(ميمات) في الدفاع.. (سينات) في الوسط ..(كافات) في الهجوم
< لمن نقول حاجة ..بنمشي ونجيها تاني ..نثبتها بالورقة والقلم.
< اصلو ما عاوزين (غلاط) ..ولا فاضيين للحاجات دي.
< مية مرة ..قلنا ليكم نحن الهلالاب ...شفوت ..في (الشفتنة) ما بنتلحق.
< ولا بنجامل.
< ولا (كورنر).
< هسع (الكورنر) الدخلو هنا شنو؟.
< المعني (الوصيف) قدام بايرن ميونخ (كورنر) ما طلع بيه.
< حسب (الشفتنة) الشايفها دي.
< لو نحن لعبنا امام بايرن ميونخ ..كان ناس (ريبيري) بجروا جرى عشان يشيلوا (قميص) بشة.
< بشة تقيل ...ما بتشغل بالالمان...المان على بشة ...ألعبوا بعيد.
< اتألمنو على بلة ..على موسى ..على سعيد السعودي ...لكن على (بشة).
< حركات الخفة البعملوا فيها ناس باسيرو وشيلميس ديل ...نحن ما عندنا.
< ولا بنقبلها.
< ولا كورنر.
< شيلميس الاثيوبي قالوا لو كان شال فانلة (كونتينتو) كان مشى عمل ليه معرض سيارات في اديس ابابا.
< طبعا ما في اي علاقة بين انك تشيل (قميص) بايرن ميونخ ..وبين تمشي تعمل ليك (معرض سيارات) في اديس ابابا.
< لكن شيلميس ممكن يعملها الزول الفرحان دا.
< بالمناسبة الزول دا الي الان ما شفنا ليه اي (كورنر).
< الليلة (الكورنرات) دي شنو ؟ الماسك لينا فيها من الصباح.
< شيلميس كونو يجيب ليه (قون) دي حاجة قنعانين منها...عشان كدا شيلميس دا ما عاوزين منو اكتر من (كورنر).
< كورنر بس.
< خلوه يجيب ليه (كورنر) اعلام المريخ بتمو ليه قون.
< قون شنو؟..والله ناس (سلك) ديل يعملوه ليه (سوبر هاتريك) عديل كدا.
< لو الهلال لعب امام بايرن ميونخ ()ستارك كان هو الببدل (فانليتو) مع المعز محجوب ...المعز ولا بمشي عليه ..(ستارك) بجيه في مكانتو.
< عامل عيونو زي المدرسة في الاجازة الكبيرة.
< قرد ما فيها.
< انتوا ما شفتوا (بيليه) اعظم لاعب كرة في العالم ..بعد مباراة الهلال وسانتوس البرازيلي ما انتهت ...ما شفتوه جرى على (شواطين) عشان يشيل فانيلتو.
< وقالوا كمان بيليه طلب صورة مع شواطين.
< شواطين قال ليه انا بتصور معاك ...لكن الصور دي خاصة ..ما اشوفها بكرة في صحيفة برازيلية.
< بيليه بكل مواهبه ومكانته وصيته عمل كدا ...الالمان الروش ديل كانوا عملوا شنو مع ناس نزار الصاقعة؟.
< التمهيداب ديل طبعا عندهم (خلعة) حايمة...لمن لعبوا مع بايرن ميونخ ركزوا على الصور والفنائل.
< الباشا (90) دقيقة ..بحنس في (جرين) عشان يشيل الفانلة.
< عشان كدا (كورنر) ما طلعوا بيه امام بايرن ميونخ الذي خسر امام فريق نمساوي تأسس سنة 2005م بثلاثية نظيفة.
< خلعة التمهيداب ديل بتذكرني ليك جماعة كدا.
< الشفقة كاتلاهم.
< بفتحوا (المروحة) وبقعدوا في (الحوش).
< تكون بتصلح في (فول) ..ينط واحد منهم ويقول ليك : (اسمع كتر الزيت).
< شوية كدا ..واحد فيهم تاني ينط ليك ويقول ليك : (ما تنسى الجبنة).
< شفقة شديدة.
< لحظات تمر ...تاني يظهر ليك واحد منهم ويقول ليك (زيد الرغيف ..الليلة نحن غداء ما اتغدينا).
< المهم لمن تنتهي من (الفول) بكونوا الجماعة طلعوا ليهم (مجلد) من الوصايا.
< الفول الصلحتو ما تفهم منو اي حاجة.
< التمهيداب امس لعبوا مع فريق روسي.
< الناس ديل (روس) عديل كدا ...وإلا فيهم خلطة.
< الحاجة العرفتها ..قالوا ليك بلة جابر (الاستغراب) كاتلو.
< معقولة ديل روس.
< بلة جابر ..قال احسن يتأكد ..قام سأل ليه (روسي) في المباراة ..قالوا انتوا في روسيا عندكم (موز).
< الروسي استغرب ..قال ليه وبتسأل من (الموز) ليه؟.
< بلة جابر قال ليه ابدا ..بس لو عندكم (موز) يبقى ما عندكم اي فرق مننا.
< شوفتوا (المنطق) دا كيف؟.
< شوفتوا (الفلسفة) دي.
< بلة جابر خلوه.
< قالوا ليك موسى الزومة شاف ليه (روسي) غليد في المباراة ..حالق ليه حلاقة غريبة.
< موسى الزومة قال احسن يكسر جمود المباراة ويدخل في الروسي دا (شمال).
< قام عمل شنو؟.
< موسى الزومة قال للروسي اسمع حلاقتك دي حلقتها وين؟.
< الروسي قال ليه في صالون حلاقة في موسكو.
< موسى الزومة قال ليه : والله ما عاوز احبطك ساكت ..لكن حلاقتك دي في الخرطوم (تحت شجرة) يحلقوها ليك.
< هسع دي عاوزة ليها صالون ..عامل عيونك (الشتر) ديل ذي سيد الدكان الما عندو (فحم).
< اول في علاقة بين العيون الشتر وسيد الدكان الما عندو فحم.
< قادر الله.
< والله علم.
< نخش على (النظام) القلتوا ليكم في بداية العمود.
< الهلال السنة دي داخل بي نظام عجيب في هذا الموسم.
< الهلال مقسم الموضوع بالحروف الابجدية.
< يعني دفاع الهلال رصينا فيه (الميمات) زي الاسود ...اي مدافع لازم يكون في اسمو حرف (الميم).
< يا اسمو هو ..يا اسم ابوه.
< الكلام دا بداية من الـ(م)ـعز (م)ـحجوب ..ثم جـ(م)ـعة ..ثم يونس الا(م)ـين...ثم احـ(م)ـد بيتر.
< تعال شوف بعد كدا كيمة (الميمات) الفي دفاع الهلال ..(م)ـساوي ...سا(م)ـي..(م)ـالك...سيـ(م)بو...اتير تو(م)ـاس.
< الوسط عشان (السين) الفي وسط الوسط ..قررنا يكون الوسط للملكة (السينات).
< ابدأ ليك سينات الوسط من (سيدي بيه)...ثم (استفين وارغو)..في سينات وضعنا فيها (نقط) عشان العين ...زي بشة والشغيل.
< في الهجوم ..رصينا ليكم (الكافات) قولوا ماشاءالله ..بداية من (كاريكا)..وكولبيالي وبكري المدينة وجكسا.
< الحكاية كدا ..اظن واضح انها فيها نظام.
< بالمناسبة اي حاجة بدون (نظام)..وبدون ايقاع ما بتمشي لي قدام ..عشان كدا لاعبي الهلال في هذا الموسم ح يكون بينهم انسجام كبير ..وهارموني وتفاهم وتجانس.
< لذلك في هذا الموسم ما عاوزين لينا اي (تمهيدي) فيه.
< عاوزين الموسم دا يكون خالي من (التمهيداب).
< اي حاجة تطرح في هذا الموسم شيلوها...لقطوا اي حاجة ...ممتاز ..كأس السودان ...درع الانقاذ ...وشاح السد ..كأس البلدية ...ذهبية الدورة التنشيطية.
< اي حاجة السنة دي عاوزنها.
< طبعا الهدف الاكبر ...هو الفوز ببطولة الاندية الافريقية.
< نصرالدين النابي ...مدرب بطولات ...مع فريق ليوبار ..جاب ليه كأس.
< مع الهلال الاسم والتاريخ والجماهير والامكانيات الكبيرة ..معقولة ما يجيب ليه كأس.
< نرجع للوصيف.
< التمهيداب لعبوا امام بايرن ميونخ الالماني وزينت الروسي وسوف يلعبوا امام فريق نمساوي...عشان ح يلعبوا (تمهيدي) مع كمبالا سيتي.
< عارفين الموضوع دا ذكرني شنو؟.
< ذكرني واحد صاحبنا ...كان يوم يكون عندنا امتحان (تاريخ)..بنلقاه قاعد يقرأ في الكيمياء والفيزياء والاحياء.
< بنقول ليه يا زول انت جنيت...بكرة ممتحن (تاريخ) البخليك تقرأ الكيمياء والفيزياء والاحياء شنو؟..وانت اصلا ما شايل المواد دي.
< عارفين الزول دا كان بقول لينا شنو؟.
< كان بقول لينا : والله يا جماعة استاذ التاريخ دا ..ما تستبعدوا منو اي حاجة...ممكن يعمل اي شيء..يعني عادي جدا يجيب لينا السؤال الاول في امتحان التاريخ من مقرر الكيمياء ..والسؤال التاني يجيبوا لينا في التاريخ من مقرر الفيزياء ...والسؤال الثالث يجبوا لينا من مقرر الاحياء ..عشان كدا احسن الواحد يعمل حسابو.
< بكرة بندخل الامتحان ..لا بنلقأ فيزياء ولا كيمياء ولا احياء..بنلقى الامتحان (تاريخ) صر.
< اها المريخ هسع ..زي صاحبنا دا ..لاعبين مع (كمبالا سيتي) كورتو زي جليد العناقريب ..وبلعبوا لي استعدادا لهذه المباراة مع بايرن ميونخ.
< والله انتوا ما غلطانين..غلطان بايرن ميونخ.
< الجابرو على الضرب دا شنو؟.
< البلعبوا شنو مع فريق ..(كورنر) ما قادر يطلع بيه.
< هسع ناس الدوحة يقولوا عننا شنو؟.
< عشان كدا كورتكم التانية ما تلفزوها.
< يتلفزوا ليها شنو في (البرد) دا.
< ملحوظة : طبعا الايامات دي ما في اي برد.
هوامش
< انتوا ناس عبدالله البشير والنابي دا شنو البعملوا فيه دا.
< قعدوا لينا تشكير في (الوصيف) لمن الجماعة صدقوا.
< يا النابي الجماعة ديل ما تغشوهم ساكت.
< ديل الي الان بعتمدوا على ضفر وبلة وموسى وسعيد السعودي.
< يعني ما في اي جديد.
< باسيرو شفنا في شندي.
< تراوري شفنا في المطار.
< اما شيلميس ...واضح لينا من اول مباراة انو عندو عقدة فنائل.
< اول مرة شوف لي محترف بفرح بالصورة.
< الزول دا احتمال يكون سجلوه في المريخ بـ (21) صورة.
< يعني حافز تسجيلو (صور).
< شيليسي ضرب ليك مانشيستر يوناتيد تلاتة (اتاوية).
< تصوروا انا امس في المباراة دي ...الوقت كلو بفتش في محمد سيد احمد.
< قلت محمد سيد احمد لو ظهر في المباراة دي ..معناتو مانشيستر يوناتيد دا (نيل الحصاحيصا).
< ناس يوناتيد ديل ملهم ..كورتهم بقت (تمهيدية) كدا.
< ايتو براهو ضرب ليك الجماعة.
< اها نوع ديل ..(انجليز) في شنو يعني؟.
< والله خسارة (انجليز) ساكت.
< الشيء المحيرني بعيدا عن هذه المباراة...(رجعنا لاستديوهاتنا المحلية).
< الشيء المحيرني ..(وارغو)...دا مالو فتح كدا.
< زولكم فرحان فرح.
< يا دوب نفسو اتفتحت.
< وارغو الظاهر عليه انو كان تعبان شديد في المريخ.
< عشان كدا الايامات دي قالوا ليك وارغو في تمارين الاعداد زي (ميسي) قبل اصابتو الاخيرة.
< طبعا ميسي الحالي عندنا فوقو الف رأي.
< الجماعة ديل عارفين.
< ناس المريخ ديل كلموهم ..ما يقوموا يسرحوا بي وشيهم.
< قولوا ليهم مباراة التمهيدي يوم 8 فبرائر.
< يعني ما تقعدوا تتفاصحوا ساكت.
< تعالوا شوفوا (تمهيدكم).
< ما تتحوموا ساكت في قطر.
< كمبالا سيتي قالوا ح يصل من الاسبوع القادم..وانتوا حايمين بي هناك.
< قايلين بايرن ميونخ ح يمرقكم من (التمهيدي).
< التمهيدي راجيكم ..راجيكم.
< ما تقعدوا تطيروا لي عيونكم زي الاعلانات بين الشوطين.
< ....
< عاجل : لو نحن بنلعب في (التمهيدي) كنا خلينا الشاي والقهوة وروتانا سينما.
[/SIZE]وإن طال السفر - محمد عبد الماجد
صحيفة قوون
