أيوه بغير

أيوه بغير…!!!

وممكن أغلط فى التعبير…

عن مفهوم الشوق واللهفة وعن إحساس جوايا مرير

وإنت بتعرف إنى بحبك…وإنو الريد جوايا مطير

وإنو الدافع كان الغيرة.. وإنو الوضع الحالى خطير

والمفروض تتوخى الحيطة.. وتحمي البينا من التفجير

تسايس نار الظن بالحكمة.. وحسن المعشر.. والتدبير

وما تتعمد تجرح ريدنا.. وتنكر كل الود والخير

وين الرحمة الكان بيناتنا؟.. وين المغفرة والتقدير؟

وين تصريحك لي بي حبك.. وإنو البينا نبيل وكبير؟

وإنك إتعلمت تسامح.. وتفهم إنو الشك شرير

وما تديهو مجال بيناتنا.. واقفل عنو خطوط السير

وخلي طريق إحساسك واحد.. وحدد لينا الصدق مصير

وكيف فكرت تبيع العشرة؟.. ولسة البينا وديع وصغير؟

ما بستحمل نار الفرقة.. وظلم الهوى.. وشماتة الغير

* وأيوه بغير…

وأنا بتهمك بالتقصير

وحقو تعيد تقدير الموقف.. ويرجع ظلمك لينا حسير

أنا قدمت فروض الطاعة.. ولسع إنت علينا أمير

ولسع حبك زاد لى بكرة.. وريدك فينا منارة ونيل

يغسل عننا ملح الوحدة.. وليو في الخاطر موج وهدير

وأيوة بغير

من إنسان ينعم بي قربك

وطول اليوم متحكر جنبك

وحايم بين شريانك وقلبك

وقاطع عننا خبرك ودربك

وخاف يا ظالم يوم من ربك

شاعل فينا مجامر حبك

ومادايرنا ثواني نغير؟؟!!

*وحقو بدل ما تلوم إحساسنا ولينا تدق كل يوم أجراسك

تفهم إنو أنحنا حبايبك.. ونحن قرايبك.. وأهلك.. وناسك

ومحتاجين نطمّن أكتر.. إننا لسع نور نبراسك

وانك لسع مغرم بينا.. ولسه لهيب الشوق أستاذك

وإنو العشرة يمين ما هانت.. وبينبض بالإخلاص إحساسك

وإنك فاهم كونها غيرة.. وتطرد بالغفران وسواسك

وأيوة بغير.. من جيرانك.. ومن حراسك

*تلويح:

الغيرة ملح الحب.. أو مقصلة إعدامه!!