عبقرية البصيرة أم حمد

بالأمس تحدثت عن البصارة.. والمباصرة.. والبصير.. وكيف الناس بيباصرو المعايش.. وكل المخلوقات بتباصر معايشها.. في اللخبار من أستراليا خبر.. لطيف وظريف استوقفني له علاقة بالمباصرة.. الخبر بيقول زوج أسترالي بحب الهظار والمغارز مع مرتو.. يوم ادسا في غسالة الهدوم عريان.. عشان يخلع المرا.. المرا جات وفتحت الغسالة وقال ليها “بــِخ” واتخلعت وإطرطشت وقالت “وب علي.. سجمي”.. بعد انتهاء مهمة الخلعة.. الزوج الظريف دا داير يمرق من الغسالة غلبو كلو كلو يمرق.. قدر ما عافرو هو مرتو ما قدرو.. وقت خلاص تب عجزو.. اتصلو بناس الدفاع المدني ويا الله ويا امين مرقوهو.. موقف هذا الاسترالي والذي يعتبر من سكان العالم الاول الذي طلعت الصبرة (الثعلب) صبرة العالم التالت احسن منو في التفكير.. حيث ان الصبرة لو دايرة تدخل قفص جداد.. اول حاجة بتتأكد منها، كيف تطلع من القفص دا؟.. وباي طريقة.. وعشان ما يغلبها تطلع، ويجي سيد الجداد ويكتلها.. اتاريهم سكان العالم الاول دا مواسير ساكت.. غايتو الزول الغتس و وِكِر في الغسالة دا، كان لمت فيهو البصيرة ام حمد كان لحقتو امات طه.. وتعتبر المرحومة أ. د/ البصيرة ام حمد مرجعيتنا في البصارة والمباصرة.. وقصة البصيرة ام حمد لمن لم يعرفها هي.. انو في حدود البصيرة الجغرافية كان في عجل (ابن البقرة والتور).. هذا العجل دخل راسو في قلة.. والقلة للحناكيش واشباه الحناكيش.. ومن لف لفهم هي بنت الزير.. دخل راسو في القلة وما قدر يطلعو من جوا القلة.. اجتمع القوم.. وبعد مداولات قالو يستعينو بالبصيرة ام حمد.. جات البصيرة أم حمد ووقفت ودرست الموقف وقيّمته.. وقالت ليهم.. بِس انتو بُلدا؟.. اضبحو العجل.. سمعو كلامها وضبحو العجل.. بعد ضبحو العجل قالت ليهم أكسرو القلة.. فكسرو القلة.. وأخرجو راس العجل سالما.. فطفق القوم يصفقون للبصيرة أم حمد الي يومنا هذا.. نجد انفسنا كثيرا ما نعمل عمل ام حمد.. ” للمعلومية أم حمد لا تمت بأي صلة لأبو حمد.. وليس لها علاقة مباشرة بي القالو حمد” عزيزي/تي القارئ انظر حولك وتحتك وفوقك وبالجنبات تلقى كتير من معافرة ومنهجية البصيرة ام حمد.. ايضا هذه القصة تقوديني الي ما يردده بعض الساسة من اننا نمر بمنعطف خطير “من الله خلقني ونحن في المنعطف الخطير دا.. غايتو منعطف طويل جنس طول، مخير الله”.. ويقولو برضو لابد من الخروج من عنق الزجاجة.. المنعطف الخطير أنا ما خايف منو.. ممكن نشيلو موزة يا قول الشماشة.. لكن الكلام عنق القزازة دا.. يلم فينا يوم لا نحرا لا ندرى.. أحد سلالة البصيرة أم حمد.. ربنا يسلطو علينا.. ويقطع روسينا.. وبعد داك يكسر القزازة!!