تفرطوا في (الموتور) شيبوب وتبكوا على (موتور) الموية

الناس وقت ما يكون عندهم حاجة في البيت – ويجيهم (حرامي) وما يلقى ليه حاجة يسرقها بقوم يشيل (شاحن الموبايل).
احسن من يمرق ساي.
احسن من يحرج نفسه.
الصباح وقت تسألهم عن الحاجات التى سرقها (الحرامي) يقولوا ليك : لقط الموبايلات كلها جلاكسي 5 ونوت 4 وشال ليه جهاز موبايل.
والحرامي ما شال اكتر من (شاحن موبايل).
قالوا ليك في جماعة جاهم حرامي.
الحرامي ما لقى اي حاجة في البيت عشان يشيلها.
ولا شاحن موبايل.
قلب البيت فوق تحت.
نزل الدولاب كلو في الواطة.
ضلفة – ضلفة.
الصور المعلقة مشى فتش خلفياتها.
ما في اي حاجة.
الحرامي وقت قنع مشى على (التلاجة) ، فتحها ليك لقى فيها (سندوتش) بتاع طعمية.
الطعمية ذاتها من سنة 1911م.
الحرامي قال ديل شنو ديل؟…(فرخة) ساكت في التلاجة ما عندهم.
طعمية في السقط دا اعمل بيها شنو؟.
حرامي انا وإلّا طالب؟.
الحرامي قال والله ما اطلع ساي – معقولة هسع (متلب) في نص الليل دا ..عشان اطلع ساكت.
اطلع ساكت كدا.
الحرامي عاين شمال ويمين …ومشى على (التلفزيون).
ما عشان يسرقه.
مشى على التلفزيون عشان يحضر ليه فيلم في زي افلام.
بدل ما يمرق ساكت.
برضو تصرف.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ناس المريخ السنة دي قالوا جاهم (حرامي).
الحرامي ما لقى ليه اي حاجة في استاد المريخ.
الحرامي قال بدل ما يطلع ساكت احسن يشيل (الموتور).
صحف المريخ امس – عملت لينا (ثكليبة) شديدة في (موتور موية).
موتور يعمل فيكم كدا.
والله يا حليل جمال الوالي.
زمن جمال لو سرقوا (الطابق الثاني) كلو ..ما في زول بقول حاجة.
تسرق عربيات.
تسرق مليارات.
ولا بجيبوا خبرها.
هسع موتور (الموية) تعملوا فيه كدا.
مجتمع المريخ كله امس تداول هذا الخبر.
شوفوا الناس ديل في (موتور) عملوا شنو؟.
شوفوا الجرسة التى حصلت في (موتور موية) – واحكموا بي نفسكم.
(تعرض استاد المريخ الى عملية سرقة من زائر ليلي قام بنهب موتور ملعب النادي وتفيد المتابعات ان مجلس المريخ قد شكل لجنة تحقيق بعد ان قام بتقديم بلاغ ضد مجهول وسيقوم بالتحقيق خلال الساعات القادمة مع المسئولين لمعرفة دوافع الجريمة واسبابها وربما قام المريخ بتسريح كافة المسئولين حيث لم تكن تلك هي اول حالة سرقة بملعب النادي).
هسع دي سرقة.
نوع دي مفروض ولا تذكروها.
مفروض تنوموا عليها.
تعملوا رايحين.
اتخيلوا مجلس المريخ شكل لجنة تحقيق.
وقام بفتح بلاغ ضد مجهول.
الكلام دا كلو في (موتور موية).
ويا ريت لو الموضوع وقف على فتح بلاغ ضد مجهول وتشكيل لجنة تحقيق..الموضوع (كبر) اكتر من كدا.
المجلس سوف يحقق مع المسؤولين.
الكلام دا كلو عشان شنو؟.
الكلام دا كلو عشان (موتور موية).
عشان فكركم ما يمشي بعيد.
لا قطر.
ولا طيارة.
موتور ساكت.
الاخطر من هذا ان الخبر ذكر ان مجلس المريخ يمكن ان يقوم بتسريح كافة المسؤولين.
تسريح مسؤولين في (موتور).
حليل زمن الطيارات الخاصة.
حليل زمن اكثر رئيس نادي عربي شعبية.
حليل زمن بايرن ميونخ.
وشالكة.
وكاظم الساهر.
يا جماعة البلد دي بتحصل فيها سرقات اراضي ..وسرقات في المال العام وسرقات في الميادين العامة ..ما بحصل فيها الكلام الذي حصل في (موتور الموية) دي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
بعدين انتوا وقت فالحين كدا ..وشاطرين ..ومكملين الفلاحة ..تفرطوا في (موتور) شيبوب وتبكوا (موتور) الموية.
ناس كان عندهم افضل (موتور) في الوسط – حركة ونشاط وحيوية وروح قتالية…يعملوا لينا الجرسة دي كلها في موتور موية.
شيبوب كان حركة من النشاط ..طويل القامة وصغير السن …كان عبارة عن (موتور) في نص الميدان ..ما عملتوا فيه البتعملوا فيه في (موتور الموية) الآن.
موتور موية شنو كمان؟.
موتور الموية عاوز يمسك ليكم الشيخ موكورو.
موتور الموية بقدر يثبت مدثر كاريكا.
بقفل بشه.
يا جماعة اعقلوا – الموضوع ما بيستاهل.
ما في نادي كبير بيعمل (الجوطة) دي كلها في (موتور).
نادي درجة تانية ما بعمل عمايلكم دي.
في تاريخ الكورة السودانية – حصل في نادي طلعت صحفه تبكي وتشكي من سرقة (موتور).
الكلام دا لا شفناه في النسور.
ولا شفناه في النيل الخرطوم.
لا شفناه في العباسية.
لا في بري.
ولا في الاحرار.
ما حصل سمعنا بالموضوع دا عمرنا كلو.
موتور شنو ؟.
بعدين هي وينها (الموية) – البعملوا ليها (موتور).
موتور موية تعملوا فيه كدا طيب لو شال (مولد) الكهربة – تعملوا شنو؟.
خلاص – لو الموضوع صعب عليكم اعملوا ليكم (كشف).
خلوا الناس يتبرعوا ليكم.
اي زول يتبرع بالحاجة البقدر عليها.
بالمستطاع بس.
انا خايف (لجنة الاستئنافات) تسمع بالموضوع دا – تقوم تقرر اعادة مباراة هلال الفاشر والمريخ التى انتهت بالتعادل في الفاشر.
ممكن يعيدوها.
لجنة الاستئنافات (شاحن موبايل) ممكن تعيد بيه المباراة.
دا موتور.
موتور عديل كدا.
والموتور اثر في نفسيات لاعبي المريخ.
المريخ ككل (انهار) بسبب سرقة الموتور.
للدرجة ان صحف المريخ خرجت بهذا الخبر كخط اول للصحيفة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الشيء الما لاقي ليه تفسير.
ولا عندو منطق.
بكري المدينة قاعد مع الجماعة ديل كيف؟.
مجلس المريخ قالوا ليك اجتمع عشان الفريق يعسكر في القاهرة..حسبوا ليك الموضوع.
تذاكر – وطيران وفنادق ..لقوا ليك الموضوع صعب عليهم.
المعسكر مكلف.
عبدالتام قال ليهم الخرطوم دي مالها؟.
نعسكر في خرطومنا دي.
لا قاهرة ولا اسكندرية.
السودان مالو؟.
والله ناس يعملوا البتعملوا فيها دي في (موتور) ..معسكر في (بحري) كتير عليهم.
لكن موضوع (الموتور) دا لو وصلتوا بيه (الفيفا) ممكن الاتحاد الدولي لكورة القدم يعتمدوا ليكم.
ممكن زي (الوك).
الوك اعتمدوا الفيفا ..الاتحاد قال ليهم جيبوا ليه (رقم وطني).
رقم وطني يجيبوه ليه من وين في (البرد) دا؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
المتعة ان شاءالله الليلة ح تكون حاضرة في مباراة الهلال امام النسور.
الليلة عاوزين معدل التهديف يرتفع.
عاوزين الاقوان الكتيرة.
اشتهينا الموضوع دا.
كتروا لينا في الاهداف.
الاهداف (العصرية) طعمها براهو.
شكل جمهور الهلال في (الجوهرة الزرقاء) اكثر من رائع.
……….
السيدة (ل) – اللالوب ممكن ينافس التفاح في (الاصالة والعراقة).
وقرّط على كدا.