كتــــــابــــــة عمـــــــود في (الضــــــلمة)

يا سلك …يا مزمل اقول ليكم حاجة ..يا كابو …يا الجاك ..احسن ليكم من هسع تتعلموا كتابة المرثيات
عطرون وضفر وكريم الحسن في تشكيلة واحدة…زي كيلو اللحمة البيدوك ليه كلو عضام
الايامات دي عندنا جو شبه (ربيعي) …اعتقد ان (قطوعات الكهرباء) في هذا الجو (حسادة) ساكت…وسمير فضل

ازمة الموسم سببها لجنة الاستئنافات.
ازمة الغاز دي برضو ما بستبعد يكون وراءها لجنة الاستئنافات.
وقطوعات الكهرباء ايضا.
والموية.
وقطن المحور الوراثي.
القطن ذاتو بقوا يلصقوا ليه اسم زي (الدواء).
فلهمة ساكت.
السينما المصرية تعاملت مع (قطوعات الكهرباء) على انها شكل من اشكال
(الرومنسيات) للتداعي مع القمر والسمر.
افلام فاتن حمامة وعمر الشريف لا تبعد عن ذلك السمر (النيلي)…هي اشبه
بليالي الجمعيات الادبية القديمة.
السينما الغربية تعاملت مع (قطوعات الكهرباء) على انها (عمل تخريبي)
ومقدمة لكارثة قادمة.
بوليوود القطوعات فيها يعني ان (المفوض) يريد ان يزور في صناديق الانتخابات.
او ان البطل يريد ان يخطف البطلة من غرفة العناية المركزة.
اما واقعنا السوداني فقد تعامل مع قطوعات الكهرباء على هذا (الحنك).
في فصل الصيف – يقولوا ليك القطوعات نسبة لارتفاع درجات الحرارة وقلة
مخزون الماء في الخزانات ونتيجة للاستهلاك الكبير للكهرباء…وسمير فضل.
في الشتاء قطوعات الكهرباء ترجع لانحسار النيل….وسمير فضل.
في الخريف قطوعات الكهرباء ترجع الى كميات الطمي الكبيرة في المياه…وسمير فضل.
الايامات دي عندنا جو شبه (ربيعي) …اعتقد ان (قطوعات الكهرباء) في
هذا الجو (حسادة) ساكت…وسمير فضل.
الكتابة والكهرباء قاطعة بتنتج مجموعة من المفارقات العجيبة.
مرة دخلنا مباراة للهلال والمريخ – الكلام دا بدري شديد.
زمن تنقا بعكس ليك الكورة معاها شوال عجور ..ناس كمال عبدالغني يجروا
على شوال العجور ..الريح كاريكا يجيب قونو بي غادي.
في تلك المباراة الهلال كان متقدم 3 / صفر على المريخ قبل انقطاع
التيار الكهربائي.
الكهربة قطعت 5 دقائق ورجعت لقينا ليك النتيجة 4 / 3 للمريخ.
الحصل شنو ما عارف؟.
ما تقطع يعني؟.
قالوا لينا لجنة الحكام استغلت قطوع التيار الكهربائي حسبت 3 ضربات
جزاء للمريخ ومنحت المريخ هدف من تسلل (واضح).
قلنا ليهم في (الضلمة) دي عرفتوه كيف تسلل (واضح) يا ناس الهلال.
قعدنا نستغرب ..وقلنا معقولة المريخ دا في (الضلمة) دي يسجل ليه اربعة
اقوان بفضل لجنة الحكام.
اصلو ما ممكن.
ولا معقول.
ولا بتجي.
قالوا لينا لجنة الاستئنافات عملت اكتر من كدا في (وضح النهار) وفي
حضور البرلمان ورئاسة الجمهورية ووزير الشباب والرياضة ووزير العدل منحت
المريخ (5) نقاط – والدوري والكاس – لجنة الاستئنافات في (النهار) بتعمل
كدا لجنة الحكام في (الضلمة) غالبها تمنح المريخ (3) ضربات جزاء وهدف من
تسلل واضح.
غير الـ (8) مليارات التى منحت لمجلس اسامة ونسي للتسجيلات.
سكتنا ما قلنا شيء.
نقول شنو عاد؟.
قطوعات الكهرباء بتعمل اكتر من كدا.
زمان ايام قطوعات الكهرباء كانت مبرمجة بصورة يومية ..قطعت علينا
الكهرباء ونحن بكريتها عندنا امتحان جغرافيا.
الكهربة قطعت ..قعدنا نذاكر في (التاريخ) ونحن ممتحنين (جغرافيا) –
الضلمة كانت شديدة ..الجغرافيا من التاريخ ما بتقدر تفرزها.
لمن الواطة شرقت اكتشفنا ليك اننا قاعدين نذاكر بالفوانيس في
(الجغرافيا)..ونحن ممتحنين (تاريخ).
بتحصل.
مرة كتبت لي عمود عن (محمد أحمد بشه)..الكهربة قطعت من السطر التاني.
الصباح بقرأ في الجريدة لقيت نفسي كاتب عن موسي الزومة.
قلت معقولة الكهربة تعمل كدا.
بشه مشى وين؟.
كتمتها في قلبي و ما قلت شيء.
مرة قاعدين نحضر في مباراة في الدوري السعودي بين الهلال والاتحاد
..مباراة موت احمر.
مباراة مولعة نار.
70 دقيقة ما شفت لي جدعة تماس.
70 دقيقة ما شفت لي ضربة مرمي.
الكورة يا قون يا كورنر.
حاجة لا تتخيل.
مباراة متعة.
في الشوط التاني الكهربة قطعت.
طوالي قلبنا القناة جبنا مباراة المريخ ومريخ كوستي في الدوري الممتاز
..كانت شغالة في قناة النيلين.
اتصرفنا..قلنا احسن من ان نقعد ساكت في (الضلمة) دي.
ح تقولوا لي كيف تابعتوا المباراة في قناة النيلين والكهربة قاطعة؟.
ح اقول ليكم عليكم اللـه مباراة المريخ ومريخ كوستي عاوزة ليها (كهربة).
بي (فانوس) ساكت ممكن تتابعها.
يمين مباريات المريخ دي بي شخيط واحد في بطارية الموبايل ممكن تتابعها.
بالمناسبة ..المريخ في الموسم القادم عطرون وضفر والريح علي وعلي جعفر
وعنكبة وبكري المدينة وخالد النعسان.
عليكم اللـه هسع دي كورة وإلا اجتماع بتاع لجنة تأبين.
حزن مبالغ فيه
•اتخيلوا معاي (المسافة) دي.
عطرون وضفر وكريم الحسن في تشكيلة واحدة…زي كيلو اللحمة البيدوك ليه
كلو (عضام).
زي الفول ..لمن يقلب (موية فول).
يا سلك …يا مزمل اقول ليكم حاجة ..يا كابو …يا الجاك ..احسن ليكم
من هسع تتعلموا كتابة المرثيات.
الموسم القادم لو ناس سمير فضل اتخارجوا …انتوا والامير والنسور ح
تكونوا في نفس المركز.
لكن هسع دا ما موضوعنا.
خلوني مع قطوعات الكهرباء.
انا هسع ما عارف بكتب في شنو في (الضلمة) دي؟.
مرة ناس حسن التمتلي …جوهم ناس يطلبوا يد بنتهم الصغيرة.
الجماعة كراعهم حارة ..دخلوا البيت كدا اتكلموا عن الخطوبة الكهربة قطعت.
اهل البنت قالوا نعقد طوالي.
نحن ما عندنا (خطوبة).
الخطوبة ذاتها بقى ما فيها ليها داعي مع (الواتس اب) دا.
الناس طبيعى كدا خاطبة.
اهل البنت قالوا نعقد.
الكهربة رجعت بعد 45 دقيقة.
الولد لقى نفسو عاقد على اخت البنت الكبيرة ..مطلقة وعندها اربع اطفال.
قال ليهم دا شنو دا…انتوا لخبطوا لي في (العقد) انا ما عاوز الزولة
دي ..انا عاوز اختها الصغيرة.
قالوا ليه واللـه نحن لغاية (الشربات) الاتوزع ..كنا فاكرينك عاقد على الصغيرة.
لكن الكهربة لخبتطنا نعمل شنو؟.
العريس قال ليهم واللـه كهربتكم دي بنتظرها تقطع تاني ..واطلق ليكم بنتكم دي.
انا عاوز (سحر) تعقدوا لي على (ست النفر).
قول كهربتكم قاطعة ..موبايلات تنوروا بيها ساكت ما عندكم.
هسع بنتكم دي انا اجيب ليها (شيلة) وإلّا اسجل ليها اولادها في المدارس.
صاحبكم زعل زعل مبالغ فيه.
الجماعة قالوا ليه ما تزعل – الكهربة اصلها بتعمل كدا.
واحد من الجماعة شفوت ..قام ليك نافش ريشو ..وقال ليه يا زول اخير انت
..واللـه انا يوم داك الكهربة حرقت لي (تلاجة) عديل كدا.
برضو مرة كدا مشينا لينا حفلة ..الفنان تقيل – اول اغنية دخل ليك فيها
اغنية (عصافير الخريف).
مع الكوبليه التاني ..الكهربة قطعت.
الفنان طوالي قلبها ليك (طيري يا قمرية وركي في الزنكية).
…………
ملحوظة : شفتوا الكهربة بتعمل شنو؟.
هوامش
ناس المريخ خلوا العجب.
وخلوا جمال الوالي.
وخلوا تحويل الرصيد.
ومسكوا ليك في (الوك).
الحمدلله انشغلوا لينا في رقبتهم دي.
ناس الهلال ..خلوهم يحسموا امورهم.
ويعملوا حاجاتهم.
ينجزوا ملف المدرب.
ويشوفوا موضوع المعسكر.
عاوزين لينا معسكر يستمر (40) يوم على الاقل.
في ظل كل هذا الصرف …الكاردينال ما حصل شكا.
ثابت..وباقى.
هلال 2016 ان شاءاللـه للفرح.
الهلال يحتاج الى ان يقيم اللاعبين الذين ضماهم في الرديف ..والمدرب
عاوز يشوف الحاصل بي نفسو ..عشان كدا الكشف الافريقي لازم يكون ناقص 5.
بعد اتضاح الرؤية واختبار اللاعبين يمكن ان يضيف الهلال (5) من كشفه
الحالي ومن تسجيلاته القادمة اذا وصل باذن اللـه مرحلة المجموعات.
شكري وان تأخر يبقى عريضا لمنتدي الهلال السوداني ..وهم يمنحونا اكثر مما نستحق.
كنا عاوزين نرد عليكم بعد الكاس.
كذلك نشكر كثيرا منتديات الفنان طارق العوض الذي كرمنا في بعض كلمات
كتبناها في حق طارق العوض الفنان الذي خلط بين النخيل والطنبور فكان طارق
العوض.
المنتديات اصبح تقوم بدور اكبر من الصحافة.
فيها نشاط وحيوية وقدرات عريضة في المعرفة والثقافة والعلم.
شكرا كثيرا منتدي الهلال والسوداني ومنتديات طارق العوض.
بالمناسبة المرحلة القادمة مرحلة اعلام المنتديات والقروبات.
على الاقل فان العلاقة الاسرية تجمع بين اعضاء المنتدي والقروب الواحد.
عرفت ليكم ليه اسامة عطا المنان في كل موسم بيعمل ليه (ازمة).
عشان يصرف الناس والاعلام من (تاكس).
ومن التجاوزات المالية في الاتحاد.
السلطات ذاتها بتنسي الحاجات التانية وبتنشغل في الازمة التى يحدثها
اسامة عطا المنان.
اسامة ازمات.
………….
عاجل : شامي لي ريحة (انسحاب)!!.