صبري محمد علي (العيكورة) يكتب: كأس العالم وخرفان منّاوي دراسة الأثر الاقتصادي

تداولت بعض المواقع الإخبارية (الأيام الفاتت) أن (ولدنا) القائد منّي أركو مناوي حاكم إقليم دارفور تبرع او سيتبرع (حقيقة مش عارف الحكاية دي تمت واللا لسه) يتبرع لدولة قطر الشقيقة بعدد (٣) الاف رأس من الخراف مساهمة منه في فعاليات كأس العالم التي ستنطلق شهر نوفمبر القادم بالدوحة

(أو حاجة بالشكل ده) .

(أوول حاجة) نشكر السيد الحاكم على هذا الشعور والمساهمة الكبيرة والحمد لله إنها جات باسم (ولدنا) مناوي ولم يعلن عنها باسم الشعب السوداني وإلا فكانت ستكون (كارثة العصر) حا تقول لى ليه يا أستاذ ؟

أقول ليك أنا …..

(آآآى) نعم القائد ما قصر و يشكر على مشاعره و كلامه الطيب تجاه دولة قطر .

لكن في معلومات لازم نوضحها وأنا نفسي أعرف المستشار (الفلتة ده) الذى أشار على السيد القائد بهذه الفكرة (الجهنمية) ولو أنه حسب متابعتى لولدنا مناوي (مااا) اظنه محتاج لمستشارين (كتار) فالزول ده الاحظ عليه كثيراً من الصفات (القذافية) سواء في طريقة لبسه او مفرداته و (السماء ذات البروج) إحدى تلك التجليات ده غير قصة الثعلب والنعامة واللالوب .

على كل حال …..

أقول (لولدنا) مناوي …

يا ابني ده كأس عالم يعني دى ما حولية (الشكينيبة) يعني بمعنى آخر الدولة المضيفة ليست مسؤولة عن إطعام زوار المهرجان بل بالعكس تماماً هي فرصة (بزينس) محسوبة بدقة ولذا كل الدول المقتدرة تتنافس على استضافة هذه الفعالية ذات الشروط والمعايير القاسية جداً .

فدولة قطر انفقت في سبيل احتضان هذه الفعالية اكثر من (٢٢٠) مليار دولار ! انفقتها على البنية التحتية من طرق وفنادق ومدن عائمة ووسائل النقل و نشأت عدد (٨) ملاعب مكيفة (إنتا فاهمني) ؟

ومتوقع ان يزور قطر اكثر من مليون ونصف زائر واذا أضفنا لهم القطريين والمقيمين

(فبالميييت كده)

الحكاية دى بتعمل ليها ثلاثة مليون تقريباً وهناك احتمال من ان تستفيد السعودية والامارات أيضاً من هذه (البهيلة) حا تقول لى كيفن ؟ لانه يا صاحبي (قطر) بلد صغيرة وقد يكون السماح للزوار بالاقامة خارجها هو احد الحلول مع توفير خدمة المواصلات المجانية يعني بالعربي كده الفنادق والمطاعم والميادين (حا تكون فُل) .

(طيب) يا ولدنا خرفانك دى يودوها وين ؟ إذا كان البلد ما شايلة الضيوف !

واللا أقول ليك …!

نفترض (تب) القطريين استلموهن وضبحوهن يكفن منو ويخلن منو؟

(أأأي نعم) ممكن نطلع (منهِن) بتلاتة الف رأس (نيفة) وستة الف وجبة كوارع وقول (الكومنية والكِبد) عملت لينا عشرة الف وجبة وباقى الخرفان ضلع مع الرز (قووول تب) عملن معانا عشرين الف وجبة يعنى (التوتل) (حا) يكون تسعة وثلاثين الف وجبة ياخى قول (٥٠) الف وجبة (اها) باقى الضيوف ياكلو شنو يا منّاوي ؟

يا جماعة ……

شفتو زى الشبحة دى دون الرجوع للحكومة المركزية هي واحدة من (خوازيق) اتفاقية (جوبا) التي تخول لدارفور استجلاب الاستثمارات وبالتالي بناء العلاقات الخاصة (دايركت) مع الدول الاخرى دون الرجوع للخرطوم و(أهوو) شايفين (برااكم) نوعاً من أنواع تلك العلاقات الخرافية و (الخرفانية) !

ياجماعة قبل ما تكون الشغلانة (قسيم مرارة) أهلوا الناس ديل فهموهم ، أدوهم كورسات في علم المراسم والاستقبال وفن الهدايا يا جماعة ما معقول لكن توصلونا لنوع الفهم ده .

ياخ أقوليكم حاجة …؟

هل تعلموا ان كأس العالم القادم في ٢٠٢٦ م ستستضيفه ثلاث دول هي كندا وأمريكا والمكسيك ! يعني الشغلانة إمكانيات واستثمار وناس جاهزة موية و زيت ما (خرفان) يا جماعة !

قبل ما أنسى : ــــ

ولكن ….

تظل تكلفة كأس العالم هذا العام هي الأعلى في تاريخه إذ بلغت (٢٢٠) مليار دولار وبعد هدية حاكم إقليم دارفور ستصبح (خسارة) قطر (٢٢٠) مليار دولار زائداً ثلاثة الف خروف !

صحيفة الانتباهة