الخرطوم الوطني في (النقعة) امس غلبت بـ (السلم والثعبان) يا ربي

لمن تكون بتشكي ليك من (ألم) ما معروف مصدرو ..ما بتخلي ليك دكتور.
تبدأ من الضرس.
للضفر.
تمشي لاختصاصي الباطنية ..يقول ليك ..والله (معدتك) ما فيها اي شيء ..تاكل (الظلط).
هو يعني الاكلو (الظلط) شوية؟.
تمشي لبتاع القلب ..يقول ليك قلبك حديد ..لسه سعة 99 جيجا (قصة حب).
غير (الاعجاب) الفري.
يا زول انت ما عندك اي حاجة.
زي الحصان.
لكن لا بتنوم.
لا قادر تاكل.
اي حاجة تدخلها تستفرغها.
تمشي لبتاع المخ والاعصاب ..يقول ليك ..ما عندك اي مشكلة…مخك يشغل ليه محطة كهرباء حرارية.
ما تخلي شيء.
الغدد.
السكري.
الضغط.
تدخل من معمل وتطلع من معمل…واي واحد من الجماعة ديل يقول ليك يا زول صحتك مية المية.
طيب الحاصل شنو؟.
تبقى من دكتور لي دكتور …(مجرب) ساكت ما بتخليه.
طبعا في الموضوع دا اخطر زول (المجرب).
البقول ليك دا مرض خطير.
والبقول ليك دا مرض صعب.
والبقول ليك صلح اعمالك.
والبقول ليك ..والله الحالة دي جات لي عمي سبعة يوم ما عاشها معانا..قروش ايجار البيت ما قدر يستلمها.
طبعا اخطر حالة للزول العندو بيت مأجر منو ..انو ما يقدر يستلم ايجار بيتو.
دي حالة متأخرة شديدة في المرض.
في زول يقول ليك يا زول المرض دي ما مرض عضوي…يقوم يدخلك في حتة تانية.
وانت شديد زي الحصان والحمدلله …ما عندك اي شيء.
اخر حاجة في زول بقول ليك يا زول انت (موهوم) ساكت ..والله ما عندك الحبة.
شفت الدهنيات ..السكريات ..النشويات ..(الاسمنت) …المنعوه ليك …كلو ما تقيف منو؟.
تقول ليه والله انا السكريات ..الدهنيات ..النشويات ما عندي معاها كبير غرض ..لكن (الاسمنت) دا ما بقدر اقيف منو؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
جماعتنا ديل ..هسع حالتهم دي حالة (وهم).
وهم ساكت.
كل مباراة يخسروا فيها ..يعلقوها في حتة تانية ..ما عندها علاقة بالموضوع.
زي حكاية المغترب ..الذي رجع للبلد بعد (21) سنة.
جاء لقى بنتو ما شاءالله بقت طبيبة…قام ما عرف يقول ليها شنو؟.
قال ليها والله لو عارفك بتبقى طبيبة كان جبت ليك مستشفى خاصة معاي.
كلام فرح.
وعشان ما نتقل على احبابنا المغتربين …البدخلو للبلد دي عملة صعبة …وكمية من الحنين والتجارب الجديدة ..قالوا ليك زول (محلي) هنا.
زول مزارع عادي.
المزارع دا زارع ليه (بصل).
البصل دا فيه حاجة.
زولكم زارع ليه (بصل) …وقاعد.
الزول بقى اليوم والتاني تجيه اشارة.
مرة يجوهوا ناس المحلية.
ومرة ناس الجبايات.
ومرة ناس جبابات الجبايات.
ومرة الجبايات التانية ديك.
المهم المزارع دا كلو ما يقف ليه قدام (بصلة) في مزرعتو ..بتجيه جباية.
المزارع لقى نفسو قصاد (البصلة) الواحدة دافع ليه (اردب) بصل جبايات.
المزارع قال ليهم اسمعوا ..انا بصلي دا لو قلب لي في اي مرحلة من المراحل (تفاح) بسدد ليكم جباياتكم دي من العملة الصعبة.
بس البصل دا إلّا ما يبقى تفاح.
وفات على كدا.
هسع ناس المريخ بيعملوا في نفس الشيء.
راجيين ليهم (تفاح) من (بصلهم) المزروع دا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عشان اقرب ليكم المسافات ..وما تفتكروا الموضوع من الكهربة.
يا زول الكهربة دخلها شنو بالموضوع؟.
ناس المريخ ديل مشوا الفاشر ..خسروا هناك قعدوا يتكلموا لينا عن الملعب.
يا زول ملعب (النقعة) دا طلعوه لينا في دولة اجنبية عديل كدا.
كأنو نجيلتو دي ما نجيلة سودانية.
كأن الفاشر دي برة البلد.
انتقادات عجيبة لملعب النقعة…وهم عندهم ملعب (مطرة) واحدة بتجيب خبرو.
في الفاشر قالوا (النقعة).
الملعب يعني.
انتوا عاوزين شنو؟.
في النجيلة الطبيعية بيشكوا.
في النجيلة الصناعية بيشكوا.
يعملوا ليكم شنو؟.
يخترعوا ليكم (نجيلة) براكم.
عارفين الجماعة البتكلموا عن ملعب (النقعة) ديل …في استادهم دا ..في ام درمان خسروا من مريخ الفاشر.
وطلعوا ليهم الشرطة.
في استادهم دا – تشهد عليهم (نجيلتهم) دي خسروا من هلال الابيض.
في استادهم طردوا ليهم لاعب من الفريق الخصم.
وحسبوا ليهم ضربة جزاء.
وخسروا برضو.
بعد دا كلو عندكم عين تتكلموا لينا عن (النقعة).
خلوها النقعة ..ناس المريخ ديل ..اي حتة بيمشوا عليها برجعوا لينا منها بي (شماعة) ثابتة.
في عطبرة ..بقولوا جمهور الامل صعب.
جمهور الامل بيجدع بالحجارة.
يعني مباريات عطبرة ..برجعو سبب خسارتها للجمهور.
انتوا عاوزين شنو؟.
يجيبوا ليكم جمهور (صيني) في عطبرة.
جمهور (هندي).
دي ما بتلقوها في عطبرة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في شندي عندهم حيلة مختلفة.
طريقة جديدة.
في شندي بقولوا (الحكم).
يقوم بكري المدينة يعمل شنو؟.
بكري المدينة بقوم يضرب ليه حكم بونية ..يقوم يعاقبوا عمر عثمان.
يعني بالواضح – الغلط يعملوا بكري المدينة ..والحساب يشيلو عمر عثمان.
في كادوقلي عارفين بقولوا شنو؟.
في كادوقلي بقولوا الارهاق والسفر اثر على اداء اللاعبين.
في الابيض (الامطار).
حتى لو كانت ما في اي مطرة.
اول كادوقلي كان فيها (ارهاق) عشان تشترطوا (المطر) في الابيض.
في كوستى …بقولوا ليك ….سبب الخسارة سوء التلفزة والنقل الحي للمباراة.
يا جماعة الناس ديل يعملوا ليهم شنو؟.
طبعا في استادهم في ام درمان بقولوا (الشرطة).
اذا كان ديل في استادهم بيشكوا من (الشرطة) ..في (النقعة) يعملوا شنو؟.
لمعلومية ناس المريخ ..السنة دي ظهرت (نيالا) في الممتاز.
ونحن من خبرة سابقة نتوقع عندما يخسر المريخ في نيالا يرجعوا لينا من هناك ويشكوا لينا من الضرب الحصل قبل شهر كدا في (الجنينة).
في علاقة بين الموضوع دا والموضوع دا؟.
المريخاب بيعملوها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
يا زول انا لمن سمعت المريخاب بتكلموا عن ملعب (النقعة)..اتخيلت هلال الفاشر بيلعب في (الكامب نو) في الوقت الذي يلعب فيه المريخ في (النقعة).
عاوز اسألكم سؤال محرج شوية.
سؤال في الصميم.
او في الجردل ..ما شرط.
ناس الخرطوم الوطني ديل ..امس وقت انتصروا على هلال الفاشر في (النقعة)…كان مسموح ليهم يشاركوا بـ (51) لاعب ..وإلّا كانوا متلكم كدا يا ناس المريخ بيلعبوا بـ (11) لاعب.
معسكرين في اثيوبيا شهر…(دولة افريقية).
وفي مصر شهر….(دولة عربية).
وفي قطر شهر (دولة اسيوية) ..عشان تجوا تقولوا لينا (النقعة).
لو على كلامكم دا …تاني معسكركم ما يفوت (جبل اولياء).
خسارة معسكرات ساكت.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
و
ولسه نحن في انتظار الهلال.
وولاءالدين.
عمار الدمازين ظهر.
وابيكو.
وايشيا وموكرو.
وابوعاقلة.
في انتظار (الوالي).
ناس المريخ هم ذاتهم في انتظار (الوالي).
كاريكا ..الليلة عندو كلام.
ونتمنى نشوف الثعلب.
وكلو بيحصل ان شاءالله.
…………..
السيدة (ل) – نفسي في (مطرة) مع (الفول) تجيب لينا (رغيف) حار.
وقرّط على كدا.