نحن عملتها فينا (الكشافات) وابيكو انتوا مالكم؟

في الحلة عندنا (بي ان سبورت) – حقتنا برانا ، بنقعد في ضل الله دا ونحلل في المباريات.
على كيفنا.
رونالدو للموسم السادس على التوالي يسجل اكثر من (30) هدف في الدوري الاسباني.
الزول شنو؟.
قشارة فول.
تلاجة بطاطس.
رونالدو اي رقم قياسي وضعوه قدامو كسرو ليك.
زي الساعة.
كورة رونالدو بقت (رياضيات)..وتاريخ وجغرافيا وكيمياء.
كلما يسجل رونالدو هدف ….المحللين والخبراء بيرجعوا 60 سنة للوراء عشان يشوفو رونالدو بهذا الهدف كسر رقم منو؟.
دا ما (تاريخ)؟.
كل مباراة يسجل فيها رونالدو (هاتريك).. بيرجعوا لينا للدقائق لحسبة الزمن الذي سجل فيه رونالدو الهاتريك.
دي ما رياضيات؟.
وكان للجغرافيا ..رونالدو من اي موقع سجل.
وكان للكيمياء (اصلى ما بريدها) ..سجل من الوضع الطائر والوضع الثابت والوضع المتحرك.
نحن زمان وقت كنا بندرس (كيمياء) كان بتقيف لينا هنا دا – ما بتنزل لينا.
وكنا بنعتبرها (تنظير) ساكت – ومعادلات ما عندها اي قيمة.
الى ان جينا وشفنا رونالدو بنزل لينا (المعادلات) دي معادلة معادلة في كل هدف يسجله.
لمن بطنا طمت.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
قاعدين نحلل الكورة كدا.
ما شغالين بالاسس العلمية ..والنظريات (التقيلة) دي.
بنحللها حسب فهمنا.
وكان لي ميسي…زى قالب الحلو.
الزول دا بتجمع وبتطرح وبتشعر بيه ما في عديل كدا.
فجأة كدا يتعجن ..يقوم يتنفش ليك.
ما بتفهم اي حاجة.
ميسي ما طوع الكورة براها – هو ذاتو اطوع ليها – ممكن يعمل اي حاجة بي جسمو.
متل المدافع الالماني ..وقت ميسي مسك الكورة ..عمل فيها راجع ..وما رجع…عمل فيها متقدم لي قدام شوية وما اتقدم.
دا كلو حصل في كسر من الثانية.
قام طلع شعوره كله ..مدافع بايرن ميونخ (شهق) ليك كدا زي (شهقة الموت).
نحن قاعدين في النادي حسينا ليك بالشهقة.
العصبة الفلتت لا عرفناها في ضهرنا – لا عرفناها في ضهر المدافع.
الموية النزلت ..لا عرفنها نزلت من رقبتنا وإلّا نزلت من رقبة المدافع.
مسى مشى ..وما مشى…نحن اللحظة دي ما بنقدر نأكدها ليكم ..عشان والله ما فهمنا فيها حاجة.
الشيء المؤكد – الحارس هناك قال يتشوبر ويطلع من المرمي – في اللحظة دي (المدافع) اتخلف مع (العفش)..ميسي صنقع ..الكورة جات قون.
بلة جابر ..هنا في ام درمان قام يرفع في ايديه.
وعلي جعفر بعد الحركة العملها ميسي ..الدكتور منعو رسمي كدا من (السمك).
طبعا ح تقولوا لي علي جعفر ذنبو شنو؟.
يعني بقت على بلة جابر.
ح اقول ليكم ..علي جعفر دا من بعد 9178950000 ميل ..لو المهاجم رفع رأسو ساكت ممكن يقع.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن قاعدين كدا في الضل ..نحلل في الكورة ..ندخل ليك محمد وردي في هدف برشلونة الاول.
نطلع عثمان حسين ..ندخل ابراهيم عوض في قون رونالدو.
شغالين كدا بس.
على كيفنا – ما في زول بيسألنا.
خلينا ليكم كورتكم الكلها (كاردينال) دي.
اي زول فينا في الضل بيقول رأيو..بي كل صراحة.
لا عندنا فواصل اعلانية ولا عندنا مشكلة مع زول.
الكورة دي عالم غريب.
برشلونة غلبت في دوري ابطال اوربا…وجات اتغلبت في الدوري الاسباني.
ما في وزول قال حاجة.
ولا في زول جاب سيرة (الكشافات).
برشلونة اتغلبت مرتين على التوالى في دوري كان الفارق بينها وبين اقرب منافس ليها (9) نقاط.
شطبوا بيكيه؟.
عندي احساس بيكيه دا المثبتو في كشف البارسا ..شاكيرا.
يمين لو ما شاكيرا ..(بلد الوليد) ما يلعب فيها.
تامي كورتو شاكيرا.
برشلونة بينها وبين اتلتيكو مدريد (9) نقاط وبينها وبين وريال مدريد (12) نقطة.
هسع برشلونة بقت في رقبتها.
يمكن تفقد لقب الدوري الاسباني ، عديل كدا.
ويمكن تخرج من بطولة دوري ابطال اوروبا.
كمان ناس اتلتيكو ديل ..كورتهم (الساطور) بيجيك طاير قبل (الكورة).
الناس ديل عندهم (عكة) في ميدان عقرب ما قاعدين نشوفها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الريال ذاتو بيغلب بالسبعة والخمسة والاربعة في الدوري الاسباني وبتغلب 0 / 2 من فريق الماني مركزه الثامن في دوري بلاده.
الناس ديل الحاصل عليهم شنو؟.
عندهم (جوهرة) برضو؟.
محمد عبداللطيف هارون مسك القطاع الرياضي لبرشلونة..وإلّا جابو (العشري)؟.
طبعا بتابع في برشلونة دي من زمن حفرو البحر..زمن القمرية كانت (جوز حمام) – وشوال البصل كان نصو (تفاح) ..ما حصل في كل متابعاتي لبرشلونة سمعتهم جابوا سيرة (الدكاكين).
الدكاكين دي عندنا نحن برانا.
دكاكين شنو كمان؟.
هي كورة وإلا تموين؟.
الغريبة عماد الطيب يشيل ويتصور قدام الدكاكين – تقول هو الامين العام لبقالة ناصية.
يا زول انت الامين العام للهلال.
الهزائم برة موجودة.
وممكن تكون كبيرة.
وتحصل فجأة ..وتكون صادمة ..وعنيفة.
الاختلاف الوحيد بيننا وبينهم ..انهم بيعرفوا يتعاملوا عند الخسائر.
الجقلبة ..وصناعة الشماعات لتعليق الخسائر عليها ما عندهم.
نحن وقت الهلال يخسر.
يشيلوا المحترفين.
والجهاز الفني.
ويشيلوا القطاع الرياضي.
ويشيلوا الكشافات.
والدكاكين.
ويغيروا (النجيلة).
برشلونة اتغلبت من ريال مدريد بعد ان تقدمت عليه بهدف (بيكيه) – كلمة واحدة في حق (انيستا) ما سمعناها.
ولا قالوا حاجة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن ترى فهمنا الحاصل.
اتغلبنا ..قلنا (الكشافات)..يشيلوا ويركبوا فيها متل (الستائر) الجديدة.
والكاردينال واعلام المريخ قبلوا على (ابيكو).
قلنا السبب ابيكو.
والكشافات.
والكاردينال حلل الحكاية وقال السبب (الصواميل).
اقتنعنا بالموضوع دا.
وقربنا نصدق.
ناس المريخ كشحوهم ليك بي هدفين ما فهموا منهم اي حاجة.
زي العطلة البتقع جمعة.
غايتو جمال سالم انا من الهدف الاول لوفاق سطيف قاعد افتش عنو ..ما لقيتو.
وكان لامير كمال ..بقترح طوالي يسحبو منو لقب (امير).
في امير بجليها كدا.
تقول حارس ليه مدرسة.
شابكننا ابيكو ..والكشافات.
الكشافات وابيكو.
انتوا مالكم؟.
معسكرين في مصر مرتين.
وفي اثيوبيا.
وقي قطر.
والامارات.
وكينيا.
وتطلعوا بالصورة دي.
فانيلتكم من الاعلانات ..علي جعفر كل ما يشوف ليه مهاجم جزائري بقول ليه (فاصل ونواصل).
المباراة كلها هو برة اللعب.
يا ناس المريخ ..تحليلنا دا ما ترموه في البحر.
اسمعوا الكلام دا …سلك ما بقولو ليكم.
على جعفر لو مشى الجزائر بي طريقتو دي – نتيجة المباراة بجيوبها في صفحة الحوادث ..ما بجيبوها في صفحة الرياضة.
كلمتكم.
ابعدوا علي جعفر من البعثة.
ناس وفاق سطيف ..نيتهم كعبة.
الناس ديل ختوا على جعفر في رأسهم.
انا كلمتكم ..وقلت ليكم (النصيحة)..عملتوا بيها ..الله شافكم ..ما عملتوا بيها من هسع شوفوا ليكم (كشافات) علقوا فيها الخسارة الكبيرة.
كدا الواحد ممكن يطلع.
وانتوا احرار.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………
و
الليلة ما عاوز اتكلم عن مباراة الهلال وهلال الفاشر.
كورتنا بقت كلها كشافات.
نقول شنو عاد.
بس ركزوا في الكورة.
خلوا الحاجات التانية.
عاوزين بداية صحيحة.
خطوة لي قدام.
الهلال عاوز مننا الكتير.
كلكم محتاج ليكم الهلال.
ما تقيفوا.
ولا تحزنوا.
انتوا هلالاب ..ما في اجمل من كدا.
الزعل في شنو؟.
الهلال لا بمرض ..ولا بموت.
الهلال كدا.
واقف طوالي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
يا سلك خلى الحساب بعد مباراة الرد.
لسه بيناتنا المسافة.
………..
السيدة (ل) – السنة دي خايف لو (المطرة) ضربتنا يقولوا لينا ابيكو والكشافات.
وقرّط على كدا.