لقيتك

لقيتك صدفة في دمي..

تقلِّب في دفاتر الهم.. وتمسح صفحة من همي

تجادل في الحزن والخوف.. وتكتب رمية لي نمِّي

مليت كل المساحة أمان.. بحسك في حنان أمي..

وساعة الحارة والحوبات.. بشوفك خالي أو عمي..

معاك كبر الطموح جواي.. وزاد بي طلتك عزمي..

كفاية علي تكون زولي.. وتكون بي حالي مهتمي..

****

لقيتك صدفة في الخاطر..

بترسم لوحة للحاضر..

بلون الأخضر الناضر..

وحبك في العيون ظاهر..

وحرفك في الحروف زاهر..

وغيمك في القليب ماطر..

بيغسل مني أحزاني.. ويأكد كيف هواك نادر..

****

ولقيتك صدفة بين الناس..

بتمسح ذكرى في الماضي، وبتنقُر في القليب أجراس..

لقيتك طيبة صادقة وذوق.. وترنيمات غُنا وإحساس..

وحنيّة أهل غالين.. وزول ونّاس

وحاتك ما بسيبك يوم.. وبهزم سجني والحراس..

وإنت المافي زيّك زي..

ولا بتنقاس بسعر الماس..

لقيتك!!

***

لقيتك عز سواد الهم.. وكان الدنيا ما بترحم..

وما اتوقعت يوم ألقاك.. ولا مفروض في يوم نتلم..

أتاريهو الزمن محتال.. وجابك لي بدون أعلم..

فتح جواي مجال للريد.. وبيك علمني كيف أحلم

لقيتك وتاني ما بحتار.. ولا بحزن.. ولابندم

ولا بحكي الشجن للناس.. وبعدك ما حأتكلم..

لقيتك.. ياخ لقيتك بس.. وما تسألني: عمرك كم ؟

أنا الولدوني يوم عينيك.. دنت من قلبي تتبسم..

لقيتك !!

*تلويح:

أحلى فصول العمر.. حنانك.