ضحك العبدلله حتى استلقى على قفاه وهو يردد عبارة (يا هو الفضل.. يا هو الفضل) وهو يطالع على إحدى الصحف إعلاناً من رئاسة الضرائب تخاطب فيه كما جاء في متن الإعلان أصحاب المهن الغنائية والموسيقية بشقيها الشعبي والحديث وفرق الإنشاد والمدائح وكل من له علاقة بالفن بمختلف مسمياته أن يقوموا بتوفيق أوضاعهم الضريبية.
والأمر هكذا لابد من إنشاء إدارة في الضرائب تسمى (مباحث ضرائب الفنانين والمادحين) مهمتها متابعة نشاط المادحين والمطربين والعازفين وإخضاعهم للجلوس داخل (المظلة الضريبية).
مشهد (1):
ليلة ذكر ومديح في منزل مواطن بمناسبة ختان أنجاله، تعشى القوم وضربوا (الزلابية) باللين وجاء دور المادح الذي قام بفتح شنطة (الطار) وإخراجه بينما فعل (الكورس) المكون من ستة أشخاص نفس الشيء إيذاناً ببدء الجلسة الروحية.
• المدينة يا النورك يلالي .. أنا قلبي ليك نط من شمالي
• (الكورس): نط من شمالي
وهنا يدق الباب بعنف فيتوقف الجميع، يفتح صاحب المنزل الباب فيفاجأ بأربعة أشخاص يرتدون بدلات سفاري بيجية وأمامهم عربة بوكس ذات أرقام صفراء:
• ده بيت محمد زين؟
• أيوة.. أنا محمد زين
• اتفضلو معانا ..
• لا شكراً شغالين والله
• إنتو منو؟
• نخنا بس بنسأل، معاكم المادح قمر الأصفياء؟
•آآي مالو …
• متهرب من الضرائب وعندو أمر قبض
• اتفضلوا..
• (رئيس المجموعة يتجه للمادح الذي أخرسته المفاجأة):
• كمان بتضرب في الشاي والزلابية وعليك خمسين ألف؟
• والله كنتا جايبا ليكم بس عملتا ليا عملية بواسير أخرتني كدا
• (وهو يأمر الأفراد الذين معه): أرفعوه في البوكس هو والكورس المعاهو ده
• (واحد من الكورس): أنحنا عملنا شنوو؟
• عملتا شنو كيف.. العداد ده ما قاعد تشيل منو؟
• والله أنا متبرع للشيخ ده سااااي
• الكلام ده قوولو في القسم..
• (أحد الحضور): خلاس يا جماعة خلوهم بس يمدحو لينا (يا شفيع الأمة)
• (المادح وهو يلمام حاجاتو): عليكم الله دي أمة يشفعوا ليها؟
مشهد ثاني:
في صالة (النسر الذهبي)، المعازيم يتناولون في العشاء والبارد بينما الفرقة الموسيقية تأخذ في أماكنها في انتظار الفنانة (علوية باغات)، ما أن أخذ العازفون أماكنهم وأمسكت (علوية باغات) بالمايك لتحية الصالة إيذاناً ببدء الحفل حتى اتجه على المسرح شخص يمسك بيديه (دفتر) يتبعه عدد من الأشخاص:
• (وهو يوجه حديثه لمعاونيه): أي عازف ما يوريكم (إيصال ضرائب) الحفلة دي على البوكس طوالي
• يتجهون لأول عازف (بتاع البنقز) الذي ما أن رآهم حتى أخذ في وزن البنقز بتشكيلات إيقاعية.. طرررر طرت طرر.. دوم ددوم دوووم.. تررر ررر تترم
• يا زول وقف حركاتك دي وورينا إيصال شغلك في الحفلة دي
• يا جماعة حركات شنووو.. والله دفعتا ضريبتي بتاعة الحفلة دي
• ورينا الإيصال..
• (يبحث في جيوبه): والله الظاهر لمن غيرتا هدومي وأنا جاي نسيتو في جيب القميص
• دي علينا.. (أرفعوهو)
• (تحين منه التفاتة نحو بقية أعضاء الأوركسترا الذين يحاول بعضهم الزوغان): ما تعملو لينا مفتحين.. كل زول يمسك آالتو ويقعد في كرسيهو وما يتحرك هنا وللا هنا
.. يتجه للعازف الملاصق لبتاع البنقز:
• أها أنتا معاك إيصال وللا برضك نسيتو؟
• لا … أنا عاوز أدفع هسسه هنا
• إنتا بتعزف شنوو؟
• البيز جيتار الشايفو ده..
• طيب (ينظر في الدفتر) …
• (ينظر في القائمة التي معه … 150 .. كمنجة .. 200 .. أوكورديون 180 أهي أهي لقيتا..طبلة 180 .. بيز جيتار .. بيزجيتار .. بيزجيتار أهو 200 جنيه)
• (يخرج العازف 200 جنيه يعطيها لرئيس الحملة الذي يخاطب معاونه): أوهو إيصال وعندو باقي 20 جنيه !!
• وهنا يصدح صوت المطربة علوية باغات عبر الساوندسيستم:
زي ده ما شفنا …
بري بري .. زي ده ما شفنا
القلع ده ما شوفنا !!
مشهد تالت:
شخص يسير بالقرب من (نادي الفنانين) ويحمل (عود):
• أقيف يا زول عندك
• (بخلعة (في شنووو؟)
• معاك مباحث الفنانين
• وأنا مالي ؟ لا فنان وللا حاجة
• طيب والشايلو ده شنووو؟
• ده عود بتعلم فيهو سااااكت.. لسه ما بعرف أعزف
• بتتعلم فيهو.. مقددا… لازم تدفع (ضريبة العازفين)
• يا جماعة قلتا ليكم أنا ما عازف ..
• خلاص أدفع تحت الحساب ولمن تبقى عازف ح نخصمها ليك !
كسرة:
عقبال مباحث ضرائب المتسولين !!
• كسرة ثابتة (قديمة): أخبار ملف خط هيثرو العند النائب العام شنو؟ 88 واو – (ليها سبع سنوات و4 شهور)؟
• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 47 واو (ليها ثلاث سنوات و حداشر شهر)
ساخر سبيل – الفاتح جبرا
صحيفة الجريدة
