[JUSTIFY]
إنهم يسرقوننا حاجة كولِن كولِن
نحن ناس داقسين للطيش.. يسرقونا وما جايبين خبر.. الغريبة يسرقو منِّنا الحاجة ويجبوها لينا مغلَّفة في لون تاني، ويبيعوها لينا.. ونحن نتجارى عليها ونشتري.. كأننا أول مرة نشوفا.. حسِّي يجيني واحد يقول لي يا زول مسروق منك شنو؟ والسرقك منو؟.. أنا أيَّها السادة مسروقة مني حاجة كولِن كولِن.. غُنية ماركة مسجلة لينا نحنا السودانين “حاجة كولِن كولِن.. الله يخلي وليدي.. ما شا الله ما شا الله”.. مع جرَّة كلمة الله.. دي غُنية حقتنا ومافي زول يجي يغالطنا فيها.. سمع أضاني سرقها مننا فنان مصري اسمو حكيم.. الفنان القاعد يغني غنية “السلام عليكم”.. غنية كلها السلام عليكم.. السلام عليكم وبي سببها قالو بقى مليونير.. وغِنا لي جنا الجنا.. المحيرني إنو أنا بقول السلام عليكم في اليوم يمكن خمسين مرة.. وما لقيت التكتح.. قريشاتو مبروكات عليهو وما حاسدو فيهن.. عِلا سرقتو لي حاجة كولِن كولِن مزعلاني شديد.. وداير لي واحد أخو بنات يشمِّر ويتحزّم ويتلزّم ويمشي يجيبها لينا منو.. سكتنا على سرقة الموية.. وسرقة الواطا.. كمان جاتنا سرقة غُنانا القاعدين نغيهو نفرِّق بو ونفرِّج بو همومنا؟ وبعدين حكيم دا ظاااتو زمااااااان لما الجزائر غلبت مصر في استاد المريخ ما قال نحن ناس كرور وما بنعرف حاجة ومتخلفين.. حسِّي مالو سارق مننا حبوبتنا حاجة كولِن كولِن؟.. أنا ما بعرفو عِلا لكن داير حبوبتنا.. قبَّال كدي سرقو مننا غنية “كدا كدا يا التريلة سايقها قوندراني”.. قلنا مافي عوجة اليشيلوها أصلو نحن ما عندنا ليها اسبيرات.. بالرغم من انو كدا يكون عندنا عندهم وسيلتين نقل “التريلا.. و.. مجروس”.. عِلا والله الحاجة كولن كولن ما بنفرِّط فيها.. لكن ان الفنان حكيم مغرود فيها ومصروم عليها.. وقاعد ياكل منها عيش.. ما عندنا مانع.. علا يدفع لنا حق الواطا.. يمشي يقابل الملحق الثقافي السوداني في مصر ويقول ليهو “أنا مغرووووود في حبوبتكم حاجة كولن كولن.. وداير أغنيها” يعملو عقد ايجار واااااضح ويحفظ لكل حقوقه.. انو يأجرها مننا لمدة كم سنة قصاد مبلغ معين.. زي ما بسو الشعراء والملحنين عندنا هنا للفنانيين.. بالإضافة إلى انو حاجة كولن كولن.. لو شكت أو مرضت أو جاتها أي عوجة يكون مسعول منها.. ويعرض عليهو السيد الملحق منيو أغاني كتيرة.. . وهو يختار ونأجرها ليهو.. مثلا غنية زي ” دخلوها وصقيرا حام”.. . تنفع مع حكيم.. “دخلوها وصئيرا حام”.. أو غنية “سريع الكف للصقع” “سريع الكف للسائيع” الصقع بالمصري ح تعذبو عذاب.. أو غنية الكنداكة.. ويركز على مقطع “أبوي وينو الايدو عطاية” عشان ينزل من المسرح ويحوم فوق الجمهور ويلم بيها النقطة.. ولاجل المقطع بتاع الشحدة دا…. الغنية دي ما نديها ليهو رخيصة الباب البجيب الريح: صحيفة اليوم التالي
[/JUSTIFY]
وأزيدك في السرقة أغنية الليل الهادي لشرحبيل
سرق كلماتها محمد فؤاد ولما شرحبيل رفع قضية خسرها ….إلا شرحبيل غلطان ماشي رافع القضية في مصر !! يعني منتظر المصريين يطلعوا ولدهم حرامي ؟!
وسرقت أصالة كلمات قصيدة لأميرة الشعر العربي وفارسة عكاظ بنيتنا الموهوبة الله يحفظها روضة الحاج …إلا أصالة اعترفت وتم تسوية الموضوع
أها ياها دي الحالة مالنا وشعرنا وغنانا سااايبة للكلب وماشي الدرب
وفالحين في قولة البرشنا بالموية نرشه بالدم ….دم بتاع مين ياأخوي!