حسن فاروق : معقولة… بت الغفير جات الاولي؟؟؟؟

مع كل امتحان شهادة سودانية اتابع حالة الانبهار البتعامل بيها ناس كتار مع تفوق طلاب وطالبات، وتسمع وتقرأ وتشوف انه الطالبة الفلانية النابغة جابت نتيجة مذهلة مع انه ابوها غفير او انه الطالب الفلاني حقق نتيجة مدهشة مع انه ابوه عامل بسيط، او امو بتبيع كسرة او او او ، ونقرأ في الصحف ونشوف في الشاشات ونسمع في الاذاعات قصص وحكاوي عن نبوغ اولاد وبنات الاسر الفقيرة ، وكأنه حدث ماعرفو السودان في تاريخه، مع انه التاريخ القريب جدا بحكي لينا عن انه النبوغ والتفوق الدراسي مرتبط بالتنافس العادل في التعليم بين ولد الغني وولد الفقير، بنت الغني (مالا) وبنت الفقير لانه التعليم كان مجان او شبه مجان، وعادي بدخل المتفوقين من ابناء المزارعين والعمال افضل الجامعات في السودان بنسب عالية ويسكونو مجان وياكلو ويشربو والمكتبة الجامعية جنبهم ، يعني ده التعليم عندنا عامل كده ..عشان كده حالة الانبهار بتفوق اولاد وبنات الفقراء ..وتحوليها الي مواد صحفية وتقارير تلفزيونية امر محزن .. دمروا التعليم وقبلوا دمروا الانسان .. وصاروا يتفضلو علي المتفوقين بالاعفاء من الرسوم .. تخيلوا الي اين وصل بنا الحال مع اكتر ناس استفادوا من مجانية التعليم وفيهم ود الغفير والمزارع والعامل .. لما وصلو السلطة اول حاجة عملوها التخريب والتمييز في كل شيء العندو قروش هو البيقرا، العندو قروش هو البخش افضل الكليات ، العندو قروش ممكن يكون اي حاجة ، ويصل اي مكان .. ولامجال للتفوق والكفاءة في المنافسة .. وتركوا لبعض منا الدهشة وهم يرددوا بحواجب مرفوعة: ( معقولة بت الغفير جات الاولي )..وفي النهاية كل اول ليهو آخر .. بطلوا دهشة نحن اصلا كده هم الجو ودمروا كل حاجة