نتيجة (1 / صفر) زي الباب الما عندو (قفل)

> انتوا مالكم عاوزين تصعبوا لينا الحكاية.

> اتنين في اتنين بي اربعة ..ما عاوزة ليها قومة نفس وآلة حاسبة.

> واحد زايد واحد …اتنين ..الموضوع ما عاوز ليه دبلوم محاسبة.

> الحكاية ما بتستاهل.

> النسور لا ميلان ..ولا اليوفى ولا الانتر.

> ولا حتى الاهلي المصري.

> ولا وادي دجلة.

> مالكم عاوزين تشككونا.

> مباراة الهلال والنسور امس ..زي حكاية الزول الاشترى ليه (جدادة).

> عمل قفص للجدادة.

> وحفر ليها (حفرة).

> وقعد حرس (الجدادة).

> ومنتظر (الجدادة) تبيض ليه (بيضة).

> عشان شنو؟.

> عشان يشيل (البيضة)..وينتظرها تتطلع (كتكوت).

> طبعا البيضة محتاجة لـ (21) يوم عشان يطلع منها (كتكوت).

> وبعد دا ينتظر (الكتكوت) يكبر.

> عشان يبيض.

> والبيضة تطلع كتكوت تاني.

> والكتكوت مع الكتكوت ..يعملوا (دواجن).

> والدواجن تصبح (مشروع).

> والمشروع يطلع قروش … يعمل بيها (عمارة).

> والعمارة تعمل ليه (عربية).

> يقعد في ضل العمارة ويشغل (استريو) العربية ..يفتح ابوابها الاربعة ..الحلة كلها تسمع.

> (ايمان بنت حسان) تسمع الاغاني ..تقول ليه الاغاني دي اسطوانة وإلّا ام بي ثري؟.

> يقول ليها (ام بي ثري).

> تقول ليه خلاص بجيب لي (فلاش) واشيل منك الاغنيات دي.

> صاحبنا جاب (الجدادة)…وعمل الدواجن ..وسوى العمارة وجاب ليه عربية ..انتظارا للحظة دي.

> دا كلو عشان ايمان بنت حسان تجي تقول ليه : الاغاني دي اسطوانة وإلّا ام بي ثري؟.

> هدفو في الحياة كلو ….هذا السؤال.

> شفتوا الموضوع دا طويل كيف؟…في ناس عندها (صبر) طويل كدا.

> شفتوا اللفة دي طويلة كيف؟.

> مشارعيهم كلها تبدأ من (فروجة).

> أمس نحن في مباراة الهلال والنسور ..عملنا لينا موضوع من هدف وحيد سجله مهند الطاهر.

> البرد كتلنا.

> طبعا البرد بجي من عدم الاحساس بالامان …ناس النسور ديل يمكن في اي لحظة يعادلو.

> خاصة بعد ما الحكم رفع الزمن البدل ضائع.

> كورة (طايشة) ساكت يمكن توقف قلبنا.

> اذا ضمنا دفاعنا ..ما بنضمن الحكام.

> يقوموا يقترحوا ليهم (ضربة جزاء) ..او يقطعوا ليهم (هدف) من رأسهم.

> الحكام ديل ما مضمونين.

> دفاع النسور امس ارتكب (ضربة جزاء) مع كوليبالي داخل الخط …الحكم (العبقري) دا ..قال المخالفة برة الخط.

> كان احسن ما تعدها.

> كان احسن تعمل منها نائم.

> بدل ما تطلعها لينا من منطقة الجزاء.

> الحكم المعز دا مفروض يمشي (الدهب)…المخالفة جوة الخط بطلعها برة.

> دا لو مشى (الدهب) بطلع جنس دهب.

> دا (ضربة الجزاء) طلعها لينا من خط (18)..ما يطلع (الدهب).

> نشفتوا ريقنا.

> وقفتوا حالنا.

> مالكم يا ناس الهلال عاوزين تخربوا لينا (تمهيدي) المريخ.

> نحن الايامات دي ما فاضين لي حركاتكم دي.

> نحن الايام دي متفرغين تماما لتمهيدي المريخ.

> عاوزين في الوقت دا تفتحوا لينا (تعادل) في الظروف دي.

> جني وجن الهدف الوحيد ..بعمل لينا حراق روح ..وتقرحات في المعدة ..واشمحطاط في المصران الاعور.

> لاعبين مع (النسور)..ولّا لاعبين مع ليفربول.

> شنو تجيبوا ليكم (قون) وتنوموا على كدا.

> نحن حركات المريخاب ديل ما بتنفع معانا ..ولا بنغشكم ..ولا بنكضب عليكم.

> انتوا بتلعبوا في (التمهيدي) عشان تعملوا حركاتكم دي.

> امس (النابي) خلانا نقول يا حليل صلاح محمد آدم.

> (حنك) بقى محفوظ.

> من الاسبوع التاني حفظناه.

> يدخل (بشة).

> يقوم في الشوط التاني يطلع (بشة) عشان يدخل بكري المدينة..نظام (الغيار) دا فيه حبة حرفنة.

> يقوم يطلع (كوليبالي)…يدخل صلاح الجزولي.

> المدرب البكون (تبديلاته) محفوظة …ما بنفع معانا.

> يمكن ان نتحدث عن ايجابيات مباراة الامس ..في اشياء جميلة نحفظها لمدرب الهلال الجديد.

> اول ايجابيات مباراة الامل ..هو ان الهلال امتلك الكورة طوال زمن المباراة.

> (لكن امتلك الكورة اطول مدة من غير اهداف يبقى مشكلة).

> ويمكن ان نقول ان امتلك الكورة لمدة طويلة امر جميل ..لكنه في نفس الوقت امر مخيف ان لم ينتج (اهداف).

> الهلال حاصر النسور في ملعبه هذه حقيقة ..ووصل لمرمى النسور كثيرا …وهدّف طوال الـ (90) دقيقة.

> لكن هذا الحصار وهذا التهديف المستمر لم ينتج غير هدف وحيد.

> يبقى على مدرب الهلال ان يبحث عن الخلل لماذا تضيع كل هذه الفرص من الهلال وتهدر.

> اذا كنا في (100) فرصة نسجل هدف واحد ..فاننا في (50) فرصة لن نسجل اي هدف.

> في المباريات الكبيرة قد تكون كل الفرص المتاحة فرصة واحدة او فرصتين.

> كيف نسجل عندها اذا كنا في (100) فرصة نسجل مرة واحدة.

> مطلوب من مدرب الهلال ان يعالج هذا الخلل قبل بداية التنافس الافريقي.

> لا نريد ان يحدث للهلال ما حدث للمريخ ..فمظهر الهلال الان وشكله غير مبشر.

> وخروجه من البطولة الافريقية يبقى (قريبا) اذا استمر الهلال بهذا الاداء.

> اذا كان الخلل في ارضية ملعب استاد الخرطوم ..نرجو ان يحول الهلال مبارياته الي شندي او الفاشر او كادوقلي.

> تلك المدن تمتلك ملاعب جيدة ..وهي افضل من ملعب استاد الخرطوم.

> المريخ تأثر كثيرا امام كمبالا سيتي من النجيل الصناعي الذي كان عامل رئيس من عوامل خسارة المريخ الي جانب عوامل اخرى.

> الهلال في مدنى وفي ارضية غير جيدة ولكن في نجيل طبيعي قدم مباراة جيدة.

> في استاد الخرطوم لعب الهلال امام النسور بمستوى اقل ما يمكن او يوصف به هو انه مستوى (ممل).

> لا نريد ان تصطدم جماهير الهلال بهذا المستوى وهى قد اتت من كل فج عميق من اجل مشاهدة الهلال والاستمتاع به.

> جماهير الهلال الان في مرحلة (ترغيب)..اي نكسة او فتور في الاداء او ضعف في النتيجة يمكن ان ينعكس ذلك سلبا على الجماهير.

> نحن نجزم ان عافية الرياضة وحلاوتها في (الجماهير) اذا انصرف الجمهور من الملاعب فان الداء سوف ينال من الاندية والمنتخب.

> مدرب الهلال عليه ان يعي ذلك ..عليه ان يبحث عن اسعاد جماهير الهلال وتحقيق احلامها.

> اذا انصرفت الجماهير ..فان (الخروج) سوف يكون مصيرنا في كل البطولات وعلى كافة المستويات.

> متعوهم بالاداء الجميل والعرض الممتع والاهداف الملعوبة.

> يحتاج الهلال في هذا الوقت لسلاح الجماهير …ومباريات الهلال امام اندية لا تجاري الهلال مثل (النسور) يجب ان يكون فيها الكثير من الاهداف.

> عرض الهلال امس امام النسور يمكن ان نقول انه كان اداء (منفرا) او هو عرضا (طارد).

> احترسوا ..ولموا الدور ..قبل فوات الاوان.

> استفيدوا من هزيمة المريخ ..كي لا تكرروها لنا …واعتبروا بما يحدث في المريخ.

> لا نريد ان تعيدوا لنا ما حدث في المريخ …في الهلال.

> امس كان النسور يمكن ان يعادل في اي لحظة من لحظات المباراة.

> واذا حدث التعادل فان ذلك سوف يكون عواقبه وخيمة.

> مدرب الهلال عليه ان يتيح الفرصة لاصحاب المهارات والحلول الفردية في هذا التوقيت.

> اين وليد علاءالدين الذي كان من افضل نجوم الهلال في مباريات قطر؟.

> اين وارغو الذي تنتظره جماهير الهلال بترقب؟.

> اين المدافع سيمبو؟.

> حتى مهند الطاهر الذي شارك في مباراة الامس اشركه مدرب الهلال (مجبرا) بعد طرد سيدي بيه.

> صلاح الجزولي يحتاج الي مشاركات مستمرة ..هو لاعب ينتج عند المشاركات المستمرة.

> لا يجدي ان يشارك في اخر (10) دقائق في توقيت حساس..وبعد استهجان الجماهير واعتراضاتهم.

> اين الشبل محمد عبدالرحمن الذي تألق في الموسم الماضي؟.

> مباراة الهلال القادمة في الممتاز امام خصم شرس.

> الهلال سوف يلعب خارج ارضه امام هلال كادوقلي في كادوقلي.

> اذا لعب الهلال بهذا المستوى فانه لن ينجح في العودة بالنقاط الثلاث للمباراة.

> انتبهوا ..اي (تعثر) في هذا التوقيت سوف يلقى بظلاله على موسم كامل.

> ملحوظة : يا حليل صلاح محمد آدم.

هوامش

> مجلس المريخ قال ان ابعاد هيثم مصطفى من بعثة المريخ التى غادرت الي يوغندا نتيجة للجيوب الانفية.

> جيبوب انفية عند عبدالصمد وإلّا هيثم.

> هيثم مصطفى دا في الهلال اصلو ما كان بتجيه (الجيوب الانفية).

> جبتوا ليه الجيوب الانفية يا ناس المريخ.

> تصريحات اكرم الهادي سليم دائما المريخ يدفع تمنها غاليا.

> يا اكرم ما تصرح.

> انت عملت ليك (سيارة).

> بقت ما فارقة معاك كتير.

> عشان كدا بقيت تلعب بي استهتار.

> انت بدون سيارة بتستهتر.

> تراوري رفض الجلوس في الكنبة بعد الخروج.

> في الهلال ما كان عندو اي مشكلة ..كان بقعد في (الكنبة) الموسم كلو.

> بشه امس طلع زعلان.

> يا بشه الزعل ما صاح منك …انت لاعب كبير.

> اتير توماس ..اكثر من جيد في دفاع الهلال.

> دفاع الهلال بصورة عامة ما فيه كلام.

> لكن مع هذا ..نتمنى ان يتيح المدرب الفرصة لسامي عبدالله ومالك.

> اتاحة الفرص للاخرين امر لا بد منه.

> الهلال يعاني من ازمة (تضيّع).

> وليد علاءالدين في كادوقلي لا بد منه.

> هلال كادوقلي من اقوى اندية الممتاز ..ظهر بمستوى اكثر من جيد في خلال هذا الموسم.

> هلال الفاشر ..يبحث عن نفسه.

> الرابطة رائعة.

> النيل الحصاحيصا ..قدمه بصورة ممتازة مبارك سليمان.

> استاد الخرطوم وضح انه العلة الاولى.

> استاد الخرطوم خطر اكثر من الخصوم.

> جماهير الهلال في شوق لوراغو.

> النابي مازال يواصل الاقصاء.

> الابعاد بهذه الصورة يكتل الطموح والرغبة.

> وارغو يريد ان يقدم نفسه بشكل جديد.

> يجب ان يمنح الفرصة.

> صلاح الجزولي يحتاج الي ان يبدأ.

> كاريكا امس لم يكن جيد.

> جمعة لم يتعرض لاختبار.

> عودة المعز محجوب مهمة للغاية.

> الهلال افريقيا يحتاج لخبرة المعز محجوب.

> والمعز يجب ان يعود ويجهز من خلال مباريات الممتاز.

> ….

> عاجل : فتحوا عينكم ..قبل فوات الاوان.