الطريفي زول نصيحة

< قالوا إن أحد الولاة الكبار أجل إعلان حكومته لعشرة أيام ترى لماذا هذا التأخير؟ الزاكي عبد الله الانصاري – دنقلا حسب التسريبات أنه استلم قائمتين واحدة (كلها من الكفاءات) وأخرى (خالية تماماَ من الكفاءات).. وعملية المزج مازالت قائمة (لكف العين)!! < لماذا نقوم بتشييد الطرق البرية (الهاي واي) بين الولايات؟ سارة الضو- مدني المجازر يا السارة في دارفور وحدها لا تكفي فلابد من معينات أخرى لزيادة الفواجع. < انت يا الطريفي عندكم موية ولا كهرباء؟ نايرة الهادي – الثورة الحارة 19 نحن يا النايرة كهربتنا في عيونا ومويتنا في دموعنا وبندفع فواتيرنا أها شن قولك. < داعش دي ماله واقعة جامعة بروفيسور مأمون حميدة من دون الباقيات؟ ياسر عبد الغني- ود نوباوي الخليفة المأمون وبروفيسور مأمون عبر التأريخ في يمنهم دعاش وفي يسارهم داعش. < متى سيشرفنا الميرغني والمهدي يا الطريفي؟ أمير الصادق الزمزمي- العزوزاب والله يا ود الزمزمي إنت دقة قديمة خالص.. إنت عينك في القصر وقدامك الحبيب الحسن والنسيب عبد الرحمن تمشي تفتش في الجزيرة أبا وجزيرة مساوي. < السودان بعد توقيع أمريكا مع ايران وعودة البلايين الى مجاريها كيف (قصتنا) مع عاصفة الحزم؟ النور المحينة- الكوة أصلو يا المحينة السودان عندو فرصتين للاستماع (إنتهت قصتنا) أو (ما تقول ضعت من إهمالي أنا عامل الحزم رأسمالي (بس)!!! أيامي ما باسما لي وعواصفي الحازمة متقساما لي < شنو يا الطريفي أخبار الحوار الوطني؟ آدم عثمان الشريف- المسلمية نحنا أدونا (الوطنيات) أما (الحيران) فيسأل عنهم الشيخ حسن ود حسونة. < إنت صحي الأستاذ فاروق أبو عيسى دا شيوعي؟ الأسباط شريف القاسم- الأبيض في علمي ود أبو عيسى صوفي إلا ركوب العجلة ما بتنسي. < أخبار الجرايد شنو؟ عازة عمر محي الدين- المناقل ورق وانفرك ومحاكم وملاكم وحوادث وقضايا وصرت مسلم لي رزايا زي طائر مكسور جناح. < في رأيك يا الطريفي المسلسلات دي في طريقة تنتهي قريب؟ عبد المنعم عبد الكريم- بحري انت ماك نصيح يا ود عبد الكريم داحين من الله خلقك شفتلك نضماً إتلم ولا تراباً انخم.. < أنا صبي ضراعي تبشة إلا ما عندي مهنة ومفلس وعايزلي عروس قمرة قبال نهاية الشهر دا؟ نوح ود رغيم- الفاشر نان مالو أبشر إنت ما سمعت بي أضغاث بت أحلام أم البنية الوحيدة المدفونة في البكري وعزاها في سفاية بلقع داحين ألكع!!! < قالوا الفتنة وصلت أم درمان الجمري البكري السيد الريح- الأبيض بالحيل وصلت أم درمان لكن أم درمان كتلت الفتنة بالحسنى وحرقت الضغائن بنيران الكماين والجموعية والهواوير إنتبهوا للشيطان الخطير والشر المستطير فأكثروا اللعنات على الرجيم وزادوا التكبير على الرحيم فزالت الغمة وصعدوا القمة والحمد لله رب العالمين (الفاتحة) < أنا يا الطريفي أفكر بي طريقة جادة في دعم تشجيع فريق غير الهلال والمريخ ملحوظة أنا بالمناسبة رأسمالي أضخم من صلاح إدريس وجمال الوالي والبرير والكاردينال مجتمعين فماذا ترشح لي؟ قاسم الشريف الشنقيطي- الرياض الخرطوم والله يا الشنقيطي إذا ما وافقت على هلال كادقلي ومريخ كوستي فأنا بفتكر أحسن خيار ليك تنتظر الزهرة أو توتي لمن يطلعوا الدرجة الأولى. < ما هي نصيحتك لواشنطون في العيد؟ حاتم المأمون أبو جديري- رفاعة عزيزتي واشنطون وكما أكدت أولبرايت فقد وصلت فعلاً العراق الى العصر الحجري.. فالرجاء إيقاف الدم فما عادت الأحجار تطيق اللون الأحمر.. < إنت الصحيفة دي تابعة لي منو؟ حيدر صديق (ود الدغري)- الحصاحيصا حسب المعلومات سيد (منو) البتسأل منو ده تابع للصحيفة دي- لكن الإعلانات تابعة لفلانة ديك.. وهو عقد جبري وقسري وملزم تم توقيعه في الليلة (ديك)!!! < كيف أخبار العاصمة المثلثة؟ حامد بشير أبارو- الدامر يا حليلك يا ود أبارو إنت من زمن العاصمة المثلثة دي بقت العاصمة (المسدسة). < متى تتوقف الحرب؟ إبراهيم عديل برشم- كادقلي الحرب توقفت يا برشم لكن المرتزقة مازالت لهم بقية من رواتب عند كتشنر والكاهن.