العيكورة: لكن حالكم يحنن يا باشمهندس
بقلم/ صبري محمد علي (العيكورة)
وللشيوعي اكثر من لسان واكثر من وجه واكثر من لون واكثر من مبدأ و بالامس الاول الشيوعي (دورهم كلهم) تحت مسمي (المكتب التفيذي) للحرية والتغيير ! ومن (حردت) اجتماع الثلاثية الاول كانت هى (قحت) الحاجة الكبيرة زااتا اما من اجتمعوا امسية الجمعة بمنزل السفير السعودي فهم (المكتب التنفيذي) اما من اجتمعوا بالامس السبت بدار حزب الامة فهم المكتب التنفيذي ل(قحت) واضافوا لها جملة(لجنة العلاقات الخارجية و الاتصال) شفتو (الفكة دي كيف) ؟
غايتو بالشايفو ده (على الطلاق) لو جيتوا فكة جنيهات عديييل ما اظن تلقوا حاجة !
رئيس حزب المؤتمر السوداني المهندس عمر الدقير قال وهو خارج من دار حزب الامة بالامس ان اجتماعهم مع ثلاثية (نجيب محفوظ) وبلسان (شيوعي فصيح)
قال ان لجنته اكدت انها لن تجلس مع من يشرعن للانقلاب !
اهااا يا المبروك الكلام ده و شبعنا فيهو قلتوا ليهم شنو وقالوا ليكم شنو؟ و ناقشتوا شنو يا (هندسة) ؟ يعني كووول الصنقيره دي كانت فى (لن نجلس مع من يشرعن للانقلاب) ؟
مافى حاجة جديده غير كده؟
طيب يا (بركة) انت فاكر العساكر البهناك ما فيهم مهندسين واللا شنو ؟ يا الفريق مهندس ابراهيم جابر ياسعادتو بالله كلمو !
طيب (نجيكم على رايكم) بنفس المنطق العساكر للثكنات (اوكي) قبلناها اهااا انتو (لشنو) ياعمك ؟ برأيي انسب مكان هو (الكوشة)
اااي ياخ بقصد كوشة التاريخ يعني مذبلة التاريخ ما كوشتنا بتاعت الجداد البنعرفها دي .
لا لا ياخ معاذ الله نحن ناس محترمين و بنفهم فى الاصول برضو .
ماااا الحكاية بحسبوها كده يا عب باسط بالعقل الناس ديل الجابهم منو عشان يتشرطوا على الشعب كده (قال ثكنات قال) .
طيب الانقلاب من الطبيعي او يفترض انه جاء على انقاض حكومة منتخبة اليس كذلك؟(طيب) ياحاج الدقير انتو الانتخبكم منو؟
مش ده انت زاااتك بتاع (المجد للمتاريس) ومش عارف المجد لمن اشعل اللساتك نارا واشتعل؟
بالله ياجماعة ده فهم واحد (عامل فيها) سياسي؟
لا ومرة كده قال ليهم ان الشعب فى مرحلة واللا ايه كده مش متذكر يمر بمرحلة (حمي النفاس الثوري) !
اللهم لا تبالينا ولا تشمت فينا .
قواعدكم الثورية يا هندسة و شفناها فى افطاراتكم الجماعية و وعدد ترامس الموية والكبابي ال (٨٣) كباية وحسبناها والقميص الاخضر الليموني الماخمج بنتذكرو كوييس ياهندسة
بس ياخ حقو تخجلوا شوية كده و ما تصدعونا بقواعدكم الوهمية واهزوجة الشارع لن يخون وكده ما الحكاية فى النهاية حساب !
فالناس بقت عارفا وزنكم الحقيقي فشنو؟ ما تكضبوا ساكت وتخموا الناس وانصحكم ما تتعبوا ساكت فأظن زمن السواقة بالخلا انتهي الى غير رجعة .
بالله ما بتخجلوا ؟ جاريين ليكم وراء راجل زيكم بالله لما تسمع العطبراوي يغني
(مرحبتين بلدنا حبابا)
حباب النيل حباب الغابة . ..
ياها بلدنا نحن اصحابا …
نهوي عديلا ونرضي صحابا
نتحزم بلدنا نشيلا
دون افكار علينا دخيلا
مرحبتين بلدنا حبابا
بالله يا باشمهندس ما بتخجلوا انت والمعاك !
ياخى وين الرجولة وين النخوة وين الوطنية جاريين ليكم وراء راجل ود (….) ! ليحل مشاكل بلدكم وعاملين فيها وطنيين وفاهمين .
ايها الناس …..
(برأي) ان دعم الجيش فى ما يخوضه من معارك سياسية فرضها عليه المجتمع الدولي وعملائه بالداخل لم تعد خافية على كل ذي بصيرة قد اصبح (فرض عين) الى حين قيام انتخابات يختار فيها الشعب من يحكمه .
دعم الجيش وهو يجابه هذه الهجمة الشرسة والممنهجة ظاهرها ابعاده عن الحياة السياسية و باطنها سلب الارادة الوطنية وتمكين العملاء وايتام السفارات من الحكم بلا انتخابات لتسهل مهمة التقسيم
و السيد الدقير (بلا خجلة) يقول ما معناه ياجماعة فولكر ده ما قال انا جاي استعمركم !
لا بالله احسن يقولا ليك .
عام مضي على طلب العميل حمدوك للوصايا الاممية على السودان واذا تضافرت الجهود و وعي الشعب ابعاد المخطط فسيمضي العام الثاني بذات (الصفر الكبير) ومما يطمئن ان مياها كثيرة قد جرت تحت قدمي (فولكر) تؤكد ان المخطط سيفشل باذن الله . التمديد فى اضعف حالاته بمجلس الامن . و لجنة الفريق الركن مهندس ابراهيم جابر ! المنسقة والمتابعة لانشطة الامم المتحدة تحصي انفاس الثلاثية وحركاتها .
بنفس بارد وتكتيك عسكري . و العسكري ان اصاب اصاب الهدف باقل الخسائر لذا سيحمل لنا الاعلام كل يوم (ان العسكر يدعمون الالية الثلاثية) والجملة هى بعضا من سلاح المرحلة !
( والله الما فاهم بعد ده تبقي دي مشكلتو)
و سيظل الهدف هو اما توافق تام لا يستثني احدا بحوار سوداني سوداني او انتخابات .
و (ناس الدقير) لن يعجبهم العجب ولا الصيام فى رجب و الجرسة حاصلة (ده حار …. ود ما بنكوي بيهو) !
ما نراه (بروتوكوليا) ان لا يسمح لهذه الثلاثية ان تتصدر المنصة الرئيسية للاجتماعات القادمة طالما ان مهمتها (تسهيل) التفاوض
فشنو ؟ (يختو) لهم طرابيز مطرفه بعييد زي بتاعين (الساوند سستم) فى الحفلات واى زول يختوا ليهو ورقة وقلم وكباية موية باااردة
وبى وراهم يقيفوا تلاتة من اولادنا العتاولة الصارين وشهم ولابسين النظارات السوداء وما معروفين زاتو تبع ياتو جهة .(انا غايتو بعرفهم)
والكلام بعد داك صدقوني غصب عنهم سيكون سوداني سودان .
قبل ما انس ي :—
يااااعمك خليك دايس (الابنص للصاجة) .. صدقني كل قرد خا يطلع شدرتو .
الاحد ١٢/ يونيو ٢٠٢٢م
صحيفة الانتباهة
