ وأُضرب بالصرمة القديمة والبيض والطماطم….أخير لي مدرجات الجمهور دي .
كتبت قصيدتين واحدة بالفصحى وأخرى بالعامية وكم بويتات كده ولم ارتقِ بعد لمرحلة الغربلة والنشر
سافرت السودان مرة واحدة …وكنت أحرص على ركوب المواصلات العامة حتى أرى المواطن من قرب والحياة على حقيقتها وأختزن كل ذلك …وحد ماالأهل يصروا أركب لي شيتن اتحكر فيها كان عربية البيت أو أمجاد براي برفض ما بحب الوحدة …وأقعد أتفرج على البلد والناس وشكلة الكماسرة مع الركاب وبس …الباقي بجردوا براااي .[/SIZE]