هل تعتقد ان الإسلام سيهزم من مجموعة بنات قرروا يعملوا قروب في فيسبوك ويشتموا الإسلام ؟

هل تعلم كم عاش الإسلام منذ بعثة النبي عليه افضل الصلاة و السلام ؟
١٤٥٤ سنة
مرّ فيها الإسلام بعصور قوة وازدهار و مرّ بعصور قمع واستعمار .. ومع ذلك بقي قوياً واستمر دخول الناس فيه أفواجا ..
في العشرة سنوات الماضية يعتقد ان ١٠٠ الف شخص في كل دولة من دول أوروبا دخلوا الإسلام .. احسب في كم دولة في أوروبا .. بعدد ٤٠٠٠ في السنة في ألمانيا ..
فهل تعتقد ان الإسلام سيهزم من مجموعة بنات قرروا يعملوا قروب في فيس بوك ويشتموا الإسلام ؟
لكن السؤال الأهم هل تعتقد ان انضمامك للقروبات دي ح تقدر انك تدافع عن الإسلام ؟
لا
ليه ؟
لانه هم ما داخلين عشان يقتنعوا أو يقنعوك أو يناقشوك وخد وهات ..
لكن ما ح أقول ليك اطلع من القروبات دي عشان اخاف عليك من الفتنة أو لانك ما عندك العلم الكافي ..
لا
تطلع رحمة بطاقتك الإيجابية وأعصابك و راحتك النفسية ..

ح تلقى روحك ضايع وسط ناس بيشتموا وبيصرخوا وبيضحكوا وبيستهزئوا وما سامعين صوتك ذاته ..
ح يضيع تعليقك وسط مئات التعليقات البذيئة و المتشنجة ..

الناس ديل بالذات البنات العربيات بالعموم و السودانيات بالخصوص .. أغلبيتهم عانوا من مشاكل اجتماعية كالختان و العنف المنزلي و تربية أسر جاهلة تعتمد العادات كدين .. أسر بتعتقد ان ضرب النساء و زواج الصغيرات و الختان من صميم الإسلام .. بنات قاموا في عهد الإنقاذ و النظام العام .. فكرهوا الإسلام .. لم يكن لديهم القدرة على التمييز بين الإسلام الحق و العادات ..
و للاسف فعلا مجتمعاتنا العربية و الإسلامية غيرت كتير في الدين و استبدلته بعادات قمعية و تقاليد سيئة عنيفة و لصقتها بالإسلام بل وصلوا إلى حد تأليف احاديث تفيد اغراضهم و تساعدهم في قمعهم للنساء و لبعضهم البعض و نسبوا هذه الأحاديث لسيدنا محمد ..
انا بعتبرهم ضحايا .. محتاجين علاج نفسي و محتاجين تكون عندهم الرغبة في معرفة الإسلام الحق ..
كمان في بعضهم نشأوا مع والدين كانوا هم الضحايا و ربوهم على كراهية الدين و هكذا دارت الحلقة ..
المهم .. قعادكم في القروبات دي ما بتفيد.. لا بتفيدك و لا بتفيد الإسلام .. أنت بس بتذيدهم عدد
لو عاوز تنصر الإسلام و تدافع عنه ..
اقرأ و افهم و تبحر ..
تحلى بالأخلاق السمحة عشان تكون خير ممثل للإسلام ..
أدعو إلى الدين بالحكمة و الموعظة الحسنة
و إذا عندك أسئلة محيراك في الدين و العقيدة ده شئ مشروع ..اسأل أهل العلم و ابحث عشان تلقي الإجابة
لكن في قروب في الفيس بوك ما أظن تلقى شئ ..
أتمنى من أصدقائي و متابعيني مغادرة القروبات الجدلية دي .. و ركزوا طاقتكم في المحبة و السعادة و الإيجابية
و انصروا الإسلام بتعلمه و الدعوة لديننا بان نكون خير مثال للمسلمين الحق

رمضان كريم
Shadia Omar