لو بقت على (الكيس) هينة

قالوا ليك واحد مشى للدكتور – قال ليه يا دكتور عندي وجع رأس ، ما قادر اشوف قدامي.
الدكتور قال ليه وجع رأس بس.
زولكم قال للدكتور – والله يا دكتور بي صراحة كدا وجع رأس وانبوبة غاز فاضية.
الدكتور قال ليه ..اعمل لي صورة اشعة لانبوبة الغاز وموجات صوتية للمنظم واعمل لي ترسيب للبتوجاز.
صاحبكم قال للدكتور والرأس!!.
الدكتور قال ليه لو صورة الانبوبة طلعت (نضيفة) – ان شاءالله (الرأس) ما ح يكون فيه اي مشكلة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
انا قاعد كدا ..بفكر في كورة الليلة.
الحمدلله الهلال لا فيه ضفر.
ولا علي جعفر.
ولا عطرون.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الطريف في الامر ناس المريخ قبل فترة عملوا ليهم حملة على الانترنت من اجل مساندة علي جعفر.
صاحبكم بقى محتاج للمساندة.
عاوز ليه دعم.
قلت الزول دا يا ربي عاوز يفتح القدس.
عاوز يرجع الاندلس.
وقت قالوا لي الزول دا بقى اساسي في تشكيلة المريخ – قلت ليهم فعلا الزول دا عاوز ليه (مساندة).
لو فكوه من غير مساندة – بقطعها في شبكتو.
لكن المساندة الجد عاوزها جمهور المريخ.
الناس ديل بيصبروا على الزول دا كيف؟.
غايتو نحن لو كان عندنا في الهلال لاعب زي علي جعفر دا – كنت ستة يوم بشجع اهلي شندي…واليوم السابع برجع اشجع الهلال.
ما بستحمل الهلال اسبوع كامل في وجود علي جعفر.
قالوا ليك في واحد عامل فيها حريف ..قال سأل جمال الوالي عن ثلاثة اسباب ادت لابتعاده عن المريخ.
جمال الوالي قالوا ليك ما كضب…قال :
علي جعفر.
وعلي جعفر.
وعلي جعفر.
الوقت داك طبعا (عطرون) ما جاء المريخ.
علي جعفر عاملين ليه (مساندة) في النت.
عشان كدا (النت) بقى تقيل.
النت بقى غالي.
الناس قاطعوا الشركة التى رفعت رسوم (النت).
انتوا قايلين المشكلة من الشركة؟.
ابدا.
المشكلة من علي جعفر.
طلعت الناس من (الشبكة) يا علي جعفر.
الشبكة العنكوتية جبت خبرها.
في واحد تاني ..ما عندو علاقة بالكلام الفوق داك ..قال لي ممكن علي جعفر يلاقى ميسي؟.
موش ناس المريخ قالوا عندهم مباراة مع برشلونة.
قلت ليه علي جعفر ح يلاقى ميسي في حالة واحدة بس.
يلبس ليه (كيس بلاستيك) مكتوب فيه (ميسي).
اليوم التاني ميسى بقول جيبوا لي الزول دا.
بالمناسبة ..(النت) الايامات دي جائط بي قصة الطفل الافغاني مرتضي أحمدي ..الطفل الذي لبس ليه (كيس بلاستيك) مكتوب فيه ميسي فطالب ميسي بي مقابلته.
الكيس الهنا دا.
القصة حسب المصادر والمواقع ..وصفحات ناس فخري مضوي جاءت على هذا النحو.
عشان ما نبقى بنلافح الكلام ساكت.
جاء في المواقع : (أمل نجم برشلونة الأسباني والمنتخب الأرجنتيني ليونيل ميسي لقاء طفل أفغاني اصبح مشهورا بين ليلة وضحاها بعدما نشرت صورته على مواقع التواصل الاجتماعي وهو يرتدي كيسًا بلاستيكيًا كتب عليه اسم أفضل لاعب في العالم ، وذلك بحسب ما كشف الاتحاد المحلي لكرة القدم يوم الإثنين. ويعشق الطفل الأفغاني مرتضى أحمدي ، البالغ من العمر 5 أعوام ، النجم الأرجنتيني ميسي ، لكن الأوضاع المادية لا تسمح له بشراء قميص لاعب برشلونة ما دفع شقيقه الأكبر هومايون (15 عامًا) إلى استخدام كيس بلاستيك من أجل صناعة قميص فريق الأرجنتين ذي اللونين الأزرق والأبيض ، وكتب على الظهر اسم ميسي ، ثم نشر صورة أخيه (مرتضى) وهو يرتدي القميص على موقع (فيس بوك) في منتصف الشهر الماضي. وكشف والد ميسي ، خورخي ، لوكالة فرانس برس أن نجله على علم بهذه الصور التي أحدثت ضجة على صفحات وسائل التواصل الاجتماعي ، ويريد القيام (بشيء ما) من أجل هذا المشجع الصغير، ثم أعلن الاتحاد الأفغاني يوم الإثنين أن النجم الأرجنتيني مصمم على لقاء (مرتضى) في أقرب وقت ممكن ، دون أن يحدد مكان وموعد هذا اللقاء. وقال المتحدث باسم الاتحاد الأفغاني سيد علي كاظمي لوكالة فرانس برس : (كان ميسي على اتصال بالاتحاد من أجل تدبير لقاء مع الصبي الشاب ، ونحن نعمل من أجل معرفة إذا كان ميسي سيأتي إلى أفغانستان أو سيسافر الطفل البالغ من العمر 5 أعوام إلى أسبانيا، أو إذا سيلتقيان في بلد ثالث). ولم يصدر أي تعليق من برشلونة حيال هذا الموضوع.ومن المؤكد أن سفر ميسي إلى أفغانستان أمر مستبعد ، في ظل الأوضاع الأمنية ، والتهديد القادم من حركة طالبان ، لكن السفارة الأسبانية في كابول أكدت لفرانس برس أنها ستقوم بكل ما هو ممكن من أجل تسهيل لقاء في بلد أوروبي. واعترف والد (مرتضى)، المزارع الفقير من ولاية جاجهوري في إقليم جازني ، أنه ليس لديه الإمكانات التي تخوله شراء قميص مقلد، مشيرًا إلى أن (مرتضى) لا يملك سوى كرة مثقوبة يلعب بها.وجدير بالذكر ، أنه نادرًا ما تمارس الرياضة تحت حكم طالبان ، وملعب كرة القدم في كابول (اشتهر) كونه كان ساحة للإعدام والرجم والبتر. وتعتبر كرة القدم والكريكيت أكثر الرياضات شعبية في البلاد التي مزقتها الحرب).
هكذا جاء خبر المواقع.
قلت لو الموضع بقى على (الكيس) ..يمين عبدالماجد واسلام سلك نلبسهم ليك (اكياس) في السقط دا ونفك صورهم في النت.
عبدالماجد يلبس صورة ميسي ..واسلام تلبس صورة رونالدو ..عشان يتلاقوا الاتنين في مدريد.
بس الجماعة ديل يا سلك ما يقوموا يطلعوهم لينا (دواعش).
ممكن ينكروا ليك (الكيس) حطب.
طبعا نحن ما عندنا فرصة لاعب يقابل ميسي او رونالدو…ناس ضفر وعلي جعفر لو حصل ليهم الموقف دا ..البنكرياس بتاعهم بروح فيها.
بنكرياس موسى الزومة والطوحال بتاعو الى الآن مفقود بعد مواجهة المريخ لبارين ميونخ.
انتوا قايلين المريخ شطب موسى الزومة ليه؟.
عشان موسى الزومة فقد بنكرياسو امام الفرنسي ربيري.
هسع مرتضى احمدي المفتح لبس ليه كيس بلاستيك مكتوب فيه اسم ميسي ورقم قميصه.
العالم طبعا بقى ضيق.
الصورة من افغانستان وصلت لي ميسي.
ميسي كما في الخبر الفوق ..قال جيبوا لي الطفل دا.
نحن لعيبتنا ديل لو الاكياس اكلوها عديل ما لبسوها ..ما بقابلوا (ميسي).
بالمناسبة نحن فرصتنا في الاحتراف ضعيفة.
صعبة يحترف لاعب في الدوري الاسباني.
صعبة لاعب يلاقى ميسى.
ما عندنا طريقة غير (الاكياس) دي.
عشان كدا ..عليكم الله يا ناس المريخ اعملوا حركة الطفل مرتضى احمدي في المباراة القادمة.
بتلعبوا مع برشلونة.
اصلا مع مجلسكم دا ..وبعد رحيل جمال الوالي ..ما عندكم طريقة لمواجهة برشلونة إلّا عبر هذه الطريقة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
الهلال الليلة ح يظهر عصرا في الجوهرة الزرقاء.
اشتهينا مباريات العصر.
ولاء الدين في العصر طبعا ما بتمسك.
ولا بتفاهم.
العصراوية الليلة في الجوهرة الزرقاء.
خلونا نشوف بكرة ان شاءالله في المساحة دي الحاصل شنو؟.
………..
السيدة (ل) – الشوق زي (الرصيد) كل ما تتكلم عنو كتير ..بمشي ناقص.
وقرّط على كدا.