(شفتك وين)؟!

كونك إنو تقسى علي.. مامعناها إني أجن ..ولا معناها أبكي عليك.. ويرجع قلبي تاني يحن..خلاص مليت من التحنيس.. وريدك كان كأنو سجن..وهسه ضروري أنسى الكان… ألف إخلاصي ليك في كفن..أحاول ألحق السنوات.. وأفتش لى حناني وطن..أنا الغلطان عشان حبيت….حبيب ماعندو ليا زمن..

*أقسى.. وقفل الأبواب….وبرة حياتك أرميني..وهدد بالفراق والبين….وحاول ياخي خليني..زهجتا من الغرور الفيك… ومامستني ترضيني..بلملم هسه في الأحلام.. لو الأيام تكفينيوأرسم في الخيال محبوب…أريت بالجد يلاقيني..يعوض ليا كل الفات…ومن تحنانو يرويني..

**لقيتك وكنت قايلك قيف..عليهو بترسى أيامي..وظنيتك ياما فيك الخير….وفيك علقت أحلامي..كتبت عشانك أغلى حروف…وليك إنسابت أنغامي..ورشيت فيك رذاذ الريد….وداعبتك بأنسامى..أتاريك كنت ياخي خيال….ومنسوج حولو أوهامي..

**لنفرض إنو إنتا نبيل… وقدرك عالي بين الناس..وعندك حاشية من خدام… ومن عشاق… ومن حراس..منو القال المحبة مقام.. ومامحكومة بالإحساس؟وكيف حانحسب النبضات….بالأقلام وبالكراس؟وكيف حنغير الأقدار…إذا دقا الغرام أجراس؟تأكد إنو مهما عليت….حيفضل طين هوانا الساس..

** وأكيد الدنيا بيك حتدور…مهما عدو بينا سنين..تفتش عن غرامي الكان… يسوقك لي قليبي حنين..وتسأل عني كل الناس…وتبكي علي بدمع العين..تضوق طعم الندم والخوف.. تشيل الليل سهاد وأنين..ولو لاقيتني يوم ولهان.. بقول ليك: ياخي شفتك وين؟تلويح:أجمل مافي النسيان أننا نعتاده!!

اندياح – داليا الياس
صحيفة آخر لحظة