انتوا (بايرن ميونخ) دا ولد حلتكم
< زمان عندنا زول في الحلة ، اسمو (احمد) كان براهو هو الفاهم والمتعلم في الحلة...التعليم زمان ما كان كتير.
< سنة كاملة يمكن ما تلاقي ليك زول متخرج من الجامعة.
< الدكتور كان لمن يكتب ليك (روشتة) تفتش البلد كلها ما تلقى ليك زول يقرأها ليك.
< زمان وقت يقولوا ليك الزول دا بقرأ في الجامعة ...تعاين ليه زي كأنك بتعاين في (امير) من امراء الدولة العباسية.
< حاجة ما تخلص.
< تشبع خلعة.
< ترجف من احترامك وتقديرك ليه.
< احمد دا كان هو الوحيد في الحلة المتطلع ...والعندو رأي في اي حاجة ..والبفهم في السياسة والثقافة والبناقش في كل الاشياء.
< أحمد دا.
< هو براهو البقرأ جرايد.
< انتوا قايلين الجرايد زمان (طلقيبة) زي هسع ...زمان زول ما مثقف وما فاهم ما بشيل ليه جريدة.
< الحاجات دي كان ما فيها مجاملة.
< هسع الجرايد الشغل والكتابة فيها اسهل من قرايتها زمان.
< اغشكم يعني.
< أحمد دا.
< هو براهو الكان عندو نظارة قراية.
< والنظارة زمان ما كانت حاجة ساهلة.
< هسع نظارة القراية ..بلبسها البقرأ والما بقرأ.
< الحكاية هملت.
< أحمد دا كان مثقف ثقافة شديدة..لمن يكلمك عن (وليام شكسبير) تحلف تقول قرأ معاه في فصل واحد.
< عارف عنو اي حاجة.
< اصلو ما بديك احساس غير دا.
< أحمد برضو من ثقافتو العالية كان براهو البتابع نشرة الاخبار.
< زمان وقت كانت نشرة الاخبار نشرة بحق وحقيقة ..كان (النشرة) ما بحضرها اي زول.
< ما في كلام زي البحصل هسع دي.
< النشرة كمان لعب ...(للكبار فقط).
< وفي الكبار ما بحضرها إلّا المثقفين.
< حتى ان (الشافع) وقت يكون قاعد في التلفزيون وقام ميعاد النشرة جاء ..ابوه بقوّمو من التلفزيون وبقول ليه : (امشي قول لي امك اعملي الشاي).
< البقعدك في النشرة انت كمان شنو؟.
< ايام ناس أحمد سليمان ضو البيت ..والفاتح الصباغ ..وعمر الجزولي ومحمد الطاهر ومحمد الفاتح السموأل وعبدالرحمن فؤاد.
< نشرة ..نشرة.
< والله النشرة لو ما شبعان ما بتقدر تحضرها.
< تشقك عديل كدا.
< نشرة الاخبار دي زمان من صعوبيتها كانت وقت تجي ..في ناس ما بفهموا فيها إلاّ نشرة الوفيات.
< هسع النشرة من شريط الكاسيت الشغال في كشك ليمون ما بتفرزها.
< زولنا المثقف الاستاذ الكبير أحمد ..كان وقت تلاقي وتقول ليه يا أحمد بدون ما تقول ليه يا (استاذ) ..بقوم يزعل ويغضب ، وما برضى ..ويقول ليك (احمد) دأ قرأ معاك في مدرسة واحدة.
< أحمد دا ود حلتك.
< أحمد دا كان بلعب معاكم (دافوري).
< احمد دا بمشي يجيب معاك الفول.
< بباريك للطابونة.
< اصلو البلد دي ما فيها احترام ..ما فيها تقدير.
< عشان كدا نحن أحمد دا ما كنا بنقول ليه أحمد حاف كدا ..كنا دائما بنقول ليه يا استاذ.
< يا استاذ يا كبير.
< ومرات وقت مزاجنا كمان يكون رايق ..بنقول ليه يا (دكتور) ..ساكت كدا وبدون مناسبة.
< كان وقت نقول ليه يا (دكتور) ينبسط في الدنيا دي جنس انبساطة...يحلف على الواحد يشرب حاجة باردة.
< الحاجة الباردة زمان برضو كان عندها قيمة ...وطعم مختلف ..ما زي هسع.
< الحاجة الباردة كانت (ساقطة)..تشربها بالخشم وتطلع بالنخرة ..طوالي اول بي اول.
< حاجات كتيرة اتغيرت ..واتبدلت.
< أحمد دا ذكرني ليكم هسع بي ناس المريخ.
< شايف الجماعة ديل رافعين الكلفة خالص مع (بارين ميونخ).
< بارين ميونخ دا تقول قرأ معاهم في مدرسة واحدة.
< تقول ولد حلتهم.
< البسمع في المريخ وبايرن ميونخ ..وبايرين ميونخ والمريخ تحلف تقول بايرن ميونخ دا بلعب معانا في الدوري الممتاز.
< كأنو من اندية ام درمان.
< او عطبرة او شندي.
< كأنو الاهلي عطبرة.
< ماخدين راحتكم على الاخر.
< يا جماعة انتوا ما في احترام.
< ما في تقدير.
< برضو الكبير ..كبير.
< بايرن ميونخ دا لو اتعاملتوا معاه بالسبهللية دي ...بطقكم (9).
< ونحن لو طقاكم (9) والله ما بنرحمكم.
< لا بنعرف ودية ..ولا بنعرف بلة جابر عندو شد عضلي.
< برضو مفروض تعطوا الفريق احترامه وتقديره ...الفريق هو الان بطل كأس العالم للاندية ...وهو افضل فريق في الوقت الحالي في الكورة الارضية.
< بايرن ميونخ لا سائل الايامات دي في برشلونة ..ولا سائل في الريال ..ولا سائل في يوناتيد.
< ما سائل في زول.
< تجوا انتوا بالسهولة دي ...وبي عدم الاحترام والتقدير هذا تتعاملوا معه.
< الموضوع دا عشان نكون واضحين اكبر من مقدرات عبدالصمد.
< واكبر كمان من مقدرات الفريق طارق الامين العام للمريخ.
< الموضوع كبير اوى.
< خلوا اللغة التى يتعامل بها اعلام المريخ ومجلسه مع الفريق الالماني.
< دي خلوها ..يمكن تكون مقبولة ...ولها مبرراتها.
< الما مقبول وغير منطقى هو ان مدرب المريخ (كروجر) سيد اللحم والرأس الي الان ما رجع.
< كروجر الذي سوف يواجه اهلو يوم 9 يناير ...الي الان ما رجع.
< مدرب الهلال والذي لم يتعاقد الهلال معه حتى الان نصرالدين النابي وصل الخرطوم.
< انت يا كروجر المقعدك في المانيا الي الان شنو؟.
< تعال شوف فريقك ..وجهّز تيمك.
< على الاقل خليك جاهز للتمهيدي ..(كمبالا سيتي) سوف يواجه المريخ في فبرائر القادم.
< يعني بعد شهر وشوية.
< وانتوا عاملها لينا كلها (بارين ميونخ).
< وبارين ميونخ لو استعدتوا ليه بصورة كويسة ما عندنا مشكلة.
< يا جماعة نحن عاوزننا نخاف علي المريخ اكتر منكم.
< كروجر في المانيا.
< ومحترفو المريخ اظن انه لم يصل منهم غير (غاندي).
< وغاندي ذاتو حايم بالركشة من الاستاد للمعسكر.
< اها يا جماعة زول حايم في البرد دا بي ركشة ..فيه (رقشة) لو قابل فريق بايرن ميونخ.
< يا جماعة الكلام البتعملوا فيه دا ما صاح.
< نحن جدول تسعة ..اخدناه في سنة تالتة ابتدائي...انتوا يا ناس المريخ عاوزين تأخدوا جدول تسعة بعد العمر دا في الدوحة.
< وقدام الناس كلها.
< الطريف في الامر ان وفد المريخ في الدوحة ذهب لمعاينة الاستاد والملعب الذي سوف تقوم عليه المباراة.
< عاينوا النجيلة ..وشافوا الشباكات بي عيونهم ...وبحثوا عن مدى جاهزية الملعب للمباراة.
< اها يا جماعة ناس يمشوا يشوفوا جاهزية الملعب ..وفريقهم ما جاهز.
< هو الفريق في عضمو ما جاهز.
< جاهزية النجيلة تعملوا بيها شنو؟.
< قول النجيلة ما جاهزة ..وقول الملعب فيه حفر وضريسة ...وحجارة.
< الحكاية دي بتضركم انتوا في شنو؟.
< الموضوع دا ممكن يتضرر منه بايرن ميونخ ..لكن انتوا بي اي حال من الاحوال وفي كل الظروف فان استاد السد لن يكون اسوأ من افضل استاد في افريقيا.
< في افريقيا وليس في السودان.
< تجوا انتوا بي عين قوية ..تمشوا عشان تفحصوا جاهزية الملعب.
< والله ضحكتونا.
< كروجر في المانيا ...الي الان قالوا ليك بضرب لي جمال الوالي بقول ليه حول لي رصيد.
< جمال الوالي بقول ليه كمان الرصيد الالماني دي ارسلو ليك كيف؟.
< المريخ فيه (7) اجانب ..وصل منهم اجنبي واحد حتى نهار امس.
< اجانب شنو؟.
< سعيد السعودي الي الان ما رجع.
< ووفد المريخ في الدوحة بوقع في العقود وبفحص في النجيلة.
< انتوا عندكم نجيلة مع الناس ..عشان تفحصوا نجيلة الغير.
< شن خبركم انتوا بالنجيلة.
< مفروض انتوا تتمنوا وتسألوا الله الملعب يكون غير جيد ..عشان بايرن ميونخ ما يقدر يلعب.
< انتوا متعودين على الملاعب الرديئة.
< الامر الاخر ان صحف المريخ يا دوب طلعت امس تتحدث عن توقيع وفد المريخ لعقد المباراة مع بايرن ميونخ.
< طيب انتوا براكم ما قلتوا الكلام دا حسمتوه قبل فترة.
< يا دوب العقود اتوقعت.
< علما ان كل الاندية في المنطقة بما في ذلك الاهلي المصري الذي عاد من بطولة كأس العالم للاندية قبل ايام اعتذر عن مواجهة بايرن ميونخ.
< وقد كان الاعتذار لعدم الجاهزية والاستعداد.
< فريق المريخ الذي اضاف الي كشوفاته في التسجيلات الاخيرة قرابة الـ (8) لاعبين..واعداد الفريق انطلق قبل (5) ايام ..وثلث لاعبي المريخ في الخارج ..مع ذلك عاوزين يواجهوا بايرن ميونخ.
< وبمشوا كمان يعاينوا (النجيلة).
< هي بقت على النجيلة يعني.
< كدا شوفوا سعيد السعودي دا ...لماذا لم يعد الي الان؟.
< ناس باسيرو ومالك ..اصلهم متعودين على التأخير.
< سعيد السعودي دا مالو؟.
< ملحوظة : جدول (9) الايامات دي شايفو حايم في المنطقة.
هوامش
< قناة الجزيرة بالشعار الجديد بقت زي الشاي بالبلح.
< انتوا دا شنو البعملوا فيه ناس الجزيرة ديل.
< معقولة نحن اليوم كلو نفتش في (الترددات).
< القناة تفتش ليها زي (الحمامة).
< الظاهر بعد ان اصبحت الجزيرة bein sport...الظاهر كدا الجماعة ديل عاوزين ليهم قروش تاني.
< طفشوا لينا قنوات كدا ..عشان ندفع تاني.
< الدوريات سخنت ..وكأس العالم قربت ..لازم ينظروا لينا.
< الدوري الانجليزي بي شعاركم الجديد بقى ما عندو اي طعم.
< قناة الجزيرة كانت متميزة بي شعارها.
< نتمنى من اللواء أحمد عطا المنان رئيس القطاع الرياضي وعاطف النور مدير الكورة ..قبل بداية الاعداد ان يكون هناك مؤتمر صحفي ..يعلن فيه برنامج الهلال في الاعداد ..والمباريات التى سوف يلعبها.
< لازم اي حاجة تكون محددة.
< وما يقوم به المجلس الان يجعلنا ..نطمع في المزيد من النظام.
< لذا لا بد ان يبدأ الاعداد بمؤتمر صحفي تعلن فيه خارطة الاعداد.
< طبعا مدرب الفريق سوف يقدم في مؤتمر صحفي.
< ما عاوزين الاعداد يبدأ قبل ان يكتمل وصول لاعبي الهلال.
< لازم الاعداد يبدأ بعد ان يكتمل كشف الهلال.
< اوعكم من الحركات البعملوا فيها اجانب المريخ الان.
< الجماعة سوف يقابلوا بايرن ميونخ دور الليلة ...والاجانب الي الان ما وصلو.
< كروجر ذاتو ما وصل.
< كروجر.
< سعيد السعودي ما وصل.
< والله لو لميتوا الحكاية ومشيتوا قابلتو هلال الحديدة في اليمن ..يكون افضل ليكم.
< التلتلة دي مالكم ومالها.
< وجدول تسعة في البرد ذاتو يمكن يصبح جدول 12.
< كلمناكم نحن.
< يا ضفر..لو عندك شد عضلي ...اتعذر لينا من هسع.
< شوف ليك شد عضلي واتخارج بيه.
< مباراة بايرن ميونخ دي ممكن ترجعك لنيل الحصاحيصا.
< ............
< عاجل : عبدالصمد مع الظفرة اطاح بي الكوكي ...مع بايرن ميونخ ح يطيح بي منو؟...انتوا كمال دحية وين؟.
[/SIZE]وإن طال السفر - محمد عبد الماجد
صحيفة قوون
