ليس على (النعسان) حرج

في الموسم الماضي ..كسب المريخ (9) نقاط بالشكاوي.
قاعدين في (مكاتبهم).
تسع نقاط وصلتهم (سفري).
لفوها ليهم.
شالوها (جملة).
كورنر ما رفعوها فيها.
وشالوا ليهم (9) نقاط.
المريخاب السنة الماضية فاتحين خشومهم زي (الدباسة) الما فيها (دبابيس).
موضوعة ساكت في المكتب.
طبعا (الدباسة) ما عندها علاقة بالموضوع.
زي الزول البقول ليك – الاسبوع القادم مسافر السعودية ان شاءالله ألقى عندك شاحن موبايل.
في علاقة بين السفر للسعودية وشاحن الموبايل.
او ممكن زول يقول ليك …مشيت فحصت طلعت عندي ملاريا … الدولار عمل كم؟.
في علاقة بين الملاريا والدولار.
زي الزول الما بعرف (انجليزي) بيمشي (الصيدلية) يقول للدكتور : عندي استفراغ شديد ووجع رأس ودوشة ومغص وانتفاخ في الطوحال ..وتقلص في المعدة وحساسية.
الدكتور يخلي اي حاجة ويمسك ليك في الحساسية.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المريخاب السنة الفاتت ..قربوا يفتحوا ليهم مكتب استيراد وتصدير في اكاديمية كورة القدم في الخرطوم 2.
الاتحاد العام منحهم (9) نقاط.
من غير اي عرق.
وبدون اي تعب.
الايام عشان بتلف.
والايام دول ..السنة دي العملو المريخ في هلال كادوقلي والامل عطبرة السنة الماضية..حصل على المريخ.
المريخ السنة دي عندو مشكلة في قيد اللاعب مازن شمس الفلاح.
زول لاعب ليه بي (اسمين) ..وكورتو (حرف جر) كتيرة عليه.
تتخيلوا بعد دا شمس الفلاح بيلعب بي اسمين.
ناس المريخ حاولوا يختصروا الحكاية في (الرباط الصليبي).
ابعدوا شمس الفلاح وقالوا (مصاب).
شمس الفلاح فعلا مصاب.
مصاب في (الرقم الوطني) ما في (الركبة).
تزوير على عينك يا تاجر.
مشاكل المريخ السنة دي ما انتهت عند شمس الفلاح.
مشاكل المريخ السنة دي ..وصلت حتى (الوك) اللاعب صاحب المشكلة المركبة في المريخ.
اللاعب لو مسجل (وطني) ما عندو رقم وطني.
ولو مسجل (محترف) فقد تم قيده بعد انتهاء فترة قيد الاجانب.
غير مشكلتو مع الملكية جوبا.
يعني الوك دا ما عندك ليه غير تشوفوا له (حافلة) في خط الكلاكلة صنقعت ..وقولوا ليه (صنقع) على كيفك ..إلى ان تحل مشكلته في التسجيلات القادمة.
وفي التسجيلات القادمة برضو مشكلته ح تكون مستمرة.
عشان تاني ما تمشوا تتحرفنوا لينا ..وتفتشوا لينا في كتاب الجغرافيا.
دا من ابيي.
ودا من يوغندا.
ودا من كادوقلي.
مشاكل المريخ السنة دي برضو ما انتهت في (الوك)…المشكلة وصلت (خالد النعسان).
لاعب بيلعب بفارق (8) سنوات من عمره الحقيقي.
يعني الزول دا لمن يصل سن مساعد مدرب ح يكون يا دوب صعدوه ناس المريخ للفريق الاول.
حلاقتك ذاتها ما حلاقة لاعب بيلعب في الرديف.
في الرديف بتحلق كدا ..وقت يصعدوك ..تجينا المباريات بي عمة وجلابية.
خالد النعسان يا ريت لو الحكاية وقفت في (السن).
الزول دا بعد (سنو) دي كان بلعب ف (الباوقة) في نفس الوقت الذي كان يلعب فيه في فريق (الامير).
دي قابلتكم في حتة.
سمعتوا بيها.
يعنى خالد النعسان دا زي مناخ البحر الابيض المتوسط ..دافي ممطر شتاء ..حار جاف صيفا.
علما انو ما في علاقة بين المناخ دا وخالد النعسان ..اتبرعت ليكم بالمعلومة مني براي.
زي (الطحنية) وقت ادخلها ليكم بدون مناسبة في العمود.
الطحنية والقرع ..ما بقعدوا في (صينية) واحدة.
بعدين يا جماعة انتوا ما تشيلوها مع (الطحنية).
حصل شفتوا ليكم (طحنية) في صينية بكا.
الطحنية دي ما ساهلة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
اعلام المريخ ..ناس مزمل وسلك وكابو ومعاوية الجاك ..ممكن يطلعوا لينا بكرة ويقولوا لينا خالد النعسان في (الباوقة) ما كان بيلعب كورة.
ح نقول ليهم طيب في الباوقة كان بيعمل شنو؟.
ح يقولوا لينا الزول دا في الباوقة زارع ليه (تفاح).
طبعا الباوقة مشهورة بالتفاح ..والجناين ..والبلح …والطبيعة الخلابة.
ناس المريخ شافوا مشكلة خالد النعسان …لحقوه ليك تاني يوم طوالي مازن شمس الفلاح ..وقالوا خالد النعسان مصاب.
يعني كدا كشف المريخ بقى فيه (4) خانات فاضية.
شمس الفلاح.
الوك.
خالد النعسان.
وشيبوب.
وعلي جعفر.
علي جعفر ما مشاركتو بعتبروا مافي.
اكون معاكم واضح.
واقولها ليكم عديل.
هذا غير الاشكاليات القانونية كشف المريخ نصفه (مصاب).
الكلام دا قبل ان تبدأ البطولة الافريقية.
غايتو لو معدل الاصابات في المريخ استمر بهذه الصورة …اتوقع مباراة المريخ في الاسبوع العاشر للدوري الممتاز يمثل فيها المريخ هيثم صديق في حراسة المرمى.
في خط الدفاع عطرون ومعاوية الجاك.
في الاطراف هيثم كابو وابراهيم عبدالرحيم.
في الوسط عمر بخيت ومزمل ابوالقاسم وعبدالله كمال واسامة عطا المنان.
المقدمة فها بابكر سلك وسمير فضل.
مامون ابوشيبة ممكن يحكمها ليكم ..السنة كلها مسك ليك هدف الاهلي شندي صحيح.
طيب يا ابوشيبة هدف المريخ في النيل شندي ..بتقول عليه شنو؟.
ابوشيبة اكيد يقعد يقول لينا في الحقيقة ..ومن هذا المنطلق ..ومن هذا المنبثق فان خالد النعسان عندما مرر الكورة …التمريرة ما كان فيها مخالفة حسب مخرجات الحوار الوطني.
كمان مامون ابوشيبة في حاجات زي دي بتلفت.
ولا بعاين.
الطريف ان صحيفة الصدي احتفت بتصريحات صلاح محمد صالح والتى قال فيها ان تحليل اخطاء الحكام عن طريق تصوير قناة النيلين ..امر مستحيل.
طيب يا مزمل ..هدف الاهلي شندي (التسلل) تصويره تم عبر كاميرات بي ان سبورت.
تقول الهلال دا بيلعب في قناة براهو.
براكم قاعدين تناقضوا روحكم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لكن انتوا يا ناس المريخ ..يا ناس مزمل ابوالقاسم العاملين لينا فيها (مفتحين) ، وعارفين اي حاجة..اذا وجدنا العذر لخالد النعسان باعتباره زول (نعسان) انتوا مالكم؟.
مشكلتكم شنو؟.
انتوا ما عاملين لينا فيها (صاحيين).
ومفتحين.
وحافظنها.
ومنقطنها.
معقولة تقعوا في خطأ مركب بهذا النحو.
لاعب بيلعب بكرتين ..كل كرت بي سن.
وبيلعب في نفس الوقت في فريقين وفي اتحادين.
غلطة زي دي ما بقع فيها زول عندو (عجلة).
شرطوا عينا.
وفضحتونا.
ودخلتوا لجنة الاستئنافات في حتة ضيقة.
طبعا ممكن لجنة الاستئنافات ترفع لها الشكوى ..وتقوم تنظر فيها.
وتشتغل لينا (تأجيلات) لحسم القضية الى ان يحسم الدوري ..وتتعرف الاندية الهابطة من الاندية الباقية.
يقوموا بعد كدا ..يقولوا ليك اللاعب خالد النعسان ثبت للجنة انه (نعسان) وليس على (النعسان) حرج.
يعني مشاركته بعمرين صحيحة.
ولعبه مع ناديين صحيحة.
اللاعب (نعسان) يا جماعة.
يا خالد عزالدين الحكاية دي ما فيها اي شيء ..لاعب بشارك (نعسان) ذنبو شنو؟.
خليك مع اسامة عطا المنان ..عشان (النعسان) دا ما حمل الكلام البتقولوا فيه دا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
……….
و
قروب رجال حول الهلال قام من تلقاء عضويته الكريمة بزيارة اسرة الراحل داؤود مصطفى وقدموا لهم دعمهم المعنوي والمادي.
هكذا هو جمهور الهلال.
ودائما الجمهور الهلالي افضل حالا من الاعلام ومن مجالس الادارات.
القروبات اصبح لها نشاط اجتماعي وخيري كبير.
نتمنى ان تتواصل مثل هذه الاعمال ..ويكون عطاء جمهور الهلال في كل ميادين الخير والعمل الصالح.
الموضوع ما كورة بس.
والهلال اكبر من تلك الحدود الضيقة.
هذا هو الهلال الذي نريد.
اخبار شيبوب شنو؟.
الناس ديل مالهم اخدوا ليهم (صنة).
الصنة نحن ما بتنفع معانا.
التسجيلات باقى ليها 77 يوم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………
السيدة (ل) – القرد لو عاوز يبقى اسد ..اول حاجة يعرف يلبس النضارة وين؟.
وقرّط على كدا.