في غوغل تكتب (هدف نزار حامد) يجيبوا ليك (مرتبك) قدامك

·أول لاعب عبرو نزار أثبت التقرير الطبية أنو عندو مشكلة في (الحلقوم) – المسكين بقى ما بقدر يبلع

·بطيخ الزمن دا ذاتو بقى ما عندو (كرامة)…البطيخة عندها جنسية (بطيخية) وبتطلع (قرعة)

·هدف نزار حامد خلى توتيل يتكلم – والقاش بيضحك ليه؟

·ناس (غوغل) ديل جنوا؟.

·تكتب هدف نزار حامد ..يجيك محمد وردي بيغني في (القمر بوبا).

·تقعد تعرض – لمن الناس يقولوا الحاصل شنو؟.

·تعرض في السخانة دي.

·والدنيا رمضان.

·تقول يمكن لخبطت في (الحروف).

·ترجع ترتب الكلمات من جديد.

·(هدف نزار حامد يا عالم)…تعمل فواصل بين الكلمات.

·تاني يجيك محمد وردي بغني في (القمر بوبا).

·يا ربي ناس (غوغل) ديل قصاندها.

·الناس ديل جنوا؟.

·شنو (الخفة) البعملوا فيها دي.

·تكتب هدف نزار حامد في سموحة المصري.

·يجيك عثمان حسين يغني في (كيف لا أعشق جمالك).

·الحكاية شنو؟.

·لا كدا الحكاية بقت مقصودة.

·ظاهرة..ما عاوزة ليها أي اجتهاد.

·كدا الموضوع مرتب.

·تكتب (سوات العاصفة في ساق الشتيل الني).

·يجيك هدف نزار حامد في سموحة.

·لا – لا ..كدا الموضوع ما بتسكت عليه.

·تقفل الجهاز تعمل ليه(shut down) وتفتحو تاتي.

·تكتب (غضبك جميل زي بسمتك).

·تاني يجيك نزار حامد ينطط.

·تقول الموضوع دا مقصود.

·في واحد شغال في الحكومة – قال لي يا ريت لو الموضوع وقف على كدا.

·الزول قال لي تتخيل أنا كتبت (هدف نزار حامد) في غوغل جاني (مرتبي) بي حوافزو وبدلاتو.

·الصراف يتلتل فينا اليوم كلو.

·تمشي ليه تلقاه طلع الفطور.

·يجي راجع من الفطور …يقولوا ليك مشى الصلاة.

·يجي من الصلاة ..يقول ليك انتظر الكهربة.

·تجي الكهربة – تلقاهو طلع فات.

·كل يوم بعمل كدا.

·لكن هسع مع الظروف الصعبة دي ..والعيد ..كتبت هدف نزار حامد ..جاني (المرتب).

·شلتو وعملت نايم.

·الغريبة لمن تكتب في (غوغل) هدف نزار حامد – بيجيك (أسامة عطا المنان) زعلان.

·ما عارف البزعلو شنو؟.

·وبابكر سلك ..لي هسع معلق في (بكري المدينة).

·فرحان بالكشافات.

·أول مرة يجيهم لاعب بتشقلب.

·فاكرين (الشقلبة) دي علم.

·قايلنها (هندسة).

·أو علوم طيران.

·تشيل كيس الخضار …عشان تكسّر الوقت – تمشي السوق تجيب ليك خضار وبطيخة.

·تلقى بتاع الخضار …ما شغال بي بطيخو ..وقاعد يتكلم عن هدف نزار حامد.

·دا شنو يا جماعة؟ …الظاهر الليلة اليوم العالي لي نزار حامد.

·تديهم محاضرة في (البطيخ).

·ما في زول بيشتغل بيك.

·بطيخ الزمن دا ذاتو بقى ما عندو (كرامة).

·البطيخة عندها جنسية (بطيخية) وبتطلع (قرعة).

·تركب ليك حافلة.

·الحافلات في السخانة دي زي صاج الكسرة.

·مولعات نار.

·قبل ما تقعد – تلقى الحافلة كلها بتتكلم عن (نزار حامد).

·نزار عمل.

·نزار قال.

·نزار سوى.

·ولا في زول بتكلم عن والي الخرطوم الجديد.

·بتكلموا بس عن (نزار).

·هدف نزار حامد في سموحة …زي أغنية (قصتنا) لعثمان حسين.

·هدف قصة.

·فيه فواصل وروايات …ورومانسية.

·رومانسية عالية كمان.

·والـلـه يا نزار حامد ذكرتنا أهداف (مهند الطاهر) ..كان فيها نفس المتعة والروعة.

·أي لاعب بيجي من كسلا – بيأتي بهذا الألق والإبداع.

·توتيل بتكلم.

·القاش بيضحك ليه؟.

·بالأرقام ..وبحساب الثانية ..مر نزار حامد أربع مرات من لاعبي (سموحة)..خامسهم كان حارس المرمى المخلوع لي وقتنا دا ..غير المعلق المصري القاعد يفلّت في القناة الصوتية التانية.

·بقول ليه في كلام زي الدراب.

·أول لاعب دخل على نزار حامد ، نزار عمل ليه (فلايت) – الكلام دا كان قبل خط السنتر ..ونزار ماشي في مشوارو.

·اللاعب دا التقارير الطبية أثبتت أنو عندو مشكلة في (الحلقوم) – زولكم بقى ما بقدر يبلع.

·وعندو فقدان للشهية.

·وما بشوف قدامو.

·وبتخيل حاجات من رأسو.

·حاجات غير موجودة.

·نزار حامد تخلص من هذا اللاعب ..جاهو واحد تاني شايل شنطتو ..وعامل فيها شفت.

·نزار حامد ما اشتغل بيه.

·ماشي في سيرتو.

·نزار (حلقمو) ليك ..وفات.

·حلقمو دا …حاجة كدا زي الشعور بالشحتفة.

·قلموا يعني.

·قطموا.

·جاء اللاعب الثالث …ونزار ماشي على القون.

·ولا بسأل ليه زول.

·ولا بقيف.

·اللاعب الثالث قالوا مفقود إلى وقتنا هذا….ما عارفنو مشى وين؟.

·ناس سموحة ديل دخلوا الملعب (11) لاعب – طلعوا (10).

·في واحد ناقص.

·اللاعب دخل في عداد المفقودين.

·في اللحظة دي نزار حامد كان قد اقترب من خط 18 – اللاعب التاني الذي سبق أن تجاوزه نزار حامد – جاء تاني ورمى نفسو قدام نزار حامد.

·عاوز ينسف روحو.

·عاوز يغامر..ويعمل فيها (صعيدي) قلبو حار.

·نزار حامد ما كضب ..نسف ليكم اللاعب.

·(تخلمكو) ليكم.

·تخلمكو دي ..يعني لقطة حتة – حتة في قفة …ورماهو بره حساباتو.

·هنا طلع الحارس زي نشرة عشرة…نزار ما كضب وضع ليك الكورة في القون.

·هدف تاني للهلال.

·الناس اتشتت.

·القال وردي بغني.

·والقال دا مصطفى سيد أحمد.

·والقال عثمان حسين.

·والمشي لي (خليل فرح).

·كل زول بشرع بي طريقتو.

·طبعاً الزمن دا أي زول عمل ليه (جلاكسي)..تشريعاتو كتيرة.

·نزار سجل الهدف الثاني بي طريقة يوم داك اتلاقينا في قوز الرملة أنت عملت فيها ما شايف …والرملة عملت فيها (نجيلة).

·نزار هدف تاني للهلال.

·تاني الناس اتقسموا في الموضوع.

·البقول ليك ..شعرت بي نفسي (ضربت لي فرخة)…شبعت من غير ما آكل.

·ومشيت غسلت أيدي في الماسورة.

·والبقول ليك لا شية جمر عديل كدا.

·ريحتها طاقة.

·والبقول ليك كأنو جابو لي (جوز حمام).

·أنت ما طالبني (حليفة).

·والبقول ليك تلفوني ذاتو شعرت بيه نزلوا لي فيه رصيد.

·حالتو مقفول.

·والبقول ليك زي الفتحو لي (المكيف).

·شعرت ليك بي هوا بارد.

·والبقول ليك زي الشغلو لي (بعد إيه).

·والبقول ليك كأنو شالوني لوتري.

·حسيت بي نفسي في المطار.

·أي واحد عندو إحساس براهو.

·شعور مختلف.

·لكن الأكيد والثابت أن وزارة التربية والتعليم مختلفة في ما بينها.

·الوزارة اتقسمت.

·ناس يقولوا دخلوا الهدف دا في (الجغرافيا)..عشان الهدف كتر خيرو أثبت أن حلايب سودانية.

·والبقول ليك في الوزارة الهدف دا ما هدف (جغرافيا) – صحيح جاء من وسط الملعب – لكن الهدف هدف (علمي) دخلوه في (الفيزياء).

·والبقول ليك الفيزياء صعبة على ناس بله جابر ..احسن تعملوه في مقرر (الكيمياء).

·والبقول ليك الكيمياء لا…الهدف دا أحسن حتة ليه (الأحياء).

·بعد الناس ما يقتنعوا ..ويقربوا يدخلوا الهدف في مادة (الأحياء) يطلع عمك قديم كدا يقول الهدف دا خلوه لمادة الفنون الجميلة.

·غايتو أنا لمن بقيت على إرسال العمود لي ناس أحمد الحاج والتحلل من الموضوع دا ..ما عرفت الجماعة ديل بقوا على شنو؟.

·فنون جميلة أم أحياء؟.

·جغرافيا أم فيزياء؟.

·أقول ليكم ..الهدف دا خلوه لينا مع أغنيات (محمد وردي).

·بريحنا مع (لو بهمسة والود والمستحيل والحزن القديم).

·الهدف دا عاوز ليه (من الغلاف للغلاف).

·لسه عندنا كلام كتير.

·عاوز ليه (عيدية) براهو.

·……….

·ملحوظة : إجازة العيد قالوا من الجمعة لي يوم الاتنين ..عليكم الـلـه هسع دي إجازة عيد ولّا فسحة الفطور.

هوامش

·يوم الخميس إن شاء الـلـه يكون عندنا لقاء معكم عبر (من الغلاف للغلاف).

·ونشوف باقى القصة.

·وموضوع شيبون وصل وين؟.

·واحد قال لي مباراة المريخ والاتحاد قالوا ح يعيدوها عشان هدف شيبون ..قلت ليه أنتوا مباراة الأمل التى طلع فيها قرار من لجنة الاستئنافات ما عادوها عاوزين تعيدوا مباراة الاتحاد.

·الحقارات البتعملو فيها دي شنو؟.

·دي (شلوقي) منكم ساكت.

·شلوقي دي يعني (شلاقة) بالانجليزي.

·ناس الأمل مالهم صنّوا كدا.

·بقوا ما بيجيبوا سيرة (الإعادة).

·زي ناس الكاردينال في حكاية (لوزان).

·يا كاردينال نحن لا بنعرف عماد الطيب ولا بنعرف نزار حامد ..موضوع بكري المدينة دا لو ما وصل (لوزان) لو جبت كأس الأندية الأفريقية ما حبابك.

·أنت قايلني بنسى.

·ما تبقوا لينا زي إعادة مباراة المريخ والأمل.

·مأمون أبوشيبة الـلـه أداهو (كنز).

·و51 سنة ح يكتب ليكم عن (هدف) شيبون.

·أبو شيبة ح يقول ليكم حكم الراية طلع (هلالابي) – بنعرف خالو ساكن في الشجرة.

·………….

·عاجل : رأيكم شنو يا ناس المريخ تعملوا الجمعة القادمة جمعة الهجوم على مجدي شمس الدين – أصلو ما عندكم موضوع.