حولنا الطبق شمال جاب لينا شيبوب مع عمار الدمازين

حسن تلجة ..البتكلم ليكم عنو دا – يوم مباراة المريخ والرابطة قاعد يظبط في الطبق..يحول في (الطبق) متل صينية الخبيز
الزول دا صعب ..يمين جاب ليه لاعب من عطبرة اسمو (عمار الدمازين) لو جابوا لينا هسع بننسحب من الدوري الممتاز
عمر بخيت حايم في نص المريخ متل ناظر المدرسة في نص الحوش في آخر الحصص
زولكم ما كضب ..وقال المريخ دا مالو بقى كدا زي الناس القاعدين في دكان ناصية…ما عندهم أي موضوع

مريخابي ..قنعان من فريقو – قعد يظبط في (الطبق)…بيظبط في الطبق من غير نفس ..زي البفرك ليه في بامية.
يحول فيه جاي وجاي…ويطنطن براهو – الحالة ما عاجباه.
وزيادة الغاز باقية ليه في نخرتو.
المريخابي اسمو (حسن تلجة).
جنو (تلج).
شغال في الدنيا دي كسار تلج.
يوم داك – لقتيو موقف عربيتو في طرف الشارع ..ونازل ليك (كسير تلج) لعسكري المرور.
العسكري من كسير التلج داخل ليك في السيوتر زي الجردل.
حسن تلجة ..ما خلى ليك شيء للعسكري.
رفعو ليك السماء.
العسكري اللـه يسألنا رتبتو (وكيل عريف)…حسن تلجة رفعو ليك (فريق).
العسكري ذاتو صدق.
بقى يرفع في كتوفو.
ويمشي ويعاين في نفسو في مراية العربية.
وقفت العربية على طرف ..ومشيت على حسن تلجة …قلت ليه يا زول مالك بتكسر في التلج من الصباح – العسكري دا طلع ليه (الرخصة) وخارجنا – قافلين الشارع – وقفتو الحركة.
حسن تلجة قال لي أنا لو عندي (رخصة) كنت وصلتو (فريق) – واللـه (شريط) ما بديه ليه في البرد دا – شوف عامل رأسو كيف زي الزول البفك ليه في (لمبة) حرقانة.
سكت – ما قلت شيء.
لكن قلت في نفسي .. يا حسن تلجة لكن ما بالغت – توصلو (فريق)…الزول دا لو ما لحقناك كان مسكتو مرور الخرطوم.
ومشيت على كدا.
حسن تلجة ..البتكلم ليكم عنو دا – يوم مباراة المريخ والرابطة قاعد يظبط في الطبق.
يحول في (الطبق) متل صينية الخبيز.
الزول دا قدر ما (اتحرفن)..ووجه (الطبق) – التلفزيون ما جاب ليه زول غير (علي جعفر).
يلفو كدا يجيب ليه علي جعفر ..يلفو كدا يجيب ليه التومة بنت حاج حامد واقفة في طرف الشارع.
حسن تلجة – عاين لي علي جعفر كدا وهو بيصرج ليه في كورة – وقال واللـه الزول دا (حجر بطارية) كتيرة على كورتو دي – كمان نقعد نحول ليه في الطبق.
الصبر بس.
اللـه يدينا الصبر.
وصاحبكم بلف في الطبق…وبحول فيه من اتجاه لي اتجاه…تقول سايق ليك (كراكة).
عصر شمال كدا…الطبق جاب ليه عمر بخيت.
عمر بخيت حايم في نص المريخ متل ناظر المدرسة في نص الحوش في آخر الحصص.
حسن تلجة عاين للتلفزيون سمح ..وقال دا شنو دا؟ ..كمان (الطبق) بتاع النيلين دا بقى يعملها كبيرة – عمر بخيت البجيبو المريخ شنو؟.
طبق ناس النيلين دا (ساطل).
واحد جنبو قال ليه فعلاً (سطلايت).
مشى شرق ..شاف ليك (عطرون) قاعد في الكنبة.
متل الزول الحارس ليه دكان.
حسن تلجة ما كضب ..وقال المريخ دا مالو بقى كدا زي الناس القاعدين في دكان ناصية.
ما عندهم أي موضوع.
تفتح أي موضوع يتكلموا ليك فيه.
عارفين أي شيء.
حسن تلجة قدر ما عفص ليك الطبق دا ..عشان يشوف (شيبوب) ما شافو.
يلفت في (الطبق) متل رجل المرور.
وبرضو ما شاف (شيبوب).
حسن تلجة – خجلان يسأل من (شيبوب) عديل كدا.
قال يتحرفن.
قام قال ليهم ..أنتوا تعالوا هنا ..المريخ دا كان فيه ولد حريف كدا ..بيلعب في النص…الزول دا مشى وين؟.
واحد خجلان برضو من أنو يقول ليه (شيبوب) – قام قال ليه (أيمن سعيد).
حسن تلجة قال ليه أيمن سعيد شنو؟…أيمن سعيد الحرفنة لقاها وين ؟..زي الزول البكون منتظر عدة الضبيحة يوم العيد.
واحد من الجماعة قال ليه أنت قاصد منو يا حسن تلجة؟.
حسن تلجة قال ليه – ولد صغير كدا ..ولعاب شديد ..وطويل …واللـه وقت نشوفو في النص – الواحد فينا زي الضرب ليه طلب سمك.
زولكم الخجلان – رجع وقال ليه …أنت قاصد منو يا حسن …أنت قاصد (الشغيل).
حسن تلجة قال ليه – لا ما الشغيل ..الشغيل خليه ..عارفنو مشى شبيبة القيروان ، أقصد مشى الهلال ..أنا قاصد ليك الولد الجاب ليه قون في الاتحاد الجزائري.
صاحبو قال ليه ..القون الما عدوه داك.
حسن تلجة قال ليه بس ..كتلتو عديل كدا ..أنا قاصد الزول دا ذاتو ..الزول دا مشى وين؟.
صاحبو قال ليه ..أسكت ..أسكت ..أسكت يا حسن نحن الزول دا ما كتلنا فيه.
حسن تلجة قال ليه كلتنا فيه كيف يعني؟ ..مشى برشلونة؟.
صاحبو قال ليه يا ريت.
حسن تلجة قال ليه مشى الأهلي المصري؟.
صاحبو قال ليه يا ريت.
حسن تلجة قال ليه مشى الزمالك؟.
صاحبو قال ليه يا ريت.
حسن تلجة ..قال ليه طيب مشى وين؟.
صاحبو قال ليه مشى شبيبة القيروان.
حسن تلجة من سمع اسم (شبيبة القيروان) – قال ليه أوعك تقول لي شبيبة القيروان (كبري).
صاحبو قال ليه تصدق.
حسن تلجة قال ليه أوعك تقول لي عشان ينتقل للهلال.
صاحبو قال ليه ..تصدق.
حسن تلجة جاء واقع من رأس البيت ..وقال لي صاحبو – نحن ما كتلنا.
كتلنا عديل كدا.
يا ريتهم لو شالوا بكري ولدهم الأروش دا غير (فتر) العيون ما شفنا منو شيء.
الزول دا الكورة العند ناس راجي ورمضان عجب ..شتتها ليهم (جري).
وناس الهلال شالوا الزول دا كيف؟.
دي فكروا فيها كيف؟.
عملوا شنو؟.
وصلوا ليه كيف؟.
صاحبو قال ليه ..واللـه الكاردينال دا بعد كدا أتوقع منو أي حاجة…هسع ابراهومة ولدنا دا ..كل يوم بنقوم الصباح ..بنتخيل يقولوا لينا مشى الهلال.
واللـه ثقة في مازن شمس الفلاح بقت ما عندنا.
حسن تلجة قال ليه واللـه أنا قايل الحركات دي عند صلاح إدريس بس ..الزول دا طلع أخطر من صلاح.
صاحبو قال ليه صلاح شنو؟..الزول دا الجوهرة الزرقاء عملها تلاتة طوابق…فندق بس.
الزول دا صعب ..يمين جاب ليه لاعب من عطبرة اسمو (عمار الدمازين) لو جابوا لينا هسع بننسحب من الدوري الممتاز.
وعندهم ولد كمان اسمو أبو عاقلة..تختوا في الجرح يطيب.
حسن تلجة ..وقت سمع الكلام دا ..قال ليه طيب نحن القاعدين ليها شنو؟…طبق شنو البنظبط فيه…ناس علي جعفر ديل أصلو ما عاوزين ليهم (طبق).
ديل – الواحد يشوف ليهم حجرين بطارية ..ويسمع بيها نتيجة المباراة.
متابعة المباراة في الإذاعة ذاتها كتيرة عليهم.
……
ملحوظة : حسن تلجة لكن زول غريب واللـه.
هوامش

قالوا ليك في واحد شفت.
درس هندسة بالمساء.
تماها بالجغرافيا.
قالوا ليك الزول دا وقت يحول الطبق بجيب ليه شيبوب مع عمار الدمازين.
قلنا ليهم دا طبق ولّا (ودع)؟؟ البجيب عمار الدمازين مع شيبوب.
الفيفا اعتمدت شيبوب في الهلال.
أقصد في شبيبة القيروان.
أنتوا مالكم مستعجلين كدا.
أصبروا شوية.
الدنيا ما طارت.
الكاردينال طلع خطير.
اجتاز الورقة الثانية بنجاح تام.
مبروك.
وفي الانتظار اكتمال العملية.
الهلال الآن في أفضل حالاته.
وأفضل مستوياته.
وسوف يصل مستوى الهلال إلى المستوى الذي يحلم به الهلالاب.
بس أصبروا.
وخلوا العيش لكافالي.
الزول دا ما تضيقوا عليه.
الحلو جايكم.
ما تغسلوا أيديكم.
غداً يلعب الهلال أمام مريخ نيالا.
بدينا بي هلال كادوقلي وهلال الأبيض ..وجينا على مريخ نيالا.
والسنة دي ما في أي مريخ بقيف قدامنا.
هلال ممكن.
لكن مريخ لا.
الأمل عطبرة يقدم في أفضل المستويات.
الأمل عطبرة 6 من 6.
ازيكال مهاجم الأمل ..هداف البطولة.
يستحق الأمل ذلك.
وهذا ثمن المواقف.
النيل شندي والأهلي شندي كلاهما انتصر خارج أرضه.
انتصر النيل في الفاشر ..وانتصر الأهلي في كادوقلي.
الأهلي الخرطوم أيضاً عاد بـ (4) نقاط.
الدوري ح يكون مولع نار.
وكل الأندية قابلة لأن تفقد الكثير.
الصبر بس.
ما في نتيجة بيصلوا ليها من خلال أسبوع.
أو أسبوعين.
وما في ممتاز بشيلوه في أسبوعين.
الدرب طويل.
والفريق الذي سوف يحقق البطولة هو الفريق البيصبر على مدربه.
ادعموا الهلال وساندوه.
وح تشوفوا الكتير من الروائع.
………
عاجل : لكن شيبوب عملها ظاهرة.