حالتها دي بي (أعمدة خرسانية) ساكت

الكلام دا للاعبي المنتخب ما عملتوه..تعملوه للاعبي المريخ يا أسامة عطا المنان وتسجلوا رمضان عجب منتصف الليل

انتوا كنتوا فاكرين نحن عاوزين رمضان عجب (كورة)؟…أبداً دا أصلو ما بحصل..نحن كنا عاوزين رمضان عجب للجوهرة الزرقاء

هسع في داعي عليكم الـلـه ..قروش (تحويل الرصيد) ..تحولوها كلها لي رمضان عجب

الهلال شغلهم بي (رمضان عجب) بي جاي ..ومشى حسم (عاصفة الحزم) بي غادي (وليد الشعلة)

· الزمن دا الواحد يسألك من اتنين في اتنين.

· تقول ليه أربعة.

· يقول ليك خلاص جيب تلاتة.

· علم الوقوف في الباب ..ما عاوز ليه مرور في (الرياضات).

· والدخول للبرلمان ما عاوز (كسيّر التلج) دا كلو يا أسامة عطا المنان.

· من كسيّر التلج – لمن بقيت زي (أيمن سعيد).

· المصري دا كلموه – قولوا ليه (كسيّر التلج) ما بخليك (هداف للدوري).

· ولا بجيب ليك (كورنر).

· ما تقعد تكسر تلج ساكت.

· كسيّر التلج لو بنفع زول – كان نفع (عصام الحضري).

· فتحوا ليكم أبواب الاتحاد العام (نص الليل).

· تقول عاوزين توصلوا ليكم (كهربة).

· وجابوا ليك (عصير الليمون) لي أسامة عطا المنان.

· يا بتاع عصير الليمون.

· نحن عارفين أي حاجة.

· أسامة عطا المنان طبعاً ضعيف قدام (عصير الليمون).

· ما بقدر يمسك نفسو.

· لو عاوز تسجل (قلنا ما ممكن تسافر) في الاتحاد العام ..وعملت ليك (عصير ليمون) لي أسامة عطا المنان أسامة بسجلها ليك.

· إن شاء الـلـه يسجلها ليك بي قانون (إزالة الملصقات) ..الطالع من المحلية.

· قانون الطواريء.

· قانون المرور.

· أي قانون ما مشكلة.

· بعدين أسامة عطا المنان ما عاوز ليه قانون.

· زول (نجار) ساكت.

· ممكن يعمل أي شيء.

· الاتحاد العام فتح أبوابه منتصف الليل …تقول عاوز يقدم ليه (نشرة).

· عشان شنو؟.

· عشان رمضان عجب يقدر يلعب في مباراة القمة.

· حوادث مستشفى أم درمان؟.

· ب الـلـه أنتوا كنتوا بترجفوا للحد دا.

· الأمور وصلت بيكم لهذا المستوى.

· اتجهجهتوا كدا.

· حالتكم صعبة شديد.

· أنتوا الكلام دا للاعبي المنتخب ما عملتوه..تعملوه للاعبي المريخ يا أسامة عطا المنان.

· تفتحوا أبواب الاتحاد نص الليل.

· عاوزين تدخلوا ليكم عربية.

· يا أسامة عملتها ظاهرة.

· جميل الدخول للبرلمان ما بردوه سريع كدا.

· الظاهر الحملة الإعلانية كانت كبيرة.

· لكن أنت بعد ما دخلت البرلمان ممكن تعمل أي شيء.

· خلاص الحكاية باظت.

· باظت من كبارها.

· باظت من (كباريها).

· جقور المنشية عرفناها ..جقور الاتحاد العام شنو كمان؟.

· نص الليل يا أسامة ..ذكرتني مسلسل (أدهم الشرقاوي).

· لا أبداً.

· ذكرتني و الـلـه مسلسل (ذئاب الجبل)…لعبد الـلـه غيث قبل أن يحل بدلاً عنه شقيقه حمدي غيث..حيث رحل الأول قبل أن يكمل تصوير المسلسل فأكمل دوره في المسلسل شقيقه حمدي.

· نص الليالي.

· الشفقة كعبة.

· والهلال خطير.

· خلوكم تعملوا إقرار مع (رمضان عجب) قبل التسجيلات – وقبل ما يصدر قرار بذلك.

· تقول مسافر (لوتري).

· الجماعة ما عندهم ثقة في (أولادهم).

· بقوا يجيبوا فيهم قبل المباراة زي (الخبيز).

· ويرجعوهم.

· الهلال شغلهم بي (رمضان عجب) بي جاي ..ومشى حسم (عاصفة الحزم) بي غادي.

· شفتوا العلم.

· قالوا ليهم (رمضان عجب)..ونحن قاصدين (وليد الشعلة).

· كمان رمضان عجب نعمل بيه شنو (35) سنة؟.

· عاوزين نفتح لينا مستشفى.

· المستشفى خلوها.

· عاوزين نفتح لينا (بقالة).

· نحن لو عاوزين رمضان عجب ..كنا رجّعنا (عمر بخيت).

· خلينا عمر بخيت ليه؟.

· عمر بخيت خلوه.

· في أحسن من مهند الطاهر.

· لو عاوزين رمضان عجب ..كنا جبنا (مهند الطاهر).

· لا مليار ولا اتنين ونص.

· تقول جايبنوا من (ريو ديجنيرو).

· جايبنوا من كلية الطب الخرطوم؟.

· زول بعد سبعة ما بشوف إلّا بالوصف…عاوزين بيه شنو؟.

· انتوا كنتوا فاكرين نحن عاوزين رمضان عجب (كورة)؟.

· أبداً …دا أصلو ما بحصل.

· نحن كنا عاوزين رمضان عجب للجوهرة الزرقاء.

· الشركة الصينية قالوا عاوزين ليهم (عمالة) سودانية.

· رمضان عجب وبكري المدينة ما عندهم محل في الهلال إلّا في (الجوهرة الزرقاء).

· إلّا مع الشركة الصينية.

· كورة شنو البلعبها رمضان عجب بعد العمر دا؟.

· وكمان فرحانين ..عشان سجلوا ولدهم.

· ودفعوا ليه اتنين مليار ونص.

· اتنين مليار ونص لو عملتوها في (طوب) كان أحسن ليكم.

· كان عملتوها أعمدة خرسانية – كان أحسن ليكم.

· جيبوها أسمنت.

· سيخ.

· ما كعب معاكم.

· أحسن ليكم من (رمضان عجب).

· المهم عملية رمضان عجب ..نجحت نجاح كامل.

· جابت (وليد الشعلة).

· يغشوكم كدا.

· يخدعوكم بالطريقة دي.

· الطريقة البتخليكم تجيبوه (نص الليل).

· أنتوا سارقين ليكم حاجة.

· الزول ولدكم …ما لكم شفقانين؟.

· خلوها تصبح.

· ثقة في الزول للصباح ما عندكم.

· فتحوا ليه الأبواب ..وطلعوا ليه الدفاتر في (الضلمة).

· أسامة عطا المنان – أصلاً جاهز للحاجات دي.

· بشغّل وكالة سفرو بالطريقة دي.

· يقولوا ليه طلع قرار لرفع الإيقاف عن بكري المدينة.

· بطلعو.

· وبمضى اسم مجدي شمس الدين كمان.

· بقولوا ليه افتح أبواب الاتحاد العام وسجّل لينا رمضان عجب.

· بفتح أبواب الاتحاد العام.

· بنفذ أي حاجة.

· وبشيل الليل كله.

· لكن مشت فيكم و الـلـه.

· قالوا ليهم رمضان عجب ..وحسموا ليك وليد الشعلة.

· جماعتكم ما استوعبوا الشغل.

· الاتحاد العام من الغضب ..لمن وقف ليك (وليد الشعلة).

· الجماعة ما استحملوا الشغل العالي.

· التكتيك الكبير.

· طوالي تم إيقاف نشاط (وليد الشعلة).

· ما قدروا يستوعبوا الشغل الكبير دا.

· القال ليكم نحن (وليد الشعلة) عاوزنو الموسم دا منو؟.

· نحن كشفنا الأفريقي مقفل.

· يعني حكاية الإيقاف دي ما فارقة معانا.

· الولد صغير في السن – ومصاب كمان.

· نحن ما ضايقين عليه.

· وقفوه زي ما عاوزين.

· حقيقة بعد ما دفعتوا اتنين ومليار نص في (رمضان عجب)..طبيعي جداً توقفوا (وليد الشعلة).

· الاتنين مليار ونص كتيرة.

· وأنتوا قروشكم بقيتوا تلقطوها (تحويل رصيد).

· هسع في داعي عليكم الـلـه ..قروش تحويل الرصيد ..تحولوها كلها لي رمضان عجب.

· ناس (ضفر) ديل ما خلتوا ليهم شيء.

· حق المواصلات ما طلعتوه ليهم.

· العجيب أن الاتحاد العام فتح أبوابه منتصف الليل ..عشان مباراة القمة.

· عشان رمضان عجب يدخل مركز.

· ورفع ليكم الإيقاف عن بكري المدينة.

· وخلوكم تختاروا حكامكم براكم.

· بالاسم.

· والوزير بدون قانون جمّد ليكم الاستقالات.

· دي استقالات وإلّا (فسيخ) البجمدوها بالطريقة دي.

· ووقفوا ليكم وليد الشعلة.

· مع الحاجات دي كلها ..المريخ (هدف) ما قدر يسجلو.

· حالتها دي (الجوهرة الزرقاء)..أعمدة خرسانية ساكت.

· يعني الطابق التاني لو قام في (الجوهرة الزرقاء)…ناس ضفر وأمير كمال من المغرب بياخدوا (خمسة).

· دي أعمدة ساكت.

· ناس المريخ وقت عملوا (الرد كسل)…خمسة مواسم بنضربوا من الهلال.

· وجمال الوالي بقول ليهم (المقصورة الطائرة).

· ونحن عاوزين نعمل ثورة في المنشآت.

· نحن عملنا الجوهرة الزرقاء ..وصدارة للممتاز ..ووصول لمرحلة المجموعات.

· في (37) مباراة في الممتاز انضربوا (17) مرة.

· أنتوا ما بتخجلوا؟.

· أنتوا ما عندكم إحساس؟.

· بي رمضان عجب.

· وبكري المدينة.

· وتجميد استقالات.

· وغارزيتو.

· وأسامة عطا المنان.

· واختيار حكام.

· وما بتنتصروا على الهلال.

· بعد كدا ناس أسامة عطا المنان ومعتصم جعفر (القاعد ساكت) إلّا ينزلوا يلعبوا ليكم.

· ناس رمضان عجب ديل ما بعملوا حاجة.

· يمين نحن لو ما مشغلوين شوية بالجوهرة الزرقاء..والجوهرة ذاتها في مرحلة (أعمدة خرسانية) كان تاخدوا خمسة.

· الـلـه شافكم.

· نحن الأيامات دي تركيزنا كلو في (الأعمدة الخرسانية).

· عشان كدا مع (الأعمدة الخرسانية) دي ..جبنا لينا عمود أساسي للهلال.

· جبنا (وليد الشعلة).

· زول هدّاف.

· وصغير في السن.

· وموهوب.

· نحن بنسجل كدا.

· شغالين كدا.

· شغل في منتهى الروعة يا الكاردينال.

· دا الهلال العاوزنو نحن.

· كدا مية – المية.

· …….

· ملحوظة : هسع دا لاعب يفتحوا ليه أبواب الاتحاد العام منتصف الليل.

هوامش

· ديل يشرحوا ليهم الحكاية كيف؟.

· يقولوا ليهم شنو؟.

· نحن لعبنا معاكم بالرديف.

· بي ناس أطهر ووليد علاء الدين ومحمد عبد الرحمن وعماد الصيني.

· بالصيني يا جماعة.

· تاني نعمل ليكم شنو؟.

· المضحك ناس المريخ عاوزين يجيبوا عمر بخيت.

· جايبنو المجلس.

· تاني ما بتقدروا تلعبوا تحت الكشافات.

· إلّا تلعبوا بالعصر.

· قالوا نحن أقصينا الترجي.

· وينو الترجي دا؟.

· ما شفنا أي شيء.

· لعبنا ليكم بالرديف.

· بي ناس عماد الصيني ..وما عملتوا أي حاجة.

· وأعمدتنا في الجوهرة الزرقاء يا دوب ظهرت.

· طيب في الحالة دي بنعمل معاكم كدا.

· بكره كيف؟.

· ناس (كيبي) بره الكشف.

· ومحمد عبدالرحمن بيلعب مصاب.

· بنجهجكم كدا.

· عاوزين شنو تاني.

· أوعكم تكونوا إلى الآن ما اقتنعتوا.

· طبعاً فوز الهلال في ملعب المريخ أمر ثابت.

· انتصارات الهلال على المريخ في ملعب الأخير ..اكتر من انتصارات الهلال في إستاده على المريخ.

· عشان ما تقعدوا تغشوا جماهيركم ساكت.

· قال اتنين مليار ونص قال؟.

· في شنو؟.

· في (الشوتة) الطلعها مكسيم بي أصبعو الشمال.

· بكري المدينة وينو؟.

· خلاص بكري رصيدو انتهى.

· لو دي كورتك ما كان ترفعوا الإيقاف.

· لعبو وإيقافو واحد.

· ما في أي فرق.

· ما شفنا ليه أي شيء.

· غارزيتو ما صبر عليه.

· قام استبدلوا.

· خلاص يا جماعة.

· خلاص يا عالم.

· المخدر فكه.

· البنج طلق.

· موضوع بكري المدينة ظهر.

· شوفوا ليكم زول غير بكري المدينة.

· رأيكم شنو في عمر بخيت.

· يلا انفخوا كلكم.

· لكن كل ما نشوف بكري المدينة نقتنع بي كلام البرير.

· الزول دا كورتو تاميها (حكام).

· يضرب في الحكام ..والحكام يحسبوا ليه في ضربات الجزاء.

· ماشين بالحكام.

· الحكام يجقلبوا ..والشكر لي بكري المدينة.

· ابراهومة قنبلة بعيدة المدى.

· نزار الصاقعة ..فوق الفرح بي غادي.

· وليد الشعلة ..أخطر زول في الدنيا.

· وأسامة عطا المريخ ..بنرجع ليه.

· الكاردينال يدير التسجيلات بذكاء عالي.

· ح نطلق على الكاردينال بالوضع دا (رجل المستحيل).

· ……………

· عاجل : أقول ليكم حاجة المريخ دا مع الجزائريين إلّا يشوف ليه (16) حكم بتسواني.