الاهلي الليبي طبظ عينو بي ايدو

امس اتاحت لنا قناة ليبيا 218 مشاهدة مباراة الاهلي الليبي وانزو المالي.
اول مرة اسمع لي بي قناة بهذا الاسم.
فتحت ليك القائمة ..لقيت ليك القنوات كلها (ليبية).
الناس ديل بعد مشاكلهم الكتيرة دي ..عندهم كل هذه القنوات.
قعدت افتش في ليبيا 218.
اول مرة اشوف لي اسم قناة زي لوحة العربية.
تقول فاتورة.
ما عاوز اتكلم ليكم كتير في الموضوع دا – لو عندنا (نقد) احسن نخليه لي قناة النيلين.
ما نقعد نتفاصح ساكت.
قعدت في المباراة وقلت (اتخابر) على الاهلي الليبي.
قبل ما ادخل ليكم على (التخابر) على الاهلي الليبي ..عاوز اقول ليكم انتوا ناس المريخ ديل بدل ما يوقفوا حارسهم جمال سالم القاعد (يتخابر) مع فيلا اليوغندي على الخرطوم ..ما احسن ليهم من الكلام عن هدف مريخ كوستي في الهلال.
ناس مريخ كوستي قالوا اشتكوا الهلال في (ولاءالدين).
قلت سبحان الله.
التاريخ بعيد نفسو.
الظاهر ولاءالدين ماشي على درب والي الدين محمد عبدالله.
تصوروا ناس المريخ (الاب) كانت عندهم (شكوى) في والي الدين محمد عبدالله بعد ان عاد من فترة احتراف في قطر.
نفس الملابسات.
مزمل ابوالقاسم كان بكتب وقتها (والي قطر شكاوي مطر) – عليكم امان الله المطرة دي (نقطة) ما شفناها منها.
الزول القافل ليه على كرت صغير ..بفكوا ليه (شايب) وراء (شايب).
شكوة مريخ كوستي في (ولاءالدين) – زي الزول الما عندو موضوع.
الزول الما عندو موضوع دا يوم قاعد كدا ..قال انا بدل ما اقعد ساي كدا ..احسن امشي اكشف على النظر.
زولكم مشى لطبيب البصر ..ما لقاهو ..قام قال وقت الزول وصل (العيادات) دي احسن الواحد (يخلع) ليه (ضرس) بدل ما يرجع ساكت.
صاحبكم مشى على طبيب الاسنان.
الدكتور قال ليه عندك وجع في (الضرس).
الزول قال ليه ما عندي والله وجع ضرس ..لكن اخلع اي واحد من الضروس الفوق دي…عندنا جارة (نقناقة) كدا ..لو مشيت ليها مدلدل ايدي وقلت ليها ما لقيت دكتور العيون بتشيل حالي ..وبتعمل لي موضوع في الحلة.
الدكتور قال ليه : لو نقناقة شديد ..احسن نشيل ليك (الضروس) الفوق دي كلها ..عشان نحاسبك خلع بالجملة بدل ما نحاسبك قطاعي.
هسع ناس مريخ كوستي عملوا نفس الشيء.
قبلوا جاي.
وقبلوا جاي.
وقت ما لقوا ليهم موضوع قالوا نشتكي ولاءالدين.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ما مهم.
نرجع لقناة ليبيا 2018..وندخل في علوم المثلثات.
اول حاجة لا بد من ان نقول السمعة التى تسبق فريق الاهلي الليبي ..اكبر من حجمو.
الفريق الليبي بوضعه الذي شاهدناه عليه امس ..الهلال قادر باذن الله وتوفيقه على الانتصار عليه في سوسة وفي ام درمان.
قبل ان اشاهد مباراة الاهلي الليبي وانزو المالي امس كنت متخوف من الفريق الليبي بعد الكلام الذي سمعته عن الفريق الليبي.
لكن في حقيقة الامر – الهلال يمكنه ان يتجاوز الاهلي الليبي بسهولة – لا مقارنة بين مستوى الهلال ومستوى الاهلي الليبي.
نحن لا نريد ان يستهتر الهلال بالفريق الليبي او يتعامل معه من غير احترام لكن في نفس الوقت لا نريد ان نُكبر مخاوف الاهلة من الفريق الليبي.
يجب ان لا نعطي الفريق الليبي اكبر من حجمه – لأن الخوف في حد ذاته عامل سلبي.
الهلال قادر على تحقيق نتيجة ايجابية في سوسة – قادر على الانتصار عديل كدا في مباراة الذهاب التى سوف تكون في تونس.
مهم جدا ان يعود الهلال بالنقاط الثلاثة من تونس – لأن الفريق فيما يبدو يلعب خارج ارضه بصورة افضل من المباريات التى يلعبها في ارضه.
كذلك يجب ان لا يفوت على الهلال ان المباريات التى يلعبها الاهلي الليبي في تونس تشكل خصما على الفريق – اذ لا تسمح السلطات التونسية باكثر من (6) الف مشجع لحضور المباراة من داخل ملعب سوسة.
هذا العدد يحضر في تمارين الهلال .. لذا فان عامل الارض والجمهور في مباراة الهلال القادمة لا يتوفر للفريق الليبي بصورة مثلى.
يجب ان يضع الهلال في الاعتبار ان مباراة الذهاب يلعبها الاهلي الليبي خارج ليبيا ..لذلك على اللاعبين ان يتخلصوا من احساس الارض والجمهور.
ملعب سوسة كما بدأ امس ملعب جيد ..وارضيته طبيعة ..والجمهور قليل وحضاري وغير متشنج.
كل العناصر في صالح الهلال لتحقيق انتصار على الفريق الليبي في سوسة.
حسم امر التأهل يفترض ان يكون من الجولة الاولى.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
اما فنيا فان الاهلي الليبي ايضا لا يمكن ان يشكل خطر على الهلال.
فريق الاهلي الليبي يتكون من عناصر شابة ..تفتقد للخبرة..هم بطبيعة الحال غير قادرين على مجاراة الهلال وخبرات لاعبيه الكبيرة.
عناصر الخبرة في الفريق الليبي قليلة من بينهم الليبي طارق التائب الذي شارك في مباراة الامس كبديل في الشوط الثاني.
مستوى طارق التائب لم يكن جيد ..يبدو ان عامل السن خصم من النجم الليبي الكثير.
بقية افراد الفريق كلها عناصر صغيرة في السن ..خاصة حارس المرمي احمد الفيتوري الذي يبدو في سن احمد بيتر.
التوليفة الاخرى اغلبها في سن بشه الصغير ووليد علاءالدين ..هذا ما يجعلنا نقول ان تلك العناصر غير قادرة على الصمود امام بشه وكاريكا ونزار حامد والشغيل.
ان يضع الهلال في الاعتبار قلة خبرات عناصر الفريق الليبي وصغر سنهم سوف يجعله ذلك يحسن التعامل معهم في مباراة الذهاب.
اما مباراة الاياب فان جماهير الهلال قادرة على ان ترهب هذا الفريق بشكل قانوني وقادرة كذلك على ان تزلزل الارض تحت اقدامهم.
لن يصمدوا امام الهلال اكثر من (5) دقائق في المقبرة – تذكروا هذا الكلام.
لكن قبل ذلك يجب ان يحسم اخوان مساوي الاهلي الليبي في (سوسة) حيث يقدمه هذا الملعب للهلال لقمة في متناول اليد.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ايضا من الاشياء الظاهرة في الفريق الليبي في مباراة الامس رعونة مهاجميه – حيث اضاع هجوم الاهلي الليبي فرص سهلة ..لا يضيعها (عنكبة).
عنكبة بجيبها …تخيلوا بعد هذا كيف هو حال هجوم الاهلي الليبي.
كذلك كانت هناك مخالفات عديدة امام مرمي انزو المالي لصالح الاهلي الليبي كلها نفذت على طريقة (موسى الزومة).
قصدت ان اقول ذلك ..وان ابدد مخاوف الهلالاب من الاهلي الليبي لأن الذي وصلنا عن هذا الفريق كان يزرع في نفوسنا الخوف.
لا نريد ان نعطي هذا الفريق اكبر من حجمه حتى لا نخسر من خوفنا منه.
مع كامل (الاحترام) للفريق المنافس باعتبار ان اي فريق لا يحترم الفريق الذي يلعب امامه بغض النظر عن مستواه فلن يحقق عليه انتصار.
ابقوا على احترامكم للفريق الليبي – لكن بددوا مخاوفكم منه – حتى لا يجعلنا الخوف نتراجع من القضاء على الاهلي الليبي من مباراة الذهاب.
طارق العشري المدير الفني للهلال ..هو يخبر الفريق الليبي جيدا ..وهو كذلك قادر على وضع الخطة والتشكيلة التى تجعل الهلال يتجاوز مرحلة الـ 32 بسهولة باذن الله وتوفيقه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
بي صراحة.
ومع كامل التقدير لقناة ليبيا 218 ..الاهلي الليبي طبظ عينو بي ايدو.
الناس ديل ما عارفين الهلال.
ما عارفين بشه وكاريكا ونزار.
ما عارفين الشيخ موكورو.
لو عارفين البعمل فيه الشيخ موكورو هذه الايام كان من هسع شاركوا في سباق الدراجات.
الهلال دا لا بتقدروا عليه ..ولا حاجة.
…………

و

الغريب ان الفريق الليبي حارس مرماه اسمه (الفيتوري)..ومهاجمهم اسمه (السباعي).
منتهى (الادب).
غايتو إلّا تجوا الخرطوم مطارحة شعرية.
انتصارات الامل بتفرحنا.
الامل انتصر امس على الاهلي عطبرة.
وتفرحنا كذلك انتصارات هلال كادوقلي.
هلال كادوقلي السنة دي عاوز يمثل في البطولات الافريقية.
…….
السيدة (ل) – كل ما يجيبوا ليك سيرة حاجة ، قولوا ليهم رمضان باقي ليه تلاتة شهور وعشرين يوم بيسكتوا ساي.
وقرّط على كدا.