محمد عبد الماجد

الاضاءة الجديدة دي مركبنها عشان خاطر شيبوب


انت يا شيبوب…وقت براك بتجي راجع للهلال وبتمشي للكاردينال بي (كرعينك)..النطة في جوبا لزومها شنو؟
يا ناس لجنة التسيير نكون من هسع واضحين معاكم..شغلكم بتاع التسجيلات دا لو عملتوه في انتخابات المريخ صوت واحد ما بتجيبوه
باللـه ناس حق (تذاكر) السفر ما عندهم ..اليوم والتاني يأجلوا في سفرهم – وناس بركبوا في الاضاءة الجديدةنحن عشان الغلاط دا ..شيبوب دا جبنا ليه اضاءة واضحة ..عشان ياخد راحتو تاني في (النطة)

امس في قوون خبر منشور بـ (العربي) – لكن ناس المريخ الخبر بكون ما وقع ليهم.
بكون فاكرنو خبر (انجليزي).
في قوون امس : (تشرع الجهة المنفذة لمشروع جوهرة الهلال الزرقاء في تركيب الاضاءة الجديدة للملعب بابراجها في اطار عملية الابدال والاحلال التى طالت حتى ابراج الاضاءة القديمة. المنتج الجديد والذي رصدته) قوون( حمل توقيعا المانياً استصحب حداثة المشروع نفسه وخاصم كل الاشكالات القديمة التى كانت تمثل نقاط ضعف في اضاءة ملعب استاد الهلال بحيث راعت الاضاءة الجديدة ذات التقنية الكهربائية العالية معادلات انكسار الضوء وطمأنت مديري عمليات النقل التلفزيوني باختفاء عهد الظل في الملعب مع اتاحة رؤية متكاملة للجماهير من المدرجات دون وجود اماكن مظلمة).
علم واللـه.
الخبر دا في البداية انا قلت ليكم مكتوب بـ (الانجليزي).
انا ذاتي طلعت غلطان.
الخبر مكتوب باللغة الالمانية.
عشان كدا المريخاب ما فهموا فيه اي شيء.
انا قريت ليك الخبر ..وطربني ليك زي كأني بقرأ في (جميلة ومستحيلة).
اتبسط ليك انبساطة شديدة.
وقلت عشان ناس المريخ ما تفوتهم حاجة ..اقوم اترجم ليهم الخبر.
في الخبر : (الاضاءة الجديدة ذات التقنية الكهربائية العالية معادلات انكسار الضوء وطمأنت مديري عمليات النقل التلفزيوني باختفاء عهد الظل في الملعب).
ضل ما في تاني.
يعني يا ناس المريخ …الشغل دا مقصودين بيه عديل كدا.
باللـه ناس حق (تذاكر) السفر ما عندهم ..اليوم والتاني يأجلوا في سفرهم – وناس بركبوا في الاضاءة الجديدة.
عليكم اللـه لو ما فلهمة ساكت ..الاضاءة الجديدة دي – تشتغل ليكم كيف مع الكهارب القاطعة دي.
الناس ديل قروشهم كتيرة ساكت.
اضاءتكم دي يا ناس الهلال إلّا يولعها ليكم (شيبوب).
بالمناسبة نحن الاضاءة دي جايبنها مخصوص عشان (شيبوب).
جبناها لي شيبوب عشان نرتاح من (عبرت وما عبرت).
الغلاط دا نحن في الهلال ما عندنا.
السنة كلها تتغالطوا فينا (عبرت – وما عبرت).
نحن عشان الغلاط دا ..شيبوب دا جبنا ليه اضاءة واضحة ..عشان ياخد راحتو تاني في (النطة).
شيبوب دا اصلا جنو (نط).
في الجزائر عندو (نطة) …الحكم ما حسبها للمريخ هدف.
ونطة شيبوب في جوبا ..برضو ناس المريخ ما استفادوا منها حاجة.
ما محسوبة ليهم.
انت يا شيبوب…وقت براك بتجي راجع للهلال وبتمشي للكاردينال بي (كرعينك)..النطة في جوبا لزومها شنو؟.
في داعي تنط في جوبا وترجع في الخرطوم.
ما كان في داعي للتسلق في الاعمدة.
والقفز من الطابق الرابع.
وفي النهاية بتمشي ترجع للهلال.
قبل ما اترجم ليكم موضوع (الاضاءة) ..احسن احكي ليكم موضوع (شيبوب).
ترجمة الخبر ذاتو بعد كدا ما في داعي ليها في (البرد).
دا (برد) يترجمو فيه (خبر).
قالوا ليك ..والكلام دا حقيقي ..ما كلام (درامي) ساكت زي كلام سلك وكابو.
الكلام دا حصل بالجد جد.
قالوا ليك شيبوب الساعة سبعة صباحا كدا كان في منزل اسامة ونسي …جابوه من المطار ..ومشوا بيه على اسامة ونسي طوالي.
دا (برد) يتفاوضوا فيه لو ما ساي.
الساعة تسعة ..شيبوب قال لي ناس المريخ انا ماشي البيت …عاوز اسلم على الوالد والاسرة والاخوان.
ناس المريخ قالوا ليه اصلو ما في مشكلة …(خاصة بعد ان قرأوا تصريحات الكاردينال في الجرايد) – الهلال يصرف نظر من شيبوب.
واسرة شيبوب تعيد حافز تسجيل شيبوب للهلال.
لجنة التسيير (جديدة).
ما عارفة الموضوع دا شغل بتاع (تكتيك) ساكت.
يا ناس لجنة التسيير نكون من هسع واضحين معاكم.
شغلكم بتاع التسجيلات دا لو عملتوه في انتخابات المريخ صوت واحد ما بتجيبوه.
اسامة ونسي ومجموعته قالوا لي شيبوب ما عندنا مشكلة تمشي البيت تشوف الاسرة وترجع لينا.
بس يا شيبوب نحن عندنا شرط.
شيبوب قال ليهم اشرطوا زي ما انتوا عاوزين.
قالوا ليه بيتكم ح يمشي معاك ليه (3) بودي قاردات – يسدو عين الشمس.
لو عاوز تجر ليك نفس ..لو ما رجعت ليهم ما بتقدر ترجع النفس الجريتو.
شيبوب قال ليهم ما في مشكلة.
قبل ما اتم ليكم الحكاية ..شيبوب دا في الكنغو كان محتجز مع البودي قاردات بتاعين المريخ من قبل ادارة مازيمبي.
يعني البودي قاردات ديل شيبوب متعود عليهم من الكنغو.
بودي قاردات مازيمبي ما عملوا ليه حاجة – تفتكروا بودي قاردات المريخ بقدروا يعملوا ليه شيء.
شيبوب طلع في حراسة مشددة من جانب بودي قاردات المريخ.
قبل المجموعة ما تتحرك ..ادارة المريخ شالت ليها (خروف) وقالت يضبحوه في بيت شيبوب بمناسبة عودة شيبوب.
خروف كرامة كدا.
كرامة العودة.
ناس شيبوب وصلوا البيت بي خروفهم.
ضبحوا ليهم الخروف ..سلخوه وعلقوه ليك ..وضربوا ليك (المرارة).
البودي قاردات سرحوا ليك مع (اللحمة) ضربوا ليك اللحمة دي زي (اللقيمات).
نسوا ليك موضوع (شيبوب).
طبعا اي بودي قارد ضعيف جدا قدام اللحمة.
في اللحظة دي وصل العقيد حسن محمد صالح بعد ان علم بوجود شيبوب في البيت.
المخابرات اشتغلت ليك.
بودي قاردات المريخ تلمسوا مسدساتهم ..وقت شافوا العقيد حسن محمد صالح.
العقيد حسن محمد صالح ..قال ليهم يا جماعة انا جيت اطمئن على شيبوب ..اخبارو في جوبا اتقطعت مننا.
ونحن الولد دا سقناه من البيت دا ..والحمدللـه هسع رجع بيتو.
حسن محمد صالح قال لوالد شيبوب ولدك رجع ليك ..ومبروك ليه المريخ ..نحن ما عندنا فيه نصيب.
اسرة شيبوب طبعا اسرة كريمة حلفت على العقيد حسن محمد صالح إلّا يقعد يفطر.
لازم ياكل من الخروف الجابوه ناس المريخ.
حسن محمد صالح قال ليهم ما في مشكلة.
في اللحظة دي كانت في توجيهات (عليا) – الظاهر عليها طالعة من الكاردينال.
شيبوب شال تلفونو ..وعمل فيها بتكلم في مكالمة خاصة.
مشي على (الماسورة).
المرة دي ما عشان ينط منها – المرة دي عشان يغسل ايدو فيها.
وهو بتكلم في التلفون.
والعقيد حسن محمد صالح بضرب في (شية) المريخ.
شيبوب بتكلم بالتلفون ..وماشي يبعد عن البيت.
يتكلم وماشي غادي.
لمن اختفى عن الانظار.
في اللحظة ديك ..عربية الهلال كانت (مركنة) في جانب.
شيبوب بدون ما يقولوا ليه اركب.
ركب العربية.
شيبوب عارفها كويس.
العربية دي ركبها قبل كدا.
هنا العقيد حسن محمد صالح قال للبودي قاردات ولاسرة شيبوب اها يا جماعة استأذن انا.
العقيد طلع.
الجماعة اكتشوفوا ليك (شيبوب) غير موجود.
ضربوا تلفونات.
لا يمكن الوصول اليه.
وقت الجماعة بلغوا ادارة المريخ انهم فقدوا الاتصال بـ (شيبوب)..صور شيبوب والكاردينال كانت نزلت في المواقع.
شيبوب لبس (الكسكتة).
المريخاب ما حارقاهم (الكسكتة).
المريخاب حارقهم (خروفهم) الراح ساكت دا.
العملية تمت بنجاح تام.
وفي انتظار توقيع شيبوب.
ثم ظهوره في تونس في معسكر الهلال بسوسة.
قالوا ليك المريخ استنفروا قواعدهم في (تونس).
وقالوا عاوزين شيبوب (ينط) من سوسة.
قالوا (خروفهم) ما بروح ساكت.
بس قبل ما ادخل بيكم على (الهوامش) – عاوز اقول ليكم شيبوب في (جوبا) خطفتوه من فندق يا ناس المريخ.
ونزلتوه بالمواسير.
وخليتوه ينط من الطابق الرابع.
نحن في الهلال شيبوب مرتين سقناهو من (بيتهم).
وبمباركة الاسرة وبرغبة (شيبوب).
شلناه من (كشف) المريخ عديل كدا.
وبعد ما ضبحتوا ليه (خروف).
مهم جدا ..ان تعرفوا ان رغبة شيبوب الاولى هي ان يلعب في الهلال.
شيبوب ما فاوض ولا ناقش في (قرش).
الزول دا عاوز يلعب في الهلال.
وهو عمل المستحيل عشان يلعب في الهلال.
عرض حياته للخطر ..ووافق على انو (6) شهور ما يلعب عشان ينتقل للهلال.
شيبوب منذ فترة طويلة رفض التوقيع للمريخ كلاعب محترف.
قال ليهم (هاوي) بس.
عارفين شيبوب عمل كدا ليه؟.
عشان يمشي الهلال.
…………..
ملحوظة : الشغل دا كبير عليكم يا ناس المريخ.
هوامش
رئيس المريخ قال شيبوب لن يلعب في الهلال.
ورئيس الهلال قال شيبوب سوف يلعب في الهلال.
ونحن قاعدين.
وانتوا قاعدين.
اصلكم ما تقولوا حاجة.
مجلس المريخ الذي قال انه صرف نظر عن شيبوب وان كرامة المريخ لا تسمح بعودة شيبوب.
وان جمهور المريخ رفض شيبوب في المهرجان الفاشل.
هذا المجلس بعد الكلام دا ارسل خطاب استدعاء لشيبوب عن طريق اسرته.
في (هاوي) برسلو ليه خطاب استدعاء.
لجنة التسيير دا احسن تركز في حاجة تانية …الكورة واضح انهم ما بعرفوا فيها حاجة.
مجلس المريخ الذي قال ما عاوزين شيبوب ارسل اسم شيبوب في كشف المريخ الافريقي.
علما ان ارسال اسم شيبوب ضمن كشف المريخ لن يمنع الهلال ان يضمه لكشفه الافريقي بعد التأهل للمجموعات ان شاءاللـه.
رسلو ساكت.
يا ابوجريشة ..عليك اللـه سعر الخرفان كيف الايامات دي.
اصلكم اشتريتوا ليكم (خروف) قريب.
خروفكم كلو طلع (مرارة).
تجارب الهلال في تونس ..محتاجة ان تكون في هدوء اكثر.
الشغل الاعلامي قد يضر الهلال.
عاوزين معسكر بعيد عن الاضواء …والفلاشات والكلام الكبير.
لكن واللـه ما قادرين نمسك نفسنا في البعملوا فيه ناس ولاءالدين ديل.
ديل قالوا ليك بعملوا في عمائل.
والعجب لمن ينضم شيبوب للمعسكر في تونس.
ح تبقى حاجة ما بتخلص.
احسن شيبوب يمشي يدخل في اللاعبين.
ويتعرف على الجهاز.
عشان شهر مايو ما يحس بالغربة.
شهر مايو يكون جاهز طوالي.
الهلال اذا لم يحسم مشاكل الموسم القادم وازماته من الافضل ان لا يشارك.
احسموا الامور قبل المشاركة.
وقبل الرعاية والتلفزة.
اي موضوع معلق يعني نسف الموسم القادم.
وناس المريخ الموسم القادم ما عندهم حاجة.
ناس كريم الحسن ديل ..إلّا تلعبوا بيهم (طايرة).
كورة قدم ما عندهم.
يا ربي الليلة بسافروا..وإلّا بأجلوا تاني.
معسكرم بقى زي (الحوار الوطني).
انا قلت (الحوار الوطني).
مالي عاوز اغلط.
………..
عاجل : يا شيبوب بعد (الكسكتة) ما بتجيك اي عوجة.