الاتحاد (اعاد) كورة الامل الموسم الماضي وابراهومة (اعاد) الكورة الموسم دا

— 1,820 views مشاهدة أخر تحديث : الخميس 25 غشت 2016 – 4:20 مساءً
دق الدلجة – محمد عبد الماجد – الاتحاد (اعاد) كورة الامل الموسم الماضي وابراهومة (اعاد) الكورة الموسم دا 25 اغسطس 2016

من رأسي :

باقى طفولتها شايلها في عيونها…

شنطتها …صورها …كلماتها …خضرتها …فهمتها قبل ما نفهمها…

واضحة…انها كانت مستعجلة ..رقم جلوسها ..كان واقف!!.

من كراسي:
مازلت أؤمن ان الانسان لا يموت دفعة واحدة ، وانما يموت بطريقة الاجزاء…

كلما رحل صديق مات جزء وكلما غادر حبيب مات جزء وكلما قتل حلم من احلامنا مات جزء ..

فيأتي الموت الاكبر ليجد كل الاجزاء ميتة فيحملها ويرحل..

جبران خليل جبران

مريخابي ظريف (والدنيا بين بين) .. زول بتاع حقيقة …قال سألوه عن فرصة المريخ في الفوز ببطولة الدوري الممتاز هذا الموسم ..فقال لهم بعد ان حسبها صاح…الحالة الوحيدة التى يمكن ان يفوز بها المريخ بالدوري هذا العام هو ان ينسحب الهلال من الدوري الممتاز.
ويجيبوا ناس سمير فضل..ومجموعته ويمسكوه (لجنة الاستئنافات).
يقوموا يضربوا دا في دا.
يقدموا الاحد على السبت.
ويعملوا اول الشهر في اخرو.
شارع القصر يرجعوه اتجاهين.
وام درمان تبقى شرق النيل.
يلخبطوا الدنيا دي كلها – عشان المريخ ..يشيل بطولة الممتاز.
يقولوا لينا في لاعب سنة 1911 كان بيلعب في هلال كادوقلي ..ضرب ليه زول بي ركشة.
اللوائح بتعتبر المريخ فائز.
عاوزين ليكم للعملية دي (120) سمير فضل و (75) مزمل ابوالقاسم و (75) بابكر سلك..و(23) هيثم كابو.
يقعدوا يتغالطوا فينا للصباح.
مدثر خيري بتمها ليكم (نضمي) في الشروق.
بقطع ليكم لوائح من رأسو.
على اساس شنو؟.
على اساس انو (خبير) في لوائح الفيفا.
اقول ليكم حاجة ..استغلوا فيضان النيل وعيدوا مباراة الامل.
صعبة عليكم يعني.
انتوا السنة الفاتت بدون (فيضان) عادوها ليكم.
الفيضان دا لو لقى ليه لجنة استئنافات كاربة ..بعيدها ليكم.
بعيد ليكم ابوها ذاتو.
دا ما فيضان بفوتوه ليكم.
عاوزين تشيلوا بطولة الممتاز بي ناس محمد الرشيد.
وابراهيم جعفر.
وصلاح نمر.
والله بتحلموا.
ديل (الكهربة) ما بشيلوها ليكم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في مباراة الامل والمريخ التى تعادل فيها الامل في اخر دقائق المباراة ..حصلت حاجة عجيبة.
الموسم الماضي …الاتحاد (اعاد) المباراة…السنة دي عارفين حصل شنو؟.
ابراهيم محجوب ابراهومة (اعاد) الكورة لي جمال سالم.
عبدالرحيم مسكها ليك.
شفتوا (الاعادة) دي.
قبل كدا.
وفي المطرة دي – كنت قلت ليكم نحن (الاعادة) ما بنخليها.
وحقنا ما بنسيبو.
الموضوع مفروض يكون وقع ليكم.
عشان تاني ما تعيدوا ليكم حاجة من رأسها.
اطرف حاجة قالوا ابراهومة (اعاد) الكورة عشان جمهور الامل هاجمو ..والولد صغير ما بستحمل (النضم).
ما بيستحمل (الكواريك).
وابراهومة دا من سنة 2011 بيلعب تحت السن.
ولسه قاعد.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عليكم الله ما تشبكونا حسابات ..وافتراضات..ونزول بالواحد وطلوع بي (جركانة العسل).
ما عندكم اي طريقة للفوز ببطولة الممتاز – إلّا ينسحب الهلال من الدوري.
الموسم الماضي الفرق كان (9) نقاط …بين الهلال والوصيف ..انسحاب الهلال حول البطولة للمريخ رغم ان المريخ خسر (5) مباريات في الدوري.
المريخ الموسم الماضي ..اعتبروه فائز في مباراة تعادل فيها.
وعادوا ليه مباراة خسرها 0 / 2.
دي محمد الرشيد بقدر يعملها ليكم.
انتوا السنة دي ما افتقدت بكري المدينة.
ولا علاءالدين يوسف وامير كمال.
انتوا فقدتوا سمير فضل.
مع ذلك ومع كل ما قدم للمريخ في الموسم الماضي من لجنة الاستئنافات لولا انسحاب الهلال ..ما كان للمريخ ان يعشم ببطولة الدوري الممتاز.
هذا العام ..ما تعشموا نفسكم ساكت.
السنة دي ..لو ناس الاهلي مدني ..كتلو ليهم لاعب في الميدان ..ناس الهلال قالوا ما بنسحبوا.
ناس النسور بقوا يخشوا الملعب بالزي الرسمي.
برضو ما في طريقة.
الغريبة ..ناس المريخ مع وصافتهم دي.
وفارق الـ (6) نقاط باعتبار مباراة الهلال التى لم يلعبها..ناس المريخ فرحانين.
فرحانين في شنو ما عارف؟.
في زول بفرح ليه بي وصافة.
في وصافة بتفرح ليها زول.
قالوا شنو؟.
قالوا (9) من (10).
والفرق (6) نقاط.
انا ما عارف لو كان عندكم (جوهرة) زي جوهرتنا دي كان عملتوا شنو؟.
حالتها دي بدون (جوهرة).
والله نحن يفرحنا شديد ..انو المريخ ما يخسر نقطة في (8) مباريات متتالية.
ويحقق انتصارات في كل المباريات.
مع ذلك يظل الفارق (6) نقاط.
عظمة يا هلال عظمة.
انتوا اذا كان بي حالتكم دي بي وصافتكم وفارق الـ (6) نقاط ..فرحانين ..نحن نقول شنو؟.
نحن بنلعب بي شباب تحت عشرين سنة.
صهيب الثعلب ..واطهر الطاهر وحسين الجريف والصيني وبشه الصغير وليد نيمار وولاءالدين ..والفارق (6) نقاط.
اقنعونا انتوا.
قولوا لي صلاح نمر عمرو (20) سنة.
صلاح نمر دا من زمن الخرطوم الوطني اسمها الخرطوم 3 هو بيلعب في الممتاز.
ومصعب عمر.
ورمضان عجب ..من زمن الموردة مثلث القمة في الممتاز.
والفرق كم؟.
الفرق (6) نقاط.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
فرحة المريخ بي (9) من (10) بتذكرني ليك ..بي الطالب البقفل الجغرافيا.
والتاريخ.
والفنون.
والعربي.
ويجي يسقط في الانجليزي والرياضيات.
بتذكروني بي الطالب …البقول للناس انا قفلت الامتحانات كلها ..وبعد دا بيجي التاني.
هسع انتوا قدر ما تعملوا….ما بتفوتوا (الوصافة).
نحن يسعدنا جدا قوة الوصيف.
تسعدنا انتصارات المريخ.
وتقدمه.
ما دام ان المريخ بعد كل هذه الانتصارات المتتالية هو (وصيفا).
وبفارق (6) نقاط.
ان شاءالله بس تفهموا حاجة.
ان شاءالله الموضوع يكون وقع ليكم.
يا جماعة انتوا (كورة) عديل ..اصلكم ما بتتقدموا على الهلال.
براكم شفتوا ..بعد كل هذه الانتصارات المتتالية …المريخ وصيف.
وبفارق (6) نقاط.
يعني تجروا جرى الوحوش ..غير (الوصافة) ما عندكم شيء.
الهلال دا ما بتتقدموا عليه إلّا باللف والدوران.
ولجان الاتحاد العام.
وشغل المكاتب.
غير كدا ..ما عندكم اي طريقة.
ولا تحلموا.
ولا تقعدوا تشرعوا فينا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
تحرشوا الاهلي مدني.
تجيبوا النسور.
برضو الفرق (6) نقاط.
والدوري على وشك.
الهلال باقى ليه (9) مباريات.
والمريخ باقى ليه (8) مباريات.
ولسه ..الغريق قدام.
عندنا مباراة مضمونة في استاد المريخ.
انتوا عارفين مباريات الهلال في استاد المريخ.
ما قاعدين نخسر.
………..
و
التعازي لاسرة المريخ في رحيل محمد آدم (ارتكاز) شباب المريخ.
نسأل الله له الرحمة والمغفرة.
لجنة الحكام عندها اجتماع حاسم اليوم.
ما بعيد ..اللجنة تقرر اعادة مباراة الامل والمريخ.
زي (اعادة) ابراهيم محجوب للكورة.
الناس ديل اتوقعوا منهم اي حاجة.
اصلو ما في حاجة بعيدة عليهم.
…………..
السيدة (ل) – ما اقسى من انك تفوت.
وقرّط على كدا.