محمد عبد الماجد

الليلة في شندي ح تقولوا يا حليل اسامة ونسي


الزول وقت يكون فاطر – كل (5) دقائق بقول ليك الساعة كم؟.

متل رجل المخابرات في الافلام العربية دائما لابس ليه نضارة سوداء وشايل ليه جريدة ، وقاعد ليه في قهوة.

ما عارف علاقة القهوة بالمخابرات شنو؟.
من رأسي :

عندما يزيد وعي المرء تقلّ عدائيّته وغروره.

نيلسون مانديلا

قيل ان مجلس المريخ طالب بحجز (مدرج) كامل من مدرجات استاد شندي.
ناس شندي افتكروا المجلس حجز (المدرج) لجماهير المريخ.
ابدا ما في كلام زي دا.
المجلس حجز المدرج لاعضاء المجلس.
26 عضو – المقصورة ما بتشيلهم.
ديل عاوزين ليهم (مدرج) كامل.
بص الوالي عاوز ليه (مدرج كامل) – عشان يتابع المباراة من داخل الاستاد.
ديل لو تابعوها في التلفزيون – عاوزين ليهم شاشة 70 بوصة.
ومحطة ارسال.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عندما يغادر المريخ الى شندي دائما بتكون عندو مشكلة في (حراسة المرمي).
ما عارف (السر) في ذلك شنو؟….(السر) قدور.
عندما كان عصام الحضري يلعب في المريخ ..اتذكر قبل مباراة المريخ والاهلي شندي في مدينة شندي ان حارس المريخ وقتها عصام الحضري غادر للقاهرة.
غادر المريخ الى شندي بدون عصام الحضري.
حارس المريخ الاحتياطي كان في ذلك الوقت هو الحارس محمد كمال.
محمد كمال ذاتو تعرض لكسر في اصبعه في التمرين الرئيسي للمباراة في مدينة شندي.
هذه الوضعية جعلت مجلس المريخ بقيادة (جمال الوالي) ..يستنجد بعصام الحضري ويحضروه من القاهرة.
عصام الحضري وصل الخرطوم يوم المباراة…وغادر لشندي من مطار الخرطوم..وشارك في المباراة.
لاقتكم (فوضى) اكتر من دي.
الفوضي طبعا حاضرة في مجالس جمال الوالي – وقتها كان جمال الوالي رئيسا لمجلس منتخب.
في المريخ ممكن تتغير اي شيء ويظل جمال الوالي رئيسا للمريخ.
الكلام دا عارفنو من متين؟.
من زمن عالم خميس.
زمن محمد موسي وخالد احمد المصطفى وفاروق جبرة وابراهومة بيلعبوا في المريخ.
هسع ناس خالد احمد المصطفي ومحمد موسي بقوا (محللين).
وناس فاروق جبرة وابراهومة بقوا مدربين.
حتى الذين مازالوا يلعبون في المريخ – تفرقت بينهم السبل.
فيصل العجب بيلعب في النيل شندي.
وموسي الزومة في النيل شندي.
ومحمد كمال – النيل شندي.
قلق الخرطوم الوطني.
وبلة جابر في الامير البحراوي.
وسفاري في الاهلي شندي.
وجمال الوالي مازال رئيسا للمريخ.
الكشافات بتاعة استاد المريخ غيروها (21) مرة – وجمال الوالي قاعد في حتتو.
مرة رئيس مجلس.
ومرة رئيس لجنة.
مرة منتخب.
ومرة معين.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نعود لازمة (الحراسة) في المريخ.
الموسم الماضي غادر المريخ الى مدنية شندي وحارس مرماه هو المعز محجوب.
ما كان امام المريخ خيار غير المعز محجوب.
جمال سالم ..كان قد ابعده المدرب الفرنسي غارزيتو لعدم جاهزيته ..حيث ابقى عليه في كنبة الاحتياطي.
غارزيتو الموسم الماضي ..رغم وجود جمال سالم ومشاركته في كل التمارين ابعده من المباراة وابقى عليه في (الكنبة).
شفتوا الانضباط.
هسع جمال سالم ..مبعد عن المشاركة ومتوقف منذ اكثر من شهر.
من المنتخب اليوغندي ذاتو ابعدوه.
مع ذلك برهان تية ومحسن سيد سوف يشركوا جمال سالم في مباراة اليوم بعد ان وصل من يوغندا امس وانضم لبعثة المريخ في شندي.
ما نريد ان نقوله للشنداوية – ان المريخ ايضا يأتي لكم هذا الموسم وهو عندو ازمة في حراسة المرمى.
برضو عندو مشكلة.
ومشاركة جمال سالم في مباراة اليوم من غير اعداد وجاهزية ..سوف تعتبر (هدية) للاهلي شندي.
على فريق الاهلي شندي ان يستفيد من ذلك – جمال سالم ليه شهر ما شاف ليه (كورة).
حارس بمثل هذه المواصفات يمكن لجلال طرف الاهلي شندي ان يسجل فيه.
انتبهوا لذلك واستفيدوا من هذا العامل.
مشاركة جمال سالم في مباراة اليوم رغم عدم جاهزيته سوف تفجر براكين الغضب في المريخ.
وسوف تثبت الفوضى التى يعاني منها المريخ مع جمال الوالي.
وستتأكد كذلك ضعف شخصية برهان تية ومحسن سيد ..فقد ابعد غارزيتو الموسم الماضي جمال سالم رغم مشاركته معه في التمارين الاخيرة.
هذا الموسم سوف يشارك جمال سالم من غير ان يكون قد شارك في التمارين الاعدادية للمريخ.
هذا سوف يجعل المعز محجوب يتخذ موقف – وقد سبق ان كان للمعز محجوب موقف في هذا الامر.
عموما – يجب ان يستفيد الاهلي شندي من مشاركة جمال سالم .. هناك عوامل فنية ونفسية سوف تساعد الاهلي شندي في الفوز على المريخ ان شاءالله في ظل مشاركة جمال سالم اساسيا في المباراة.
جمال سالم يمكن ان يكون اليوم هو (الثغرة) الكبري في المريخ ..وللاهلي شندي الاستفادة من ذلك.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المريخ في مباراة اليوم لن يعاني من مشكلة في حراسة المرمي فقط..المريخ اليوم يعاني من عدد من المشاكل.
لم يسبق للمريخ بكل هذه المشاكل والازمات ان واجه فريق الاهلي شندي.
على الاهلي شندي الانتباه لذلك ..فهو يلعب امام فريق يباريه من غير مقدمة هجومية.
يغيب من مباراة اليوم تراوري وبكري المدينة وعبده جابر ومحمد عبدالمنعم عنكبة.
هذا الغياب يجعل المريخ يلعب من غير مقدمة هجومية – ليس امام المريخ اليوم غير ان يقدم (ضفر) ليلعب رأس حربة.
يا شوفوا ليكم زول من لجنتكم دي (بص الوالي) يلعب ليكم في المقدمة.
لا اظن ان الاهلي شندي كان يحلم ان يلعب امام فريق لا يملك (مهاجم) ليمثله في تشكيلته الاساسية للمباراة.
مشاركة خالد النعسان وبرنس عطبرة ان حدثت سوف تكون اضافة كبرى للاهلي شندي.
غيابات المريخ لن تكون في حراسة المرمى وخط المقدمة وحده.
المريخ يعاني من غياب اكثر من عنصر في كل الخطوط – حيث يغيب اكرا وسالمون وراجي عبدالعاطي.
اذن ليس امام الاهلي شندي فرصة افضل من هذه الفرصة.
انتصار الاهلي شندي بهدف وحيد في ظل الظروف التى يعاني منها المريخ سوف تعتبر مكسب للمريخ.
المريخ يأتي شندي بمجلس تسيير اطلقنا عليه اسم (بص الوالي) – مجلس جديد يتكون من (26) عضوا.
قطر بس.
بص الوالي في اول طلعاته خارج العاصمة سوف يصطدم بفريق قوي يعرف ان يستغل حداثة المجلس وتعدد اعضائه.
حداثة العهد لن تكون للمريخ في (مجلسه) فقط – الحداثة سوف تكون ايضا في (الجهاز الفني).
اذن كل العوامل اليوم متوفرة لفريق الاهلي شندي ليحقق (رباعية) عديل في شباك المريخ.
اذا انتصر الاهلي بهدف وحيد على المريخ ..قلنا ليكم سوف نعتبر النتيجة مكسب للمريخ.
مطلوب من الاهلي شندي ان يعرف كيف يتعامل مع هذه (العوامل) والتى تشكل نقص وازمة حقيقية للمريخ اليوم.
المريخ في اضعف حالاته ..والاهلي شندي احسبه في افضل الحالات.
غياب كلتشي هداف البطولة لن يؤثر كثيرا على الاهلي في ظل غياب (خط الهجوم باكمله) في المريخ.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن اليوم باذن الله وتوفيقه على موعد مع (فرحة) كبري في شندي.
وسوف تكون فرحتنا حاضرة ان شاءالله في (الجوهرة الزرقاء) والهلال يلعب امام الخرطوم الوطني.
اليوم هو يوم هلالي خالص باذن الله.
خلونا نفرح.
ونعيش الفرحة.
في الجوهرة الزرقاء.
وفي شندي.
…………..

و

صلاح نمر مكسب للاهلي.
صلاح نمر ضربة الجزاء شايلها في كراعو.
الاهلي شندي وجمهوره عليه ان لا يستجيب للاستفزازات التى يمكن ان يتعرض لها من المريخ او من حكم المباراة.
المريخ سوف يعمل على عدم اكمال المباراة.
فرصة المريخ فقط تتمثل في افساد المباراة وإلغائها.
لذلك يجب الانتباه لذلك.
نحن هنا في الخرطوم ما عندنا ان شاءالله اي مشكلة.
سادومبا وشيبوب.
وان كان اليوم في الجوهرة الزرقاء – الكلمة سوف تكون كلمة (ثلعبونا).
وبشه ذاتو بعملها.
يا بشه ما تبوظ اعصاب الجماعة قبل اسبوع.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الليلة يا مريخاب في شندي ح تقولوا يا حليل اسامة ونسى.
وتعرفوا الفرق.
الموضوع يمكن يجيب ليه (وحدات).
في ريحة (وحدات).
…………
السيدة (ل) – الليلة السحور بـ (فرحة) – اقصد (فرخة).
وقرّط على كدا.