محمد عبد الماجد

اتلخبطنا (العالمي) في المريخين منو مريخ الفاشر ولاّ مريخ ام درمان؟


[CENTER][B][SIZE=5] اتلخبطنا (العالمي) في المريخين منو مريخ الفاشر ولاّ مريخ ام درمان؟ [/SIZE][/B][/CENTER] [SIZE=5]

< ناس (سلك) تاني بكونوا الليلة رجعوا يختوا (حلة اللبن) في النار. < والحلة تاني ح تفور. < ولمن تفور ..اللبن بدفق. < سلاح الموسيقي الليلة ح يدور. < يا سلام على اكرم الهادي سليم ..يستحق ليه على الاقل كدا (ركشة). < بالميت كدا (موتر). < او لو عاوزين تقرضوها عليه ..ادوه (عجلة). < الزول دا اتعود على (السيارات) ما بلعب ليكم تاني ساكت. < يا سلام على (حسبو). < اسف ..اتذكرت..(حسبو) بيلعب في مريخ الفاشر...وليس في مريخ ام درمان. < قلت ليكم ..(الطبق) حقنا قاعد يلخبط لينا الحكاية. < امس في نفس التوقيت الذي كان يلعب فيه الاهلي شندي امام مريخ الفاشر كان كذلك يلعب الاهلي الخرطوم امام المريخ العاصمي. < اهلي في (التلفزيون القومي)...واهلي في (النيلين). < مريخ هنا ..ومريخ هناك ...كيف ما ألخبط؟. < والطبق واحد ..(احول) فيه زي مروحة التربيزة ..كل مرة اقبلو على اتجاه. < ناس مامون ابوشيبة الليلة ح ترجع ليهم روحهم المعنوية ..ح ترجع ليهم الثقة ..تاني ح يكلمونا عن عشم التأهل. < والمقصورة ..والطابق التاني. < بالمناسبة الناس ديل خلوا الكلام عن (الاستاد). < الناس البلبعوا في دور الـ (64)..ح ينسوا الموضوع اليوغندي (المستعجل) ..زي كأنو الفريق الذي خسر امام كمبالا سيتي هو فريق مريخ الفاشر...وليس مريخ ام درمان. < قلت ليكم (الطبق) ذاتو يلخبط. < انتوا ما شفتوا (فيصل العجب)..شوط لعبو في الخرطوم وشوط في شندي. < ما قلت ليكم الطبق واحد..والمريخ نفس المريخ ..والاهلي هنا وهناك. < الليلة دي مناسبة جميلة عشان ينكروا مباراة كمبالا سيتي ..ينسوها..يشيلوها من الذاكرة. < يدلتوها. < المسامح كريم يا جماعة. < والفات مات. < كمبالا سيتي بتاعت مين؟. < ح ينكروها حطب. < ولا بنعرفها. < ولا حصل قابلتنا. < خلاص المسامح كريم قلنا ليكم ..باركوها يا جماعة. < الكورة (مدورة). < مدورة علينا نحن بس. < الكورة البتلعب بيها برشلونة (مربعة). < الناس ديل ما بعملوا بالكورة اي حاجة. < وقت تبقى علينا نحن ...يقولوا لينا الكورة (مدورة). < في (فهم) حايم بالشكل دا. < في (غلاط) في حتة. < سامع لي انا (غلاط). < الفريق عادي ينضرب في ارضو ووسط جمهورو 0 / 2 ...ويقولوا ليك (عالمي). < وعادي جدا يمنطقوا ليك الحكاية ويقولوا ليك الكورة (مجنونة). < مجنونة عندكم براكم. < سمعتوا مرة ناس ريال مدريد ديل قالوا الكورة (مجنونة). < يا جماعة حكاية الكورة (مدورة)..والكورة (مجنونة) دي حاجات بقت ما بتقسم. < ما تقعدوا تغشوا في الناس ساكت. < مجنونة كيف يعني؟ < الكورة بين الشوطين قاعدة (تشد) شعرها. < بعدين الكورة ذاتها لو (جنت) ما خاطية. < عليكم الله البتعملوا فيه دا ما بجنن. < الجن بنداوي كعب البعمل فيه موسى الزومة. < موسى الزومة خم ليك لاعب بايرن ميونخ...لمن لاعب بايرن ميونخ المسكين (اتهجم). < الحاجات دي لاعب بايرن ميونخ كان بشوفها في حلبة المصارعة او افلام الاكشن. < لكن عاوز اقول ليكم (العالمي) المدهش ..الغريب ..العجيب ..البقطعها ...فاز على الاهلي الخرطوم (المسكين) دا 4 / صفر. < يلا يا مريخاب افتحوا صفحة جديدة. < المريخ امس قدم عرض مدهش ..حاجة ما بتصدق. < شيلميس ذاتو طلع نجم المباراة. < أها دا كلام يا جماعة. < شيلميس بقى (نجم). < يا حليل (سيدا). < الجائزة دي كان احق بيها (فيصل العجب) في شندي ..بدل ما تعطوها (شيلميس). < العجب احق بيها. < والطبق واحد...نحن ذاتو ما عارفين العجب لاعب وين ..هنا وإلا هناك. < الباشا دا زي الشفتوا في شندي ..جاب قون مريخ الفاشر. < الطبق يلخبط. < ما قادر يركز. < انتوا مشرف زكريا دا متين اتسجل في المريخ العاصمي. < يكون في مريخ الفاشر...ما عارف؟. < شيلميس شنو كمان ؟...عامل كدا زي (العدس) وقت يكون ما فيه ملح. < دا نجم مباراة دا. < إلا مباراة الاهلي شندي ومريخ الفاشر. < مية مرة اقول ليكم حصل لينا لخبطة في (الطبق). < مريخكم ما عندو اي فرق من مريخ الفاشر. < سيدا قاعد في بيتو ..وفيصل العجب في مريخ الفاشر. < جيبوا ليكم احرف زول في الدنيا. < احرف سمسار ..يقدر يفرق ليكم (المريخ) التمهيدي من مريخ الفاشر. < أهو كل مريخ. < لكن شيلميس دا نجم مباراة. < زول زي العدس ..(يعيدوا ليكم الكلام الف مرة). < عدس ومسيخ كمان. < تاني عدس. < ايوا تاني عدس. < عشان تاني ح تسمعوا نفس الكلام. < ح نرجع من اول وجديد ...للمريخ صاحب البطولات المحمولة جوا. < (7) حديّات ..وجوز قطا. < الليلة الاسطوانات ح ادور. < العالمي ينتصر على الاهلي الخرطوم باربعة اهداف نظيفة. < يا سلام. < يا للروعة. < يا للجمال. < الباشا هداف للممتاز ..الباشا سجل هدفين امس ليصبح رصيده من الاهداف في الممتاز (4) اهداف. < باسكال يقدم السهل الممتنع وينال (كرت اصفر) واحد. < غاندي يترافع عن نفسه ويرفع كور (جاهزة) امام مرمى الخصم من نوعية (هاك جيب قون). < المريخ يقدم عرض (هندي) امام الاهلي الخرطوم (زيتنا في بيتنا). < في ناس اقصى حاجة عندهم لتصليح الفول ..هو يزيدوا ليه (الزيت). < بتقلبوا وبفوتوا بي غادي لمن يعملوا للفول زيت زيادة. < ناس المريخ هسع (زادوا) الزيت. < طبعا الزول البقعد يتفاصح ليك في البيت ..واول ما يطلع الشارع الغنماية تاكل عشاه ..دا ما حبابو. < ناس المريخ اتفولحو على الاهلي الخرطوم فريق (التبادل) الاول للمريخ. < ايهاب زغبير لاعب الاهلي الخرطوم (معار) للمريخ. < مصعب عمر لاعب المريخ معار للاهلي. < عليكم الله هسع في داعي للخبطة دي. < دي النيل الحصاحيصا ما بعملها. < الاهلي الخرطوم طبعا اعظم انجاز ليه امام المريخ هو ان يصمد (30) دقيقة امام المريخ دون ان تستقبل شباكه هدف. < ناس الاهلي الخرطوم شبكونا ليك قبل اسبوع عاوزين نفتح الابواب للجماهير. < عاوزين نفتح المباراة للجماهير عشان تدخل مجاني. < هي وينها الجماهير؟. < اقنعوني ان فريق الاهلي الخرطوم عندو (جمهور). < فريق الاهلي الخرطوم جماهيره هم (اقطاب) النادي. < يعني ما في حاجة اسمها (جماهير) في تلك الاندية ..ديل (اقطاب) ساكت. < لذلك قالوا عاوزين يفتحوا الابواب للجماهير ..والصحيح هو ان يقولوا عاوزين يفتحوا الابواب للاقطاب. < نحن كنا ما فاهمين اي حاجة. < كنا ما ناقشين اي شيء. < الجماعة اتاريهم قاصدين حاجة تاني بـ (الفتح) دا. < قالوا ح يفتحوا الابوب للجماهير عشان تدخل المباراة مجاني ..قاموا فتحوا (الشباك) للباشا ورمضان عجب وراجي. < أهو كلو (فتح). < لكن الزول البفتح بي (تريس) ما زي الزول البفتح بي عشرة اسود. < ناس المريخ فتحوا بي عشرة اسود ..عشان كدا ما في طعم لفتوحهم دا. < لكن مع ذلك ...الليلة ح تشوفوا كسير تلج على اصولو. < شيلميس ح يطلعوا ليك الليلة نجم الموسم. < رغم قناعتي التامة ان شيلميس دا لو كان بيلعب في الهلال ...كان عملنا ليه (ترمسة اسكريم) يقعد بيها قدام جامعة النيلين. < عليكم الله كون شيلميس يطلع نجم المباراة ...دي ما فيها دلالة انو المريخ بقى قاعد ساكت. < هجوم المريخ الي الان ما سجل هدف. < الي الان تسجيل اهداف المريخ من لاعبي الوسط الباشا وباسيرو ورمضان عجب وراجي عبدالعاطي. < ما في (مهاجم) جاب ليه هدف. < حتى ضربات الجزاء بضيعوا فيها ناس باسكال واوا. < اها في (تواضع) اكتر من كدا. < تراوري لابس ومسرح ...وبشد في الشورت ..تقول ماشي ليه (حفلة). < الزول دا بي حالتو دي واضاعتو للكور ..كنا بنستحملو كيف؟. < الله مرقنا منو ساكت. < المريخ لو عاوز يتأهل...يخلي هجومو قبلو. < لأن (هجوم) المريخ خصما على المريخ. < امشوا اعتمدوا على الباشا ورمضان عجب وراجي عبدالعاطي افضل ليكم من عنكبة وتراوري. < عبدالرحمن كرنقو مع رمضان عجب كون ثنائية جميلة. < لا ..لا ..دا شنو البكتب فيه دا. < عبدالرحمن كرنقو بيلعب في مريخ الفاشر ..ما مريخ ام درمان. < أهو كلو عن العرب (مريخ). < قلت ليكم. < عدت ليكم. < عندنا مشكلة في الطبق ..وفي التشابه الكبير بين مريخ الفاشر ومريخ ام درمان. < انا عارف ناس مريخ الفاشر كلامي دا ما بعجبهم..كيف ألخبط بينهم وبين المريخ (التمهيدي). < هسع (العالمي) في ديل منو؟. < مريخ الفاشر وإلّا مريخ ام درمان؟. < غايتو حكاية (العالمي) دي ما عارفها ..لكن الحاجة المتأكد منها مريخ ام درمان بيلعب في (التمهيدي). < ملحوظة : التمهيدي حاجة زي الحنضل. هوامش < ناس المريخ اشتكوا في حارس فريق كمبالا سيتي. < شوفوا عدم الخجل. < بعد مستواكم دا كمان بتشتكوا. < قول كسبتوا الشكوى ...ح تمشوا وين بي مستواكم دا. < لو عندكم شكوى مفروض تقدموها في (عبدالصمد). < هلال الفاشر نخشى عليه من البداية غير المبشرة. < مبارك سيلمان استطاع ان يجعل النيل يفيض بعد انحساره. < مبارك سليمان اثبت انه مدرب كبير ...وهو يتقدم بفريق متواضع ولم يسجل جيدا ..وفقد معظم عناصر تشكيلته السابقة. < الاهلي شندي ايضا مستواه تراجع هذا العام ..ووضح ان الفريق لم يعوض فقد اسماعيل بابا ومالك اسحق وباسيرو. < المهاجم الغيني الذي يلعب في الاهلي شندي ..ما عندو حاجة غير (صبغة) الشعر. < يا حليل اسماعيل بابا. < احمد عادل ادرك التعادل للنمور في الزمن البدل الضائع. < فريق الاهلي الخرطوم اذا كان هذا هو مستواه فهو سيغادر الممتاز هذا الموسم. < كورة بدون روح. < مباراة الهلال والنسور اليوم نريد ان يعود بها الهلال اليوم ان شاءالله لصدارة الممتاز. < عاوزين الهلال يتصدر وينفرد وحيدا في الصدارة. < وهذا لن يكون ممكن ان لم ينتصر الهلال بخمسة اهداف. < مباراة الهلال والنسور يجب ان تنقل اليوم في التلفزيون القومي. < ما في زول بحول ليه (طبق) عشان قناة النيلين. < .... < عاجل : جمهور الهلال على موعد اليوم ان شاءالله مع وليد علاءالدين. [/SIZE] وإن طال السفر - محمد عبد الماجد صحيفة قوون



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *