عبد العظيم صالح : كرسي النص
٭ مر الاقتراع بسرعة وانخرط الجميع في التنفيذ.. في دقائق ولد قروب (الحافلة رقم 225 خط الدروشاب شمال).. في السابق كانت الحافلة تعج بالحيوية.. يقطع الركاب الرحلة الطويلة في (الونسة) وتبادل وجهات النظر حول
٭ (الحكومة والهلال والمريخ والطعمية والفسيخ) والاحتكاك بالكمساري.
٭ في زمن الوتساب لاذ الناس بالصمت الجميل.. (كل زول مدنقر في جهازه) الاقتراح جاء من أحد الركاب.. قال (ياجماعة بدل كل زول ماشغال بالثاني خلونا نسوي لينا قروب خصوصاً الرحلة طويلة ومملة ووقوفها متكرر)!!
٭ السايق قدم طلب الانضمام وكذلك الكمساري .. قبل وصول الحافلة كبري الحلفاية كان القروب يأخذ وضعه الطبيعي.. الأعضاء اندمجوا للآخر.. ونسات، لايكات، ضحكات، صور.. كل صور الأمطار والسيول شفناها بما فيها الخور العجيب الذي هزم كل المحليات والمعتمدين والولاة الذين مروا على الخرطوم بمن فيهم الوالي الحالي.. يمتد الخور العجيب من المحكمة شمالاً حتى (تخوم الدروشاب) مع السلمة.. يمتلئ الخور بالماء من أول مطرة ولا تجروء أي قوة على وجه الأرض علي تفريغه. يمتلئ بالبعوض والماء الآسن والضفادع وكل حشرات الدنيا..!
٭ القروب (دور) حتى بعد وصول الركاب لوجهتهم النهائية.. الكمساري أضحى مركز معلومات.. تسأله (ندى): عموري المواصلات كيف؟ أطلع ولا أقعد شويه في البيت؟!
٭ أطلعي يا(ندوية) نحن (قاشين) الشارع انتظرينا في المحطة.. (عموري ) في كل مرة يضيف عدداً من زملائه وكذلك فعل بله السواق و جباره بتاع النقابة وفاطمة ست الشاي.
٭ سعاد كتبت لطه في الخاص أنا دايرة انسحب … مامعقول اليوم كله.. يافرده عاكس الشارع.. بجيبك في السلك.. بقيس زيتك وبتمك..!
٭ جباره مبسوط جداً مع القروب جاءته رسالة في الخاص (احنا قافلين الشارع.. تعال بعد 12.. عارفك ما مرخص.. رخصتك منتهيه والركاب (ساديين) والممرات الآمنه وعموري ودستة ركاب معلقين في الفضاء !
٭ذات يوم ضحكنا طويلاً وعمك (إبراهيم) يكتب يا(عادل) يا (وفاء) عملتوها ظاهره .. يا أخوننا خشوا الخاص.. شكلكم بتتلاقوا طوالي ..!!
٭ عادل أرسل (فيس) ضحكه ياعمك من يوم ماعملنا القروب تاني ماتلاقينا .. ما تنسى كنا جيران وفاء راكبه وراء السواق طوالي وأنا في كرسي النص.. ضج القروب بالضحك وسأل عباس يا جماعه نص +نص كم؟.. وضحك الجميع من(النشوه).
٭ قبل يومين كتب(عموري) لخالد في الخاص: ناس القروب كرهوني عموري حوّل لي عشره (سلفني ثلاثين ) ماعندي حق الفطور.
٭ يوم الخميس الماضي كان تاريخياً.. فقد سهر القروب في صالة الأفراح حتى الصبح والمناسبة زفاف عادل من وفاء..
ضحك الجميع وعموري يقول كل شيء قسمة ونصيب لكن ياجماعة (كرسي النص) دا ماهين ..!!
