اضافة (دمغة الجريح) لهدف شيبولا الاول

من رأسي :

ناس المريخ لو عاوزين يشتكوا (شيبوب) ألّا يشتكوه في (التسخينة) – الزول دا شارك في (5) دقائق فقط..هسع دي عاوزة ليها محامي وكمان ايطالي..اول مرة اشوف لي نادي يوكل ليه (محامي ايطالي) في (تسخينة)…والله يا شيبوب صعب.

صعبتها شديد على الجماعة ديل.

من كرأسي :

(وتمشي معاي خُطانا الإلفَهْ والوحشَهْ..وتمشى معاي وتْرُوحى..وتمشى معاي وسط روحى..ولا البلْقاهو بِعْرِفنى…ولا بعرِف معاكْ روحى)

عمر الطيب الدوش

في المريخ المشاكل كلها بيعمل فيها (مصعب عمر).
يفكها.
ويجليها.
ويعمل ضربة جزاء.
ويطلع المريخ من البطولات الافريقية كلها (الابطال) و (الكونفدرالية).
مع ذلك …ترك المريخاب (مصعب عمر) بكل هذه (البلاوي) واشتكوا (شيبوب).
شفتوا (المحن).
شفتوا الغلبة النحن فيها.
عينكم في مصعب عمر وتطعنوا في شيبوب.
عليكم الله البيستاهل (الشكوى) منو؟.
بيني وبينكم.
مصعب عمر ام شيبوب؟.
لو خجلانين تشتكوا (مصعب عمر) – عشان ولدكم ..وعشان هو لاعب الفريق وموجود في كشوفات النادي ، نقول ليكم (شيبوب) ذاتو ولدكم ..واسمو برضو موجود في كشوفات النادي.
يعني الحالة واحدة.
عشان كدا اختصروا المسافة واشتكوا (مصعب عمر).
تعالوا بالباب عديل.
مصعب عمر هو الذي هزمكم.
وهو الذي تسبب في ضربة جزاء مع اللاعب شيبولا.
وهو الذي كان ثغرة في دفاع المريخ.
وهو الذي اخرج المريخ من كل البطولات الافريقية هذا الموسم والموسم الماضي.
شيبوب ذنبو شنو؟.
شيبوب وقت مصعب عمر بعمل في هذه (الجلطات) كان قاعد في (الكنبة) ، في المباراة ما كان مشارك.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ما عاوز احلف ليكم ساكت – لكن ناس الفيفا ديل لو شلتوا ليهم شريط المباراة وشافوا الحاجات البعمل فيها (مصعب عمر) وضربة الجزاء التى ارتكبها بيعيدوا ليكم المباراة.
ما تتعبوا ساكت في موضوع (شيبوب) دا.
عشان نحن ما بنرحمكم.
الامر الغريب ان الشوط الاول كلو كان مصعب عمر بيلاحق في شيبولا وبعمل في المخالفات.
في مخالفة اشتبك فيها مصعب عمر مع الحكم ، لأنه عمل مخالفة مع (شيبولا).
وشيبولا ولابقع.
الزول قريب من الواطة يقع كيف يعني.
مع هذا …الجهاز الفني للمريخ لم يلتفت لمصعب عمر وهو يخرج من المباراة بسبب شيبولا.
الى ان اجبر شيبولا مصعب عمر يعمل معاه ضربة جزاء.
مصعب عمر من غير ما يشعر لقى ليك (شيبولا) قدامو.
مواجه المرمى.
مصعب عمر ما قدر يعمل اي حاجة غير (ضربة جزاء).
لكن تمريرة سادومبا خطيرة – تمريرة مقدمة لضربة الجزاء.
ما عندها حل غير (ضربة جزاء).
ما في اي طريقة.
لذلك احسن ليكم لقطوا اوراق (مصعب عمر) ، وشوفوا ليه (صورة) مع (الكاردينال) وامشوا (الفيفا).
بيعيدوا ليكم المباراة.
احسن من تشتكوا (شيبوب).
الفيفا ح تعمل ليكم شنو في موضوع (شيبوب)؟.
الفيفا ما عندها ليكم اي حاجة.
الفيفا ح تقول ليكم شيبوب ما مفروض يقفز من الطابق الرابع.
لاعب (هاوي) – والله في نيابة الملكية الفكرية ما بتقدروا تعملوا ليه حاجة.
ملكية شنو؟.
يمين محكمة اهلية ما بتقدر تعمل حاجة في موضوع شيبوب دا.
نحن عارفين ومقدرين.
عارفين هدف شيبولا حار.
وما بتبلع.
وبقيف هنا.
لكن نعمل ليكم شنو؟.
حالة الكورة كدا.
قلنا ليكم – جمال الوالي دا ما تجيبوه لينا.
نفسي اعرف بس ..شيبولا الكلمو بي جمال الوالي منو؟.
شيبولا مشكلتو شنو مع الوالي.
هدفو دا هدف زول عندو رأي في (الوالي).
رأي عديل كدا في (الوالي).
واليكم …والوالي التاني.
الاتنين.
لكن الشيء البيقدر يعملها ليكم والي الخرطوم ..ممكن بعد فحص هدف شيبولا ومراجعة خدمات (المذبوحين) ، ممكن والي الخرطوم يقرر اضافة (دمغة الجريح) لهدف شيبولا الاول.
والله نحن لو بقت على الهدف ..ما كان قلنا شيء.
كان سكتنا ساكت.
الموضوع اكبر من الهدف.
تتخيلوا شيبولا بعد هدفو المضاف ليه (دمغة جريح) دا – تتصوروا عملوا معاه (ضربة جزاء).
يعني سجل قون ..وعملوا معاه ضربة جزاء.
تاني يعمل شنو اكتر من كدا.
وزي ما اتخصص شيبولا في العملين ديل ..اتخصص سادومبا في (التمرير).
زمان كنت بقول ليكم نحن اي حاجة عندنا بي نظام.
اشرح ليكم القصة.
سادومبا كان صاحب تمريرة الهدف الاول.
وسادومبا ذاتو كان صاحب التمريرة التى حدثت بعدها (ضربة الجزاء).
شفتوا التخصصية دي عالية كيف؟.
شفتوا النظام دا.
والغريبة سادومبا وشيبولا الاتنين انضموا لكشوفات الهلال في التسجيلات الاخيرة.
يعني المباراة لو قامت في موعدها – دا كلو ما كان حصل.
شفتوا (التأجيل) جاكم بالساحق والماحق كيف؟.
كان للساحق فهو عزيز شيبولا.
وكان للماحق فهو سادومبا.
ديل الاتنين من الليلة اسمهم الساحق والماحق.
جايبين ليكم (نمر) في دفاعكم وما قادرين تتصرفوا.
دفاع فيه (نمر) و (ضفر) و (عطرون) …عليكم الله دا دفاع هسع وإلّا (بقالة) لبيع الاعشاب النباتية.
خط دفاعكم زي كتاب المطالعة.
نمر.
وضفر.
وعطرون.
كتاب مطالعة عديل كدا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
امس ..قلت امشى اشوف (مامون ابوشيبة) عامل شنو؟.
الموضوع بكون داخل عليه شديد.
لقيت ليك مامون ابوشيبة واضع ليه (27) تشكيلة للمريخ.
الزول دا وضع كل الاحتمالات.
كل الخيارات.
يا ابوشيبة ..انتوا مشكلتكم ما (التشكيلة).
مشكلتكم يا ابوشيبة (جمال الوالي).
من سنة 2002 او 2003 ما عارف ما غلبتو الهلال في ملعبه في الدوري الممتاز.
يعني منذ ان جاء جمال الوالي رئيسا للمريخ …المريخ ما فاز على الهلال في استاده.
الهلال حقق (10) انتصارات على المريخ في ملعبه.
18 انتصار للهلال مقابل 6 انتصارات للمريخ.
ما في مقارنة.
الفرق شاسع.
انتوا يا جماعة مفروض تشوفوا مجلس الشوري.
او مجلس الشرف.
أيا كان الاسم.
اقعدوا معاهم.
انتوا بعد كدا مفروض تحصروا منافستكم مع الاهلي شندي.
مع الخرطوم الوطني.
مع هلال الابيض.
لكن تنافسوا الهلال دي تاني ما تفكروا فيها.
ألعبوا مع القدركم.
الهلال والمريخ في الممتاز بقى ما في (ندية) بينهم.
الفرق في النقاط في الدورة الاولى الآن (10) نقاط.
دا وصيف شنو؟.
دا (وصيف) عجيب.
وصافة مبالغ فيها.
المضحك ..والحاجة الما لاقي ليه (بصلة) – اعلام المريخ مجاراة لاعلام الهلال وتقيلدا له ..بطلق على الهلال كلمة (الوصيف).
ناس كابو ومعاوية الجاك.
والفرق 10 نقاط.
و5 بطولات متتالية.
و18 نقطة فرق.
و18 انتصار.
ورباعية.
وثلاثية.
وشالوا الكورة وطلعوا.
وبعد دا يقولوا ليك (الوصيف).
الفيك بدر بيه.
الوصيف – تعب معانا.
……………….

و

محسن سيد لقى لجنة التسيير بتفتش ليها في مدير فني اجنبي …قال احسن يتمها (تصريحات).
يا محسن انت ومصعب عمر واحد.
الهلال اشرك شيبوب في اخر 5 دقائق..لماذا لم يشرك المريخ (الوك).
يلا ورونا شطارتكم.
متوكل اختفى.
وعصام الحاج احسن ليه يرجع (المعارضة).
……………
السيدة (ل) – قال يسافر يمكن وقت يرجع تعملي ليه (مسكول).
وقرّط على كدا.