محمد عبد الماجد

علي مليار


طبعا كلنا بنعرف الزعيم التاريخي (علي دينار).
علي دينار ما عندنا فيه اي كلمة.
علي دينار ..نقول عاد فيه شنو؟.
كلامنا كلو عن (علي مليار).
مع التاريخ الذي صنعه الزعيم السوداني اسمو كان (علي دينار).
فرد (دينار)..شوفتوا التاريخ دا كيف؟.
انت يا علي جعفر بي كورتك الشوية دي اسمك بقى (علي مليار).
في شنو؟.
وليه؟.
وعلى كم؟.
عندكم (عيادة) في شارع الدكاترة.
عندك شركة مقاولات.
غايتو (كورة) ليك ما شايفنها.
عشان الامور تبقى ليكم واضحة من بداية العمود.
وتظهر.
علي جعفر – قالوا اعادوا قيده في المريخ بـ (مليار) جنيه – من هنا جاءت تسمية (علي مليار).
كدا وضحت افتكر.
من الليلة علي جعفر اسمو (علي مليار).
بالمناسبة قالوا ليك (الورد) الريح علي قالوا ليك فارق (الزهور) علي جعفر.
الزهور والورد اتفرقو.
علي الريح شطبوه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
علي جعفر – علي مليار كان قد سافر مع بعثة المريخ الى المغرب من غير ان يعيد توقيعه للمريخ.
نحن الهلالاب قلنا لو علي جعفر دا قعد في كشوفات المريخ من غير توقيع ما في زول بيسألو.
ولا بنقدم فيه شكوى.
يوقع او ما يوقع..ما مهم.
علي جعفر ولا عاوز ليه (توقيع).
لو قعد بدون ما يوقع ما في زول بيسألو.
ولا في زول بقول شيء.
عادي.
اعلام المريخ كان قد نشر صور لعلي جعفر وهو مع سفير السودان في المغرب.
نحن شفنا الصور قلنا في شنو؟.
على جعفر رئيس البعثة؟.
الزول دا القعدو مع (السفير) شنو؟.
الحاصل شنو؟.
قالوا لينا علي جعفر عاوز يوقع في كشوفات المريخ ، ولا بد ان يكون ذلك امام (سفير) السودان في المغرب.
السفير شخصيا.
قلنا ليهم والله كورة علي جعفر الشايفنها دي مع (مدير مكتب) السفير ما بتقعدو.
سفير شنو؟.
الموضوع دا ما عاوز ليه (سفير).
انتوا ساكت بتكبروا الموضوع.
الموضوع دا كان (مواطن) ساكت بيحسمو … لا عاوز ليه (سفير) ولا حاجة.
معقول الزول دا سافر من هنا (مفكوك) عشان يوقع في المغرب امام (السفير).
انتوا مالها كورتكم بقت زي (المفاوضات) مع الحركات المسلحة.
علي جعفر بقى رئيس حركة عشان يقعد لينا مع (السفير).
ويوقع كمان.
كان يمشي يوقع في (قطر).
انتوا نقلتوا المفاوضات الى (المغرب).
غايتو ما عارف.
لكن بعد (النفرة) العملوها للمريخ اتوقع اي شيء يحصل.
النفرة كلها شالوها وادوها علي جعفر.
عشان كدا بقى علي مليار.
كدا وضحت.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الغريبة بعد المليار.
والتوقيع.
والصور مع السفير.
علي جعفر في المغرب كان قاعد (كنبة).
عليكم الله في داعي للمليار .. علي جعفر قعد (كنبة).
المليار دي لو اديتوها (تراوري) كان حلت ليه مشكلة.
تراوري الظاهر عندو (صالون) بيبني فيه في (مالي).
عشان كدا كل مرة بقول لي ناس المريخ عاوز ليه قروش.
والبنيان الايامات دي صعب شوية.
غايتو تراوري اثبت فعلا انو (مالي).
سوداني الجنسية (مالي) الاصل.
الزول دا لو صنقع في السماء …عاوز قروش.
الكورة البيضيعها …عاوز فيها قروش.
تراوري (مهاجم) ولاعب (محترف)..علي جعفر على شنو؟.
علي مليار.
عليكم الله في (مدافع) بيسجلوه بي (مليار).
لجنة تسيير المريخ واضح انها بتلخبط بين بكري المدينة وبين علي جعفر.
الناس ديل قروشهم كلها كبوها في المدافعين.
مرة في رمضان عجب.
ومرة في امير كمال.
ومرة في علي جعفر.
ما في (مدافع) في الدنيا بسجلوه بي الرقم دا.
في ريال مدريد ما بحصل الكلام دا.
وجعتوا لينا قلبنا ساكت.
بعدين على جعفر دا ناس (النسور) ما عاوزنو ..المليار على شنو؟.
غايتو انا بعد (الفلسة) التى ضربت المريخ – فكرت ليكم في فكرة.
رأيكم شنو علي جعفر يبقى (رئيس) لنادي المريخ في الجمعية العمومية للمريخ.
بحل ليكم مشاكلكم (المالية) كلها.
او ممكن تجيبوه رئيس للجنة تسيير زي اسامة ونسى.
القروش العند علي جعفر الايامات دي عند جمال الوالي ما في.
الزول الوحيد العندو قروش في المريخ الايامات دي هو علي جعفر.
علي مليار.
عشان كدا استفيدو منو وجيبوه (رئيس للمريخ).
ما بتلقوا اكتر من (المليار) دي.
اقصد ما بتلقوا احسن من علي جعفر.
المليار دا علي الاقل ممكن تمسك المريخ (6) شهور.
المليار دي بتجيب ليكم (10) صلاح نمر و(14) حماد بكري و (9) ابراهيم جعفر و(7) محمد الرشيد.
وكان لي خالد النعسان بتجيب ليكم (120) خالد النعسان.
لو قسمتوها كدا – احسن من تدوها كلها علي جعفر.
مليار لي علي جعفر في شنو؟.
الزول دا كورتو – في (كشافات) ما بتلعبو.
دي كورة (عصرية) ساكت.
مليار ليه؟.
هسع دا تاني ناس بخيت خميس ومازن شمس الفلاح يلعبو معاه كيف؟.
مفروض بعد (المليار) دي ..الكورة من القون يطلعها براهو.
جمال سالم ولا يتحرك.
وبخيت خميس ..ما يتعب ويكمل اللاين.
اللاين يكملو علي جعفر.
الزول دا شال ليه (مليار) جنيه – مع الظروف الصعبة التى يمر فيها المريخ.
اسامة ونسى يطلعوه بالضمانة …وعلي جعفر يشيل ليه (مليار).
والله ناس الشرطة لو عارفين قروش النفرة بتمشي لي علي جعفر ..قرش ما كان دفعوه ليكم.
حرقتوا لينا دمنا ساكت.
انتوا تعرفوا ..نحن ح نجيب لينا آلة حاسبة ..ونقعد نحرس علي جعفر.
اي كورة يلعبها ..بنشوفها بتعمل كم في المليار.
ما عندنا مشكلة ..ممكن نحسب ليه (التصريجة) بي نصف القيمة.
يعني الكورنر البطلعو علي جعفر بنحسبو ليه بـ (15) جنيه.
بداية الهجمة منو بنحسبها ليه بـ (21) جنيه.
قرش فوق السعر دا ما بنزيدو.
الاحتكاك القانوني بـ (7) جنيه.
رمية التماس بـ (3) جنيه.
الضربة الرأسية بـ (8) جنيه.
ايقاع المهاجم في (التسلل) بـ (13) جنيه.
اها يا جماعة قصرنا معاه.
شوفوا انتوا علي جعفر عاوز ليه كم سنة عشان يحلل (المليار) دي.
الزول دا لو اشتغل من النباه الاول (جدعات تماس) لمن تمغرب يوماتي لمدة (10) سنوات ما بحلل (المليار).
اقول ليكم حاجة يا علي جعفر.
انت وبكري المدينة وامير كمال ..شلتوا ليكم (قروش) ساكت.
رمضان عجب ..شوية حلل قروشو.
علي جعفر وبكري المدينة وامير كمال ما عندهم طريقة غير (التحلل) من المليارات دي.
زي ما بعملوا الناس كلهم ..انتوا مفروض تتحللوا.
القروش اصلها قروشنا.
قروش نفرة.
يعني قروش الناس ديل.
اتحللوا ..نبقى (خالصين).
قروشكم (كورة) ما بتقدروا تسددوها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
و
يا يوم بكرة ما تسرع تعال.
بكرة عاوزين نشوف الهلال الجديد.
عاوزين نشوف الجوهرة.
سادومبا.
وشيبوب.
الله يجيب لينا بكرة على خير.
ان شاءالله دائما تامين وسالمين ولامين.
………..
السيدة (ل) – (النيل) الجاري دا قال ليك حولي لي (رصيد).
وقرّط على كدا.