عندنا ليكم (محترف) بيلعب (رئيس)

قبل كدا قلت ليكم الهلال بيبحث عن (مهاجم) والمريخ بيبحث عن (رئيس).
الجماعة بفتشوا ليهم في (رئيس).
عاوزين ليهم رئيس (طرف) مؤتمر وطني.
عشان يضمن ليهم (الدعم) من السلطة..ويجيب ليهم (السيولة) من الحكومة.
ونحن مساكين نبني جوهرتنا بي عرق جبينا.
بي قروش الكاردينال.
الهلال رجّع (سادومبا)…وناس المريخ عاوزين يرجعوا (جمال الوالي).
الناس في شنو؟…وهم في شنو؟.
الغريبة اعلام المريخ الذي ظل (يطبل) لعودة جمال الوالي شايف عودة (سادومبا) غريبة للهلال.
ما عاجباه الشغلة.
الموضوع دا مضايق اكرم الهادي سليم وعلي جعفر واعلام المريخ.
اختبارات الرئيس في المريخ بعملوها بـ (امر القبض).
والشيك.
وتذاكر السفر.
وحجوزات الفنادق.
الواحد فيهم بختوا ليه (شيك) قدامو بشوفوه بسددوا وإلّا لا؟.
معقولة نادي في حجم المريخ ما يلقى ليه (رئيس).
جمال الوالي ما عاوز يرجع ..من غير ضمانات ودعومات.
واسامة ونسى (الرئاسة) تاني ما بفوتها.
يفوتها كيف؟..وهو كل (تسجيلات) بيعملوا ليه (نفرة) بي (10) مليار.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في المريخ ليس هناك (رئيس) متفق عليه.
حتى جمال الوالي الذي كان (رئيس طوالي) – اصبحت حوله خلافات كبيرة في المريخ.
وليس هناك دليل اكبر من ان جمال الوالي لن يستطيع ان يعود للمريخ عبر الجمعية العمومية.
جمال الوالي فشلت شعبيته الكبيرة واعلاميته الضخمة في ان تعيده للمريخ عبر (الجمعية العمومية) ، واصبح طريق العودة الوحيد بالنسبة له ان يرجع رئيس للمريخ بالتعيين.
الصناديق قالت لا.
يعني (الوالي رئيس طوالي) و لن نوالي غير الوالي ..كلام جرايد ساكت.
اعلام بس.
واعلام (سالب) كمان.
حقيقة الامر ..ونبض الجمعية العمومية في المريخ يشير لعكس الذي يروج له اعلام المريخ.
تتكلموا ساكت وقت جينا لساعة الجد – اكتشفنا ان جمال الوالي ما عندو اي شعبية.
إلّا في (الاعمدة) الحمراء.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
رؤوساء الهلال عبر تاريخ الهلال الكبير – كلهم كانوا بيرفضوا رئاسة الهلال عبر التعيين.
ما فيهم زول بيجي بالتعيين مرتين.
جمال الوالي يمشي ويجي راجع بالتعيين.
الزعيم الراحل الطيب عبدالله كان عنده موقف واضح من (التعيين) وقد ظل الرجل في خلاف مع لجان التعيين.
ولم يعرف للطيب عبدالله مؤيدا غير (صناديق الاقتراع).
لذلك كان (الزعيم) الطيب عبدالله.
طه علي البشير وعبدالمجيد منصور – كلهما اختاروا ان يحكموا الهلال عبر اختيار الجمعية العمومية.
صلاح ادريس رفض اكثر من مرة ان يكون رئيسا للهلال عبر التعيين.
الامين البرير تدرج في العمل الاداري الى ان اصبح رئيسا للهلال عن طريق الجمعية العمومية للهلال.
حتى اشرف الكاردينال لم يدخل الهلال ليكون رئيسا لمجلس ادارته إلّا عبر الانتخابات.
هذا هو الهلال.
صناديق الاقتراع هي صاحبة الكلمة الاولى والاخيرة في الهلال.
ويبقى من بعد احترامنا وتقديرنا كل من تأتي به صناديق الاقتراع وان اختلفنا حوله ، او اختلفنا معه.
جمال الوالي الآن بعد (14) سنة – يريد بعد كل هذه السنوات ان يحكم المريخ عبر لجنة التسيير.
كأنه بطرح نفسه لاول مرة.
جمال الوالي يريد ان يرجع بقرار وزاري وعن طريق لجنة يختارها جمال الوالي وتدعمها السلطة.
هذا هو الطريق الوحيد الذي يمكن ان يعود به جمال الوالي رئيسا للمريخ.
اسامة ونسى قام بدور (تنظيف) الديون.
اسامة ونسى وصل لغاية الحبس – عشان جمال الوالي يرجع تاني عبر التعيين.
حتى (النفرة) التى قام بها اسامة ونسى ومجلسه – ربما يكون المستفيد الاول منها هو جمال الوالي.
عشان قروش النفرة دي ما بتطلع إلّا في المجلس القادم.
والمجلس القادم الترشيحات تشير فيه لعودة جمال الوالي.
ناس اسامة ونسى حارقين دمهم ساكت.
حتى الجمعية العمومية التى كان يمكن ان تدعم اسامة ونسى عطلت (صناديقها).
عشان يرجع جمال الوالي من تاني.
طيب انتوا زعلانين في عودة (سادومبا) ليه؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
غايتو هيثم مصطفى لو استمر في المريخ الى وقتنا هذا كان اصبح رئيس نادي المريخ.
بس هيثم مصطفى غلبو يصبر مع المريخاب.
فضل العودة والجلوس في البيت من ان يكون لاعبا في المريخ.
مجلس جمال الوالي في السابق كان قد اجبر فيصل العجب على كتابة خطاب اعتزال.
اجبروا فيصل العجب على الاعتزال.
وقالوا ليه كفاك.
انت عاوز تلعب لغاية متين؟.
الشيء العجيب ..ان جمال الوالي الذي اجبر فيصل العجب على الاعتزال او على كتابة خطاب الاعتزال هو نفسه الذي يريد ان يعود للمريخ مرة ثانية.
ولو انه عاد عبر الجمعية العمومية واختياراتها ما كنا قلنا شيء.
جمال الوالي يريد ان يعود بنفس الاسلوب الذي ظل يعود به للمريخ منذ ان جاء به قبل اكثر من 14 سنة.
الباب فاتح.
ليه الناس بتحب تدخل بالشباك.
يمكن ان يأتي جمال الوالي عبر (الجمعية العمومية) ما في اي مشكلة.
الجمعية العمومية بكل عيوبها وحتى بعضويتها المستجلبة تبقى افضل مليون مرة من التعيين.
اسامة ونسى تم تعينيه رئيسا للمريخ.
ومددوا ليه.
ويبدو ان المجلس الثالث للمريخ ايضا سوف يكون عبر (التعيين).
وينها الجمعية العمومية؟.
وينها العضوية؟.
هل كل هذه الاجسام ..اجسام شكلية ساكت.
صور.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
يا ناس المريخ لو الموضوع غلبكم – ممكن نشوف ليكم رئيس (محترف).
رئيس اجنبي.
افتحوا باب انتداب رؤوساء الاندية الاجانب.
جيبوا ليكم رئيس من برة.
اتفكوا شوية من جمال الوالي.
جمال الوالي في المجلس.
جمال الوالي رئيس عبر التعيين.
جمال الوالي في المدرجات.
جمال الوالي يزور اسامة ونسى.
اطلعوا من الحتة دي شوية.
في الهلال جاء صلاح ادريس وخرج – ما في زول مساك في صلاح ادريس الآن.
جاء الامين البرير وفات.
وسوف يمضي الكاردينال بعد (الجوهرة) دي – وما في زول بقول ليه إلّا تقعد.
وإلّا تبقى رئيس.
الهلال قادر في كل وقت ان يصنع رجال المرحلة.
ما عندنا اي مشكلة.
واي زول تجيبو صناديق الاقتراع مرحب بيه واهلا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
مباراة الهلال امام سان جورج في الجوهرة الزرقاء وبعد الاسماء الجديدة التى انضمت للهلال ح تحقق دخل خرافي.
يجب الترتيب لهذه المباراة منذ الآن لتكون احتفال بالجوهرة والمدرب والمنضمين حديثا للهلال.
مهند ومعتز وحسين.
اي حاجة تمام.
في انتظار شيبوب.
الحساب يجمع.
ح تتعبوا معانا.
…..
السيدة (ل) – النعامة لو عندها رأس ما بتدفنو في الرمال.
وقرّط على كدا.