الهلال يرفض ميسي بسبب السن .. !

* ليس غريباً أن يتعاهد لاعبو الهلال مع مدرب فريقهم على مواصلة المشوار في بطولة أبطال إفريقيا والظفر بلقب (الأميرة السمراء) فقد تعودنا (سنوياً) منذ أكثر من ثمانين عاماً على هذه السيناريوهات الخيالية والمسرحيات الكوميدية، ولكن الغريب حقاً أن التعاهد هذا المرة تم بين لاعبي الوصايفة ومدربهم الكوكي على متن الطائرة التي اعادتهم من ملاوي للخرطوم، فهل يعقل أن يتعاهد مدرب مع لاعبيه على (عدم الطيران) وهم في (الجو) .. ؟

* (الكوكي) لو مشت عليه قصص التعاهدات دي بركبكم التونسية ..و(من شابه “طيران بلاده” فما ظلم) ..!

* لعيبة الهلال ديل يا كوكي عمرهم كلو شغالين يعاهدوا، (المرة دي عشان تضمنهم سيبك من “التعاهدات” وأحسن تكتبّوهم “تعهدات”) .. !

* ناسكم ديل يا محمد عبد الماجد كان يسيبوا التعاهدات لحدي ما يصلوا الخرطوم، (معقولة يتعاهدوا في الطائرة، وهم على “صفر”) ..!

* ويا عينيا يا عينيا (صفرك) طال متين الجية .. ؟؟

* (تعاهدكم) دا يا مساوي لا يساوي (الصفر) الذي كُتب به .. !

* يحكى عبر تاريخ (الأصفار) الجوية الطويل أنه ما (تعاهد) الوصايفة يوماً إلا و(طاروا) قبل أن يسمع الناس بالتعاهد الذي أعلنوا فيه الموت من أجل الشعار ، و(“العهدة” في ذلك على الراوي وعصمت مالك الهلال) .. !!

* يا كردنة : بدل (تتعاهدوا) على عدم الهزيمة أحسن (تتعاقدوا) مع مدافع عليه القيمة .. !

* يا ابراهيم عوض بدل تعيشوا علي أحلام (بنيان) الجوهرة، أحسن تكونوا واقعيين وتفكروا في (بنيان) فريق يكفيكم شر البهدلة .. !

* لو لقيتوا ليكم (شركة صينية) بمواصفات (شركة بنيان الجوهرة) ممكن تتعاقدوا مع (قلب دفاع رخيص)، و(تبنوا) الفريق بأقل الأسعار و(ممكن يحصل تخفيض ستين في المية بعد تدخل الكاردينال) .. !

* كردنة في العلاقات ما بتلحق .. كردنة شفت بقسِم قيمة الصفقة وهو قاعد في محلو ..(كردنة دا لو داير يسجل ميسي بسجلو) ..!

* صديق عزيز قال لي كردنة قال ممكن يسجل ميسي في الهلال .. قلت ليهو لو دايرو (يسجل زيارة لنادي الهلال موش يسجلو في الكشوفات) الموضوع دا بياخد معاهو علي الأقل خمس سنوات .. !

* قصة تسجيل ميسي في الهلال دي زي حكاية قناة (زول) في آخر أيامها ما بتدي الناس حقوقهم وظروفها صعبة، لما قالوا للمدير في حوار صحافي : (انتو فلستوا ولا شنو ؟)، قال ليهم : (زول إمكانياتها كبيرة وحتستمر مسيرتها من دون توقف، ولو دايرين نتعاقد مع أوبرا وينفري بكرة دي ممكن نجيبا) ..!

* من يوم مدير زول قال : (لو دايرين اوبرا بكرة دي ممكن نجيبا)، تاني نحنا ما قدرنا نجيب قناة زول .. !

* قناة زول وقفت قبل ما أوبرا تجي .. (هسه ميسي دا لو ما جا قناة زول ما بتقيف براها، مافي برضو حيطة في الجوهرة بتقيف) ..!

* يا مزمل : نتمنى انو اصابة ميسي الأخيرة ما تخلي كردنة يصرف عنو نظر ..!

* يا كردنة : عليك الله ما تكسر خاطر ميسي وتحرمو من اللعب في الهلال ..(البرغوث الأرجنتيني راجل طيبان خليهو يجي يستمتع مع الشغيل باللعب في السودان) ..!

* المشكلة هسه المنسقة تطلع بيان تقول ميسي كبير وصرفنا عنو النظر ..و(عماد الطيب يقول لينا صفقة البرغوث معقولة وسعرو رخيص ويتفاجأ ببيان فتومة في الفيس) .. !

* ميسي بجيكم في أقرب فترة تسجيلات بس ما تعصروا عليه بالتعهدات .. !

* ميسي محظوظ يسيب نيمار ويجي يلعب مع صلاح الجزولي في الهلال ..!

* طالما كردنة ممكن يجيب ميسي يلعب في الخرطوم (معناها العقد الصيني مقنع وموضوع الجوهرة محسوم)..!

* اتحسمي .. !

نقوش متفرقة

* قنوات (بي ان سبورت) طلبت شراء حقوق بث مباراة الزعيم وعملاق باب سويقة (حصرياً) حتى لا يفوتها شرف نقل (النهائي المبكر)، وهكذا هي القنوات الكبيرة تبحث عن المباريات الاستثنائية واللقاءات المصنفة فوق العادة، و(شاطرين يا أيمن جادة) .. !

* المطره من رشتا والعروس من بشتا و(المباراة من القناة التلفزتا) .. !

* الوصايفة بقولوا ليك : (نحنا وصلنا مرحلة متقدمة في البطولة كورنا بقت مشفرة في بن سبورت) .. طيب نحنا بن سبورت بتشفر لينا قبل ما نصل مرحلة التلفزة، و(فعلاً الزعيم مفخرة وسمحة المقدرة) ..!

* ناس (بن سبورت) ما قادرين يصبروا على الزعيم لحدي ما تبدأ المجموعات ..(تلفزة من بدري وحقيقي يا سامر العمرابي شغلكم تمام ومافي كلام) ..!

* يا ابو سمره عندنا كورة ما لاقين ليها قناة لحدي هسه بين أخوانا الوصايفة وسانغا باليندا، (قلنا نشوف ناس قوون لو رفضوا ندفع فرق ونبدل المباراة بعدة) ..!

نقش أخير

دق الباب بشده والناس قاعدة مستعدة ..

قايلنو زول (بن سبورت) طلع سيد العدة ..!