محمد عبد الماجد

مباراة الاياب (سلك) طرف يمين (ابوشيبة) ارتكاز (مزمل ابوالقاسم) رأس حربة


مباراة الاياب (سلك) طرف يمين (ابوشيبة) ارتكاز (مزمل ابوالقاسم) رأس حربة
< قبل ايام ..(قاعد ساكت) قرأت لي خبر ..كان له ما بعده. < مرات في اخبار زي (الفجل). < رغم انو ما في اي علاقة بين الفجل والخبر. < لكن مع (باسكال واوا) اي حاجة جائزة. < القون في المريخ بقى بـ (ضربة الجزاء) ما بجي. < اها ديل يعملوا ليهم شنو؟. < احسن (تعقدوا) ليهم عديل كدا. < قرأت خبر توقفت عنده بعنوان (انفجار كبير يهز سطح المريخ يثير التساؤلات). < الانفجار دا ..طبعا غير الانفجار الذي حصل في استاد الخرطوم. < تفاصيل الخبر بتقول : (وقع على سطح المريخ انفجار كبير وغامض التفاصيل ، وصل الي درجة ان وكالة (ناسا) الفضائية الاميركية وصفته في موقعها يوم الاربعاء الماضية ـ بانه مأساوي ، وذكرت ان شظاياه من رمل المكان واحجاره تطايرات مرتفعة (15) كيلو مترا بالجو ، وحفر في الكوكب الأحمر فوهة جديدة قطرها (30) مترا). < الكلام دا ما حصل في شارع الستين .. ولا حصل في الشجرة ولا العزوزاب ..الكلام دا حصل في (كوكب المريخ). < يعني في (المركز) ذاتو. < تجوا انتوا ما عاوزنو يحصل في استاد الخرطوم ...وفي نجيل صناعي كمان. < الانفجار هنا حصل في (رأس) المريخ. < خلوه كلامي انا ..(انسوني) ..يمكن تقولوا دا زول (هلالابي) ما بنأخد بي وجهة نظرو. < امس الحبيب (مامون ابوشيبة) كتب في عموده قلم في الساحة : ( جاءت المباراة وسط حزن دفين عم الاسرة المريخية برحيل الاستاذة سميرة خليل ومحمد سليمان دخيل الله والامين زيكو على التوالي قبل المباراة فاحسسنا ان السقوط المتتالي لكواكب المريخ ربما كان انذرا بسقوط فريق الكرة ..ونستغفر الله). < هذا ما خطه يراع ابوشيبة. < الرحمة والمغفرة لابناء المريخ الذين رحلوا في هذه الايام. < يعني يا جماعة كانت هناك دلائل كثيرة لخسارة المريخ اي زول بربط بين الحاجات دي ممكن يطلع بمعادلة ترجح خسارة المريخ. < افهموها براكم. < لكن غير الكلام دا ..انا استغربت من مامون ابوشيبة الذي كان قد كتب قبل المباراة في عموده ايضا : ( مباراة السبت تعتبر مصيرية بل هي مباراة الحصول على بطاقة التأهل بالنسبة للمريخ ، لأن مباراة الاياب في كمبالا لا يمكن الاعتماد عليها في الحصول على نتيجة ايجابية...الفوز 4 / صفر على الاقل يوم السبت هو مطلب المريخ وأي نتيجة أقل من ذلك ستجعل الفريق مهددا بالوداع الافريقي المبكر من الدور التمهيدي ...حتى الفوز 3 / صفر لا يبعث الأطمئنان لأن الخصم يمكن أن يعادل النتيجة علي أرضه مع احتمال تأهله بالترجيحية). < ابوشيبة قال فوز المريخ 3 / صفر لا يبعث الأطمئنان. < شفتوا (بايرن ميونخ) رفع الطموح كيف؟. < انا ما عارف اللعب امام بايرن ميونخ منو؟. < ناس امير كمال ولا ناس اخونا مامون ابوشيبة. < معاوية الجاك رجع من قطر حافظ ليه (4) كلمات المانية..وقال بي كلماتو الاربعة دي عاوز يكتب ليه عمود بالالماني. < قلت ليه يا معاوية الجاك كلماتك دي في المانيا (موية) ما بتشربك. < الاغرب من كدا معاوية الجاك عاوز يكتب ليه قصيدة المانية ..معتمد على مباراة المريخ امام بايرن ميونخ. < انتوا فاكرين (العالمي) دي طالعة من (فراخ). < اقصد طالعة من (فراغ). < مامون ابوشيبة الذي قال ان الفوز على كمبالا سيتي 3 / صفر لا يبعث الاطمئنان ..كتب امس في عموده : (حدث ما تخوفنا منه بسبب اعداد المريخ في الدوحة ، والذي ارتكز على مواجهة ابطال اوروبا ..حيث اضطر الفريق للعب بأسلوب دفاعي بحت). < يا ابوشيبة انتوا اعداد المريخ في الدوحة ما كنتوا شايفنو (نموذجي). < ما كنتوا شايفنو (مثالي). < خلاص الليلة عاوزين تنكروه. < طبعا انا برجع الي كلام مامون ابوشيبة لأنه اقرب نسبيا للقبول ..لو مسكت ليك اعمدة اي كاتب في المريخ ح تشوفوا العجب...(في مريخ الفاشر). < يعني لو جبت ليكم نماذج من كتابات (هيثم كابو) قبل المباراة وبعد المباراة ..ح تختوا (ايديكم في رأسكم) وح تقولوا انتوا هيثم كابو دا بقى بعد المباراة (علي يس). < امس انا في اخيرة الصدي قلت يمكن الاعمدة اتلخبطت في التصميم..عمود علي يس يكون نزل تحت صورة هيثم كابو. < هيثم كابو الذي دخل معنا في جدل طويل ..عندما كنا ندافع عن هيثم مصطفى وهو لاعبا في الهلال ..وكان يرى ان غارزيتو على صواب..كتب امس منتقدا كروجر. < يا عالم. < (تعال بص بس وشوف). < كتب كابو مخاطبا المدير الفني للمريخ الالماني كروجر : (ألا ترى ان المريخ دفع ثمن ابعادك لهيثم مصطفى بالرغم من ان اللاعب نفذ تعليماتك الجائرة بعد منعك له الحضور للتمرين عقب الافطار ـ ورفضك (المفاجيء) لمنحه نصف الساعة التى كنت تسمح بها في يومي (الاثنين والخميس) التى تعود على صيامهما اسبوعيا ـ وجاء قبل اذان المغرب وافطر سندوتش وكوب عصير وصلي المغرب ودخل الملعب ضاربا نموذج نادر في الانضباط الذي لا يعرف الاعذار فكان جزاؤه البقاء خارج التشكيلة دون وجود سبب مقنع). < كابو اخيرا يقول عن هيثم مصطفى انه ضرب نموذجا نادرا في الانضباط الذي لا يعرف الاعذار. < دا هيثم يا كابو ...(جميل والله). < يا عالم. < تعالوا شوفوا هيثم كابو ..الذي اطلق على هيثم مصطفى لقب (سيبا) عندما كان يلعب في الهلال وكان يرى ان هيثم مصطفى هو الغلطان وهو عليه الالتزام بكل توجيهات مدربه ولو قال له (اطلع فوق الشجرة)..يكتب اليوم مدافعا عن هيثم مصطفى. < كابو بكتب عن (صيام) هيثم مصطفى يوم الاثنين والخميس. < شوفتوا (الاحساس) دا بقى عالي كيف عند كابو. < ايه الذوق دا. < قلت ليكم افضل مامون ابوشيبة ..وهو احسن حالا من كل كتّاب المريخ في ارائه وان كان فيها الكثير من التناقض. < مامون ابوشيبة في كتاباته احساس صادق بعيشه ..وبكتبو. < اما معاوية الجاك فقد كتب في وسط انفعاله امس عن هيثم مصطفى : (طالبنا بضرورة وجود هيثم مصطفى صاحب الخبرات الكبيرة في البطولات الافريقية ولكن الجهاز الفني ابعده حتى من قائمة (التمنتاشر) بحجة الانضباط). < عاوز اسأل معاوية الجاك ..انت هيثم مصطفي الخبرات الكبيرة في البطولات الافريقية حصل عليها بـ (تحويل الرصيد). < انتوا زمان البطولات الافريقية دي ما كنتوا ناكرنها علينا. < اكيد معاوية الجاك عارف ان هيثم مصطفى لم يكن يلعب في الاهلي المصري ولم يحصل على خبراته في البطولات الافريقية مع فريق الترجي التونسي. < اكيد عارف الحاجات. < طيب بتغالطوا مالكم؟. < غايتو الناس ديل وكت يتغلبوا ..بطلعوا ليهم جنس (فضائح). < في حاجات مخجلة ظهرت بعد الخسارة امام كمبالا سيتي. < معاوية الجاك (شاهد من اهلها) شفتوه كتب امس شنو؟. < معاوية كتب مخاطبا المجلس : ( نذكرهم بما حدث بالعاصمة الرواندية كيجالي حينما احتد أحد اللاعبين مع كروجر وهدد بالاعتداء عليه في حضور خمسة من اعضاء المجلس مجرد ان ابعده من التشكيلة وعند حضور البعثة رفض اللاعب الحضور للمحاسبة واحتمى بداره ليقدم المجلس على خطوة مخجلة قللت كثيرا من قدره حيث ظل يتودد للاعب ويمارس معه كل اشكال (الحناسة) حتى يحضر للمحاسبة (الصورية) . رفض اللاعب الحضور ليضطر اعضاء المجلس للذهاب اليه في داره ويرفعون من حجم التودد ليحضر اللاعب بعد تعب وتعنت لتكون العقوبة الصورية ونتيجتها (لفت نظر) وما درى هؤلاء انهم اعدموا قيم المريخ وضيعوا هيبته ومرمطوها في الارض). < طيب وقت الحاجات (الفظيعة) دي بتحصل في المريخ ..شابكننا (العالمي) ليه؟. < خلوها مستورة يا معاوية. < حقيقة ..مشكلة المريخ ليس في عبدالصمد. < ولا في كروجر. < ولا في باسكال واكرم وباسيرو (العضلاته مربطة). < ولا في المدلك. < مشكلة المريخ في اعلام المريخ. < اعلام المريخ امس حاول يستعطف جمهور المريخ ..وحاولوا ان يخففوا عن ألم الجمهور ...والاحساس باوجاعه...وحقيقة الامر ان هذا الجمهور الذي يرفع ضغطه هو (اعلام المريخ). < انتوا الذين تحدثتوا عن العرض (الخرافي) الذي قدمه المريخ امام بايرن ميونخ. < وانتم الذين اطلقتم عليه لقب (العالمي). < وبعد كدا ..عاوزين (كروجر) يشيل الشيلة. < نحن عندنا مشاكل عامة في الاعلام ..الامر ليس قصرا على اعلام المريخ وحده. < نحن ايضا نشارككم في الذنب ..لكننا افضل منكم لأننا نعترف عن الخسائر والاخطاء ويتحمل اعلام الهلال المسؤولية كاملة. < وهذا ما يجعل الفرق كبيرا بين اعلام الهلال واعلام المريخ. < ملحوظة : وإلا شنو؟. هوامش < اقترح ليكم مباراة الاياب ..تمشوا تلعبوا بتشكيلة من كتّاب المريخ. < الناس البتفاصحوا ديل خلوهم يلعبوا هم. < عشان نشوف طول اللسان دا حدو وين؟. < هيثم كابو ما بنفع اكتر من (حارس مرمي). < حارس مرمي بجيبها من جوة. < في خط الدفاع ابراهيم عبدالرحيم (مساك). < ياسر المنا مدافع تاني. < في الاطراف بابكر سلك طرف يمين ..عشان زول سريع وحريف ولسانو طويل. < طرف شمال هيثم صديق. < لكن هيثم صديق في اول (10) دقائق بطروده بالكرت الاحمر. < في الوسط مامون ابوشيبة (ارتكاز) عشان يقاصد الحكام. < اسماعيل حسن صانع ألعاب. < على الشمال في الوسط يلعب هيثم محمد علي. < على اليمين في الوسط يلعب معاوية الجاك. < في الهجوم مزمل ابوالقاسم وعبدالله كمال. < تمشوا بالتشكيلة دي ...بتغلبوا كمبالا سيتي تلاتة في مباراة الاياب. < طبعا المريخ لو عاوز يتأهل مباشرة إلا يغلب 3 / صفر. < تلاتة بي هجومك دا لو قلبوها ليكم (كلمات متقاطعة) ما بتجبوها. < غايتو (شيلميس) قالوا في (الليدو) ما في محترف بلحقو. < ...... [/SIZE]وإن طال السفر - محمد عبد الماجد صحيفة قوون