(عطرون) سجلتو الحكومة اي مواطن عندو (وقية) فيه

المريخ ح يشرك (الوك)…الاندية ح تشتكي ..الاتحاد ح يقبل الشكوى.. لجنة الاستئنافات ح ترفض الشكوى..الاتحاد ح يطلب مراجعة فحص
كريم الحسن سألنا من كورتو – قالوا لينا كورتو دي في (صيوان) ما بتلعبو
ناس سمير فضل والفاتح خضر وابونائب ..ديل عليكم اللـه في (عزاء) ما عاوزين نشوفهم تاني
عنكبة من الاعارات الكتيرة بقى زي (لبسة) الطفل البتشتريها ..تقوم تلقاها صغيرة ..تقوم ترجعها تاني لصاحب المحل
= الناظر لتسجيلات المريخ هذا الموسم يصل الى قناعة تامة ان المريخاب قنعوا من تحقيق الانتصارات في المستطيل الاخضر.
بقوا ناس مكاتب ساي.
اي زول وصل الى قناعة تامة ان المريخاب سوف يتجهوا في الموسم الجديد اتجاه صريح وواضح الى اسامة عطا المنان (المكلف) بتحرير كل الاوراق التى يريدها المريخ.
اذا نظرنا الى تسجيلات المريخ في التسجيلات الرئيسية سوف نصل الى تلك القناعة التى تثبت ان المريخ معنى فقط بتحقيق الانتصارات في (المكاتب).
نمسكها واحدة – واحدة.
اصلو ما مستعجلين – ورانا شنو نحن؟.
لو عاوزين تجيبوا ليكم ورقة وقلم نحن معاكم.
اول تسجيلات المريخ في التسجيلات الاخيرة كان اللاعب (خالد النعسان) وهو لاعب قيّد في كشوفات (الرديف) …زي نوع (النعسان) دا نحن ما بنعدو في التسجيلات.
عندنا منو كتير.
يكفي فخرا ان الهلال في كشوفات الرديف هذا الموسم سجل هداف دوري الثانية في الخرطوم حسن الحرية والمهاجم كالو واباذر وباسل واحمد ميسي من رديف المريخ واحمد روني وصداح دهب وايمن الموردة.
خالد النعسان مع الجماعة ديل في (الكنبة) ما بقعد – ولا تزعجوا نفسكم ساكت.
بعدين خالد النعسان ذاتو سجلوه بـ (التقسيط) يعني الزول دا كل ما يرفع ليه كورة بقول عاوز ليه (قسط) من اقساط تسجيلو.
نحن خالد النعسان دا لا عارفنو لاعب لا عارفنو (تلاجة) البسجلوه بالاقساط دا.
المريخ في جانب اللاعبين الوطنيين سجل ايضا اللاعب (عطرون).
عطرون دا نحن لمن سألونا منو قالوا لينا في (تصوير المستندات) ما فيه كلام.
واللـه الزول دا بخت ليك صورة للمستند …تحلف تقول (الاصل).
عطرون قالوا مع تصوير (المستندات) حريف في (شوربة العدس).
قلنا ليهم (شوربة عدس) شنو كمان؟ ..انتوا الزول دا جبتوه بالغلط.
قالوا لينا اصلو ناس مريخ كوستي ديل بسجلوا ساكت.
مرات بمشوا يسجلوا من موسم الحصاد.
البلعب في الجنوب بجيبوه.
والبلعب في يوغندا بجيبوه.
هسع لو فتشنا فريقهم بنلقى لينا واحد فيهم من (اثيوبيا).
اصلو ما تستبعدوا الموضوع دا.
غايتو يا ناس المريخ (عطرون) دا بنفعكم في (السفريات الخارجية) – قلبو قوي ما قاعد يخاف ليه من طيارة.
سفر بسافر ليكم لكن تاني ما عندو ليكم اكتر من كدا.
المريخ هذا الموسم ايضا سجل (الوك) وهو لاعب لا يمكن الاستفادة منه بسبب مخالفاته التى وقع فيها اللاعب ووقع فيها المريخ.
وقبل ذلك وقع فيها مريخ كوستي.
اللاعب ما فيه كلمة …لكن ح تستمتعوا بيه فقط في (التمارين).
غايتو يا ناس المريخ اضفتوا لي (كشفكم) تراوري آخر.
في جانب المحترفين الاجانب المريخ هذا الموسم سجل ليه لاعب اجنبي واحد وهو كريم الحسن.
كريم الحسن دا سألنا من كورتو – قالوا لينا كورتو دي في (صيوان) ما بتلعبو.
كورة ونسة ساكت.
لو اجتهدتوا معاه شديد كدا ممكن يربع ليكم عشرة الكوتشنية.
في (الحريق) قالوا حريف ما بفك الخمسين.
لكن في الكورة من اربعة عصر ببقى زول (كشافات).
الكشافات مولعة بقول ليك مالها مضلمة كدا.
الكورة عصر ..بقول ليك من الليل يدخل ما بشوف سمح.
انتوا ما طالبني حليفة لكن عطرون وكريم الحسن ومعاهم اي واحد من (الزهور والورد) لو لمّا فيهم (ولاءالدين) برجع اي واحد فيهم الى مسقط رأسه.
اول حاجة عطرون بمشي كوستي.
الوك برجع (اويل).
كريم الحسن بمشي (اكرا).
بفرتكم ليكم فرتيك الجن.
عطرون دا قالوا ليك نوع المدافعين البدخلوا بالجنبة.
تقول شايل ليه صينية باسطة.
اما كريم الحسن فهو من المدافعين البيدسو ..اصلو ما بدخل ليه على مهاجم بدفر المدافع القدامو بس.
كريم الحسن مدافع (تقيل) بتسفيدوا منه في المباريات الخارجية ..لمن تدخلوه في الزمن البدل الضائع.
بيكسر ليكم الزمن.
غير كدا ما تعشموا في حاجة منو.
المريخ من (فلستو) الموسم دا ..قروشو نقصت لتسجيل بكري بشير قام رجع (عنكبة).
يعني عنكبة راجع ..رجعة (فلس) ساكت.
موش مرات الزول بكون عاوز ليه كيلو ضان ..يلقى قرشو شوية يقوم يشتري ليه ربع كيلو عجالي ويرجع البيت.
الموضوع دا هسع بقى على المريخ.
قروشهم نقصت ..جابوا عنكبة.
عنكبة من الاعارات الكتيرة بقى زي (لبسة) الطفل البتشتريها ..تقوم تلقاها صغيرة ..تقوم ترجعها تاني لصاحب المحل.
غايتو الزول وقت يكون ما عندو قروش بعمل البعملوا فيه ناس المريخ ديل.
قالوا ليك في واحد في الحلة عاوز يعرس ..وما عندو قروش.
كل ما يحدد ليه تاريخ ..والتاريخ يقرب ..يقوم يقول عندو (عمتو) اتوفت عشان كدا ح يأجل العرس شوية.
15 عيد مرت فيه ساكت.
21 بنت خطبها …وخطوبته ما اتكللت بالنجاح.
آخر حاجة ناس الحلة قالوا يدخلوه (العرس الجماعي) عشان يكمل عرسو.
العرس الجماعي بتمو الحكومة.
زي حكاية ناس المريخ ديل تسجيلاتهم دفعتها ليهم الحكومة.
يعني عطرون دا اي مواطن سوداني عندو فيه (وقية).
يعني ناس اسامة ونسي يجيبوا ليكم قروش من وين؟.
قروش عند مدني الحارث؟.
جمال الوالي قلتوا لينا رجل اعمال.
اسامة ونسي دا برضو رجل اعمال.
يا جماعة خلوا الطابق مستور.
ما تخلونا نتكلم ساكت.
نحن لو اتكلمنا ما بنسكت.
لكن بنفس الطريقة (الهبتلية) التى تمت بها تسجيلات المريخ اعملوا معسكركم – اصلكم انتوا ما باقيين على لاعبين الكورة كتير.
لو باقيين على الكورة ما بتسجلوا ليكم لاعب ح ينسف الموسم.
في مريخابي قال لي انتوا (الوك) البتتكلموا فيه دا ح يجيب للمريخ الدوري والكاس.
قلت ليه كيف؟.
قال لي المريخ ح يشرك (الوك)…الاندية ح تشتكي ..الاتحاد ح يقبل الشكوى.. لجنة الاستئنافات ح ترفض الشكوى.
الاتحاد ح يطلب مراجعة فحص.
الاسئتنافات ح تصر.
الاندية ح تنسحب.
السلطة ح تدخل.
الوزير ح يكون ليه لجنة.
البرلمان ح يكون ليه لجنة تانية.
رئاسة الجمهورية ح تجتمع بالاندية المتضررة والاتحاد.
الاتحاد ح يدعوا لجمعية عمومية…ويمنح المريخ كاس الدوري والكاس.
شفتوا كيف؟.
نحن الحاجات دي حافظنها.
الفيلم دا معيود.
قلت ليكم (الوك) دا ح يعملها – قعدتوا تغالطوا فينا.
عشان كدا ..يا ناس المريخ ما في داعي للمعسكر الخارجي.
ما في داعي للجهاز الفني الاجنبي.
لو عينتوا ابوجريشة بمسك ليكم الجهاز الفني.
تعبانين ليه – وقت اسامة عطا المنان قاعد.
اسامة عطا المنان اصلو ما بقصر.
بالمناسبة من الآن لو كونوا لجنة الاستئنافات ولقيتوا فيها اي (شق) ما تشاركوا في الممتاز.
لجنة الاستئنافات لازم تكون لجنة محايدة وشريفة وعندها رأي.
ناس سمير فضل والفاتح خضر وابونائب ..ديل عليكم اللـه في (عزاء) ما عاوزين نشوفهم تاني.
………
ملحوظة : نعمل بيهم شنو؟.
هوامش
يا ناس الرابطة البلد دي ما فيها قانون.
انسحبوا بس.
قلنا ليكم انسحبوا ..عملتوها لينا (شكاوي).
تهبط الرابطة التى تطبق القوانين واللوائح ..ويبقى مريخ كوستي المخالف.
نتمنى ان يحسم موضوع المدرب سريعا.
المدرب بدون عقد ما بقعد ليكم.
نسبة للظروف المالية الصعبة التى يمر بها المريخ اتوقع ان يكون مدرب المريخ القادم عبدالمجيد جعفر.
عبدالمجيد جعفر مدرب خطير وجيد ..لا ادري لماذا لا تستفيد منه اندية الممتاز.
اتمنى ان تكون هناك خانات خالية في النيل شندي لتسجيل الباشا وبلة جابر.
اتخيلوا النيل شندي بقيادة العجب والباشا وموسي الزومة وبلة جابر.
الباشا هو المكسب الحقيقي للنادي الذي سوف يسجله.
بكري بشير قدم موقفا تاريخيا في الانتماء والكلمة.
نرجو ألا نقسو على صلاح الجزولي.
لا نريد ان نفقد صلاح الجزولي من بداية الموسم بسبب الهجوم والآراء التى تكتب عنه.
صلاح الجزولي مهاجم يحتاجه الهلال في المواجهات الافريقية لأنه لاعب يمتلك بنية جسمانية جيدة.
لذلك لا تفقدوا هذا اللاعب.
انظروا الى تمسك اللاعب بالهلال.
هو اخطأ لأنه لم يعلن عن رفضه.
لكن في النهاية تختلف طرق التعبير من شخص لآخر.
عاينوا الى تمسكه بالهلال.
وامنحوه فرصة.
……..
عاجل : خلونا نلعب كورة بس.