[CENTER][B][SIZE=5] بلة جابر في بايرن ميونخ ألحقوا (الشمطة) دي [/SIZE][/B][/CENTER]
[SIZE=5]
< اخونا (بلة جابر) طبعاً عندو تجربة احتراف سابقة في (باريس سان جيرمان).
< احتراف ..احتراف ...ما حلاقة ..عشان ما تلخبطوا لينا ساكت.
< انا هسع جبت لي سيرة (حلاقة) في الموضوع ..ما تلافحو الكلام.
< في حلاقة الايام دي حايمة اسمها (باريس سان جيرمان).
< ما عارف ليه اسم (باريس سان جيرمان).....بديني احساس انو هذا الاسم اسم (معجون اسنان).
< ما اسم فريق.
< بلة جابر لعب في (باريس سان جيرمان) مع ناس وزلاتان إبراهيموفيتش وإزيكييل لافيتزي وماركو فيراتي وادينسون كافاني وماكسويل ولوكاس مورا وتياغو سيلفا.
< شفتوا العلم دا كيف؟.
< ادينسون كافاني دا ..دحين ما اسم (دواء).
< ديل يفرقوهم كيف من الادوية.
< بيلعبوا في نادي ولّا في صيدلية.
< المهم عندي (بلة جابر) لعب مع الجماعة ديل.
< لعب عديل.
< الكلام دا لا فيه شق ولا فيه طق.
< ولا في زول بقدر يقول حاجة.
< هو ما لعب في باريس سان جيرمان (بصورة رسمية كدا) ..لكن ما مشكلة.. اعتبروه لعب.
< البلد اصلو ما فيها محاسبة.
< طلقيبة ساكت.
< موش قاعدين يقولوا ليك (فراخ) بالفرن...بدوك (فرن) مع الفراخ ..ولاّ معجون ابو وردة بدوك معها (وردة) بنت المعجون!!.
< أهو كلام.
< عشان كدا بلة جابر احسبوها ليه لعب في باريس سان جيرمان.
< والله ..ما في زول يقول حاجة.
< باركوها.
< ما مشكلة ..بنحسبها ليك.
< بنعدها ليك يا بلة.
< لكن ليك عليّ ...هسع على كلامنا دا ..تلقى (كشافات) ملعب باريس سان جيرمان (حديقة الأمراء) في باريس قعدت تشكي.
< تلقاها شالت هم.
< وح نعتبر (مجازًا) يا بلة جابر في سيرتك الرياضية انه سبق لك اللعب في صفوف النادي الفرنسي (باريس سان جيرمان).
< أها يا جماعة الزول دا نحن قصرنا معاه.
< بس اوعكم ..(خليفة) يسمع الكلام دا ..يقول وبالمرة كدا ..احسبوا لي اني لعبت في (ريال مدريد).
< يا خليفة انت كمان ما تبالغ.
< بالمنطق كدا ..اذا بلة جابر لعب في باريس سان جيرمان فإن خليفة لاعب الهلال بالمزيكا يمكن أن يلعب في ريال مدريد.
< دي ولا عاوزة كلام.
< في واحد بلافح الكلام زي (السفنجات).
< بتعرفوا الناس البلافحوا (السفنجات) في المناسبات.
< بس من تطلع (سفنجتك)..يجي واحد يقول ليك اتوضى وارجعها ليك.
< تاني لا تشوفو ..لا تشوف (السفنجة).
< الزول البلافح سمع الموضوع دا ...قال باريس سان جيرمان بتاع الكلاكلة اللفة.
< قلت ليه اول الكلاكلة اللفة فيها (باريس سان جيرمان).
< قادر الله.
< قال لي الاسم دا تحديدًا كدا مافي ...لكن والله عندهم جنس (طحنية).
< زولكم اختزل الحكاية كلها في (الطحنية).
< مسكتو من (اضنينو) وجريتو لي تحت وقلت ليه هسع عليك الله علاقة الطحنية بي باريس سان جيرمان شنو؟.
< قال لي ما في علاقة..لكن (البرد) شديد.
< قلت ليه تاني وأنا اشده إلى الارض ...وعلاقة (البرد) بالكلام البتقول فيه دا شنو؟.
< قال لي ما في علاقة ..لكن (البطيخة) الجبتها يوم داك ..طلعت عسل.
< فقع مرارتي ..قلت ليه وعلاقة البرد بالبطيخة شنو؟.
< قال لي ما في علاقة ..لكن جماعتك ديل عملوا رسوم للترفيه.
< الكلام وقع لي.
< قلت ليه طيب ما تقول كدا من الصباح.
< لكن يا ود الناس عن اذنك ..نحن كنا بنتكلم عن شنو؟.
< طيرت لي الكلام من رأسي...زي (الشافع) البروح في العرس.
< اتذكرت ...كنا بنتكلم عن تجربة بلة جابر في باريس سان جيرمان.
< يا بلة تعرف ..لو بي كورتك دي مشيت فرنسا ..(نابليون) بقوم من قبرو.
< بلقط جيشو من أول وجديد ..جندي جندي.
< برجع تاني يقود جيشو ...ويحاصر المنطقة كلها.
< بتجيب لينا الحرب.
< كورتك دي يا بلة ما كورة (فرنسا).
< في فرنسا كورتك دي (شاديد) ما بتلعبك.
< شليل وين راح ..ما بتكفيك.
< نغشك.
< ناس مزمل ابوالقاسم ما بقولوا ليك الكلام دا.
< لكن نحن بنقولوا ليك.
< ولو (خليفة) حقنا دا ..عمل نفس حركاتك دي ..بنقول ليه نفس الكلام.
< الحقيقة ما بتزعل.
< انتوا عاوزين الحقيقة ..ولاّ عاوزين حاجة تانية.
< هسع تلقوا في ناس منكم قالوا عاوزين (حلاوة مولد).
< حلاوة مولد اجيبها ليكم من وين؟.
< بلة جابر اعتبرنا ليه تجربة اللعب في باريس سان جيرمان..قام قال شنو؟.
< بلة جابر قال حسب الغراء الصدى : (قال جناح المريخ بأنه لا يستبعد حصوله على عرض من الفريق البافاري في الفترة المقبلة بعد المستوى الطيب الذي قدمه امام بايرن ميونخ).
< شوفوا الولد ..قال لا يستبعد أن يحصل على عرض من بايرن ميونخ.
< خلي تلفونك فاتح.
< وما تطلع من (الواتساب)...الالمان ديل بفاوضوا بالواتساب.
< يا ربي (بايرن ميونخ) دا غيروه.
< اتكشح في اخر عمرو.
< الناس ديل عملوا ليهم (سلخانة) في مدينة ميونخ.
< الناس ديل قلبوا ..بطلوا كورة.
< عملوا ليهم مزرعة دواجن في برلين.
< يا بلة عرض شنو المنتظرو من بايرن ميونخ.
< كورتك القدمتها امام بايرن ميونخ (طلب فول) ما بتجيبو.
< عرض شنو كمان؟.
< مالك عاوز تحرجنا مع الالمان.
< يا بلة تعرف كشافات (لاليانز أرينا) لو سمعت كلامك دي ح تنتحر.
< بعدين يا بلة انت تجربتك مع باريس سان جيرمان صبرت عليها ..عشان تجي تصبر على تجربة بايرن ميونخ.
< بلة جابر طبعاً مفتح.
< يمشي يلعب مع المنتخب في بطولة الامم الافريقية ...يقول ليك باريس سان جيرمان اتكلم عني ...وأنا منتظر مكالمة من وكيله.
< بلة جابر يمشي يلعب امام بايرن ميونخ ..يقول ليك لا استبعد حصولي على عرض من البافاري.
< والله كلام.
< دا تلقى لو قعد يتابع ليه مباراة لي ريال مدريد ..بنتظر ليه تلفون من (كارلو أنشيلوتي) ، يقول ليه : (اها رأيك شنو في الخطة التى لعبنا بيها).
< انت يا بلة قاعد تتغطى كويس.
< برضو (البرد) الايامات دي بخلى الزول يهضرب.
< يا بلة ..انت قاعد تتقل في الفول.
< والله كلامك دا ما كلام فول ...دا كلام (قرع) عديل كدا.
< نحن كمان ما بنعرف (القرع).
< يا بلة ..لمن تأكل ما تنوم طوالي.
< الكلام دا ما كويس لي تصريحاتك.
< اتمشى لمن تأكل شوية.
< تقوم يوم تتقل ليك في (كوارع)..تقول أنا الاحق بالكورة الذهبية.
< يا بلة كب ليك موية سخنة في رأسك ..عشان تصحصح.
< والله حالتك دي من الهدف العكسي الذي سجلته في المريخ لصالح الخرطوم الوطني ما عاجبني.
< بقيت تتكلم ساكت.
< بقيت تتكلم (كتر) يا بلة.
< موسى الزومة ما قال كلامك دا ..لاعب بايرن ميونخ قال ليه : (انت ما نصيح).
< انت يا بلة ..العرض المنتظرو من البافاري حق شنو؟.
< عرض سمك.
< عرض موبيليا.
< يمكن نكون فهمنا غلط.
< يمكن انت قاصد حاجة تانية.
< احتمال عرض عسكري.
< احتمال.
< موضوع اللعب في بايرن ميونخ دا ...اظن انت اول زول تتفق فيه معانا على انه مستحيل.
< وانه كلام جرايد.
< والله دا لو بقى كلام جرايد ..ما بجي.
< جرايد شنو البتشطح كدا.
< بعدين يا جماعة انا عاوز اقول ليكم.
< عاوز اقول ليكم ...وانتوا احكموا.
< بلة جابر دا انا هسع سألتو.
< في زول جاب سيرتو في العمود دا.
< بلة جابر دا يا جماعة ما براهو قال منتظر عرض من بايرن ميونخ.
< الكلام دا قلتو انا.
< الكلام دا قالو بلة.
< اها يا عالم ..كلام زي دا في زول بفوتو.
< بلة براهو بجيبها لي نفسو.
< اعمل ليه شنو؟.
< مرة جاب ليه هدف عكسي في المريخ (عنكبة) ما بجيبو.
< ناس الخرطوم الوطني وقت شافوا (بلة جابر)...قالوا نحن (عنكبة) نعمل بيه شنو؟.
< صلاح الجزولي ذاتو نعمل بيه شنو؟.
< قام عملوا شنو؟.
< صلاح الجزولي ودوه الهلال.
< وعنكبة ودوه المريخ.
< وقالوا في الموسم الجديد ح يعتمدوا على (بلة جابر).
< اها يا ناس زول بالمواصفات دي ممكن يمشي يلعب في بايرن ميونخ.
< الزول دا (صحوه)..عشان لو قعد ينتظر عرض البافاري ..بنلقى في يونيو القادم في (مريخ الفاشر).
< غايتو يا بلة عندك جنس (شطحات) ...اسوأ من هدفك في المريخ امام الخرطوم الوطني.
< يوم بي شطحاتك دي بتكتل ليك (كشافة).
< ملحوظة : انتوا موسى الزومة ...ما منتظر (مسكول) ساكت من بايرن ميونخ...مسكول ..واعلام المريخ بتم الباقي.
هوامش
< الدوحة يا دوب فهمت حاجة.
< سيد البلد وصل.
< في الدوحة قالوا وارغو حالف يهزم المريخ.
< نحن عاوزين هلال مريخ عديل كدا ...ما تلخبطوا لينا الحكاية.
< رغم أن اعداد الهلال لم يبلغ مرحلة المباريات بعد.
< عدم التدرج في الاعداد ...مخاطره كتيرة.
< اذا كان الدوري الممتاز سوف يبدأ يوم 4 فبراير ..فذلك يعني ان معسكر الهلال في الدوحة فترته سوف تكون (15) يوماً فقط.
< وهذه الفترة قصيرة جدًا بالنسبة للاعداد.
< رغم أن اعداد الهلال بدأ في الخرطوم من يوم 25 ديسمبر.
< لكن الاعداد الجاد دائماً يكون خارج البلد.
< لا سيما وان عقد الهلال لم يكتمل إلا قبل اسبوع.
< يعني الهلال يحتاج إلى اعداد مكثف.
< الغريبة أن اغلب اندية الممتاز التى سوف تلعب يوم 4 فبراير ..لم يبدأ بعد.
< لا بد أن يؤجل الممتاز على الاقل عشرة ايام ..حتى تستعد الاندية بصورة علمية.
< الاعداد اذا كان (مكلفت) الموسم كله بكون ما نافع.
< في الدوحة الهلال ليس معني بالمباريات التجريبية ..ان لم تكن الجاهزية البدنية.
< التجارب الودية ملحوقة.
< حتى لو كان ذلك عن طريق احضار اندية للخرطوم للتباري مع الهلال.
< مطلوب من مجلس الهلال أن يجهّز للهلال مباراة مع نادي خارجي بعد العودة من الدوحة ..لأن جماهير الهلال سوف تكون في شوق للهلال.
< ويمكن أن تحقق المباراة عائدًا مالياً كبيرة من الدخل والتلفزة.
< مباريات الهلال في الدوحة ..يفضل ألا تتلفز ...حتى تحتفظ الجماهير بشوقها للهلال.
< وحتى يجرب الجهاز الفني اسلوبه بعيدًا عن الكاميرات والاضواء والتلفزة.
< ....
< عاجل : بلة شكلو كدا مصدق.
[/SIZE]وإن طال السفر - محمد عبد الماجد
صحيفة قوون
