المرحوم شرب ليه (كباية لبن) وشغل المروحة في (تلاتة) واتكل

• انتوا سمعتوا الحكايات البقولوها الناس في صيوانات البكاء.
• الغريبة رغم الحكايات الحزينة دي (الشاي) مدور في الصيوان متل (الكورس) بتاع الحقيبة.
• الشاي بدون ما تطلبو بيجيك.
• لمن تسأل ليك زول : (المرحوم الحصل ليه شنو؟).
• اي واحد بيقعد يألف ليه قصة.
• واي زول بيدخل صيوان العزاء بيسأل : (المرحوم مالو؟).
• او المرحوم كان عندو شيء؟.
• كان عندو جلاكسي 5.
• اغلب الاجابات بتقول ليك : (والله ما كان عندو اي شيء).
• لغاية العصر دا كان حايم زي (الحصان).
• ربط (لمبة) الحوش ومات.
• كمان (لمبة الحوش) بتكتل؟.
• مالكم انتوا عاوزين توهمونا؟.
• تكون لمبة تونسية.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• بس ناس الخضر جابوا ليهم (كديس)..الفار قبل ما تقبضو ..بتطلع ليه (امر قبض).
• كديسة في منتهى (الديمقراطية).
• والمرحوم مالو؟.
• كان عندو شنو؟.
• كان زول طيب ..واصلو ما بسأل ليه زول.
• الزول دا من طيبتو ..بتلقاه واقف مع الشفع.
• وبشرب الشاي بدون سكر.
• ما عارف العلاقة شنو بين الطيبة والشاي البدون سكر.
• المرحوم ما قاعد يغلط ليه على زول.
• إلّا الكمساري.
• وسيد البيت.
• في ناس بزيدوا وبيجتهدوا وبيعملوا ليهم اضافات براهم.
• تقول ليهم : المرحوم مالو؟.
• ينسجوا ليهم قصة ..(فيلم هندي) بس.
• قصة ناقصة بس (شاروخان).
• مرات تسأل.
• يقولوا ليك والله (المرحوم) جاء العصر ..شايل ليه (جريدة)..قرأ ليه (عمود) في الاخيرة…ومات بعد كدا.
• كمان (الجرايد) بقت تكتل.
• معقولة بس.
• الترجي ممكن يعملها.
• الجرايد الايامات دي كلها (الترجي).
• والمريخاب قلوبهم كعبة.
• قلوبهم طلعت من صدورهم.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• بس ناس الطيب عندهم (جدادة) رايحة ليها اسبوع.
• وتمشي تسأل.
• المرحوم مالو؟.
• والله المرحوم كان زي (الطلقة) ما بيشكي من اي حاجة.
• جاء المساء ..طلع التلفزيون حضر ليه مباراة ..ومات في الزمن البدل الضائع.
• بعد ما الحكم الرابع رفع الزمن البدل الضائع…هو طوالي مات.
• كمان المباريات بقت تكتل؟.
• مالكم انتوا عاوزين تشفقونا؟.
• يعني الواحد ما يحضر ليه مباراة.
• ما بعيد المباراة تكون مباراة للترجي.
• ناس الترجي بعملوها.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• بس احمد ود مكي رخصة القيادة حقتو ضاعت.
• مشى عشان يطلع ليه رخصة قيادة جديدة ..قالوا بعد مباراة الترجي.
• والمرحوم كان عندو شنو؟.
• ابداً – والله ما كان عندو اي حاجة.
• لغاية اول امبارح شايفنو حايم في الحلة….سايق عجلتو وحايم.
• لكن الحصل عليه شنو؟.
• مالو؟.
• مات كيف؟.
• والله المرحوم ..جاب ليه (لبن)..ختاهو في التلاجة ..شربو وشغل المروحة في تلاتة ومات على كدا.
• معقولة.
• كمان (اللبن) بيكتل.
• هسع نحن نعرفها كيف؟.
• دا من اللبن؟.
• وإلا من المروحة؟.
• ما بنستبعد (تلاتة) المروحة دي تكون عندها علاقة بي تلاتة الترجي.
• التلاتة سامة.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• بس الشفيع حمدنا الله ..عمل ليه شريحة جديدة.
• والمرحوم كان عندو شنو؟.
• مشكلتو؟.
• مالو؟.
• المرحوم كان شديد.
• ما عندو اي حاجة.
• جاء راجع من الشغل ..لقى زوجتو عاملة ليه (بامية مفروكة).. ضرب ليك (البامية المفروكة) دي ما خلي فيها حاجة.
• وطلب ليه (بصلة) كمان.
• ومات.
• كمان (البامية المفروكة) بقت تكتل.
• يا جماعة.
• نحن نعمل شنو؟.
• السبب البامية المفروكة وإلّا البصلة؟.
• نخلي (البامية المفروكة).
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس عثمان فاض السيد ..جابوا ليه عقد من برة ..طلع ليه شهادة خبرة طبيب مخ واعصاب.
• وسافر.
• والمرحوم مالو؟.
• المرحوم ..الصباح دا ..كان لابس ليه قميص اخضر ..وحايم بيه في الشارع ..حتى قال لي عاوز لي شاحن موبايل.
• شال شاحن الموبايل ..واختفى.
• بعد ساعة سمعت خبر وفاتو.
• والله اتجرست جنس جرسة.
• بكيت في الدنيا دي جنس بكا.
• بكيت عليه؟.
• ابدا ..بكيت على (الشاحن) اصلو الشاحن كان (اصلي).
• معقولة.
• كمان شاحن الموبايل بقى يكتل.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس علوية بنت محمدين رمت حيطة الصالون ..قالت عاوز تقلبو (دكان).
• والمرحوم مالو؟.
• كان عندو شنو؟.
• المرحوم مشى السوق.
• جاب ليه ربع كيلو لحمة وجاء راجع.
• قبال ما يعملوا ليه ربع الكيلو ..انقرض.
• معقولة.
• ربع كيلو اللحمة كمان بقى يكتل؟.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس مختار تاج الشجر بفتش ليه في بيت يرحل ليه ..قال نسابتو ضايقوه.
• قلنا ليه انت ساكن معاهم وإلّا هم الساكنين معاك؟.
• قال لينا انا الساكن معاهم.
• قلنا ليه ..انت ساكن معاهم ..وعاوزهم كمان ما يضايقوك.
• انت ما عندك دم.
• وما عندك ذوق.
• وكمان بعد دا شايل حالهم في الاعمدة الصحفية.
• والمرحوم مالو؟.
• المرحوم قطع ليه تذكرة..قال مسافر تركيا.
• قبل ما يسافر …الموت لحقو في شارع المطار.
• مات هناك.
• جبناه راجع.
• دفناه في المقابر الفوق.
• معقولة.
• تذاكر السفر كمان بقت تكتل؟.
• طياراتنا دي قبل ما يسافروا بيها ..بقت تكتل.
• يعني نخلي السفر.
• وإلّا نعمل شنو؟.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس الامين ساد السر ..فقد الذاكرة ..وبقى ما بعرف ليه زول.
• الشيء الغريبة.
• وبعد الكلام دا كلو.
• والنظريات البقول ليكم فيها من الصباح.
• ناس المريخ ديل.
• ناس المريخ مالهم؟.
• ناس المريخ ديل..اي واحد فيهم تسألو ..يقول ليك والله الترجي خطير.
• والترجي صعب.
• والترجي ما بتصاقع.
• بس دفاعهم ضعيف.
• انتوا البوصلكم (دفاعهم) شنو؟.
• انتوا قايلين نفسكم بتصلوا مرحلة (دفاع الترجي).
• انتوا يا ناس المريخ خط 18 حقكم ما بتطلعوا منو.
• خط 6 ما بتطلعوا منو.
• وبتتكلموا لي عن دفاع الترجي.
• دفاع الترجي انتوا ولا بتشوفوه.
• ألعبوا كورتكم ..وشوفوا ليكم (منطق) احسن من كدا.
• وكلامكم دا تاني ما تقولوه لي زول غريب.
• بضحك فيكم.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس الترجي دفاعو ضعيف.
• …………
و
• الترجي دفاعو ضعيف واتصدر الدوري التونسي.
• يا ربي الترجي اتصدر الدوري التونسي بي (الخرطوم الوطني).
• بعدين انتوا يا ناس المريخ اخر من يتكلم عن دفاع الترجي.
• دفاع فيه علي جعفر ومالك الاشتكاكم وتتكلموا عن دفاع الترجي.
• ما تقولوا كلام زي دا.
• عشان كلامكم دا بيحرج (علي جعفر) ساكت.
• بعدين اقول ليكم حاجة.
• رمضان عجب ذاتو ما قاعد ليكم.
• عندكم سبعة مليار طلعوها.
• ما عندكم ما تضيعوا وقتكم ساكت.
• جيبوا شيبون.
• رمضان عجب ما بتقدروا عليه.
• …….
• السيدة (ل) لو شايلة ورقة وقلم اكتبي الرقم دا.
• وقرّض على كدا.