د/ عادل الصادق المكي

قصة غرام بالريد بدت.. وبالمعجون انتهت


[JUSTIFY]
قصة غرام بالريد بدت.. وبالمعجون انتهت

في موقع التواصل الاجتماعي على الانترنت “تويتر”.. تشارط أصدقاء أحد السعودين معه على الزواج.. مرة تانية يعني يعرس فوق مرتو.. وأوعدوهو بتلاتين ألف ريال مساعدة “ستين مليون جنية”.. مرتو قرت النضم دا.. حضرت ليهو مبلغ تسعين ألف ريال تلاتة اضعاف ما قدمه الأصدقاء.. وكتبت ليهو رسالة “أحبك.. أريدك لي وحدي”.. صاحبنا خلى العرس وقبض التسعين الف.. عداهن مشى ليها تاني وقال ليها”ما تصلحيهن شوية.. خليهن مئة” وقد كان.. لكن الزول دا تلقاهو يقول”طاقة ليلة القدر وإتفتحت لي”.. وبقى ليهو مصدر ابتزاز.. كل ما يحتاج لي شي.. يدخل النت ويكتب في (تويتر) ويلمّح انو داير يعرس تاني.. والمرا تخاف وترشيهو بالآلاف الريالات.. غايتو مرا بقت ليهو وسيلة إنتاج.. ودي طريقة جديدة في كيف تزيد دخلك عن طريق النت.. من ناحية أخرى من الكويت.. مرا طلبت الطلاق من راجلها وقالت في تبريرها “انو زول ما بيعرف ياكل.. اللكل دا ما بيعرف ليهو.. قاعد يعمّط الرغيف في الحمص.. وأنا قلت ليهو كم مرة ياكل بالشوكة.. وطريقة اكلو دي ييييييييييع قاعدة تقرفني”.. انتي شفتي اكل يا بت الناس؟.. الله لاوراكي اكلنا للقراصة بالتقلية.. اللقمة تقوم من الصحن.. فيها مئة سي سي ملاح، تصل الخشم خمسة وعشرين سي سي.. الخمسة وسبعين ديل يروحن جبايات و ضريبة طريق من القدح للخشم.. والعجن والخفج بالاصابعين الخمسة لليد اليمين وممكن نستعين باصبعين من اليد الشمال عند اللزوم.. اما اللحم اجعص عضم ونفسو عاجباهو ما ياخد معانا خمسة ثواني تشوفيهو كركرب اتجدع في الصينية وعدمان اسم اللحيمة.. وان دايرة تشوفي بعيونك البي يبقى علي العضام تعالي واخطفي كراعك لي عند سوق قندهار محل بيع الشية.. أها والنحدسك لي حسي قاعدين ناكل الزيتون زيو وزي النبق واحد.. نمسك الزيتوناية.. ونكردها وجبغ نمرقها من الخشم في بطن الليد وفننننننن نجدعها في خشم الباب.. وهكذا الي ان نقضي عليه.. عباس ود الحسين .. سافر برا.. في مطعم فخم .. قعدي يتفلهم وياكل الزيتون بالشوكة.. يالله ويا امين بعد نص ساعة قبض ليهو زيتوناية واحدة بعد مساككة وملاوة شديدة.. كل ما يعصر زيتوناية تنط في الزول القدامو وتضربو في نخرتو.. في النهاية قعد يتعضّر للزول الفلعو بالزيتون دا” يا اخي زيتون الزمن دا.. جنو نطيط”! وأيضا من الكويت.. غايتو الكويتيات الله يهديهن.. زوجة طلبت الطلاق من راجلا قالت “السبب انو الراجل المتخلف دا، قاعد يعصر صباع المعجون من فوق.. وانا كلمتو كم مرة يعصرو من تحت.. وما داير بيسمع نضمي” يقول لها احد الاجاويد من السودان” الله لا وراكي البي يبقى علي صباع المعجون عندنا.. يتعصر من كل الجوانب.. ولما يكمل يتعضى بالسنون.. وبعد تب يقضى يتمصمص بالموية.. والواحد يغمض عين ويفتح عين ويقابل بيهو الضو يشوفو فيهو باقي واللاّ لا؟”..

الباب البجيب الريح : صحيفة اليوم التالي [/JUSTIFY]


تعليق واحد

  1. [SIZE=4]والله يا ود الصادق ولا كان في داعي تشيل حال الكويتية …..فييييي سودانا ده البت أبت الولد قالت عشان قاعد يشرب الشاي ” جب جب جب ” طبعا اللغة المكتوبة ما حتجيب الصوت تماما !
    واحدة أبته عشان بيطمس البسكويت في الشاي ! شفت جنس الفلهمة دي ؟
    وهو شن حلاة البسكويت بدون طميس ! والعجب لما تكمده كووولو في الكباية وتجيب معلقتك ! والعجب لو خبيز وماهو بسكويت دكان ![/SIZE]