حليلنا يا عباس!؟!
*مافيا القمح والدقيق جعلت الرغيفة في خبر كان الناس تاكل في (الجنيه) زاتو..!!
*الغموس.. دموع وألم ومعاناة والحمد لله من الصباح حتى المساء..!!
*غسيل الملابس والاستحمام صار ترفاً لأن الداخل للحمام مفقود..!!
*الماء البارد يسبب تصلب أي حاجة خاصة مع الجوع (وفي المعسكرات)..!!
*تسخين الماء في (الحلة) يكلف أنبوبة البوتجاز الشيء الكثير..!!
*ابتكرنا الاحتفاظ (برغوة) الصابون في كوز صلصة والمسح على الأطراف..!!
*فتة العدس وفتة الفول (والإمساك) صار ملازماً أول لهما..!؟
*أن تتعطر لصلاة الجمعة تجعل بعض المصلين ينظرون إليك (شذراً)؟! لأن الرائحة تشغل الناس عن صلاتهم مع اقتراب موعد الغداء..!!
*جلابية بنطلون قميص في حالة جيدة وممتازة تثير الشك حولك.. وأنك أصبحت من أهل شارع المطار أو الحوار أو (الخوار)..؟!
*من الأفضل (للمدعو) إلى زواج أن يجلس قرب باب الخروج.. بعد العشاء مباشرة ولا داعي للاحراج..!!
*في حالة الزكام أو نزلة البرد (المنديل) صار ترفاً كُم الجلابية أسهل وأرخص..!!
*في حالة المرض التأمين الصحي صار (سخياً) على أصحابه بدون رأفة…!
*أرتفعت أسعار الأدوية البلدية خاصة الحلبة والجنزبيل والقرض..!؟
*إذا ركبت الحافلة أجلس بالقرب من النافذة وانظر إلى الشارع حت تصل وجهتك حتى لا تضطر للدفع مرة أخرى..لا داعي للاحراج مع المعارف أحلف وانت صادق..!!
*في أي كافتيريا كل فطورك ووجهك لأقرب حائط.. برضو لا داعي للاحراج..!!
*لا داعي للفلسفة وشراء أكثر من (جريدة) والعمل إنك مثقف الأخبار شبه بعض ولا تكن كالأقرع النزهي..؟!
لا تجلس في كرسي أمام المنزل حتى لا تضطر لدعوة أحد..!!
*أسعار صحن البوش ارتفعت وصاحبك هارون بدأ (النقة)..!
*لم يسلفني هذا الشهر أفهم يا عباس؟!
*كيلو اللحمة أصبح حلماً والسلطة بالدكوة ترفاً واتعزز الليمون؟!!
*حاكم الخرطوم سبق إن قال (الحتات) كلها باعوها هسع قبلو على سواكن..!!
*شهادة بحث البلد دي عند منو..؟؟!
*يا عباس فكر قبل أن تعود..!!
*حاكم الخرطوم قال لجماعتو ألبسوا الكاكي.. (قايل الناس بتكاكي)..؟!
*خليهم يلبسوا…
*نحن جاهزين يا عباس..؟!
مفارقات – صلاح أحمد عبدالله
صحيفة الجريدة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
يا زول … إنت من وين؟
يا شيخ صلاح … القصة ما قصة (كاكي) .. ولا الناس (تكاكي)
عمنا بشه … زول (تفتيحة) شديد … زول (مقرّم) .. لمن بي غادي
ما تشوفو كدا … شايل (عكازو) .. وكل ما يزور حته .. يلم الناس حوله .. يطلع في حته عاليه … ويقول ليهو كلمتين .. و(يفك جاكات) للناس … وفي النهاية .. يقعد يغني … (ينطط) بال عكاز ..
وتقولوا دا .. زول (عربي) ..ساكت … لالالا هو ما كدا
عمنا بشه … يخطط .. أنو يحكم (العالم)
عمنا بشه .. وجماعتو …. ما مهم عندهم الناس
المهم … يقعد في القصر الجمهوري … ويحكم العالم
الناس .. تاكل رغيف ولا نيم .. ولا الجنية ذاتو … دا ما مهم
الناس .. تخت الصابون في علبة الصلصة . ولا يستحموا فيها … دا ما مهم
الناس . ما تتعطر لصلاة الجمعة … ولا حتى ما يصلوا الجماعة ذاتو … دا ما مهم
الأدوية .. تختفي .. وسعر الأدوية البلدية .. ترتفع …. دا ما مهم
الناس تركب .. مواصلات .. وتمشي (كداري) ….. دا ما مهم
حتى عباس الغلبان .. يفكر يرجع … ولا ما يرجع …. برضو ما مهم
المهم … شهادة بحث البلد دي عند منو ؟
شهادة بحث البلد … عند (هناي) … وهناي عاوز يحكم العالم
كيف؟
ح يبيع سواكن لي تركيا … وحلايب لي مصر … والفشقة لي أثيوبيا … أبيي لي سلفا
ودنقلا لي كوريا الشمالية … كردفان لي غريغستان .. والخرطوم لي بوركينا فاسو.. والجزيرة لي أمريكا الجنوبية .. وأي حته .. لي أي حته
يعني يكون … كل دول العالم …عندها حته في السودان .. يعني السودان بقي العالم مصغر
يعني لو … واحد قال ليك … يا زول إنت من وين؟
تقول ليهو : والله … في الحقيقة … أنا دنقلاوي من كوريا الشمالية .. فرع دنقلا … لكن مقيم في .. بوركينا فاسو .. فرع الخرطوم
أحلي جنسية … جنسية (هنايه) … لمن بي هناك
بي كدا …. يكون عمنا (هناي) وجماعتو… حاكمين (العالم) … من القصر الجمهوري …. دا هو المهم
أما .. الناس … بما فيهم عباس … (بي جازن) … ياكلوا نيم