صارحتني : كادت أن تقع في المعصية بسبب غياب زوجها المغترب !
حكى الداعية الإسلامي “محمد هاشم الحكيم” بأسى وحزن شديدين عن “قصة زوجة مغترب” قائلاً : زوجة مغترب شريفة صارحتني أنها كادت أن تقع في الفتنة، يوم أمس بسبب طول غياب زوجها المغترب.
وأضاف “الحكيم” بأسى، بحسب مانقل محرر “كوش نيوز” : مأساة مغتربي الشمالية، و يمكن تعميمه على غيرهم من شتى بقاع السودان في المهجر.
في تلك القرية الوادعة بالشمالية، أقمت محاضرة نسائية عصراً، فكن ٦٠٠ إمرأة بالتمام و الكمال.
وبعد صلاة المغرب أقمت أخرى للرجال في المسجد فكانوا ٢٠ رجلا فقط !! ، دُهشت لهذا العدد القليل من الرجال مقارنة بالنساء، سألتهم أين رجال القرية، قالوا لا يوجد غيرنا !، الرجال إما مغتربين أو يقيمون بالعاصمة الخرطوم !
سألت نفسي في حسرة ” دي حياة شنو يا جماعة، متزوجين عشان يرموا النساء كده ?
أجريت إحصائية بسيطة، فوجدت متوسط حضور الأزواج لأسرهم، في كل عامين، إجازة لاتتعدى ” شهراً واحداً “، و الكثيرون لأكثر من ٤ و ٥ و ٧ أعوام، لم يحضروا قط.
ويضيف “الحكيم” بحسب مانقلت “كوش نيوز”، ” يعني كما حكت إحداهن ٢١ عاماً زواج عشنا مع بعض في مجموعها على فترات متقطعة سنتين فقط، لكننا انجبنا خمسة أطفال !
مُضيفاً: يعني مهمته في الإجازة يجي يحملها و يسافر و يجي بعد الفطام، ويشتكوا ما لاقين ناس يقيفوا في مزارعنا، ياخي المزارع هينة البيقيف في بيتك منو، البيربي أطفالك منو، الذي يآنس أم العيال ليلاً شنو .
فوق لي نفسك ياخي، امك ماتت ما حضرتها ، أبوك قطعوا رجله ما وقفت فيهو، أختك عرسوها وولدت و طلقوها و انت بس تشوف في الصور !
شافعك البكر مات و دفنوا أهلك وجاي بعد سنة تبكي في قبرو، وللأسف غشوه لأنو زول أتذكر مكان قبرو مافي!!
ويحكي “الحكيم” أن أحدهم عاد من السفر ورأى طفلا شك فيه هل هذا ابني أم لا، ولربع ساعة يتبادلان الأنظار، فلما رجع البيت و عرفه بكى و ترك الاغتراب، خليك واعي وتعال اكسب باقي عمرك وعمر أحبابك، آخرها كوم تراب الفانية دي.
منع عمر رضي الله عنه حتى الجيش من أن يبعد المقاتل عن زوجته اكثر من ٦ أشهر .
لكن نعمل شنو للاتعود على قراصة العزابة في خميس مشيط، وقعدة الحريق يوم الجمعة من ١٠ صباحاً إلى ١٠مساءً مع شله الإنس !!
أبومهند العيسابي
الخرطوم (كوش نيوز)
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
السؤآل الأهم من ذلك من هو السبب في إغتراب الناس عن أولادهم ؟؟؟ يا شيخ خليك واضح وأسأل كل الأسئلة ولا تسأل سؤآلاً واحداً، وتحمل المشكلة لطرف واحد، والا ما قادر تقول الحقيقة؟؟؟ وفي هذه الحالة عليك بالسكوت !!!!!!!
شيخنا الجليل جزاك الله خيرا
اغترب عشان اوفر ليهم عيشه كريمه
وله اقعد جمبهم والواحد تجيه ملاريا وما اقدر اوفر ليه حق العلاج
شابكنا انت المغتربين المغتربين ! طيب يا شيخ رأيك شنو في النسوان الرجالهن قاعدين معاهم في البيت وبعد ده بفتشوا على الرجال الفي الشوارع والوافقات بالليل في شوارع العاصمة منتظرات الزبائن أصحاب السيارات الفارهة ؟؟؟ ولا ديل عميان منهم وفلاحتك بس في المغتربين يا رمة
شوف يابهايم عشان ماتكتروا الكلام اى واحد مغترب مرتو عايزاه طوالى يقدم استقالتوا ويغور في ستين داهية
بس رجاءا ماتعمموا الكلام
والله حياة الاغتراب جميلة وممتعة لاكهرباء بتقطع لاموية مافي لا اكل ملوث
easy life زى مابيقولو المغتربين
تانى العاوز يرجع يرجع حتى ولو موش متزوج
لابترحموا لا بتخلو ربنا يرحم
يا جماعة أنا مغترب وظاهرة الإغتراب أكبر من تناولها بهذا الابتسار والسطحية ومافي حد يشعر بالسعادة ويمشي يختار البعاد