عبد الله مسار يكتب : عكير الدامر شاعر الفروسية والحكم
عكير الدامر شاعر ملهم يمتاز شعره بالصدق والحكمة، وهو شاعر فارس فطر على الشعر وخاصةً شعر الحماسة والحكمة. ومن شعره
همك كان جبل لوك الصبر بهدو
مشوارك طويل كرِّب لجامك شدو
كفك للضعيف بالحسنة دائما مدو
والباب الحبيب الريح أخير لك سدو
اغتنم الشباب قبل الرويس ما يشيب
العاقل دوام لي نفسو يبقى طبيب
درب المهلة للحول إن صبرت قريب
خائنة الدينا مرات تشوف وجيهة
لامن تفتنك بي زخرفا وبي تيها
أحسن تنستر من البلاوي الفيها
دا البيرقي بقولوا دقينتو ما بغطيها
مطلوق اللسان اختاهو لا تباريهو
درب الحسكنيت شوف البلاوي الفيهو
خاوي الأعبش الحافظ الكتاب والملة
رافع راسو فوق ما برضى عيشة الذلة
وأبعد من طريق الما بقول بسم الله
والجار الفسل أحسن تسيبلو الحلة
عيش في الدنيا ضيف أعمل حساب يوم باكر
وأسجد للكريم ابقالو حامد وشاكر
استغفر كثير ما تنسى خليك فاكر
الموت بلحقك لو بحرسوك عساكر
أصلو الموت نهاية للبشر حتمية
لا واسطات بتشفع ليك ولا جوزية
ربنا في الكتاب ادانا حجة قوية
قال الموت بجيك لو في بروج مبنية
شايفك يا نفس في الفارغة يومي تجوطي
في الغي والضلال من بدري قاعدة تصوطي
باب التوبة مفتوح ليك قبل ما تموتي
وإن وقع القدر وريني وين بتفوتي
يارب العباد ضوي القبور العاتمة
واشفي صدورنا من شر الهموم الكاتمة
يا ربي الذنوب صبحت علي متراكمة
أغفر يا كريم وارزقنا حُسن الخاتمة
صحيفة الصيحة
