محمد عبد الماجد

تصريجة (اتير توماس) ذاتها مشتاقين ليها


يبدأ هلال 2016 الظهور من ثغر السودان الحبيب مدينة بورتسودان عندما يلعب اليوم على شرف مهرجان السياحة والثقافة في بورتسودان امام فريق قورماهيا الكيني.
اصبروا يا جماعة – الناس الواقفة تقعد يا جماعة.
كلكم بتشوفوا.
الروقة بس.
الضيق كعب.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
السرة بنت جاد الله ..جاها وجع ضرس – الدكتور كتب ليها مشاهدة مباراة للهلال.
والباقي علينا نحن.
بورتسودان هي الاكثر شوقا للهلال في هذا التوقيت (البحر قايم) – باعتبار ان الهلال منذ ثلاث سنوات لم يزر المدينة بسبب هبوط هلال الساحل وحي العرب لتبقى المدينة الكبيرة والعريقة بعيدة عن الدوري الممتاز.
الليلة يا ناس بورتسودان …الزيارة في العيادات مجاني.
المستشفيات تفتح ابوابها من الساعة عشرة.
الهلال جاكم.
اهل الشرق اليوم يبدأ منهم الهلال ويظهر في شكله الجديد – حيث يتجه السودان كله لثغر السودان مساء اليوم لمشاهدة الهلال.
كل الناس في شوق لهلال السودان الذي غاب في معسكر خارجي امتد لـ (28) يوما في تونس.
28 يوم محرومين من الهلال.
الشوق كتلنا كتل.
كان كل الناس يراقبون الهلال واخباره من خلال الصحف ومواقع التواصل الاجتماعي.
يسكوا في الهلال سك.
لم يكن هناك اجمل من رسالة تصلك عبر الهاتف يكون فيها نبأ فوز الهلال في مباراة اعدادية.
تحرس الرسالة زي (غفير) الثانوية بنات.
ترقب الناس ومتابعتهم للهلال جعلت هواتفهم الجوالة اكثر احساسا وشعورا بالهلال فقد اصبح الموبايل يستقبل اخبار الهلال بفرحة كبيرة.
بطارية الموبايل نزلت من الشوق.
نشيل ونشحن في الموبايل.
الصحف ايضا تبادلت اخبار الهلال وصور اللاعبين بعد الاضافات الجديدة التى حدثت في كشف الهلال.
الاضافات لم تكن في كشف اللاعبين فقط ..الاضافات كانت ايضا في الجهاز الفني للهلال.
عشان كدا الناس شايلة الشوق بحر.
اليوم نشاهد ونرى (الفكر) الفرنسي الذي يقود الهلال – نحن مشتاقين لرؤية مدرب الهلال الفرنسي وهو واقف على الخط يوجه للاعبي الهلال.
عاوزين نشوف بفكر كيف؟.
انفعالاته؟.
وقفتو.
مشتاقين لي حاجة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
التايا بنت رحمة – جابت ليها ولد سمتو (الجوهرة الزرقاء).
مشتاقين للتسخينة ..ولوقفة جماهير المسطبة العجيبة عندما تكون هناك هجمة واعدة للهلال.
مشتاقين نشوف ناس جمعة جينارو قاعدين في (الكنبة) – شوقنا بحر.
شوقنا البحر الاحمر عديل كدا.
جمعة في الكنبة مشتاقين ليه – كيف يكون الحال لمكسيم وهو يقف على الخشبات الثلاث.
نترقب ظهور هيثم مصطفى مدرب عام ..(سيدا) لم تبعد عنه نجوميته حتى وهو قاعد في الكنبة.
الزول بنفس النجومية والبريق.
شعبيته ظلت في تصاعد مستمر – وهو بعيد عن الهلال.
الآن هيثم مصطفى يقود الهلال فنيا الى جانب المدير الفني كافالي.
عاوزين نشوف (لمسة) سيدا في الجهاز الفني.
تمريرة هيثم كان منها بيجي القون.
والآن نحن على ثقة ان توجيهاته ايضا ح تجيب القون.
عاوزين نشوف ناس مكسيم في المرمى.
اشتقنا لي اي حاجة في الهلال.
حتى (صريجة) اتير توماس اشتقنا ليها.
تقليشة عبداللطيف بويا.
عترة مساوي…وقت يقوم ويقع.
عاوزين نشوف ناس بشه ونزار حامد في وسط الهلال ..بهندسوا الحكاية زي ما بقول الكتاب.
زي الفول المصلح.
اشتقنا لي شقة الشغيل ..وقت يقوم ويتكلم مع الحكم.
يقيف زي الاسد.
اشتقنا لي بشه وهو بيأخذ ليه (نطة) لي فوق وقت يضيع ليه كورة مضمونة.
اشتقنا لي كاريكا وقت يقوم جاري ….ما في زول بيلحقو.
وقت يجري كاريكا ..ابقى انتظر الكورة في القون.
اشتقنا شديد للشغيل وقت يخم ليه لاعب – اي ركبة تمشي على حتة.
اي لاعب عندو ركبتين.
اللاعب البيقشو الشغيل بتظهر ليه (21) ركبة…غير (البنكرياسات).
كل ركبة بتمشي على حتة.
ح نقعد الليلة ونحرس التلفزيون – ما بنحول القناة.
من الساعة تسعة صباحا ح نجيب قناة البحر الاحمر.
ح نراجع عداد الكهربة.
ونمشي نجيب لينا (كهربة) للضمان.
ما عاوزين زول يجينا الساعة تمانية.
ح نقفل البيوت.
ونقعد نتفرج في المباراة.
بنجيب (اللبن) من بدري.
نحن (الشوق) كاتلنا كتل للهلال.
قاعدين نتابع في الجرايد – ونشوف في الصور.
عاوزين الليلة نشوف اولادنا.
عاوزين نفهم برانا.
نشوف شوف عين عديل كدا.
نفسنا نشوف ولاءالدين بيجيب القون كيف وقت الكورة تنزل قدامو ..يكفتها ليك زي (الحدية).
الحارس بمشي طوكر.
والباك بمشي جبيت.
وضفر بمشي سنكات.
ضفر هسع الدخلو شنو؟.
هسع لو ولاءالدين جاب ليه قون في المباراة الودية – مامون ابوشيبة يطلع بكرة ويقول ليك هدف ولاءالدين (تسلل).
عاوزين نشوف الحاجات دي.
نحن مشتاقين.
عاوزين نشوف ابوعاقلة – قالوا ليك الزول معلم كبير – بعمل ليه في حاجات في النص ..نابيلون ما بعملها.
ما عارف نابيلون الدخلو شنو في العمود.
يمكن دا الشوق.
عاوزين نشوف عمار الدمازين ..زول هادي وبيلعب بي عقل وما بطلع الكورة (ضفر).
لا ضفر ولا علي جعفر.
قالوا ليك الكورة وقت تكون عند علي جعفر – المريخاب كلهم بختوا ايدهم في قلبهم.
ويقعدوا يشحدوا الله الكورة تمر بي سلام.
تمرق بس.
عاوزين نشوف شيخ موكورو – الزول دا قالوا (ساحر)..والكورة عندو (منوتة) عديل كدا.
ما عندو كورة بتطلع ساكت.
دارسها – دراسة.
عاوزين نشوف كينيدي – عقلية احترافية حقيقية في الهلال.
مشتاقين والله.
مشتاقين لي جماهير الهلال وقت تقوم تغني لي (سيد البلد).
وقت يقوموا ويقعدوا.
الواحد فيهم كل ما يتلفت يكورك لي بتاع الشاي.
كل ما يشوف بشه – يطلب ليه كباية شاي.
والحكم كل ما يرفع رايتو – يكوركو فيه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
آمنة بنت اللمين عندهم صالون وقع قبل الخريف – من البيعمل فيه علي جعفر دا.
اشتقنا …وقت اعصابنا تبوظ ونقعد نعاين في الساعة.
نقيف ونقعد.
نمرق برة الشارع.
ونرجع ..نلقى الهلال جاب ليه قون.
وقت اعصابنا تبوظ شديد ..نحول القناة.
نمشي قناة تانية.
اشتقنا للحاجات دي.
نحن لغاية الليلة وقت كاريكا يضيع ليه كورة مضمونة بنقعد نكورك في بكري المدينة.
الليلة والله ح نعمل الحاجات دي.
عارفين الهلال ح يلعب ودي.
لكن نحن في الودي – الهلال دا ما بنقبل فيه حاجة.
ح نتذكر الليلة ..مشجع الهلال (بلولة) ..وح نسأل ليه الرحمة والمغفرة.
ح نتذكر عبدالمولي الصديق العاشق الولهان في الهلال ..وح نقعد ندعو ليه.
ح نتذكر الراحل داؤود مصطفى ..ونقول الله يرحمه.
الليلة يوم هلالي خالص.
ح نشوف فيه الطيب عبدالله.
وح نشوف فيه والي الدين محمد عبدالله.
ح نشوف ود الجنيد.
كل الهلالاب – الليلة ح يكونوا معانا الساعة تمانية مساء.
عاوزين نتفسح في شعار الهلال.
نفسنا نشوف (الازرق).
الواحد وقت يشوف (الهلال) ..روحو بترقد.
بتحس بي سعادة.
وراحة.
الليلة عليكم الله يا ناس قناة البحر الاحمر – يا ناس قناة الملاعب ..الهدف عيدو لينا تسع مرات.
عاوزين نشبع في الاعادة.
نحن الناس ديل مشتاقين ليهم.
بلوا لينا شوقنا.
خلونا نتمتع.
المباراة ذاتها بعد ما تنتهي عيدوها لينا تاني.
خلونا نتفرج في ناس موكورو وولاءالدين.
خلونا نقنع ليك المريخاب ديل.
نوريهم حاجة.
حاجاتنا تمام.
وما عندنا اي مشكلة.
واي حاجة عندنا ماشه بي نظام.
الليلة ح نشوف الهلال.
يا الله بس شيل لينا العوارض.
وابعد عننا البلاوي.
وان شاءالله ما في لاعب من الهلال يتعرض لي اصابة.
ربنا يحفظهم.
وربنا يمتعنا بمباراة اليوم.
من غير اي عارض.
ان شاءالله اي مشجع هلالي الليلة يقعد يتابع المباراة ما يحصل ليه اي عارض.
اصلو شوقنا بحر.
والمباراة في قناة البحر الاحمر.
الليلة البحر الاحمر – ح يبقى البحر الازرق.
و تشوفوا حاجة.
ح تفهموا ليكم شيء.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
سكينة بنت الحسن اشترت ليها موبايل جلاكسي …قالت رقم ما بيبدأ بي 09123 ما يضرب ليها.
…………
و
في انتظار رؤية الهلال اليوم.
وان شاءالله الاوضاع كلها تكون تمام.
ناس المريخ حايمين من مطار لي مطار.
الناس ديل كان يمشوا يعسكروا في سوريا مع فلستهم دي.
………..
السيدة (ل) – الزول وقت يقول فاطر ..يكون شافك بس.
وقرّط على كدا.