محمد عبد الماجد

قلنا (النفرة) تظهر في (بكري المدينة) ظهرت في (الحكم)


امس قلنا نشوف (قروشنا) مشت وين؟.
اي (بطيخة) دافعين فيها (قرش) بنعرفها.
نحن حقنا ما قاعدين نخليه.
لو عندنا (بصلة) ما بنسيبها.
عليكم الله في الزمن الصعب دا في زول بخلي حقو.
عندنا قروش من ناس المالية.
وقروش من ناس اتحاد المصارف.
وبنك الثروة الحيوانية.
والبنك العقاري.
والجزيرة.
والشرطة.
وناس طارق حمزة.
قروشنا مشت لي ناس المريخ – ونحن (كهربة) ما عندنا.
السخانة كتلتنا.
الكهربة بقت زي (التلغراف) – تجيك مرة مرة.
لمن تشوف (اللمبة) مولعة ..زي كأنك شفت (هلال العيد).
(يومي البشوفك يبقى عيد – والدنيا تبقى معيدة).
الضحك يشقك.
وقت تشغل (المروحة) تقول شغلت (محمد الامين).
بتنطرب جنس انطرابة في الدنيا دي.
تبشر فوق المدام.
وتعرض صقرية.
زي كأنك بتسمع في (قلنا ما ممكن تسافر).
(وعيونك ديل عيون اهلي حنان زي نغمة في مقطع).
بتلقى نفسك بترقص من غير ما تشعر.
ما فاضل ليك إلّا تتحنن.
وتعمل ليك (سيرة).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
امس قلنا نشوف قروشنا راحت وين؟..الزمن دا الزول لو عندو (قرش) بيحرسو.
بقعد حداهو.
نحن (الباقى) ما قاعدين نخليه للكمساري – نخلي ليكم (10) مليار جنيه.
الـ (10) مليار دي لو منحوها للنسور كانوا غلبوا خمسة.
مريخ نيالا.
النيل شندي.
اقل حاجة كانوا بغلبوا اتنين.
نحن عندنا 10 مليار جنيه مع ناس المريخ…راحت ساكت.
10 مليار منها العوض وعليها العوض.
قعدنا نتابع في (حقوقنا).
نشوف (قروشنا) بتجري قدام عيونا.
يا بكري ارفع رأسك …(عندنا معاك 10 قروش)…الجري الكنت بتعمل فيه زمان – ما تعملوا لينا الليلة.
نحن طالبنك.
يا ضفر ما تتقدم…لو ما كان عندنا عندك قروش ..ما بنسألك ..العاوز تعملو – اعملو.
ما في زول بقول ليك حاجة.
لكن طول ما عندنا عندك قروش من حقنا نسألك.
نرجعك تلعب ورا.
نقدمك…
على كيفنا.
نشطبك في التسجيلات دي.
بي حقنا.
قروشنا ونحن (احرار) فيها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
اصلا الزول وقت يكب ليه قروش في حاجة – بيقعد يتابعها.
بيحرسها.
زي (سيد البيت) الذي تستأجر منه المنزل الساكن فيه – وتكون ساكن معاه في نفس البيت.
بقعد ليك في حلقك.
يعني قاسم ليك البيت.
لو كنت ساكن مع (صاحب البيت)..بعذبك عذاب ..ويقعد يحرسك في النازلة والطالعة.
لمن ترجع البيت شايل ليك (كيس خضار) ..بكون عاوز يعرف (الكيس) دا فيه شنو؟.
يحسبها ليك بصلة – بصلة.
عجورة عجورة.
لو قفلت الباب بي قوة ..يجيك ناطي.
لو شافعك طالع في رأس البيت ..سيد البيت يدق ليك الباب ويقول ليك (السقف) بتاع الصالون ما شايل حيلو.
لو دفقت ليك (موية)…يقيف ليك في الباب.
دا غير انو من يوم 23 في الشهر – بشيل (الكرسي) ويقعد ليك برة.
هسع نحن امس عملنا نفس الشيء في مباراة المريخ.
المباراة كانت تحت رعايتنا.
قعدنا نشوف (النفرة) مشت وين؟.
قلنا نلقاها ظهرت في بكري المدينة.
لقيناها ما ظهرت.
اصلا بكري المدينة بيظهر ويختفى مع (القروش).
في قروش بيلعب ليكم.
ما في قروش الابيض دي ما بمشيها معاكم.
قلنا كدا نشوف (ضفر).
لقينا كورتو قبل النفرة زي كورتو بعد النفرة.
طيب القروش دي راحت وين؟.
النفرة دي عملتوا بيها شنو؟.
لا كهربة.
لا كورة.
راحت وين؟.
نحن قاعدين نفتش ليك في (النفرة) كدا – ظهرت لينا في (الحكم).
الحكم جريتو كانت جرية (نفرة).
وصفارتو.
صفارة (نفرة).
اي احتكاك بالنوايا ..بحسب مخالفة لصالح المريخ.
واي مخالفة للكوكب المراكشي ..بفوتها ليك.
شغل (النفرة) ظاهر.
اصلو ما عاوز ليه (غلاط).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الامر الغريب كان في معلق مباراة المريخ والكوكب في قناة انغام.
الزول دا كان بصرخ ويكورك في كورة ماشه (الكشافات).
الكورة في السما – وهو قاعد يصرخ لينا.
عندو فروقات (صريخ).
فايض (كواريك).
الزول دا كان بعلق ليه في كورة تانية.
وإلّا كان لابس ليه عدسة تقريب.
وإلّا فاكرنا بنحضر فيها في الراديو.
المعلق خلى الكورة وبقى كل دقيقتين يقول لينا مجموعة قنوات انغام تنازلت عن 20 % من قيمة الاعلانات لصالح المريخ.
الكلام دا كرروا اكتر من 120 مرة في المباراة.
بعدين (مجموعات) قنوات انغام دي وين؟.
نحن ما سمعنا بيها.
انغام متين عملت ليها (مجموعة).
وكل لحظة والتانية يقول لينا المباراة منقولة (حصريا) على قناة انغام.
ويقول لينا قناة انغام منحت قناة الخضراء وقناة البحر الاحمر حق نقل المباراة.
من وين هي (حصرية) ومنقولة في نفس الوقت في عدد من القنوات.
ويرجع لينا تاني ويقول لينا قناة انغام تنازلت عن 20 % من قيمة الاعلانات لصالح المريخ.
يمشى ويرجع للمعلومة دي.
يعني الاعلان البعمل فيه المعلق لهذا (التنازل) اكبر من عائدات الاعلان الكلي للمباراة في قناة انغام.
لكن برضو نحن ما بنلوم المعلق.
وما بنقول ليه شيء.
كورة مافي.
والمريخ كان غائب المباراة كلها.
وما بظن المريخ طلع ليه بي حاجة من المباراة دي اكتر من الـ 20 % التى تنازلت منها قناة انغام من عائدات الاعلان في المباراة لصالح المريخ.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المباراة (فنيا) ما كان فيها اي شيء.
ما فيها شيء غير التنازل عن الـ (20 %).
وفريق الكوكب المراكشي كان افضل من المريخ رغم خسارته.
وهذا مؤشر مبكر ان المريخ في المغرب سوف يعاني كثيرا امام هذا الفريق الذي يلعب كورة منظمة.
الفريق كورتو (هادية).
لكن يفتقد للشراسة (الهجومية).
مركزه في الدوري المغربي – انعكس على مستواه.
وواضح ان الفريق احترم المريخ اكثر من اللازم.
هذا (الاحترام) اكيد الكوكب المراكشي سوف يتخلى عنه في المغرب.
بي نفرتكم.
وبي حكمكم.
غالبين واحد يا ناس المريخ.
في المغرب بدون نفرة.
وبدون حكم..ح تعملوا شنو؟.
وح تتصرفوا كيف؟.
احسن ليكم شوفوا ليكم (نفرة) تانية.
فريقكم دا اصلا شغال بالنفرة.
وناس بكري المدينة وعلاءالدين يوسف ما بلعبوا ليكم بدون (نفرات).
علاءالدين يوسف بي نفرتكم دي لعب ليكم (5) دقائق.
بدون نفرة ح يعمل ليكم شنو؟.
عاوزين كلامي.
بدون نفرة ما تمشوا المغرب.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
و
الكوكب المراكشي في المركز الـ (14).
بعادل عندنا (النسور).
او الامير البحراوي.
التسجيلات باقى ليها تلاتة ايام.
شيبوب باقى ليه 72 ساعة.
الريدة الفي القلب بتظهر في العيون.
هسع بقت تظهر في الكورة.
………
السيدة (ل) – قهوة بدون (سكر) بنعرفها ..بدون (دوا) بنعرفها ..بدون (قهوة) دي كيف؟.
وقرّط على كدا.