كفاية (تمرير)…البحصل فينا دا (كتييييير)

*مافي اي (دهشة) في خبر رفض الاتحاد العام لشكاوي المريخ.
*الدهشة الحقيقة كانت بتحصل لو الاتحاد (قبل) الشكاوي دي.
*انتو عارفين لو كان الاتحاد قبل الشكاوي بتاعت المريخ كان ممكن يحصل شنو.؟
*اي مريخابي على وجه الارض دي كان حيكون منطط عوياناتو وفاتح خشمو.
*والمامنطط عيونو ولافاتح خشمو كان حتلقاهو (غمران).
*لو شمموهو (بصلة) مابفوق.
*لو رشوهو بي (كولونيا) برضو مابفوق.
*لو (قرصوهو) ذاتو مابفوق.
*ياجماعة.
*انا شخصياً اطلاقاً وبتاتاً ماكنت متوقع اي قرار بخلاف الرفض.
*اتعودنا على كدا.
*اتعودنا على اننا نتظلم ونسكت.
*وانا ماعارف لمتين (التعويدة) دي حتلازمنا.
*يامجلس المريخ.
*انا شخصياً ماعارف انتو ليه متمسكين بالنسخة الحالية من الدوري الممتاز دي.؟
*النسخة دي غير ما(عطلتنا) ماعملت فينا اي خير.
*ارهقت لعيبتنا…وعرضتهم للاصابات…وشتتّ تركيزنا من الابطال…وآخر حاجة (حلوة) حصلت لينا فيها انو شكاوينا اترفضت.!
*يعني حتى الشكوى ذاتو ماانصفونا فيها.
*ياخي انسحبوا من الدوري دا.
*بلا دوري بلا لمة.
*انسحبوا عشان حالنا (يتعدل).
*عشان تاني مانتظلم.
*عشان الناس تعمل لينا تاني الف حساب.
*ياخي انسحبوا وخلوهم يشوفوا الدوري بتاعهم دا بدون المريخ بكون عامل كيف.
*خلوهم يضوقوا (مساختو).
*الدوري الممتاز ياناس من غير المريخ ممكن يبقى اي حاجة (الا) دوري.
*المريخ هو (روح) هذا الدوري.
*ونحن نطالب بـ(طلوع) الروح.
*و….
*ياروح مابعدك روح.
باص بيني:
*ياخي زهجنا من (المجاملات) على حسابنا وفترنا من (الحقارة)…والانسحاب من الدوري في التوقيت دا (شطارة).
باص طويل:
*خلوهو ليهم يعملوا فيهو الدايرنو…ان شاء الله يقلبوهو دوري (شطرنج).
باص قون:
*الانسحاب من النسخة الحالية للدوري الممتاز والتركيز مع الابطال…قرار ننتظره من مجلس المريخ…ودا قرار (مريح).
خانة:
*يامجلس المريخ…كفاية (تمرير)…البحصل فينا دا (كتييييييير)