كانت ساعة النصر ..واحدة وربع صباحا
الهلال كسر ليك قاعدة الاهلي المصري ..وضربو ليك بثلاثية …نجيب محفوظ ما عملها
“”””””””””””””””””””””””””””””””””
الحاجة البتحير الزول – وبتخليه ما فاهم اي حاجة ، الساعة واحدة وربع صباحا الزمن دا بقت تجي من عصرا بدري
“””””””””””””””””””””””””””””””””””””””””””””
الحفلة في الاقاليم بتنتهي الساعة اربعة صباحا …والعروس بيجيبوها من الكوافير الساعة اتنين – شوف عيني (العريس) مرات يجيبوه الكوشة نايم
“””””””””””””””””””””””””””””””””
ملأوا لينا رأسنا ساكت بالجغرافيا ومليون ميل مربع ..والصمغ العربي ..والقطن ..كبرنا لقينا ما في اي كلام بالشكل دا
“””””””””””””””””””””””””””””””
• الليلة نحن اي حاجة عندنا (واحدة وربع) صباحا.
• رفعنا اي شيء الى ذلك التوقيت…وقعدنا منتظرين (التأهل).
• عندنا عشم كبير ..عشان كدا بنعاين للساعة بي فهم.
• الدقائق شغالة معانا زي ناس الجمارك.
• ونحن قاعدين فوق رأي.
• نحن اي حاجة عندنا بي نظام.
• في ناس بيقطعوا السلطة قبل الفول.
• وفي ناس لا..بصلحو الفول اولا وبقطعو السلطة في الاخر.
• عاد جنس (لخبطة).
• ما قايل الزول وقت يكون عندو مباراة مصيرية بيقعد يتلخبط كدا.
• عاوز اشغل (المروحة) شغلت (الطير المهاجر) – في علاقة بين الطير المهاجر والمروحة.
• ما عارف – لكن (مراوح) الزمن دا ما عندها ضمان.
• اتوقعوا منها اي حاجة.
• الحفلة في الاقاليم بتنتهي الساعة اربعة صباحا …والعروس بيجيبوها من الكوافير الساعة اتنين – شوف عيني (العريس) مرات يجيبوه الكوشة نايم.
• لو ما البدلة كبيرة فيه شوية …ما بتعرفو.
• ليه العريس دائما بيلبس بدلة اكبر منو؟.
• ما حقتو!!.
• والغريبة مع البدلة الكبيرة بيكون نائم.
• يكون مساهر في (حنتو).
• الليلة نحن ناس الساعة واحدة وربع صباحا.
• ناس سهر ساكت.
• الحاجة البتحير الزول – وبتخليه ما فاهم اي حاجة ، الساعة واحدة وربع صباحا الزمن دا بقت تجي من عصر بدري.
• بدون ما تشعر تلقى واحدة وربع جات…تقول كانت واقفة في الباب على الهبشة.
• الزمن ممحوق ..زي دقيق الفيتريتة …بروح في (الصاج) ساكت.
• الحكاية كدا.
• ما بتعرف الصاح شنو؟.
• شاي الصباح بنشربو واحدة وربع صباحا.
• دا شاي وإلّا فيلم اجنبي؟.
• زي اقليم السافنا الغنية في الجغرافيا.
• انتوا الاقليم دا اختفى وين من الواقع؟.
• بقى لا حس ولا خبر.
• قلت ليكم زمان – انا عندي احساس (جغرافي) كدا – انو الناس ديل بيدرسونا حاجات ما عندها اساس.
• ملأوا لينا رأسنا ساكت بالجغرافيا ومليون ميل مربع ..والصمغ العربي ..والقطن ..كبرنا لقينا ما في اي كلام بالشكل دا.
• قطن شنو؟.
• وصمغ ايه؟.
• الصمغ ذاتو بنستوردو مع الحاجات زي (الدواء).
• لكن برضو بنشرب الشاي واحدة وربع صباحا.
• بي بسكويت ..بي زلابية ..من غير زلابية ما مشكلة.
• زمان نحن كنا بنقيف في (زيت الزلابية).
• خاصة في (السقط).
• ما عارف (العبقرية) وين في الحتة دي؟.
• غايتو الحاجة البتذكرها والمواقف المسجلها كلها كانت في (زيت الزلابية).
• قبل ما يظهر (الجلي).
• وكريم (21).
• الشاي واحدة وربع صباحا.
• المهم بنجيهو ليكم بعد المباراة.
• الفطور واحدة وربع صباحا.
• الغداء ..واحدة وربع صباحا.
• حليل الغداء.
• العشاء ..واحدة وربع صباحا.
• عملنا جمع تأخير للوجبات.
• باقى نحن راجيين ناس (مساوي)..لو ما حسموا لينا الموضوع ..ما بنمشي لينا على صحن.
• حالفين ما ندخل لينا حاجة على خشمنا.
• التلفونات ذاتها بنرد عليها بعد واحدة وربع صباحا.
• قبل هذا التوقيت – ما في زول يضرب ليه لي زول.
• ولا في زول يتكلم ليه مع زول.
• كل حاجة بنأجلها الى ما بعد مباراة الهلال والاتحاد.
• المباراة بتبدأ في الجزائر يوم (السبت) وبتنتهي في الخرطوم يوم (الاحد).
• فرق يوم كامل.
• هسع نحن نقعد وين مع الفروقات دي؟.
• عليكم الله هسع دي ما (جهجهة).
• الزمن دا الواحد ذاتو بقى ما بيستحمل الحاجات دي.
• في شفقة في تاريخ الوطن بهذا الشكل؟.
• خلونا نرجع ..ونسترجع.
• يمكن نتعلم.
• ونرجع نقيف تاني.
• تعجبني قدرة الاهلي المصري في الخروج بالنتيجة التى يريدها في ارض الفريق الذي يلعب معه.
• عندهم عزيمة وارادة واصرار ..لغاية آخر ثانية من عمر المباراة.
• طبعا باستثناء قدرتهم على الانتصار على الهلال – عشان الهلال جندل ليك الاهلي المصري وهو في عظمته بقيادة الحضري ووائل جمعة وشادي محمد ومحمد شوقي وابوتريكة وبركات وفلافيو وجيلبرتو بثلاثية زي الما حصل حاجة.
• العجور لو كان بتكلم كان قال حاجة.
• الهلال كسر ليك قاعدة الاهلي المصري ..وضربو ليك بثلاثية …نجيب محفوظ ما عملها.
• الغريبة ان كل المباريات الكبيرة التى لعبها الهلال وكانت (ثارية) عنده كانت خالية من (ضربات الجزاء).
• ولا ضربة.
• انتصرنا على الاهلي المصري بثلاثية من غير الاستعانة بي صديق.
• من غير (ضربة جزاء).
• وكان الرسم الهندسي للمباراة قد بدأ من داريوكان ..كورة معكوسة من الكورنر.
• قون.
• يعني ح تكون الموناليزا.
• الهدف التاني من (سقط لقط) … المستكاوي الى الآن نفسو قايم.
• الزول دا كل ما يكتب ليه عمود – بتذكر الموقف دا.
• الهدف كان سجلو (الصبي) اسحاق كرنقو في شباك الحضري من مسافات بعيدة ما فيها رادار..ولا بوليس حركة.
• الهدف الثالث والذي وضع النهاية للمباراة ..سجله (قودوين)…بتبادل وتوافيق مع هيثم مصطفى.
• ناس شادي محمد جابوهم ليك يتخابطوا بعد الهدف زي البفتشوا ليهم في (مرارة).
• وائل جمعة زي الزول المشي يجيب (الملاحة).
• صلعتو (ترقش) مع الهدف متل استوب الكوبري طوالي فاتح.
• واسامة حسني بيلبس في الفانلة برة.
• حالة صعبة شديد.
• معجزة نتيجة مباراة الهلال والاهلي ..ان الاهداف الثالثة كلها جاءت في الشوط التاني.
• دا علم براهو.
• وزي ما قلت ليكم في بداية العمود ..اهداف ما فيها اي (ضربة جزاء).
• اهداف ناصحة.
• او اهداف ناصعة.
• ما في اي لولوة.
• لكن مع ذلك الاهلي المصري قادر بالعودة بالنتيجة التى يريدها عندما يلعب خارج ارضه.
• الاهلي المصري كان قد تعادل مع الصفاقسي بهدف لكل في القاهرة في نهائي بطولة الاندية الافريقية.
• اي زول قنع من الاهلي.
• بما في ذلك الاهلاوية نفسهم.
• حتى جاءت الدقيقة (92) وكان عند ابوتريكة رأي تاني …ليسجل هدفا يحقق به الاهلي المصري البطولة.
• المباراة كانت تاريخية.
• والهلال ما بعيد من التاريخ.
• قادر اليوم ان شاءالله ان يحقق نتيجة تأهله الى النهائي.
• وان نحقق الكاس.
• هذا الشعب ..عمرو ما راهن على حاجة ساكت.
• هذا التفاؤل الذي هو عند جماهير الهلال ما طالع من فراغ.
• يعني شنو لو جبت ليكم هدفين.
• ما صعبة عليكم.
• انتوا قادرين.
• سجلوا اكبر قدر من الاهداف ..بعد ذلك ..ما في مشكلة لو قبلت شبكتكم هدف.
• جيبوا تلاتة اهداف ..عشان ترتاحو.
• اعملوها يا اتير.
• انتوا قادرين على ذلك يا اندرزينهو.
• المهم ما يسجل هدف مبكرا في الهلال – عشان ما يحسم المباراة.
• حتى لو لم تسجلوا في الشوط الاول ..حافظوا على نظافة شباك الهلال.
• انتوا قادرين على التسجيل في الشوط التاني.
• ما تستعجلوا.
• ألعبوا كورتكم.
• ولو الهلال كان في يومو بتعودوا ان شاءالله بالتأهل من الجزائر.
• واثقين نحن من ذلك.
• وطمعانين في الكريم.
• يا الله انصر الهلال …واجعله يحقق نتيجة تؤهله الى نهائي البطولة.
• 90 دقيقة …خالصة ان شاءالله للهلال.
• ……………..
• ملحوظة : وفي انتظار الواحدة والربع صباحا – عشان نقول وكانت ساعة النصر في اكتمال الهلال.
هوامش
• الكتابة بي وجع الضرس – حاجة لا تطاق.
• الكتابة ممكن تقبل اي شيء إلّا وجع الضرس.
• وجع الضرس ..الليلة بشيلو بشه ان شاءالله.
• مشيت لي دكتور اسنان ..الضرس البيوجعك ..بيقلع الضرس الجنبو.
• في انتظار ان يكتمل الهلال.
• وفي كل الاحوال ..سوف نقبل بكل النتائج.
• شكرا ليكم ما قصرتو.
• وان شاءالله جزاء جهدكم هذا تكونوا الليلة في النهائي.
• ونجيب الكأس.
• نحن تاني ما بنقيف.
• ولا بنلعب.
• هدفين كتيرة على الهلال.
• الثلاثية اليوم ان شاءالله يحققها الهلال في الجزائر.
• تلاتة اقوان عديل كدا.
• ولا اتنين.
• وشبكة مكسيم ..مقفولة بالطبلة والمفتاح.
• ألعبوا بعيد.
• وان شاءالله …الواحد الاحد ..يتأهل الهلال اليوم للنهائي.
• قولوا يا رب.
• وما تمشوا بعيد.
• ………..
• عاجل : والصبر مفتاح الفرج.
إنضم لقناة النيلين على واتساب
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة