(البامية المفروكة) لو بقت (سمك) شعور (السلطة) بكون شنو؟

نفسي اشوف لي فيلم هندي..البطل ما يدخل السجن بعد ان يكون (المفوض) اتآمر عليه

زمان كان عندنا استاذ جغرافيا كان بقول لينا (الاستغراب) حالة من حالات الفلس المعوي

بفتشوا في البمرقهم من الهلال ..مرة يقولوا الشغيل موقوف ومرة يقولوا الاستحواذ كان شوية

لغاية ما وصلنا انو واحد قريبنا ..قال لينا واللـه (الحمل) دا فيه جنس (بامية مفروكة) سمك بس!!

· ما تشتغلوا بالعنوان كتير.

· انا ما عندي مشكلة مع (البامية المفروكة).

· ولا عندي معاها قضية.

· ولا بيناتنا (ورثة).

· لكن برضو الحق – حق.

· زمان كان عندنا استاذ جغرافيا كان بقول لينا (الاستغراب) حالة من حالات الفلس المعوي.

· ونحن ما كنا فاهمين اي حاجة.

· لكن مع ذلك كنا بنصفق للاستاذ ..بنشوفو اخطر زول في الدنيا.

· لمن كبرنا شوية قلنا علاقة (الاستغراب) بالفلس شنو؟.

· والفلس ذاتو الدخلو شنو في (المعوي)؟…عشان يوصفوه بيه.

· دا كلام مرتب ساكت ..لا منطقي ولا عندو اساس.

· والكلام دا كلو كدا بي ربطتو ..علاقتو بالجغرافيا شنو؟.

· كنا بنفتش في مقرر الجغرافيا دا درس – درس ..عشان نلقى الكلام دا – ما قاعدين نلقاهو.

· الاستاذ بيجيبو من وين؟..ما عارفين.

· غايتو اساتذة الجغرافيا ديل ..عملوا فينا عمائل ..لخبطوا لينا رأسنا بي معلومات كلها غلط.

· شبكونا ليك السودان بلد المليون ميل مربع ..لمن البلد (اتقسمت).

· طقوا المساحة عين.

· قمنا على اساس مليون ميل مربع ..واتربينا على كدا.

· اول ما اتصدمنا بالواقع ..لقينا ليك ما في كلام بالشكل دا.

· قالوا لينا (القطن) المحصول الرئيسي في الجزيرة.

· طلع لا رئيسي ولا حاجة.

· القطن بنجيبو من برة زي (الشكولاتة).

· الكلام الدرسناه في (الجغرافيا) لقيناه في حتة ..والواقع كان في حتة تانية.

· الواحد لمن مسكو صداع.

· لمن يجيك انفصام في الشخصية.

· الحاجات كدا.

· ما مفهومة.

· زي البامية المفروكة.

· مرة جبنا لينا (جزّار) افتكرناه حريف.

· وجبنا لينا (حمل).

· قلنا للجزّار عاوزنك تطلع لينا من (الحمل) دا ..(سيلات).

· الجزّار دا ساعة نحن واقفين في رأسو.

· جيبوا صينية.

· نجيب الصينية.

· جيبوا جردل.

· نجيب ليه الجردل.

· جيبوا (خشبة) اكسر فيها.

· نجيب ليه الخشبة.

· جيبوا (صابونة) اغسل بيها.

· نجيب الصابونة.

· تتخيلوا بعد (اللفة) الطويلة دي ..الجزّار طلع لينا شنو من (الحمل)؟.

· ما بتتخيلوا اصلو.

· الجزّار طلع لينا من الحمل (بامية مفروكة).

· ومسيخة ملح كمان!!.

· بعد التعب دا ..و (باع)…الجزّار طلع لينا (بامية مفروكة) بدل لحمة السيلات.

· مسكنا ليك الجّزار ..ادينا ليك درس في (الاخلاق).

· قلنا ليه وقت الموضوع خلص على (بامية مفروكة)….الصينية لزومو شنو؟.

· البامية المفروكة عاوزة ليها (صينية).

· قول احتجت لي صينية.

· الجردل لي شنو؟.

· البامية المفروكة عاوزة ليها (جردل).

· كلو دا خليه …(الخشبة) ليه؟.

· من اللـه خلقكم سمعتو ليكم بي (بامية مفروكة) عاوزة ليها (خشبة).

· انت مالك عاوز تفور لينا دمنا.

· ودا كلو كوم ..والصابونة كوم.

· بعدين نحن كان على (البامية المفروكة) …برانا كنا بنعملها ..الموضوع ما عاوز ليه جزّار او مساعد جزّار.

· بامية مفروكة يجيبوا ليها (جزّار) دي لا سمعنا بيه ولا حاجة.

· الموضوع ما كان بيستاهل.

· الجزّار مسكنا ليك ..وقال لينا يا جماعة ما تلوموني…انا ما غلطان.

· قلنا ليه طيب نلوم منو؟.

· نحن فترنا من اللوم.

· نلوم الحمل!!.

· الجزّار قال لينا ولا تلومو (الحمل) – الحمل اصلو ما عندو ذنب.

· قلنا ليه طيب نلوم منو؟.

· نقطع نحن!!.

· الجّزار قال لينا لوموا (المحلية)..الحمل دا قبل ما تشوفوه كدا كان (خروف) عديل كدا ..(كبش) اقرن.

· قلنا ليه والقلبو (حمل) شنو؟.

· قال لينا رسوم المحلية الكتيرة.

· سكتنا وما قلنا حاجة.

· (اتقونعنا).

· الجزّار قال لينا والحمل دا قبل ما يكون (كبش) كان (عجل).

· كلنا قلنا ليه والبقاهو (حمل) شنو؟.

· الجزّار قال لينا (المحلية)!!.

· قبل ما (اتفجع) ليكم في السطر دا ..الجزّار قال لينا وقبل ما يكون (عجل) الحمل دا كان (تور).

· هنا (اتفجعنا) ليكم ..وقلنا واللـه (المحلية) دي ما صاح منها.

· ما ظريفة.

· ما حلوة.

· شينة عديل كدا.

· (تور) قدر الكتله يبقى (حمل).

· الجزّار قال لينا ويا ريت لو الموضوع وقف لي هنا …حملكم دا قدر ما اتحرفنت ليكم فيه ما قدرت اطلع منو اكتر من (البامية المفروكة) دي.

· استغربنا ..واتشقينا استغراب.

· قلنا ليه كدا عليك يا ود الناس حاول وطلع لينا من الحمل دا (ملوخية)..واللـه (البامية المفروكة) مع المطر دي لا بتتاكل ولا حاجة.

· الجزّار قال لينا ..(المحلية) ما خلت حاجة في الحمل .البامية المفروكة دي ذاتها لو ما لحقتوها بتلقوها (موية فول).

· سمعنا ليك (موية الفول) ..شفنا ليك (البامية المفروكة) دي زي (السمك) ..لمن (السلطة) بي عجورها استغربت!!.

· قلنا نلحق ننسف ليك (البامية المفروكة) قبل ناس المحلية.

· قبلنا ليك على (البامية المفروكة) ما خلينا فيها حاجة.

· نفضنا ليك الصحون – صحن – صحن زي (الكوتشينة).

· لي درجة انو عندنا واحد قريبنا ..قال لينا واللـه (الحمل) دا فيه جنس (بامية مفروكة) سمك بس!!.

· البامية المفروكة عاوزة تبقى سمك.

· زي صعود المريخ لنصف النهائي.

· شعور (السلطة) شنو؟.

· اها كدا…

· نفسي احضر لي (فيلم هندي) البطل ما يكون فيه (مظلوم).

· شفتوا ليكم مباراة للمريخ بعد نهايتها …اعلام المريخ ما قال ان فريق المريخ عندو (ضربة جزاء) الحكم لم يحتسبها لهم.

· دي شفتوها.

· المريخ عند اعلام المريخ دائما مستهدف ..رغم ان ضربات الجزاء التى منحت للمريخ في البطولة الافريقية الآن لم تمنح لكل الاندية المشاركة التى في مرحلة المجموعات.

· نفسي اشوف لي فيلم هندي..البطل ما يدخل السجن بعد ان يكون (المفوض) اتآمر عليه.

· وناس الشرطة لبّسو ليه (تهمة) ساكت.

· الشرطة في الافلام الهندية – دائما مع (الخيانة).

· الهنود ديل بيلعبوا بالشرطة.

· نحن هنا لقينا لينا فيلم هندي.

· حاجة ملخطبة كدا – زي الفيلم الهندي.

· قبل مباراة الهلال امام مازيمبي ..كانت احلام المريخاب بي (كاس) البطولة الافريقية ..كبيرة.

· كانوا يتحدثون عن كاس الابطال للاندية الافريقية زي ما قاعدين يتكلموا عن كاس سيكافا.

· افتكروا الموضوع كلو (علمة).

· الجماعة ما عارفين في حاجات تانية.

· فاكرنها (غلقت) على كدا.

· ما عارفين الغريق ورا.

· ولا سمعوا بي الخيل الحرة بتجي في اللفة.

· المريخاب فرحتهم بخروج الهلال من المجموعات كانت اكبر من فرحتهم بتأهلهم.

· عشان كدا لمن الهلال عادت ليه الفرصة واصبح المرشح الاول لتصدر مجموعته ..انصدموا.

· اصابتهم خيبة امل.

· وقعدوا يفتشوا في المشاكل.

· بفتشوا في البمرقهم من الهلال ..مرة يقولوا الشغيل موقوف ومرة يقولوا الاستحواذ كان شوية.

· مرة يحرشوا في سموحة.

· القعدة غالباهم.

· نحن مقدرين الظرف.

· عارفين حالتكم صعبة.

· ومقتنعين ان الهلال لو قابلكم بي دفاعكم (الشوارع) دا ..غارزيتو بمشي حتة ..ومحسن سيد بمشي حتة.

· وجمال الوالي بلحق عبدالصمد.

· وابوجريشة برجع اديس ابابا.

· فريقكم دا اصلو ما تلاقونا بيه في دور (الاربعة).

· البامية المفروكة دي بنفرتكها ليكم صحن ..صحن.

· ……….

· ملحوظة : يا برهان عاوزين برهان على تصريحاتك البتقول فيها دي.

هوامش

· المهم عندنا ان ينتصر الهلال اليوم في الكاملين.

· الانتصار هو الاهم.

· نحن في النهايات ..اي تعثر لا قدر اللـه ..ببقى التعويض صعب.

· صدارتكم.

· بطولتكم.

· ما تفكوها.

· وجود مكسيم اليوم في مرمى الهلال امر لا بد منه.

· الكوكي عليه ان يتعامل مع المباراة بمسؤولية واهتمام كبير.

· نسأل اللـه ان ينتصر الهلال في اي حتة.

· هنا وهناك.

· في الكاملين وفي كادوقلي.

· المطر ممكن تكون عذر للجماعة.

· لكن نحن ما عندنا حاجة اسمها مطرة.

· تلعبوا كورتكم بس.

· يا بشه ..الليلة يومك.

· بشه ومطرة.

· ………..

· عاجل : الجو دا جو (فرح) عديل كدا ..الليلة وبكرة.