للحصول على (النغمة) اضغط (مصعب عمر)

من رأسي :

المريخ عاوز يشارك في مرحلة (المجموعات) في محل (وفاق سطيف) – متل الزول البقرأ (اثار) يقوم فجأة يقرر يقرأ (طب) ، عشان لقى ليه (سماعة) واقعة.
من كراسي :

(إنني أحلم بجيل يجعل الكتابة جزءاً من العيش، كشرب الماء).

محمد المهدي المجذوب (مجلة الثقافة السودانية)

في مباريات هلال مريخ (القمة) سابقا ، (قبل ما ادخل ليكم في الموضوع) ، حقيقة كدا المريخ بقى لا (ند) لينا ولا حاجة.
ومباراته امام الهلال ما بتشكل مباراة (قمة).
لا قمة ولا يجزنون.
انا عارف الحقيقة مرة.
وما بتتبلع.
الكلام دا ما (انشاء) ساكت.
ولا (معلومات عامة).
ولا هو كلام جرايد.
الهلال فاز على المريخ (18) مرة مقابل (6) مرات فقط – (الندية) دي وين؟.
ندية في شنو؟.
المقعدكم معانا في جدول واحد منو؟
نديتكم دي إلّا تكون في (الضمنة).
او (السيجة) ما عارف.
شليل وين راح …على افضل الفروض.
ندية إلّا في عمود سلك ومزمل.
وشارع واحد.
ومكتب سمير فضل واسامة عطا المنان.
هسع جايبين ليكم (28) عضو ..والفرق بين الهلال والمريخ (10) نقاط.
بزارة (عمم) ساكت.
ما بتخجلوا.
ما بتحسوا بالحرج.
28 عضو – والفرق (10) نقاط.
النسور.
الامير البحراوي.
النيل شندي.
الندية بين الهلال والمريخ بقت في (الجرايد).
في (الاعمدة).
ما في ليها اي اثر.
في (الملعب) – مكان الدواس الجد – الهلال فاز (18) مرة على المريخ مقابل (6) انتصارات للمريخ على الهلال.
يعيدوا ليكم الكلام مية مرة.
موثق وثابت…وموجود ..واي زول شافو.
هسع الكلام دا (قوز رملة) قاعد يحصل.
من سنة 2002 المريخ ما فاز على الهلال في (المقبرة).
وبعد دا تقولوا لي (ندية).
وتقولوا عن مباراة الهلال والمريخ مباراة (قمة).
قمة من طرف واحد.
نحن ما شايفين ليكم اي (قمة).
كم مرة عليكم الله ..المريخ يتقدم ..والهلال يفوز بالمباراة.
علم والله.
18 نقطة فرق بين الهلال والمريخ في احدى بطولات الممتاز.
الخير كتير.
10 نقاط فرق الآن بين الهلال والمريخ..وبتتكلموا عن (الندية).
و28 عضو.
وينها (الندية) دي؟.
5 مرات على التوالي فاز الهلال ببطولة الدوري الممتاز – لمن نحن ذاتو نسينا حاجة اسمها (المريخ).
وبتكلموا عن (الندية).
بتنططوا علينا ليه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المهم – ما اطول عليكم.
في مباريات (القمة) باعتبار ما كان ..هناك (اهداف) شهيرة للهلال ..الناس اصلا ما بتنساها.
الناس بتذكرها.
تقعد فيها..وتشرب بيها (القهوة).
بنتونس بيها.
ونطلع بيها الشارع.
اهداف عندها (مواقف) خاصة.
باقية وخالدة في الذاكرة.
تذكروا هدف (بشه) الذي انتهت عليه مباراة القمة ، وقت كان المريخ (90) دقيقة ضاغط الهلال ومحاصره في ملعبه ..قام (بشه) لقى ليه كورة كان موسى الزومة (سارح) فيهم حسم بيها المباراة.
تذكروا القون دا.
قون (السرحة).
سرحان عبدالبصير.
اقصد سرحان الزومة.
موسى الزومة ربنا يطراه بالخير كان (سارح).
وبشه جنو وجن زول يسرح ليه في (الحصة).
زمان كان عندنا استاذ لو لقى ليه طالب (سارح) في الحصة ، بخلى الحصة كلها ويقبل ليك على (الطالب).
بسمعو ليك مية كلمة فارغة.
بندمو ليك على (السرحة).
زي بشه.
بشه لقى ليك موسى الزومة (سارح)…انطلق ليك بالطرف الشمال.
فات عديل.
وموسى سارح.
من مهند لي كريكا.
لي بشه.
قووووون.
قون (السرحة).
موسى الزومة بعد (السرحة) ديك ..مشى اهلي الخرطوم.
ومشى بعد الاهلي …النيل شندي.
الغريبة في النيل شندي قالوا ليك ما خلى (سرحتو).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الناس برضو ما بتنسى هدف عبداللطيف بويا في المريخ عندما كان عصام الحضري حارسا لمرمى المريخ.
بويا مسك لكورة من النص ..كسر يمين ..ميل شمال ..وشات الكورة.
170 حضري ما يطلعوها.
يا الحضري لو رجعت لي وراء وعمرك بقى (21) سنة ..كورة بويا دي ما بتطلعها.
قون عبداللطيف في بويا …لكن هو قون نصاح.
الحضري لغاية الآن الهدف قاعد يزاول ليه في النوم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
من الاهداف الجميلة ايضا ..هدف المحترف (ساني) في عصام الحضري برضو.
طبعا نحن عصام الحضري دا اتفسحنا فيه.
مهند الطاهر براهو جاب فيه (كرتونة) بتاعة اقوان.
قون ساني في الحضري على ما اعتقد كدا كان في الدقيقة 80.
الغريبة المريخ برضو كان متقدم على الهلال بهدف.
دفاع المريخ وعصام الحضري كانوا مقفلين كويس.
ما في لاعب بدخل خط (18).
اي كورة معكوسة في المنطقة ..عصام الحضري كان بيستلمها.
عارفين (ساني) عمل شنو؟.
ساني قال ليهم …اعكسوا لي الكورة برة خط 18.
ناس هيثم مصطفي قالوا ليه عاد نعكسها ليك كيف برة الخط؟…الحضري دا جوة الخط ما في زول بجيب فيه قون ..عاوزني نعكسها ليك برة خط 18.
ساني قال ليهم انتوا ما عندكم شغلة ..بس اعكسوا لي الكورة برة الخط.
قالوا ليه ما في مشكلة ..بنعكسها ليك.
الدقيقة 80 جات …رفعوا ليه الكورة خارج خط 18.
الكورة كانت مع (الواطة).
بتذكر (ساني) دا نزل ليها في الارض ..بحركة (برجلية) جدع ليك الكورة شمال الحضري.
يمين الحضري ما عرف حاجة.
لا عرفها بالرأس ، لا عرفها بالكراع.
9 شهور الحضري فاقد الذاكرة.
9 شهور الدرب رائح على الحضري.
عملوا ليه (حوض سباحة) ما نفع.
شقة في العمارات ما نفع.
نزلوه في السلام روتانا ما نفع.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
هدف (شيبولا) هسع برضو من الاهداف الخالدة.
الجميل في شيبولا ..انو سجل ليه هدف – وعملوا معاه ضربة جزاء.
يعني اي حاجة في المباراة شيبولا عملها.
للحصول على النغمة.
اضغط (مصعب عمر) بتجيب قون.
واضغط عليه تاني ..بعمل معاك (ضربة جزاء).
الايامات دي ما في احلى من (النغمة) دي.
نغمة مصعب عمر.
لو ضغط على مصعب عمر بتحصل على اي حاجة.
بتحقق اي شيء.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………………

و

المريخ قالوا طالب يشارك في المجموعات.
هههههههههههههههههههههه.
يوم بتكتلوا ليكم زول بي ضحكة ساكت كدا.
انتوا القاعد يغشكم منو؟.
دا منو البقول ليكم الكلام دا.
قوموا شوفوا شغلتكم.
الحركة دي بكون عملها المريخ عشان يأجلوا ليه مباراة كادوقلي.
مباراة كادوقلي رابع يوم في العيد.
ناس بكري المدينة وعلاءالدين يوسف في العيد (شبر) ما بطلعو من الخرطوم.
كمان عاوزين تعيدوا بيهم في كادوقلي.
انتوا ما عارفين ناس هلال كادوقلي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
……….
السيدة (ل) – بمر بي بيتكم مخصوص الايامات دي عشان اشم ريحة (الكعك).
وقرّط على كدا.